Dipotšišo tše Tšwago go Babadi

Re ka ithuta’ng thibelong e hwetšwago go Ekisodo 23:19 ya gore: “Putšane O se kê wa e apea le mafsi a mm’ayô”?

Taelo ye ya Molao wa Moše, yeo e tšwelelago gararo ka Beibeleng, e ka re thuša go kwešiša pono ya Jehofa mabapi le se se swanetšego, kwelobohloko ya gagwe le botho bja gagwe. Le gona e bontšha gore o hloile borapedi bja maaka.—Ekisodo 34:26; Doiteronomio 14:21.

Go apea putšane goba phoofolo e nngwe le mafsi a mmago yona go be go ka se dumelelane le tsela ya tlhago yeo Jehofa a rulagantšego dilo ka yona. Modimo o dirile gore mafsi a pudi a fepe putšane le go e thuša gore e gole. Go apea putšane le mafsi a mmago yona, go ya ka mantšu a seithuti se sengwe, go be go tla bontšha “go se hlomphe tswalano yeo Modimo a e theilego le go e kgethagatša magareng ga motswadi le ngwana.”

Go oketša moo, ba bangwe ba nagana gore go apea putšane le mafsi a mmago yona e ka ba e be e le tirelo ya boheitene yeo e bego e direlwa go neša pula. Ge e ba go be go le bjalo, thibelo ye e ka ba e ile ya šoma e le tšhireletšo go Baisiraele gore ba se dire tiro ye ya bodumedi e sa kwagalego le e sehlogo ya ditšhaba tšeo di ba dikologilego. Molao wa Moše o be o thibela Baisiraele ka go lebanya gore ba se sepele ditseleng tša ditšhaba tšeo.—Lefitiko 20:23.

Mafelelong, mo molaong wo re bona kwelobohloko ya Jehofa e lerato. Ge e le gabotse, Molao o be o e-na le ditaelo tše mmalwa tše di swanago tšeo di bego di thibela go swara diphoofolo ka tsela e šoro le tšeo di šireletšago batho gore ba se dire dilo ka go fapana le tsela ya tlhago yeo di rulagantšwego ka yona. Ka mohlala, Molao o be o akaretša ditaelo tšeo di bego di thibela gore go se dirwe sehlabelo ka phoofolo ntle le ge e ba e e-na le bonyenyane matšatši a šupago e tswetšwe, go se bolawe phoofolo le ngwana wa yona ka letšatši le tee le gore ka sehlageng go se tšewe nonyana le mae a yona goba mafotwana.—Lefitiko 22:27, 28; Doiteronomio 22:6, 7.

Go molaleng gore Molao e be e se feela ditaelo le dithibelo tše di sa kwešišegego. Gare ga dilo tše dingwe, melao ya wona ya motheo e re nea kwešišo e phagamego ya boitshwaro yeo e tlogago e bonagatša dika tša Jehofa tše di kgahlišago.—Psalme 19:7-11.

[Mothopo wa Seswantšho go letlakala 31]

©Timothy O’Keefe/Index Stock Photography