Go Kwešiša Beibele go ka go Thabiša

BEIBELE e hupere therešo ya bohlokwa e tšwago go Modimo. E re botša ka morero wa bophelo, le ka seo se bakilego mathata a batho le ka bokamoso bja bona. E re bontšha kamoo re ka hwetšago lethabo, kamoo re ka thomago segwera le kamoo re ka rarollago mathata ka gona. Go feta moo, e re ruta ka Mmopi wa rena le Tatago rena wa legodimong, Jehofa. Tsebo e bjalo e dira gore re thabe e bile e re nea morero wa bophelo.

Beibele e swantšha go monya tsebo ka Modimo le go ja dijo. Jesu o itše: “Motho a ka se phele ka senkgwa feela, eupša o tla phela ka polelo e nngwe le e nngwe e tšwago molomong wa Jehofa.” (Mateo 4:4; Baheberu 5:12-14) Bjalo ka ge go ja dijo tša phepo ka mehla go re thuša gore re phele gabotse, le go bala Lentšu la Modimo ka mehla go bohlokwa ka ge go re thuša gore re holwe ke kholofetšo ya Modimo ya bophelo bjo bo sa felego.

Re thabela go ja ka baka la tsela yeo re bopilwego ka yona le ka baka la gore go ja go a re khoriša. Lega go le bjalo, go na le senyakwa se sengwe sa motheo seo re swanetšego go se kgotsofatša ge e ba re nyaka go thaba. Jesu o itše: “Go thaba bao ba lemogago go nyaka ga bona dilo tša moya.” (Mateo 5:3) Go a kgonega go hwetša lethabo ka baka la gore go nyaka dilo tša moya go ka kgotsofatšwa ke kwešišo ya Lentšu la Modimo.

Ke therešo gore ba bangwe ba hwetša go le thata go kwešiša Beibele. Ka mohlala, o ka nyaka thušo ka mangwalo ao a bolelago ka metlwae yeo o sa e tsebego goba ao a dirišago polelo ya go swantšhetša. Le gona, go na le diporofeto tšeo di dirišago diswantšho gomme re ka di kwešiša ge re bala mangwalo a  mangwe a Beibele ao a bolelago ka taba yeo e sepedišanago le tšona. (Daniele 7:1-7; Kutollo 13:1, 2) Lega go le bjalo, ruri o ka kwešiša Beibele. O tla kgodišwa ke’ng?

Lethabo Leo Bohle ba ka Bago le Lona

Beibele ke Lentšu la Modimo. Ka go yona Modimo o re hlalosetša morero wa gagwe. Na Modimo a ka re nea puku yeo e lego thata go kwešišega goba yeo e ka kwešišwago ke batho ba rutegilego feela? Aowa, Jehofa o a re naganela. Kriste Jesu o itše: “Ke tate ofe mo gare ga lena yo e ka rego ge morwa wa gagwe a kgopela hlapi, yena a mo nea noga go e na le hlapi? Goba ge e ba a bile a kgopela lee, a ka mo neago phepheng? Ka gona, ge e ba lena gaešita le ge le le ba kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!” (Luka 11:11-13) Ka gona, o ka kgodišega gore o ka kgona go kwešiša Beibele le gore ge o kgopela Modimo go tšwa pelong o tla go nea thušo e nyakegago gore o kwešiše Lentšu la gagwe. Ge e le gabotse, dithuto tša motheo tša Beibele di ka kwešišwa le go thabelwa le ke bana!—2 Timotheo 3:15.

Le ge go kwešiša Beibele go nyaka boiteko, go dira bjalo go tla re matlafatša le go re kgothatša. Ka morago ga ge a tsošitšwe, Jesu o ile a bonala go baapostola ba gagwe ba babedi gomme a bolela le bona ka boporofeta bja Beibele. Pego ya Luka e re: “A thoma ka Moše le Baporofeta ka moka, a ba hlathollela dilo tše di lego mabapi le yena ka Mangwalong ka moka.” Mafelelo e bile afe? Bošegong bjoo ge ba be ba naganišiša ka seo ba se rutilwego, baapostola ba botšana ba re: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?” (Luka 24:13-32) Go kwešiša Lentšu la Modimo go ba thabišitše ka baka la gore go matlafaditše tumelo ya bona dikholofetšong tša Modimo le go ba nea pono e kgahlišago ka bokamoso.

Go e na le gore go kwešiša Lentšu la Modimo e be morwalo, go a thabiša e bile go a hola, go thabiša go swana le go ja dijo tša phepo. O swanetše go dira’ng gore o kwešiše Beibele? Sehlogo se se latelago se tla bontšha kamoo o ka thabišwago ke go “fihlêla xo tseba Modimo.”—Diema 2:1-5.

[Seswantšho go letlakala 4]

Bjalo ka tate yo lerato, Jehofa o re nea moya o mokgethwa go re thuša go kwešiša Beibele