Anke Diatla Tša Lena di Tie Matla
Anke Diatla Tša Lena di Tie Matla
“A diatla tša lena di tiê matla, lena ba Le kwaxo mehleng yeno ditaba di bolêlwa ke baporofeta.”—SAKARIA 8:9.
1, 2. Ke ka baka la’ng re swanetše go ela hloko dipuku tša Hagai le Sakaria?
DIPOROFETO tša Hagai le Sakaria di ngwadilwe nywaga e ka bago 2 500 e fetilego, lega go le bjalo di tloga di le bohlokwa kudu bophelong bja gago. Dipego tša Beibele tšeo di hwetšwago dipukung tše tše pedi ga se histori feela. Ke karolo ya “dilo tšohle tšeo di ilego tša ngwalwa e sa le pele di . . . ngwalelwa go re ruta.” (Baroma 15:4) Dilo tše dintši tšeo re di balago dipukung tše di dira gore re nagane ka maemo a kgonthe ao a bego a dutše a tšwelela ga e sa le go tloga ge Mmušo o be o thewa legodimong ka 1914.
2 Ge moapostola Paulo a be a šupa go ditiragalo le maemo ao batho ba Modimo ba bogologolo ba ilego ba lebeletšana le ona, o ile a bolela gore: “Bjale dilo tše di ile tša tšwela pele di ba wela e le mehlala, gomme di ngwaletšwe go ba temošo go rena bao re fihletšwego ke bofelo bja ditshepedišo tša dilo.” (1 Bakorinthe 10:11) Ka gona o ka ipotšiša gore, ‘Dipuku tša Hagai le Sakaria di na le mohola ofe mo mehleng ya rena?’
3. Hagai le Sakaria ba lebiša tlhokomelo go eng?
3 Go etša ge sehlogo se se fetilego se bontšhitše, diporofeto tša Hagai le Sakaria di akareditše nako ya ge Bajuda ba be ba boela nageng ya gabo bona yeo ba e neilwego ke Modimo ka morago ga go lokollwa bothopša Babilona. Baporofeta ba ba babedi ba ile ba lebiša tlhokomelo tabeng ya go aga tempele lefsa. Bajuda ba ile ba thea motheo wa tempele ka 536 B.C.E. Gaešita le ge Bajuda ba bangwe bao ba tšofetšego ba ile ba lebiša tlhokomelo dilong tše di fetilego, ka kakaretšo go be go ‘kwatšwa mekgolokwane.’ Lega go le bjalo, ge e le gabotse selo se itšego sa bohlokwa kudu se diragetše mo mehleng ya rena. Bjang?—Esera 3:3-13.
4. Go ile gwa direga eng gatee-tee ka morago ga Ntwa ya I ya Lefase?
4 Gatee-tee ka morago ga Ntwa ya I ya Lefase, batlotšwa ba Jehofa ba ile ba lokollwa bothopša Babilona o Mogolo. Seo se ile sa swantšhetša pontšho e kgolo ya thekgo ya Jehofa. Mathomong go be go bonagala eka baetapele ba bodumedi le badirišani ba bona ba tša dipolitiki ba fedišitše modiro wa go bolela phatlalatša le wa go ruta wa Barutwana ba Beibele. (Esera 4:8, 13, 21-24) Lega go le bjalo, Jehofa Modimo o ile a tloša mapheko modirong wa go bolela le wa go dira barutiwa. Nywaga-someng e fetilego ga e sa le go tloga ka 1919, modiro wa Mmušo o ile wa gola gomme ga go seo se ilego sa kgona go thibela tšwelopele ya wona.
5, 6. Sakaria 4:7 e šupa go modiro ofe o mogolo?
5 Re ka kgonthišega gore Jehofa o tla tšwela pele a thekga modiro wa go dira boboledi le wa go ruta wo o dirwago ke bahlanka ba gagwe bao ba kwago. Go Sakaria 4:7 re bala gore: “Xo tlo bá xwa bewa lefsika la sehlwa, xwa xoeletšwa xwa thwe: A le atlêxê! A le atlêxê!” Se se šupa go modiro ofe o mogolo mo mehleng ya rena?
6 Sakaria 4:7 e šupa nakong yeo borapedi bja therešo bja Morena wa Legohle bo tlago go ba boemong bjo bo phethagetšego malapeng a lefaseng a tempele ya gagwe ya moya. Tempele yeo ke tokišetšo ya Jehofa ya go mmatamela ka go mo rapela motheong wa sehlabelo sa poelanyo sa Kriste Jesu. Ke therešo gore tempele e kgolo ya moya e be e dutše e le gona ga e sa le go tloga lekgolong la pele la nywaga C.E. Lega go le bjalo, borapedi bja therešo bjo bo lego lapeng la bjona la lefaseng bo sa dutše bo tla tlišwa boemong bjo bo phethagetšego. Barapedi ba dimilione lehono ba hlankela lapeng la lefaseng la tempele ya moya. Ba gotee le ba bangwe ba bantši bao ba tsošitšwego ba tla tlišwa boemong bjo bo phethagetšego nakong ya Pušo ya Jesu Kriste ya Nywaga e Sekete. Mafelelong a nywaga e sekete, ke feela barapedi ba Modimo ba therešo bao ba tlago go tlogelwa ba phela lefaseng leo le hlwekišitšwego.
7. Jesu o kgatha tema efe go tlišeng borapedi bja therešo boemong bja bjona bjo bo phethagetšego mehleng ya rena, gomme ke ka baka la’ng re swanetše go kgothatšwa ke seo?
7 Mmušiši Serubabele le Moperisita yo Mogolo Jošua ba be ba le gona go bona ge tempele e be e fetšwa ka 515 B.C.E. Sakaria 6:12, 13 e boletše e sa le pele ka tema e kgathwago ke Jesu e swanago le ya bona go tlišeng borapedi bja therešo boemong bja bjona bjo bo phethagetšego ka gore: “Morêna wa mašaba ó re: Šó monna yo leina la xaxwe e lexo Lehloxedi, ka xobane mo a lexo xôna xo tlo hloxa, ’me ó tlo axa Ntlo-kxêthwa ya Morêna. . . . Ké yêna a tl’o xo tšweletša letaxô à dutše sedulong sa xaxwe à buša; e tlo ba yêna moperisita à le sedulong sa xaxwe.” Ka ge Jesu yo a lego legodimong a dira gore lelokelelo la dikgoši go tloga ka Dafida le gole e bile a thekga modiro wa Mmušo tempeleng ya moya, na o nagana gore go na le yo a ka šitišago gore o tšwele pele? Le gatee-tee! Na se ga se sa swanela go re kgothaletša go tšwela pele bodireding bja rena, re sa arošwe ke dipelaelo tša letšatši le letšatši?
Dilo Tšeo di Tlago Pele Bophelong
8. Ke ka baka la’ng re swanetše go etiša modiro wa tempeleng ya moya pele maphelong a rena?
8 E le gore Jehofa a re thekge le go re šegofatša, modiro wa tempeleng ya moya o swanetše go tla pele maphelong a rena. Ka go se swane le Bajuda bao ba ilego ba re, ‘Lebaka ga le ešo la fihla,’ re swanetše go gopola gore re phela “mehleng ya bofelo.” (Hagai 1:2; 2 Timotheo 3:1) Jesu o ile a bolela e sa le pele gore balatedi ba gagwe bao ba botegago ba be ba tla bolela ditaba tše dibotse tša Mmušo le go dira barutiwa. Re swanetše go ba šedi gore re se ke ra hlokomologa tokelo ya rena ya tirelo. Modiro wa go bolela le wa go ruta wo o ilego wa emišwa ka lebakanyana ke kganetšo ya lefase o ile wa tšwetšwa pele ka 1919, eupša ga se wa tšwa o phethwa. Lega go le bjalo, ga go na pelaelo gore o tla phethwa!
9, 10. Tšhegofatšo ya Jehofa e ithekgile ka eng, e lego seo se bolelago eng go rena?
9 Go fihla bokgoleng bjoo re tšwelago pele go šoma ka mafolofolo, re tla šegofatšwa—re le sehlopha e bile re le motho ka o tee ka o tee. Ela hloko kholofetšo ya Jehofa yeo e ka neago kgonthišetšo. Gatee-tee ge Bajuda ba boetše borapeding bja moya ka moka gomme ba tšwetša pele ka phišego modiro wa bona wa go thea tempele, Jehofa o itše: “Lehono ke thôma xo Le šexofatša.” (Hagai 2:19) Ba be ba tla thabela go amogelwa ke yena gape ka mo go tletšego. Bjale ela hloko ditšhegofatšo tšeo di hwetšwago kholofetšong ya Modimo e rego: “Xo tlo ba le peu ya moláô; morara o tlo bea dikenyô; naxa e tlo nthša menônô; lexodimo le tlo neša phoka ya lôna. Tšeo ka moka ke tlo di nea mašalêla a sethšaba sé, ya ba tša bôná.”—Sakaria 8:9-13.
10 Go etša ge Jehofa a ile a šegofatša Bajuda bao moyeng le nameng, le rena o tla re šegofatša ge re dira modiro wo a re abetšego wona ka mafolofolo le ka pelo e thabilego. Ditšhegofatšo tše di akaretša khutšo gare ga rena, polokego, katlego le kgolo ya moya. Lega go le bjalo, o ka kgonthišega gore tšhegofatšo ya Modimo yeo e tšwelago pele e ithekgile ka go dira ga rena modiro tempeleng ya moya ka tsela yeo Jehofa a nyakago gore o dirwe.
11. Re ka itlhahloba bjang?
11 Bjale ke nako ya gore re ‘hlokomele ditsela tša rena.’ (Hagai 1:5, 7) Re swanetše go ipha nako ya gore re hlahlobišiše dilo tšeo di tlago pele maphelong a rena. Tšhegofatšo ya Jehofa yeo a re šegofatšago ka yona lehono e ithekgile ka tsela yeo re godišago leina la gagwe le go tšwela pele ka modiro wa rena tempeleng ya gagwe ya moya. O ka ipotšiša gore: ‘Na dilo tše ke di etišago pele bophelong di fetogile? Phišego ya-ka ya go fišegela Jehofa, therešo ya gagwe le modiro wa gagwe e bjang ge e bapišwa le phišego yeo ke bego ke e-na le yona ge ke be ke kolobetšwa? Na go kgahlegela bophelo bja manobonobo go kgoma tlhokomelo yeo ke e neago Jehofa le Mmušo wa gagwe? Na go boifa batho—go tshwenyega ka seo ba bangwe ba tla se naganago—go nkgogela morago ka tsela e itšego?’—Kutollo 2:2-4.
12. Ke boemo bofe bja Bajuda bjoo go bolelwago ka bjona go Hagai 1:6, 9?
12 Ga re nyake gore Modimo a re time tšhegofatšo ya gagwe e humilego e le ka baka la go hlokomologa ga rena modiro wa go godiša leina la gagwe. Gopola gore ka morago ga go thoma modiro gabotse, Hagai 1:9 e bega gore ‘yo mongwe le yo mongwe wa Bajuda bao ba tsošološitšwego o be a kganyelela ntlong ya gagwe.’ Ba ile ba swarega ka dinyakwa tša bona tša letšatši le letšatši le bophelo bja gona. Ka baka leo, go be go ‘bunwa di se kae,’ go hlaela dijo tše di nago le phepo, dino le diaparo tše borutho. (Hagai 1:6) Jehofa o ile a tloša tšhegofatšo ya gagwe. Na go na le se re ka ithutago sona go tšwa go se?
13, 14. Re ka diriša bjang thuto yeo re e hweditšego go Hagai 1:6, 9, gomme ke ka baka la’ng se e le sa bohlokwa?
13 Na ga o dumele gore e le gore re tšwele pele re thabela ditšhegofatšo tša Modimo, re swanetše go lwantšha go inyakela dilo mola re hlokomologa borapedi bja Jehofa? Seo se bjalo go sa šetšwe gore modiro goba dilo tšeo re di kgahlegelago tšeo di arošago tlhokomelo ya rena ke mahumo, maano a go huma kapejana, maano a go ikemišetša go ba le thuto e phagamego e le gore re be le mošomo o kgahlišago mo tšhepedišong ye goba ke ditsela tša go ikgotsofatša.
14 Dilo tše bjalo e ka no ba e se dibe ka botšona. Lega go le bjalo, na ga o bone gore go ya le ka pono ya bophelo bjo bo sa felego, yeo ge e le gabotse ke ‘mediro e hwilego’? (Baheberu 9:14) Ka kgopolo efe? E hwile moyeng, ke ya lefeela le e se nago mohola. Ge motho a e phegelela, mediro e bjalo e ka mmolaya moyeng. Se se ile sa diragalela Bakriste ba bangwe ba tloditšwego mehleng ya baapostola. (Bafilipi 3:17-19) Se diragaletše ba bangwe mo mehleng ya rena. O ka ba o tseba ka ba bangwe bao ba ilego ba aroga ganyenyane-ganyenyane medirong ya Bokriste le ka phuthegong; gona bjale ga ba bontšhe tshekamelo le ge e le efe ya go boela tirelong ya Jehofa. Re tloga re holofela gore batho ba bjalo ba tla boela go Jehofa, eupša ntlha ke gore go phegelela ‘mediro e hwilego’ go ka feleletša ka gore re se ke ra amogelwa ke Jehofa le go se hwetše tšhegofatšo ya gagwe. O ka bona gore bjoo e tla ba boemo bjo bo nyamišago gakaakang. Se se tla bolela go lahlegelwa ke lethabo le khutšo tšeo di tšweletšwago ke moya wa Modimo. Le gona nagana gore e tla ba tahlegelo e kaakang go se be karolo ya borwarre bjo borutho bja Bokriste!—Bagalatia 1:6; 5:7, 13, 22-24.
15. Hagai 2:14 e bontšha bjang go ba bohlokwa ga borapedi bja rena?
15 Ye ke taba e bohlokwa kudu. Ela hloko go tšwa go Hagai 2:14 kamoo Jehofa a ilego a lebelela Bajuda bao ba ilego ba hlokomologa ngwako wa gagwe wa borapedi e le gore ba kgabiše nywako ya bona ka noši, e ka ba e le ka tsela ya kgonthe goba ya seswantšhetšo. “Le xo sethšaba sé xo dutše byalo, le xo batho bá, xe ke ba bôna.—Ó r’yalo Morêna.—Xo dutše byalo medirong ka moka ya matsôxô a bôná, le tše ba di tlišaxo fá, di thšilafetše.” Dihlabelo le ge e le dife tša go ithola kgwara tšeo Bajuda bao ba sa ineelago ka pelo ka moka ba bego ba di neela aletareng ya lebakanyana kua Jerusalema di be di sa amogelege ge feela ba be ba hlokomologa borapedi bja therešo.—Esera 3:3.
Thekgo e Kgonthišeditšwego
16. Go ithekgilwe ka dipono tšeo Sakaria a di bonego, Bajuda ba be ba ka kgonthišega ka eng?
16 Bajuda bao ba kwago bao ba ilego ba šoma go ageng lefsa tempele ya Modimo ba ile ba kgonthišetšwa ka thekgo ya Modimo, go etša ge Modimo a ile a bontšha ka tatelano ya dipono tše seswai tšeo Sakaria a di amogetšego. Ya pele e ile ya kgonthišetša gore tempele e tla fetšwa le gore Jerusalema le Juda di tla atlega ge feela Bajuda ka go kwa ba be ba phetha modiro woo ba o neilwego. (Sakaria 1:8-17) Pono ya bobedi e holofeditše gore mebušo ka moka yeo e bego e ganetša borapedi bja therešo e tla fedišwa. (Sakaria 2:1-4) Dipono tše dingwe di ile tša kgonthišetša gore Modimo o tla ba šireletša ge ba dutše ba aga tempele, batho ba ditšhaba tše dintši ba tla kgeregela ngwakong wa Jehofa o feditšwego wa borapedi, go tla ba le khutšo ya kgonthe le polokego, go tla tlošwa tšeo go bonagalago eka ke mapheko a magolo a go emiša modiro wa Modimo, go tla tlošwa bokgopo gomme barongwa ba tla ba okamela le go ba šireletša. (Sak 2:5, 11, NW; 3:10; 4:7; 5:6-11; 6:1-8) O ka kwešiša lebaka leo ka lona ka kgonthišetšo e bjalo ya thekgo ya Modimo, batho bao ba kwago ba ilego ba fetoša tsela ya bona ya go phela gomme ba lebiša tlhokomelo modirong woo Modimo a bego a ba lokolletše go o dira.
17. Ka baka la kgonthišetšo yeo re nago le yona, ke’ng seo re swanetšego go ipotšiša sona?
17 Ka mo go swanago, kgonthišetšo yeo re nago le yona ya gore borapedi bja therešo bo tla fenya e swanetše go re tutueletša go dira bodiredi gomme e re tutueletše go naganišiša ka ngwako wa Jehofa wa borapedi. Ipotšiše gore: ‘Ge e ba ke dumela gore ga bjale ke nako ya go dira modiro wa go bolela ditaba tše dibotse tša Mmušo le go dira barutiwa, na dipakane tša-ka le mokgwa wa-ka wa bophelo di dumelelana le kgodišego ya-ka? Na ke fetša nako e lekanego ke ithuta Lentšu la Modimo la boporofeta, ke naganišiša ka lona le go boledišana ka lona le Bakriste-gotee le nna le ba bangwe bao ke kopanago le bona?’
18. Go ya ka Sakaria kgaolo 14, ke eng seo se letšego ka pele?
18 Sakaria o ile a bolela ka go fedišwa ga Babilona o Mogolo mo go latelwago ke ntwa ya Haramagedone. Re bala gore: “E tlo ba ’tšatši le tee la xo tsebya ke Morêna, le se naxo mosexare le bošexo. Seetša se tlo ba xôna ka mantšibua.” Ee, letšatši la Jehofa e tloga e tlo ba la lefsifsi le le lebe bakeng sa manaba a gagwe mo lefaseng! Eupša e tla ba la seetša le la go amogelwa mo go tšwelago pele ga barapedi ba Jehofa ba botegago. Le gona Sakaria o ile a hlalosa kamoo dilo ka moka lefaseng le lefsa di tlago go tsebatša bokgethwa bja Jehofa. Borapedi bja therešo tempeleng ya Modimo e kgolo ya moya e tla ba mohuta o nnoši wa borapedi mo lefaseng. (Sakaria 14:7, 16-19) A kgonthišetšo e kgahlišago gakaakang! Re tla bona go phethagatšwa ga seo se ilego sa bolelwa e sa le pele gomme re tla bona go godišwa ga bogoši bja Jehofa. Letšatši leo la Jehofa e tla ba la moswana-noši e le ka kgonthe!
Ditšhegofatšo tša sa Ruri
19, 20. Ke ka baka la’ng o hwetša Sakaria 14:8, 9 e le yeo e kgothatšago?
19 Ka morago ga phethagalo yeo e makatšago kudu, Sathane le batemona ba gagwe ba tla tswalelelwa sekoting moo ba tla bego ba sa dire selo. (Kutollo 20:1-3, 7) Ke moka ditšhegofatšo di tla latela nakong ya Pušo ya Kriste ya Nywaga e Sekete. Sakaria 14:8, 9 e re: “Mohla woo meetse a phelaxo a tlo êla à e-tšwa Jerusalêma, a mangwê à foloxêla lewatleng la bohlabêla, a mangwê a foloxêla lewatleng la Bodikêla; xwa tlo ba byalo selemô le marexa. Xomme Morêna e tlo ba Yêna Kxoši ya lefase lohle. Mohla woo Morêna e tlo ba Yêna o tee a nnoši, le leina l’axwe e tlo ba le tee.”
20 “Meetse a phelaxo,” goba “noka ya meetse a bophelo,” ao a swantšhetšago ditokišetšo tša Jehofa bakeng sa go thekga bophelo, a tla tšwela pele go ela go tšwa sedulong sa Mmušo wa Mesia. (Kutollo 22:1, 2) Lešaba le legolo la barapedi ba Jehofa leo le tla bago le phologile Haramagedone, le tla holega ka go lokollwa kotlong ya lehu leo le bakilwego ke Adama. Gaešita le bao ba šetšego ba hwile ba tla holega ka tsogo. Ka gona go tla thongwa nako e mpsha ya pušo ya Jehofa mo lefaseng. Batho lefaseng ka bophara ba tla lemoga gore Jehofa ke Mmuši wa Legohle, yena a nnoši yo a swanetšwego ke go rapelwa.
21. Boikemišetšo bja rena e swanetše go ba bofe?
21 Ka baka la dilo ka moka tšeo Hagai le Sakaria ba ilego ba di bolela e sa le pele le dilo ka moka tšeo di phethagaditšwego, re na le lebaka le le tiilego la go gatela pele modirong woo Modimo a re abetšego wona gore re o dire malapeng a lefaseng a tempele ya gagwe ya moya. Go fihlela ge borapedi bja therešo bo tla be bo tlišitšwe boemong bjo bo phethagetšego, eka ka moka ga rena re ka katanela go etiša dikgahlego tša Mmušo pele. Sakaria 8:9 e re kgothaletša gore: “A diatla tša lena di tiê matla, lena ba Le kwaxo mehleng yeno ditaba di bolêlwa ke baporofeta.”
Na o a Gopola?
• Ke go swana gofe ga histori mo go dirago gore puku ya Hagai le ya Sakaria e be tša bohlokwa lehono?
• Dipuku tša Hagai le Sakaria di re nea thuto efe mabapi le dilo tšeo di tlago pele bophelong?
• Ke ka baka la’ng go ahla-ahla diporofeto tša Hagai le Sakaria go re nea lebaka la go ba le kholofelo ka bokamoso?
[Dipotšišo tša Thuto]
[Seswantšho go letlakala 26]
Hagai le Sakaria ba ile ba kgothaletša Bajuda go šoma ka moya ka moka gomme ka go rialo ba amogele tšhegofatšo
[Diswantšho go letlakala 27]
Na o ‘kganyelela ntlong ya gago’?
[Seswantšho go letlakala 28]
Jehofa o holofeditše tšhegofatšo, gomme o e neile