O ka Dira Bjang Diphetho ka go Dumelelana le Thato ya Modimo?

KUA United States monna yo mongwe o ile a ya pankeng a swere tšheke ya R163 000. O be a ikemišeditše go bea tšhelete akhaontong yeo e beetšwego nako. Lega go le bjalo, mošomi wa pankeng o ile a mo eletša gore a e beeletše mmarakeng wa go ananya ditšhelete, a bolela gore le ka mohla mmaraka wa go ananya ditšhelete o ka se ke wa felelwa ke matla. Monna yoo o ile a phetha ka go amogela keletšo yeo. Go se go ye kae ka morago ga moo, peeletšo ya gagwe e ile ya felelwa ke matla kudu.

Phihlelo ye e bontšha gore go dira diphetho tše bohlale ke tlhohlo. Go thwe’ng ka diphetho tše fapa-fapanego tšeo re lebeletšanago le tšona bophelong? Diphetho tše dintši di ka dira gore motho a atlege goba a palelwe—gomme go se go ye kae ya ba taba ya lehu le bophelo. Ka gona, ke bjang re ka kgodišegago gore re dira diphetho tše bohlale?

“Tsela šé”

Letšatši le letšatši re dira diphetho mabapi le seo re tlago go se ja, go se apara, moo re swanetšego go ya gona, bjalo bjalo. Diphetho tše dingwe di ka bonagala e le tše dinyenyane, eupša di ka ba le ditla-morago tše kotsi. Ka mohlala, go dira phetho ya go kgoga ka lekga la pele go ka lebiša mokgweng wa bophelo ka moka wa go kgoga. Le ka mohla ga se ra swanela go tšeela fase bohlokwa bja diphetho tšeo di ka bonagalago e le tše dinyenyane.

Ke kae mo re ka lebago gona bakeng sa tlhahlo ge re dira diphetho tšeo go bonagalago eka ke tše dinyenyane? E tla ba mo go kgahlišago kudu go ba le moeletši yo a botegago wa go re eletša ge re lebeletšana le phetho e thata! O ka hwetša moeletši yo bjalo. Puku ya bogologolo yeo e nago le molaetša bakeng sa mehleng yeno e re: “Ditsêbê tša lena di tlo kwa ka nthaxo xa lena xe xo thwe: Tsela šé! Tšeang ka yôna! Le se fapoxêlê ka xo le letona le xe e le xo la ntsôxôšô!” (Jesaya 30:21) Mantšu a ke a mang? Le gona o ka kgonthišega bjang gore tlhahlo ya gagwe ke e ka botwago?

Kgonthišetšo e lego ka mo godimo e hwetšwa Beibeleng, yeo ba dimilione ba ithutilego yona gomme ba lemoga gore e buduletšwe ke Jehofa Modimo, e lego Mmopi. (2 Timotheo 3:16, 17) Jehofa o tseba kamoo re bopegilego ka gona, ka go rialo ke mothopo o kaone-kaone wa tlhahlo. O kgona go bona bokamoso e sa le pele, ka ge e le ‘Yena yo a kwaditšego tša mafelelo mola di sa thoma, di sešo tša direga. Yena a boletšego a re:  Se ke se rerilego ga se šuthe.’ (Jesaya 46:10) Mopsalme o ile a bolela go bota ga gagwe Lentšu la Jehofa ka gore: “Ntšu la xaxo ké lebônê la dinaô tša-ka, ké seetša tseleng ya-ka.” (Psalme 119:105) Lega go le bjalo, Jehofa o re thuša bjang go hlahla tsela ya rena gore e be e bolokegilego gare ga meetse a bilokanago a lefase la mehleng yeno? Re ka dira bjang diphetho ka go dumelelana le thato ya Modimo?

Diriša Melao ya Motheo ya Beibele

Jehofa Modimo o neile Bakriste melao ya motheo e le gore ba ka dira diphetho tše kwagalago. Go ithuta melao ya motheo ya Beibele le go e diriša go ka swantšhwa le go ithuta leleme le go le diriša. Ge o šetše o kgona leleme leo, gantši o kgona go kwa ge motho a dira diphošo tša popopolelo gobane seo a se bolelago se sa kwagale gabotse. O ka fo se kgone go šupa seo ge e le gabotse se fošagetšego ka seo a se bolelago, eupša o tseba gore se fošagetše. Ge o ithuta melao ya motheo ya Beibele go ba go fihla bokgoleng bja go e dira karolo ya bophelo bja gago, gantši o ka kgona go bona ge phetho e itšego e se ya maleba gotee le ge e sa dumelelane le melao ya motheo ya Modimo.

E le mohlala, bona phetho yeo mofsa a ka lebeletšanago le yona ge a kgetha mokgwa wa gagwe wa go lokiša moriri. Ga go taelo ya Beibele yeo e ganetšago ka go lebanya mokgwa o itšego wa go lokiša moriri. Lega go le bjalo, ela hloko molao wo wa motheo wa Beibele. Moapostola Paulo o ngwadile gore: “Ke rata gore basadi ba ikgabiše ka moaparo o rulagantšwego gabotse, ka go se solege le ka go hlaphogelwa ga monagano, e sego ka mekgwa ya go loga moriri le gauta goba diperela goba kobo ya theko e kgolo, eupša ka tsela e swanelago basadi bao ba ipolelago gore ba hlompha Modimo ka tsela ya borapedi, e lego ka mediro e mebotse.” (1 Timotheo 2:9, 10) Paulo mo o ngwala mabapi le basadi, eupša molao wo wa motheo o šoma go banna gotee le basadi. Molao wo wa motheo ke ofe? Ponagalo ya rena e swanetše go bontšha bothakga le go hlaphogelwa monaganong. Ka gona lesogana le ka ipotšiša gore, ‘Na mokgwa wa-ka wa go lokiša moriri o bontšha bothakga bjo bo swanelago Mokriste?’

Le gona ke molao ofe wa motheo wo mofsa a ka o hwetšago ge a latela mantšu a latelago a morutiwa Jakobo? “Lena dihlotlolo, na ga le tsebe gore go gwerana le lefase ke bonaba go Modimo? Ka gona, mang le mang yo a nyakago go ba mogwera wa lefase o itira lenaba la Modimo.” (Jakobo 4:4) Bakriste ba hloile kgopolo ya go ba bagwera ba lefase, e lego go dira bonaba le Modimo. Na mohuta wa go lokiša moriri woo dithaka tša gagwe di o ratago o dira gore a bonagale e le mogwera wa Modimo goba mogwera wa lefase? Lesogana leo le naganišišago ka taba ya mokgwa wa go lokiša moriri le ka diriša melao ya motheo yeo e theilwego Beibeleng e le gore le dire phetho e bohlale. Ee, melao ya motheo ya Modimo e re thuša go dira diphetho. Le gona ge re tlwaelana le go dira diphetho tšeo di theilwego melaong ya motheo ya go boifa Modimo, go ba bonolo go dira diphetho tše bohlale tšeo di se nago mafelelo a kotsi.

Ka Lentšung la Modimo re ka hwetša melao e  mentši ya motheo. Go ba gona, re ka no se hwetše temana yeo e bolelago ka go lebanya ka boemo bja rena. Lega go le bjalo, re ka bala kamoo ba bangwe ba ilego ba kwa tlhahlo ya Modimo le kamoo ba bangwe ba ilego ba hlokomologa ditemošo tša Modimo. (Genesi 4:6, 7, 13-16; Doiteronomio 30:15-20; 1 Bakorinthe 10:11) Ge re bala ditaba tše bjalo le go hlahlobišiša mafelelo a tšona, re tla lemoga melao ya motheo ya Modimo yeo e ka re thušago go dira diphetho tšeo di kgahlago Modimo.

Tšea ka mohlala poledišano e kopana yeo Jesu Kriste a bilego le yona le moapostola wa gagwe Petro. Banna bao ba kgoboketšago lekgetho la diterakema tše pedi ba ile ba botšiša Petro gore: “Na morutiši wa lena ga a ntšhe [lekgetho] la diterakema tše pedi?” Petro o ile a araba ka gore: “Ee.” Ka morago ga moo, Jesu o ile a botšiša Petro: “Magoši a lefase a hwetša ditshwanelo goba lekgetho la hlogo ka hlogo go bomang? Na ke go barwa ba bona goba go batho ba bangwe?” Ge Petro a re: “Go batho ba bangwe,” Jesu a re go yena: “Ka gona, barwa ga ba ntšhe lekgetho. Eupša gore re se ba kgopiše, wena e-ya lewatleng, o lahlele kgwega, gomme o tšee hlapi ya pele e tšwago, ge o bula molomo wa yona, o tla hwetša tšhelete ya tšhipi ya setatere. O e tšee o ba nee yona o ntšhetše nna le wena.” (Mateo 17:24-27) Ke melao efe ya motheo ya Modimo yeo re ka e hwetšago tabeng ye?

Ka go botšiša lelokelelo la dipotšišo, Jesu o ile a thuša Petro gore a be le pono e nepagetšego: Ka ge e le Morwa wa Modimo, Jesu o be a se a swanela go lefišwa lekgetho. Gaešita le ge Petro a ile a palelwa ke go kwešiša taba yeo mathomong, Jesu o ile a mo thuša ka botho gore a e kwešiše. Ge ba bangwe ba dira diphošo, re ka dira phetho ya go ekiša Jesu ka go ba swara ka kwelobohloko go e na le gore re pepentšhe ka tsela e sehlogo diphošo tša bona goba re ba ahlole.

Ka morago Petro o ile a bona lebaka la go lefa lekgetho—e sego go kgopiša ba bangwe. Wo ke o mongwe wa mehlala yeo re ka ithutago go yona tabeng ye. Go naganela matswalo a ba bangwe ke gabohlokwa kudu go e na le go gapeletša go dira seo re nago le tshwanelo ya go se dira.

Ke eng seo se re tutueletšago go dira diphetho tšeo di tla bontšhago go hlompha matswalo a ba bangwe? Ke lerato la go rata baagišani ba rena. Jesu Kriste o ile a ruta gore go rata baagišani ba rena bjalo ka ge re ithata ke taelo e bohlokwa yeo e latelago ya go rata Modimo ka moya wa rena ka moka. (Mateo 22:39) Lega go le bjalo, re phela lefaseng la boithati, gomme ditshekamelo tša rena tša sebe di re tutueletša gore re be baithati. Ka gona e le gore motho a rate moagišani wa gagwe bjalo ka ge a ithata, o swanetše go fetola monagano wa gagwe.—Baroma 12:2.

Ba bantši ba dirile diphetho tše bjalo, gomme ba nagana ka ba bangwe ge ba dira diphetho, go sa šetšwe ge e ba ke tše dikgolo goba tše dinyenyane. Paulo o ngwadile gore: “Go ba gona, le bileditšwe tokologo, bana bešo; feela le se ke la diriša tokologo ye e le tlhohleletšo ya nama, eupša hlankelanang ka lerato.” (Bagalatia 5:13) Seo re ka se dira bjang? Anke o nagane ka mosetsana yo a ilego a hudugela lefelong la magaeng go yo thuša batho go ithuta ka Lentšu la Modimo. Ge a dutše a boledišana le batho, o ile a lemoga gore moaparo wa gagwe, gaešita le ge e be e le wa bothakga go ya ka mokgwa wa go apara wa makgoweng, o be o bolelwa gampe motseng.  Mokgwa wa gagwe wa go apara le wa go itokiša e be e le wa bothakga, lega go le bjalo o ile a phetha ka gore a apare diaparo tšeo e sego tša makgoweng, “e le gore lentšu la Modimo le se bolelwe ka go gobošwa.”—Tito 2:5.

Nkabe o ile wa arabela bjang ge e ba o be o lebeletšane le go dira phetho ka tsela ya go itokiša ga gago goba ka selo se sengwe seo o se ratago? O ka kgodišega gore Jehofa o tla thabišwa ke ge diphetho tša gago di bontšha go naganela matswalo a ba bangwe.

E-ba le Ponelo-pele

Ka ntle le melao ya motheo ya Beibele le matswalo a ba bangwe, ke eng seo re ka naganago ka sona ge re dira diphetho? Gaešita le ge tsejana ya Bakriste e le lekgwara e bile e le e tshesane, Modimo o ba nea tokologo e lekanego. (Mateo 7:13, 14) Re swanetše go ela hloko kamoo diphetho tša rena di tla kgomago boemo bja rena bja moya, bja kgopolo, bja maikwelo le bja tša maphelo nakong e tlago.

A re re o be o nagana ka go amogela mošomo. Mohlomongwe ga go na selo se se gobogilego moo goba se sa swanelago mošomong. O tla kgona go ba gona dibokeng tša Bokriste le dikopanong. Tšhelete yeo o e golago e tla feta kamoo o bego o letetše ka gona. Mothwadi o tšeela bokgoni bja gago godimo gomme o nyaka go go diriša ka mo go feletšego. Ka ntle le moo, o rata mohuta wa mošomo wo o o dirago. Na go na le selo seo se ka dirago gore o se amogele modiro woo? Go thwe’ng ge e ba o bonela pele kgonagalo ya gore o rate mošomo woo kudu. O botšwa gore o ka se gapeletšwe gore o šome diiri tše oketšegilego. Eupša e le gore o fetše mošomo, na o be o ka ikgafela go šoma lebaka le letelele go feta ka mo o swanetšego? Na go šoma go feta nako e beilwego ya mošomo e ba selo seo se diregago gantši? Na go dira bjalo go tla go kgaoganya le lapa la gago gomme mafelelong gwa go kgaoganya le mediro ya moya yeo o sa swanelago go e foša?

Ela hloko kamoo Jim a ilego a dira phetogo e kgolo ka mošomo wa gagwe. O ile a šoma ka thata gomme a hwetša maemo a godimo khampaning. Mafelelong o ile a ba molaodi wa khampani yeo a e šomelago dinageng tša ka Bohlabela, a ba molaodi-pharephare wa yona kua United States le setho sa lekgotla la balaodi la ditshepedišo tša dikhamphani tša yona kua Yuropa. Lega go le bjalo, ge maemo a tša boiphedišo a be a phuhlama kua Japane, o ile a bona kamoo go phegelela tšhelete le maemo e lego ga lefeela. Tšhelete yeo a e gotšego ka go e šomela ka thata e ile ya fela gatee-tee. O ile a hloka morero bophelong. Ke moka a ipotšiša gore, ‘Ke tla be ke dira’ng nywageng e lesome go tloga ga bjale?’ Ka morago o ile a lemoga gore mosadi wa gagwe le bana ba be ba tsepamišeditše megopolo ya bona dipakaneng tše nago le morero kudu bophelong. Ba be ba dutše ba kopanela le Dihlatse tša Jehofa ka nywaga e mentši. Jim le yena o ile a nyaka go ba le lethabo le kgotsofalo tšeo lapa la gagwe le bego le e-na le tšona. Ka gona o ile a thoma go ithuta Beibele.

Go se go ye kae Jim o ile a kgona go bona gore mokgwa wa gagwe wa bophelo o be o mo šitiša go phela bophelo bjo bo nago le morero bjalo ka Mokriste. O be a dula a sepela go dikologa Asia, United States le Yuropa, e bile a se na nako e lekanego ya go ithuta Beibele le go kopanela le badumedi-gotee le yena. O ile a lebeletšana le go dira phetho: ‘Na ke tla tšwela pele ke phela bophelo bjo ke bo phetšego nywageng e 50 e fetilego goba na ke tla phegelela tsela e mpsha ya bophelo?’ O ile a naganišiša ka thapelo ka ditla-morago tšeo a bego a di bonetše pele tša phetho ya gagwe gomme a phetha ka go rola mediro ya gagwe ka ntle le o tee e le gore a ka ba le nako e lekanego bakeng sa go phegelela dilo tša moya. (1 Timotheo 6:6-8) Phetho yeo a e dirilego e ile ya mo thabiša, ya ba ya mo nea le sebaka sa gore a swarege ka mediro ya Bokriste.

Go sa šetšwe gore ke tše dikgolo goba tše dinyenyane, diphetho tša gago ke tša bohlokwa. Phetho yeo o e dirago lehono e ka dira gore o atlege goba o palelwe, gaešita le go ba taba ya lehu le bophelo nakong e tlago. O ka dira diphetho tše bohlale ge e ba o ela hloko melao ya motheo ya Beibele, matswalo a ba bangwe le go ba le ponelo-pele ya seo o se dirago. Dira diphetho tšeo di dumelelanago le thato ya Modimo.

[Seswantšho go letlakala 13]

Diphetho tšeo di ka bonagalago e le tše dinyenyane di ka ba le mafelelo a magolo

[Seswantšho go letlakala 14]

Melao ya motheo ya Beibele e ka mo thuša bjang go dira phetho e bohlale?

[Seswantšho go letlakala 15]

Jesu o ile a bolela le Petro a mmontšha kwelobohloko