Tshwanelo ya go ba le Leina

MOTHO yo mongwe le yo mongwe o na le tshwanelo ya go ba le leina. Kua Tahiti, gaešita le ngwana yo a lahlilwego gomme go sa tsebje tatagwe le mmagwe o newa leina. Diofisi tša boingwadišo di nea ngwana yoo a lahlilwego leina gotee le sefane.

Lega go le bjalo, go na le motho yo mongwe yoo re ka rego o timilwe tshwanelo ye ya motheo, e lego tshwanelo yeo e neilwego mo e ka bago batho ka moka. Se se makatšago ke gore ke “Tate yo lapa le lengwe le le lengwe legodimong le lefaseng le bitšwago ka yena”! (Baefeso 3:14, 15) Ge e le gabotse, batho ba bantši ba gana go diriša leina la Mmopi go etša ge le tšwelela ka Beibeleng. Ba bona go le kaone go diriša direto tše dingwe legatong la lona, e lego direto tše bjalo ka “Modimo,” “Morena” goba “Wa Bosafelego.” Ge e le gabotse leina la gagwe ke mang? Mopsalme o araba potšišo yeo ka gore: “Leina la xaxwe ké Jehofa. Pele xa xaxwe Le xobê mexobô.”—Psalme 68:4.

Karolong ya pele ya lekgolo la bo-19 la nywaga ge baromiwa ba London Missionary Society ba goroga Tahiti, Mapolynesia a be a rapela medimo e mentši. O mongwe le o mongwe wa yona o be a na le leina leo le mo hlaolago, gomme medimo e megolo e be e le Oro le Taaroa. E le gore ba hlaole Modimo wa ka Beibeleng go medimo e mengwe, baromiwa bao ga se ba ka ba dika-dika go diriša leina la Modimo ka gohle, leo ge le be le fetolelwa ka Setahiti le bego le ngwalwa ka gore Iehova.

Leina leo le ile la tsebja ke bohle gomme la dirišwa dipoledišanong tša batho tša letšatši le letšatši gotee le dingwalweng. Kgoši Pomare II wa kua Tahiti, yoo a bušitšego mathomong a lekgolo la bo-19 la nywaga, o ile a le diriša ka makga a mmalwa mangwalong a gagwe. Bohlatse bja seo bo tšwelela lengwalong leo re le bonago mo seswantšhong. Ka ge le ngwadilwe ka Seisemane, le beilwe Musiamong wa Tahiti le Dihlaka-hlakeng tša Yona. Lengwalo le ke bohlatse bja gore batho ba ile ba amogela ka bolokologi go dirišwa ga leina la Modimo ka nako yeo. Go oketša moo, leina la Modimo le tšwelela ka makga a dikete tokollong ya mathomo ya Beibele ya Setahiti, yeo e phethilwego ka 1835.

[Seswantšho go letlakala 32]

Kgoši Pomare II

[Mothopo wa Seswantšho go letlakala 32]

King and letter: Collection du Musée de Tahiti et de ses Îles, Punaauia, Tahiti