Latela Mohlala wa Jesu Gomme o Bontšhe go Tshwenyega ka Badiidi

BODIIDI le kgatelelo di nyakile di bile gona nakong ka moka ya bophelo bja motho. Gaešita le ge Molao woo Modimo a bego a o neile Baisiraele o be o reretšwe go šireletša badiidi le go ba imolla matshwenyegong, gantši Molao woo o be o sa latelwe. (Amosi 2:6) Moporofeta Hesekiele o ile a kgalema mokgwa woo badiidi ba bego ba swarwa ka ona. O itše: “Batho ba naxa yeo ba a pateletša, ba a hlakola; babôtlana le badiidi ba ba dira ka thata; ba pata moeng bà sa ye ka molaô.”—Hesekiele 22:29.

Maemo a be a swana le a nakong ya ge Jesu a le mo lefaseng. Baetapele ba bodumedi ba ipontšhitše ba sa naganele badiidi le bahloki. Baetapele ba bodumedi ba ile ba hlaloswa e le “barati ba tšhelete” bao ‘ba bego ba e-ja dintlo tša bahlologadi’ le bao ba bego ba tshwenyegile kudu ka go latela metlwae ya bona go feta go hlokomela batšofadi le badiidi. (Luka 16:14; 20:47; Mateo 15:5, 6) Ke mo go lemogegago gore seswantšhong sa Jesu sa Mosamaria wa kgaugelo, ge moperisita le Molefi ba be ba bona monna yo a gobetšego ba ile ba feta ka thoko e nngwe ya tsela, go e na le gore ba fapogele go yena gore ba mo thuše.—Luka 10:30-37.

Jesu o Bontšhitše go Tshwenyega ka Badiidi

Dipego tša Ebangedi tša bophelo bja Jesu di bontšha gore o be a tloga a kwešiša mathata a badiidi le gona a tloga a tshwenyega ka bona. Le ge Jesu a ile a phela legodimong o ile a itlhohlora, a swana le batho gomme ‘a diila ka lebaka la rena.’ (2 Bakorinthe 8:9) Jesu o  ile a re ge a bona mašaba a batho, “a a šokela, gobane ba be ba šokiša gomme ba gašane go swana le dinku tše di se nago modiši.” (Mateo 9:36) Pego ya mohlologadi wa modiidi e bontšha gore Jesu o be a sa kgahlwa ke dimpho tša bahumi bao ba ilego ba “ntšha go tše di ba tlaletšego,” eupša o kgahlilwe ke moneelo wa mosadi wa mohlologadi wa modiidi. Seo mohlologadi a se dirilego se kgomile pelo ya Jesu gobane o “lahletše sohle seo a bego a iphediša ka sona.”—Luka 21:4.

Ga se feela gore Jesu o be a kwela badiidi bohloko, eupša gape o be a bile a tshwenyega ka dinyakwa tša bona. Yena gotee le baapostola ba gagwe ba be ba e-na le sekhwama seo ba bego ba thuša Baisiraele ba badiidi ka sona. (Mateo 26:6-9; Johane 12:5-8; 13:29) Jesu o kgothaleditše bao ba bego ba nyaka go ba balatedi ba gagwe gore ba swanetše go lemoga boikarabelo bja bona bja go thuša badiidi. O ile a botša mmuši wa mohumi wa lesogana gore: “Rekiša dilo tšohle tše o nago le tšona o abele badiidi, gomme o tla ba le lehumo magodimong; ke moka o tle o be molatedi wa-ka.” Taba ya gore mohumi o be a sa nyake go kgaogana le tšhelete ya gagwe e bontšha gore o be a rata tšhelete go feta Modimo le batho. Ka gona, o be a hloka dika tše di nyakegago gore motho e be morutiwa wa Jesu.—Luka 18:22, 23.

Balatedi ba Kriste ba Tshwenyega ka Badiidi

Ka morago ga lehu la Jesu, baapostola le balatedi ba bangwe ba Gagwe ba ile ba tšwela pele ba bontšha go tshwenyega ka badiidi bao ba bego ba phela le bona. Mo e ka bago ka 49 C.E., moapostola Paulo o ile a boledišana le Jakobo, Petro le Johane mabapi le thomo ya go phatlalatša ditaba tše dibotse yeo a bego a e neilwe ke Morena Jesu Kriste. Ba ile ba dumela gore Paulo le Baranaba ba swanetše go ya “ditšhabeng,” eupša ba lebiše tlhokomelo kudu go ruteng ba-Ntle. Lega go le bjalo, Jakobo le badirišani ba gagwe ba ile ba kgothaletša Paulo le Baranaba gore ba dule ba “nagana ka badiidi.” Le gona ke seo Paulo a ilego a “leka ka matla go se dira.”—Bagalatia 2:7-10.

Nakong ya pušo ya Mmušiši Kelaudio, tlala e kgolo e ile ya wela dikarolo tše di fapa-fapanego tša Mmušo wa Roma. Ge Bakriste ba Antiokia ba e-kwa seo, ba ile “ba ikemišetša, yo mongwe le yo mongwe wa bona go ya kamoo a bego a ka kgona ka gona, go romela tirelo ya thušo go bana babo bona bao ba dulago Judea; ke moka ba dira se, ba e romela go bagolo ka seatla sa Baranaba le Saulo.”—Ditiro 11:28-30.

Bakriste ba therešo lehono le bona ba kwešiša gore balatedi ba Jesu ba swanetše go naganela badiidi le bahloki, kudu-kudu ba badumedi-gotee le bona. (Bagalatia 6:10) Ka gona, ba bontšha go tshwenyega ka bao ba hlokago dilo tše di bonagalago. Ka mohlala, ka 1998 komelelo e kgolo e ile ya wela karolo e kgolo ya ka leboa-bohlabela la Brazil. Komelelo ye e ile ya senya reisi, dinawa le mabele gomme ya baka tlala e apareditšego—e lego e mpe kudu le go feta lebakeng la nywaga e 15 go ba go fihla ka nako yeo. Mafelong a mangwe, gaešita le meetse a go nwa a be a hlaela. Ka pela-pela Dihlatse tša Jehofa dikarolong tše dingwe tša naga di ile tša rulaganya dikomiti tša tlhakodišo, gomme ka nako e kopana, di ile tša kgona go kgoboketša dijo tše dintši le gona di ile tša kgona go lefelela selo sa go di rwala.

Dihlatse tšeo di thekgago masolo a  tlhakodišo di ngwadile gore: “Re thabišwa kudu ke ge re kgonne go thuša bana babo rena, kudu-kudu ka gobane re kgodišegile gore re thabišitše pelo ya Jehofa. Ga re lebale mantšu a Jakobo 2:15, 16.” Ditemana tšeo tša Beibele di re: “Ge e ba ngwanabo rena goba kgaetšedi a hloboletše gomme a hloka dijo tše di lekanego tša letšatši, lega go le bjalo, yo mongwe wa lena a re go bona: ‘Sepelang ka khutšo, le ruthele gomme le khore,’ eupša le sa ba nee dinyakwa tša mebele ya bona, go hola’ng?”

Phuthegong e nngwe ya Dihlatse tša Jehofa ka toropong ya São Paulo, Hlatse e mafolofolo yeo e ikokobeditšego e be e hloka dilo tše di bonagalago e bile e sa kgone go itlhokomela. E re: “Le ge ke diila, molaetša wa Beibele o nneile morero wa bophelo. Ga ke tsebe gore nkabe ke le kae ge nkabe ke sa ka ka thušwa ke Dihlatse-gotee le nna.” Nakong e fetilego, mosadi yo wa Mokriste yo a šomago ka thata o be a swanetše go buiwa eupša o be a sa kgone go lefelela ditshenyagalelo tša sepetlele. Boemong bjo, bana babo rena ba Bakriste le dikgaetšedi ka phuthegong ba ile ba lefelela ditshenyagalelo tša gore a buiwe. Go thuša badumedi-gotee le rena bao ba nyakago thušo ke mokgwa wa Bakriste ba therešo lefaseng ka bophara.

Lega go le bjalo, go sa šetšwe gore diphihlelo tše bjalo di thabiša gakaakang, go molaleng gore maiteko a bjalo ao a dirwago ka pelo ka moka a ka se fediše bodiidi. Gaešita le ge mebušo e matla le mekgatlo ya ditšhaba-tšhaba ya go thuša badiidi e kgonne go thuša go gongwe, ga se e kgone go fediša bothata bja kgale bja bodiidi. Ka gona go rotoga potšišo, Ke tharollo efe yeo e tla fenyago bodiidi gotee le mathata a mangwe ao a gateletšago moloko wa batho?

Dithuto tša Beibele di Nea Tharollo ya sa Ruri

Dipego tša Ebangedi di bega gore Jesu Kriste gantši o be a dira dilo tše dibotse go badiidi le go bao ba bego ba nyaka thušo. (Mateo 14:14-21) Lega go le bjalo ke modiro ofe woo a bego a tshwenyega ka wona kudu? Lebakeng le lengwe, ka morago ga ge a feditše nako a thuša bao ba lego tlalelong, Jesu o boditše barutiwa ba gagwe gore: “A re yeng go gongwe, metseng yeo e lego kgaufsi, gore ke yo bolela le moo.” Ke ka baka la’ng Jesu a ile a kgaotša modiro wa gagwe wa go thuša balwetši le badiidi bakeng sa gore a tšwetše pele modiro wa boboledi? O hlalositše gore: “Gobane ke tšwetše wona morero wo [wa go dira boboledi].” (Mareka 1:38, 39; Luka 4:43) Le ge e le gore go direla batho dilo tše dibotse go be go le bohlokwa go Jesu, go ruta ka Mmušo wa Modimo e be e le modiro wa bohlokwa kudu.—Mareka 1:14.

Ka ge Beibele e eletša Bakriste gore ba “latele dikgato tša [Jesu] kgaufsi,” lehono ba na le tlhahlo e kwagalago gabotse ge go tliwa tabeng ya gore ba ipeele dilo tše di tlago pele maitekong a bona a go thuša batho ba bangwe. (1 Petro 2:21) Go swana le Jesu, ba thuša batho bao ba nyakago thušo. Lega go le bjalo, go swana le Jesu ba dira modiro wa go ruta ka molaetša wa Beibele wa ditaba tše dibotse tša Mmušo wa Modimo gore e be morero wa bona o mogolo. (Mateo 5:14-16; 24:14; 28:19, 20) Lega go le bjalo, ke ka baka la’ng re swanetše go tšeela godimo molaetša wo re o bolelago o hwetšwago ka Lentšung la Modimo go feta wa go thuša batho ba bangwe?

Diphihlelo tša kgonthe tše di tšwago lefaseng  ka bophara di bontšha gore ge batho ba kwešiša le go latela dikeletšo tšeo di šomago tša Beibele, ba hlangwa gabotse go lebeletšana ka katlego le mathata a letšatši le letšatši go akaretša le bodiidi. Go feta moo, molaetša wa Beibele wa Mmušo wa Modimo wo o rutwago ke Dihlatse tša Jehofa lehono o nea batho kholofelo ya bokamoso—kholofelo yeo e dirago gore re thabele bophelo, gaešita le ka tlase ga maemo a thata. (1 Timotheo 4:8) Kholofelo yeo ke efe?

Lentšu la Modimo le re kgonthišetša mabapi le bokamoso bja rena gore: “Go na le magodimo a mafsa le lefase le lefsa tše re di letetšego go ya ka kholofetšo ya [Modimo], gomme toko e tla aga go tšona.” (2 Petro 3:13) Ka dinako tše dingwe ge Bibele e bolela ka “lefase,” e šupa go batho bao ba phelago lefaseng. (Genesi 11:1) Ka gona, “lefase le lefsa” la toko leo go holofeditšwego gore le tla tla, ke moloko wa batho bao ba amogelwago ke Modimo. Lentšu la Modimo le tšwela pele le holofetša gore ka tlase ga pušo ya Kriste, bao ba amogelwago ke Modimo ba tla amogela mpho ya bophelo bjo bo sa felego le gona ba tla phela bophelo bjo bo kgotsofatšago lefaseng la paradeise. (Mareka 10:30) Bokamoso bjoo bjo bo kgahlišago bo bulegetše batho ka moka, go akaretša le badiidi. Gona moo ‘lefaseng leo le lefsa,’ mathata a bodiidi a tlo fedišetšwa sa ruri.

[Lepokisi/Seswantšho go letlakala 7]

JESU O TLA “HLAKODIŠA MODIITŠANA” BJANG?—Psalme 72:12

TOKA: “Ó tlo ahlolêla babôtlana ba sethšaba, ó tlo thuša bana ba bahumanexi; ’me bapateletši a ba šilakanya.” (Psalme 72:4, mongwalo o sekamego ke wa rena.) Nakong ya ge Kriste a buša godimo ga lefase, go tlo ba le toka yeo e tlago go thabelwa ke bohle. Go ka se be le sekgoba sa kgobogo, lenaba leo le gwahlafatšago dinaga tšeo di humilego gore e be tša bodiidi.

KHUTŠO: “Mehleng ya xaxwe xo taxê moloki, moláô [“khutšo,” NW] o xolê ò e-ya le dikxwedi di sa kxaotše xo balama.” (Psalme 72:7, mongwalo o sekamego ke wa rena.) Bodiidi bjo bogolo lefaseng bo bakilwe ke dithulano le dintwa tša batho. Kriste o tla tliša khutšo e feletšego lefaseng, ka go dira bjalo a fediša dibaki tše dikgolo tša bodiidi.

KWELOBOHLOKO: “Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.” (Psalme 72:12-14, mongwalo o sekamego ke wa rena.) Bahumanegi, badiidi le bao ba gateletšwego ba tla fetoga ditho tša lapa letee la batho bao ba thabilego, leo le kgobokantšwego ka tlase ga bogoši bja Kgoši Jesu Kriste.

KATLEGO: “Xo tlo ba le mohora wa mabêlêʹ mo naxeng.” (Psalme 72:16, mongwalo o sekamego ke wa rena.) Nakong ya pušo ya Kriste, go tla ba le boati bja dilo tšeo di bonagalago le katlego e kgolo. Batho ba ka se sa tlaišwa ke tlhaelelo ya dijo le ditlala tšeo gantši di bakelago batho ba bantši bodiidi lehono.

[Seswantšho go letlakala 4, 5]

Jesu o be a tshwenyega ka dinyakwa tša badiidi

[Seswantšho go letlakala 6]

Molaetša wa Beibele o tliša kholofelo ya kgonthe