Maemo a Lehono a Bodiidi

VICENTE * o bonwa gantši ditarateng tša São Paulo, Brazil, a goga kariki ya go rwala merwalo yeo e dulago e rwaleletše. O kgoboketša dikhatepokisi, ditšhitswana tšeo di lahlilwego le dipolasitiki. Ge swahlana e tšea-tšea, o ala dikhatepokisi ka tlase ga kariki ya gagwe gomme a robala. Go bonala a sa kwe medumo ya dikoloi le dipese tšeo di fetago setarateng sa leema-ema seo a robalago go sona. O kile a šoma a ba le legae le lapa—eupša ka moka ga tšona di mo lahlegetše. O šoma ka thata gore a hwetše dilo tše dinyenyane tša go iphediša ge a le moo.

Ka manyami, batho ba dimilione lefaseng ka bophara, go swana le Vicente ba phela maemong a bodiidi bja go rona nta. Batho ba bantši ditšhabeng tšeo di hlabologago ba gapeletšega go phela ditseleng goba mekhukhung. Bakgopedi—digole, difofu le basadi ba go nyantšha bana—ba bonwa gantši ba kgopela. Bana ba sepela gare ga dikoloi tšeo di emego dirobotong ba leka go rekiša malekere ba holofela gore ba tla hwetša dipeninyana.

Go thata go hlalosa gore ke ka baka la eng maemo a le bjalo. Makasine wa Brithania wa The Economist o boletše gore: “Moloko wa batho ga se wa ka wa huma ka tsela ye, wa ba le tsebo e kaakaa ya kalafo, bohlale bja thekinolotši le temogo ya go fediša bodiidi.” Tsebo ye e tloga e hotše ba bantši. Ditarata ka ditoropong tše dikgolo dinageng tšeo di hlabologago di tletše dikoloi tše difsa tša mabaibai. Mabenkele a tletše didirišwa tša sebjale-bjale, tšeo di dulago di nyakwa ke batho. Mabenkele a mabedi a magolo kua Brazil a ile a dira papatšo e kgethegilego ya go kgothaletša batho go reka. A ile a dula a butšwe mašegong a di-23 le di-24 tša December 2004. Le lengwe la mabenkele ao le ile la laletša dibini tša mmino wa samba gore di tle di thabiše bareki. Seo se ile sa gogela bareki bao ba ka bago 500 000!

Lega go le bjalo, batho ba bantši ga ba holwe ke lehumo leo ba bangwe ba nago le lona. Phapano ye e lego molaleng gare ga bahumi  le badiidi e dirile gore ba bantši ba phethe ka gore go nyakega gore go gatwe mogato ka tšhoganetšo wa go lwantšha bodiidi. Makasine wa Brazil wa Veja o begile gore: “Ngwaga wo [2005], go lwantšha bodiidi e swanetše go ba taba-kgolo ditherišanong tša lefase.” Veja e begile gape ka tšhišinyo e mpsha ya Marshall Plan yeo e reretšwego go thuša dinaga tšeo di diilago, kudu-kudu tša Afrika. * Le ge go bonala eka ditšhišinyo tše bjalo di bontšha tšwelopele, wona makasine wo o tlaleleditše ka gore: “Go na le mabaka a mantši a go belaela ge e ba go tla ba bjalo. Ge dinaga tše dintši di sa rate go thuša ka ditšhelete, ke ka lebaka la gore ditšhelete tšeo ga di fihle go batho bao di swanetšego go ba thuša.” Ka manyami, ka baka la kgobogo le melao e mentši e thata e swanetšego go latelwa, ditšhelete tše dintši tšeo di ntšhwago ke mebušo, batho, mekgatlo ya go thuša bahloki ga di fihle go batho bao ba tlogago ba di nyaka.

Jesu o be a tseba gore bodiidi e tlo ba bothata bjo bo tšwelago pele. O itše: “Le na le badiidi ka mehla.” (Mateo 26:11) Na se se bolela gore bodiidi bo tla tšwela pele bo le gona lefaseng? Na go na le seo se ka dirwago go fetoša maemo? Bakriste ba ka dira’ng go thuša badiidi?

[Mengwalo ya ka tlase]