Bohlokwa bja “Sebjana se Fokolago”

MOAPOSTOLA Petro o ngwadile gore: “Lena banna, tšwelang pele le dula [le basadi ba lena] go ya ka tsebo, le ba nea kgodišo go etša sebjana se fokolago, se setshadi.” (1 Petro 3:7) Na ge Lengwalo le le bolela ka mosadi e le “sebjana se fokolago” le bontšha gore basadi ba a nyatšega ka tsela e itšego? Anke re boneng molaetša wo mongwadi yo a buduletšwego a bego a nyaka go o fetiša mathomong.

Lentšu la Segerika bakeng sa “kgodišo” le bolela “theko, bohlokwa . . . le tlhompho.” Ka gona, monna wa Mokriste o swanetše go swara mosadi wa gagwe ka lerato, a bontšha gore o a mo hlokomela bjalo ka sebjana se se ka thubegago gabonolo le sa bohlokwa. Ruri se ga se lenyatšo. Ka mohlala, ela hloko lebone la Tiffany la galase yeo e kgabišitšwego ka matšoba. Ruri lebone le le lebotse kudu le ka lebelelwa e le le le ka thubegago gabonolo. Na go thubega ga lona gabonolo go dira gore le lebelelwe e se la bohlokwa? Aowa-owa! Ka 1997 lebone la mathomo-thomo la Tiffany la galase yeo e kgabišitšwego ka matšoba le ile la tsenya tšhelete e lekanago diranta tše dimilione tše 17,9 fantising! Go ba ga lona leo le thubegago gabonolo go ile gwa godiša bohlokwa bja lona, e sego go bo fokotša.

Ka mo go swanago, go godiša mosadi e le sebjana se se fokolago ga se go mo nyatša goba go mo tšeela fase. Go dula ga monna le mosadi wa gagwe “go ya ka tsebo” go bolela gore o naganela matla a gagwe le mafokodi a gagwe, dilo tše a di ratago le tše a sa di ratego, dipono tša gagwe le maikwelo a gagwe. Monna yo a tshwenyegago ka mosadi wa gagwe o lemoga gore semelo sa gagwe ga se swane le sa mosadi wa gagwe gomme o hlompha seo. Monna o hlokomela mosadi wa gagwe “e le gore dithapelo tša [monna] di se ke tša šitišwa.” (1 Petro 3:7) Monna yo a palelwago ke go hlompha dika tša mosadi wa gagwe o dira gore tswalano ya gagwe le Modimo e be kotsing. Ee, Lentšu la Modimo ga le nyatše basadi. Go e na le moo, le ba nea seriti le go ba hlompha.

[Mothopo wa Seswantšho go letlakala 32]

© Christie’s Images Limited 1997