Dipotšišo tše Tšwago go Babadi

Ke’ng seo se dirago gore “matsaka a dithšaba ka moka” a tle ka ‘ntlong’ ya borapedi bja therešo?—Hagai 2:7.

Jehofa o boletše e sa le pele ka moporofeta Hagai gore: “Dithšaba ka moka ke tlo di šišinya, xwa tseb’o tla matsaka a dithšaba ka moka; me Ntlo yé ke tlo e tlatša letaxô.” (Hagai 2:7) Na go šišinywa ga “dithšaba ka moka” go dira gore “matsaka” a ditšhaba—batho ba dipelo tše di botegago—a amogele borapedi bja therešo? Karabo ke aowa.

Ela hloko gore ke eng seo se šišinyago, goba se šikinyago ditšhaba le seo go šišinya mo go se bakago. Beibele e re ‘ba ditšhaba ba tsoša marole e bile ba rera tša lefeela.’ (Psalme 2:1) “Tša lefêla” tšeo ba duletšego go di “rêra,” goba go naganišiša ka tšona, ke go dira gore mebušo ya bona e tie go ya go ile. Ga go seo se ba šikinyago ge e se seo se hlohlago pušo ya bona.

Boboledi bja lefase ka bophara bja mabapi le Mmušo wo o hlomilwego ke Modimo bjoo bo dirwago ke Dihlatse tša Jehofa ke sona selo seo se hlohlago ditšhaba. Godimo ga moo, Mmušo wa Modimo ka Mesia wo o bušwago ke Jesu Kriste o tlo “phšatla mebušô e mengwê ka moka [ya batho] wa e fediša.” (Daniele 2:44) Molaetša wa kahlolo wo o akaretšwago modirong wa rena wa boboledi o šišinya ditšhaba. (Jesaya 61:2) Le gona tšhišinyego ye e gola kudu ge modiro wa boboledi o dutše o naba gotee le go tia. Go šišinywa mo go boletšwego e sa le pele go Hagai 2:7 go bontšha’ng?

Re bala go Hagai 2:6 gore: “Morêna wa mašaba ó re: Xo sa šetše lebakanyana, ké mo ke tl’o xo šišinya lexodimo le lefase, le lewatlê le naxa.” Ge a be a tsopola temana ye, moapostola Paulo o ngwadile gore: “O holofeditše a re: ‘Ke tla buša ke hudua e sego lefase feela, eupša le legodimo.’ Bjale polelwana e rego ‘Ke tla buša’ e bolela go tlošwa ga dilo tšeo di šišinywago e le dilo tšeo di dirilwego, e le gore dilo tšeo di sa šišinywego [e lego Mmušo] di šale.” (Baheberu 12:26, 27) Ee, tshepedišo ka moka ya gona bjale ya dilo e tlo fedišwa e le gore e šuthelele lefase le lefsa leo le dirilwego ke Modimo.

Batho ba dipelo tše di botegago ba tla borapeding bja therešo eupša e sego ka gobane ditšhaba di šišintšwe goba di šikintšwe. Seo se ba gogelago go Jehofa le borapeding bja gagwe ke sona seo se šišinyago ditšhaba, e lego modiro wa lefase ka bophara wa boboledi wa mabapi le Mmušo wa Modimo o hlomilwego. Go bolelwa ga ‘ditaba tše di thabišago tše dibotse tša ka mo go sa felego’ go gogela batho bao ba sekametšego go lokeng borapeding bja Modimo wa therešo.—Kutollo 14:6, 7.

Molaetša wa Mmušo ke wa kahlolo le phološo. (Jesaya 61:1, 2) Mafelelo a go o bolela lefaseng ka bophara a gabedi: go šišinya ditšhaba le go tla ga matsaka a ditšhaba letagong la Jehofa.