Morero wa Modimo ka Lefase—O Kgaufsi le go Phethagatšwa

GE Adama le Efa ba be ba sa le Paradeiseng, Modimo o ba neile taelo ye: “Tswalang Le atê, tlalang lefase, Le le fenyê, Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.”—Genesi 1:28.

Go fenya lefase go be go bolela se se fetago go le lema goba go hlokomela karolo e nyenyane ya lona. Adama le Efa gotee le bana ba bona ba be ba swanetše go katološa Paradeise go fihla ge e aparetša lefase ka moka. Eupša, banyalani ba pele ba ile ba dira sebe gomme ba rakwa tšhemong ya Edene. (Genesi 3:23, 24) Eupša seo se be se sa bolele gore lefase le ka se fenywe.

Batho bao ba kwago ba tla kgona go fenya lefase, ka baka la gore ba tla šegofatšwa ke Modimo. Ge setšhaba sa Isiraele ya bogologolo se be se šegofatšwa ke Modimo, mašemo a sona a be a tšweletša dibjalo tša go nona gomme dirapa tša sona di enywa dienywa tša go kgahliša. Go tlo ba bjalo ge lefase la rena ganyenyane-ganyenyane le fetoga paradeise. Ka ge go holofeditšwe ka Lentšung la Modimo leo le buduletšwego, Beibele, “Lefase le nthšitše dikenyô tša lôna. Re šexofatšwa ke Modimo, Modimo wa rena.” (Psalme 67:6) Ge e le gabotse, mafulo a matala a lefase le dithaba, dihlare tša lona le matšoba, dinoka tša lona le mawatle di tlo thaba. (Psalme 96:11-13; 98:7-9) Lefase la rena le tla be le tsošološitšwe le e-na le dimela tše di kgahlišago, dinonyana tša mebalabala, diphoofolo  tša go kgahliša le batho ba dipelo tša go loka.

Lefase le Lefsa le Kgaufsi!

Ga bjale re kgaufsi le go tshela mollwane wa lefase le lefsa leo le holofeditšwego ke Jehofa Modimo. Moapostola Petro o ngwadile gore: “Go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” (2 Petro 3:13) Ka morago ga go bala mantšu ao a Petro, ba bangwe ba ka phetha ka gore polanete ye e ka se ke ya fetoga paradeise. Ba ka nagana gore go tlo fetošwa magodimo le lefase la kgonthe. Na go tla ba bjalo?

“Magodimo a mafsa” ke’ng? Ga se magodimo a kgonthe ao a hlodilwego ke Modimo. (Psalme 19:1, 2) Petro o be a šetše a boletše ka “magodimo” a seswantšhetšo—mebušo ya batho yeo e godišitšwego goba yeo e phagametšego balata ba yona. (2 Petro 3:10-12) “Magodimo” a a paletšwe ke go buša batho gomme a tla fedišwa. (Jeremia 10:23; Daniele 2:44) “Magodimo a mafsa” a tlago go a tšeela sebaka ke Mmušo wa Modimo wo o bopšago ke Kgoši Jesu Kriste le baja-bohwa gotee le yena ba 144 000 bao ba tsošetšwago legodimong.—Baroma 8:16, 17; Kutollo 5:9, 10; 14:1, 3.

“Lefase le lefsa” leo Petro a boletšego ka lona ga se polanete e mpsha. Jehofa o dirile lefase e le le le phethagetšego gore batho ba ka phela go lona ka mo go sa felego. (Psalme 104:5) Ka dinako tše dingwe ge Beibele e bolela ka batho e re ke “lefase.” (Genesi 11:1) Lefase leo le lego kgaufsi le go fedišwa ke batho bao ba itirilego karolo ya lefase le le kgopo. Ka mokgwa o swanago, lefase la batho bao ba sa ratego Modimo le ile la fedišwa ka Meetse-fula mehleng ya Noa. (2 Petro 3:5-7) Ka gona, “lefase le lefsa” ke’ng? Ke setšhaba se sefsa—barapedi ba therešo ba Modimo, ba “xo loka dipelong tša bôná.” (Psalme 125:4; 1 Johane 2:17) Melao ka moka ya “lefase le lefsa” e tla tšwa ‘magodimong a mafsa.’ Banna ba go botega lefaseng ba tla kgonthišetša gore ditaelo di a latelwa.

Dilo tše Difsa le tša go Kgahliša!

Ka kgonthe, Jehofa o ile a re direla legae la go kgahliša ge a be a lokiša lefase bakeng sa gore batho ba kgone go phela go lona. Ka boyena o ile a bolela ka modiro wa gagwe wa go bopa lefase e le o “botse kudu.” (Genesi 1:31) Sathane Diabolo o ile a tutuetša Adama le Efa gore ba rabele. (Genesi 3:1-5; Kutollo 12:9) Lega go le bjalo, kgaufsinyane Modimo o tla kgonthišetša gore baloki ba hwetša ‘bophelo bja kgonthe.’ Ke gore “bophelo bjo bo sa felego” Paradeiseng e phethagetšego. (1 Timotheo 6:12, 19) Anke ga bjale re ahla-ahleng ditšhegofatšo tšeo di tlago go thabelwa ka nako yeo.

Nakong ya pušo ya Kriste ya Nywaga e Sekete, Sathane o tla tswalelelwa gomme a ka se sa kgona go tlišetša batho madimabe. Moapostola Johane o re: “Ka bona morongwa [morongwa yo mogolo, Mikaele goba Jesu Kriste] a theoga legodimong a swere senotlelo sa sekoti le ketane e kgolo seatleng sa gagwe. A swara drakone noga ya kgale, yeo e lego Diabolo le Sathane, a e tlema ka nywaga e sekete. A e lahlela sekoting a se tswalela gomme a se tiiša godimo ga yona, gore e se ke ya hlwa e timetša ditšhaba go fihla ge nywaga e sekete e fedile.” (Kutollo 20:1-3; 12:12) Ka ntle le gore ba lokologile tutuetšong ya Sathane nakong ya ge a lahletšwe ka sekoting, batho ba tla thabela ditšhegofatšo tše dingwe tše dintši ka tlase ga pušo ya Mmušo.

Bokgopo, bošoro le dintwa ga di sa tlo ba  gona. Beibele e holofetša gore: “Xo se xokae e mobe ó tlo ba a ile; O tlo bôxa lešope, yêna à se xôna. Ba bolêta e tlo ba bôná beng ba naxa; ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.” (Psalme 37:10, 11, 29) Jehofa Modimo e tla ba “Mo-fediša-dintwa xo fihla mafelong a lefase.” (Psalme 46:9) A kgonthišetšo e kgahlišago gakaakang ya khutšo le polokego!

Dijo tše dibose tša phepo di tla hwetšagala ka boati. Mopsalme o opetše ka gore: “Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.” (Psalme 72:16) Ka nako yeo ga go na yo a tlago go kgotlelela bohloko bja tlala.

Ga go na yo a tlago go babja. Ruri, “xo ka se bê le e a rexo: Ke a babya!” (Jesaya 33:24; 35:5, 6) Ge Jesu Kriste a be a le lefaseng, o ile a fodiša ba swerwego ke lephera, digole le difofu. (Mateo 9:35; Mareka 1:40-42; Johane 5:5-9) Akanya ka seo a tlago go se dira lefaseng le lefsa! Nagana ka lethabo leo le tlago go ba gona ge difofu, difoa, digole le dimumu di fodišwa.

Ge batho ba kwago ba batamela phethegong, mathata a botšofadi a tla rarollwa. Digalase tša mahlo, mahlotlo, dikota tša digole, ditulo tša digole, dipetlele le dihlare ga di sa tlo ba gona. Ruri go tla ba le phetogo e kgahlišago ge re boela matleng a bofsa! (Jobo 33:25) Mesong e mengwe le e mengwe re tlo tsoga re lapologile re ikemišeditše go thoma mediro e thabišago ya letšatši le lefsa.

Dipelo tša rena di tla thabišwa ke go tsošwa ga bao re ba ratago le ba bangwe. (Johane 5:28, 29; Ditiro 24:15) Ruri go tla thabiša go amogela Abele, Noa, Aborahama, Sara, Jobo, Moše, Ruthe, Dafida, Eliya, Esitere le ba bangwe ba bantši! Ba bangwe ba dimilione le bona ba tla tsošwa. Bontši bja bona ga se bja ithuta ka Jehofa, eupša bo tla amogelwa ke batho bao ba ikemišeditšego go ba ruta ka Modimo, merero ya gagwe le ka Morwa wa gagwe Jesu Kriste. Ge bao ba tsošitšwego ba tseba Mmopi wa bona, tsebo ya go tseba Jehofa ka kgonthe e tla tlala lefase.

Go feta tšohle, re tla kgona go rapela Modimo a nnoši wa therešo ka mo go sa felego. Re tla ba le tokelo e kgethegilego ya go ‘hlankela Morena re thabile,’ le gona re tla dirišana gabotse ge re aga dintlo tše dibotse, re lema gomme mafelelong re fenya lefase ka moka. (Psalme 100:1-3; Jesaya 65:21-24) Go tla thabiša kudu go phela ka mo go sa felego paradeiseng ya khutšo le e botse yeo e tšweletšago kudu yeo e godišago leina le lekgethwa la Jehofa!—Psalme 145:21; Johane 17:3.

Teko ya Mafelelo ya Batho

Nakong ya Pušo ya gagwe ya Nywaga e Sekete, Jesu o tla diriša mohola wa sehlabelo sa topollo bathong ka moka bao ba kwago. Mafelelong sebe sa batho se tla tlošwa gomme ba tla išwa phethegong. (1 Johane 2:2; Kutollo 21:1-4) Ge ditla-morago tša sebe sa Adama di fedišitšwe ka mo go feletšego, batho ba phethagetšego ba tla fihlelela ditekanyetšo tša Modimo mebeleng, menaganong, boitshwarong le moyeng. Ka gona, ‘ba ka phela’ ka kgonthe ge ba fihla boemong bja phethego bja go hloka sebe. (Kutollo 20:5) Ruri se le lefase la Paradeise di tla tagafatša Jehofa!

Nakwana ka morago ga ge Pušo ya Kriste  ya Nywaga e Sekete e fedile, Sathane Diabolo le batemona, goba barongwa ba kgopo, ba tla lokollwa sekoting seo ba tla bego ba lahletšwe go sona nywaga-kgolo e lesome pejana. (Kutollo 20:1-3) Ba tla dumelelwa gore ba leke la mafelelo go aroša batho go Modimo. Le ge e le gore batho ba bangwe ba tla ineela dikganyogong tše mpe, borabele bjo bo ka se atlege. Jehofa o tla fediša batho ba babe bao ba rabelago gotee le Sathane le batemona ba gagwe ka moka. Go ka se sa ba le bokgopo. Badiri ba bobe ka moka ba tla be ba feletše sa ruri, gomme baloki ba tlo newa bophelo bjo bo sa felego.—Kutollo 20:7-10.

Na o tla ba Gona?

Bophelo bjo bo sa felego bja lethabo bo letše ka pele ga bao ba ratago Jehofa Modimo. Paradeiseng go ka se be le seo se lešago bodutu ka bophelo bjo bo sa felego. Ge e le gabotse, bophelo bo tla thabiša ge nako e dutše e feta, gobane go tseba Jehofa Modimo go ka se ke gwa lekanyetšwa. (Baroma 11:33) Ka mehla o tla ba le selo se sefsa seo o tlago go ithuta sona, le gona o tla ba le nako e ntši ya go monya tsebo. Ka baka la’ng? Ka baka la gore o tla phela e sego feela nywaga e 70 goba e 80, eupša ka mo go sa felego.—Psalme 22:26; 90:10; Mmoledi 3:11.

Ge e ba o rata Modimo, o tla thabela go dira thato ya gagwe ka mehla. Moapostola Johane o ngwadile gore: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.” (1 Johane 5:3) Ka gona, ge go tliwa tabeng ya go kgahliša Jehofa Modimo o se ke wa dumelela selo se go thibela go dira se se lokilego. Dula o gopola ka kholofelo e kgahlišago yeo Lentšu la Modimo, Beibele le go neago yona. Ikemišetše go dira thato ya Jehofa le gona o se ke wa fapoga tseleng yeo. Ka gona o tla ba gona ge morero wa Modimo ka lefase o phethagatšwa gomme lefase la rena le fetoga paradeise ya ka mo go sa felego.

[Seswantšho go letlakala 4]

Ka tšhegofatšo ya Modimo, mašemo a Isiraele a ile a tšweletša kudu

[Seswantšho go letlakala 7]

Ke ditšhegofatšo dife tšeo o holofelago go di thabela Paradeiseng?