Morero wa Modimo ka Lefase ke Ofe?

KE KA baka la’ng o thabela go sepela phakeng goba go sepela serapeng sa matšoba a go nkga bose? Ke ka baka la’ng o thaba ge o bona letsha le lebotse goba dithaba tše ditelele tšeo ditlhora tša tšona di khupeditšwego ke maru? Ke ka baka la’ng o ema ganyenyane gore o theetše melodi e thabišago ya dinonyana tšeo di opelago godimo ga dihlare? Le gona, ke ka baka la’ng o thabela go bogela dikgama tša go kgahliša di tshela-tshela goba mohlape wa dinku wo o fulago ka molatswaneng?

Go na le karabo e tee feela dipotšišong tše ka moka. Re be re bopetšwe go phela Paradeiseng! Ke moo batswadi ba rena ba pele, Adama le Efa ba thomilego go phela gona. Re abetše tlhologelo ya go phela Paradeiseng go bona, gomme bona ba e neilwe ke Mmopi wa bona Jehofa Modimo. O be a tseba gore re tla thabišwa ke Paradeise ka baka la gore ge a be a re bopa o re neile dika tšeo di nyakegago gore re thabele legae la rena le lebotse la lefaseng.

Ke ka baka la’ng Jehofa a ile a bopa lefase? O ile “a le dirêla xo dulwa ke batho.” (Jesaya 45:18) “E a dirilego lefase” o neile Adama le Efa legae le lebotse la paradeise, tšhemo ya Edene. (Jeremia 10:12; Genesi 2:7-9, 15, 21, 22) Ruri ba swanetše go ba ba be ba kgahlwa ke melapo ya yona, matšoba a yona le dihlare tša yona! Dinonyana tše dibotse di be di bonwa sebaka-bakeng gomme diphoofolo tša mehuta-huta di be di ralala nageng—go se na yeo e bego e le kotsi bathong. Dihlapi le dibopiwa tše dingwe di be di thala ka gare ga meetse a sekilego le ao a hlwekilego a lefase. Sa bohlokwa kudu go feta tšohle ke gore Adama le Efa ba be ba le gotee. Ba be ba tla godiša bana gomme ba katološa legae la bona la Paradeise ka lethabo lapeng la bona leo le golago.

Le ge lefase e se paradeise lehono, le ka bapišwa le legae le lebotse leo le thabilego. Legae la rena leo re le neilwego ke Modimo la lefaseng ka bophara le na le tšohle tšeo re di nyakago—seetša, phišo, meetse le dijo. Re thabišwa kudu ke seetša sa letšatši le phišo ya lona gotee le seetša se se phadimago sa ngwedi bošego! (Genesi 1:14-18) Ka mpeng ya lefase go na le dibešwa, tše bjalo ka malahla le oli, tšeo re ka di šomišago go fehla phišo. Re na le meetse ka baka la modikologo wa meetse  le tshepedišo ya dinoka, matsha le mawatle. Le gona lefase le adilwe ka bjang bjo botala bjo bo swanago le mmete.

Go swana le ge dijo di ka bolokwa ka gae, lefase le na le dijo tše dintši polokelong ya lona. Jehofa o re nea ‘dihla tše di enywago le go khoriša dipelo tša rena ka mo go feletšego ka lethabo,’ ka dibjalo ka mašemong le dienywa ka dirapeng. (Ditiro 14:16, 17) Ka ge lefase e šetše e le legae leo le thabišago, akanya gore le tla ba bjang ge “Modimo yo a thabilego,” Jehofa, a le dira paradeise!—1 Timotheo 1:11.

 [Methopo ya Diswantšho go letlakala 2]

COVER: Earth: NASA photo; Stars: NASA, ESA and AURA/Caltech