Na o ‘Bolela o Lokologile’?

BATHO ba fetago dimilione tše tshela dinageng tše 235 ba na le selo seo Beibele e se bitšago ‘tokologo ya polelo.’ Polelwana ye e tšwelela ka makga a 16 ka go Phetolelo ya Lefase le Lefsa ya Mangwalo a Bakriste a Segerika. (Bafilipi 1:20; 1 Timotheo 3:13; Baheberu 3:6; 1 Johane 3:21) ‘Tokologo ya polelo’ e akaretša’ng? Ke’ng seo se re thušago go ba le yona? Tokologo ye e re thuša dikarolong dife tša poledišano e le gore re kgone go bolela re lokologile?

Go ya ka Vine’s Expository Dictionary of Old and New Testament Words, polelwana ya Segerika bakeng sa “tokologo ya polelo” e tliša kgopolo ya “go bolela ka bolokologi, go bolela ka go se šitišwe, . . . go bolela ka sebete o sa boife; ka go rialo wa ikholofela, wa bolela ka go tia o thabile, ka sebete, gomme ga se ka mehla e šupago tabeng ya polelo.” Lega go le bjalo, go bolela ka bolokologi ka tsela e bjalo go fapana le go bolela ka go se bontšhe tlhompho goba go se be le boitshwaro. Beibele e re: “Anke polelo ya lena ka mehla e be e kgahlišago.” (Bakolose 4:6) Go bolela ka bolokologi go akaretša go ba bohlale mola ka lehlakoreng le lengwe re sa dumelele maemo a gateletšago goba go boifa batho go re šitiša go bolela.

Na go bolela ka bolokologi ke tokelo yeo re e neilwego e le bohwa? Ela hloko seo moapostola Paulo a se ngwaletšego Bakriste kua Efeso. O itše: “Nna motho yo a fetwago le ke yo monyenyane-nyenyane wa bakgethwa bohle, ke neilwe botho bjo bo sa swanelago gore ke bolele ditaba tše dibotse ditšhabeng mabapi le mahumo a ka se kego a lekanywa a Kriste.” Paulo o okeditše ka gore e be e le ka baka la Jesu Kriste moo “re nago le tokologo ye ya go bolela le go batamela ka kgodišego ka tumelo ya rena go yena.” (Baefeso 3:8-12) Go e na le gore e be tokelo, ke mpho yeo re e neilwego ka baka la tswalano ya rena le Jehofa Modimo yeo e theilwego tumelong go Jesu Kriste. Anke re boneng seo se ka re thušago go hwetša tokologo ye le kamoo re ka e bonagatšago ka gona ge re dira boboledi, ge re ruta le ge re rapela.

Ke’ng Seo se re Thušago go Bolela ka Sebete?

Jesu Kriste ke mohlala o mogolo tabeng ya go bolela ka bolokologi. Go ba ga gagwe yo mafolofolo go ile gwa mo tutueletša gore a tsome dibaka tša go dira boboledi. Go sa šetšwe gore o be a khuditše, a e-ja lapeng la motho yo mongwe goba a le tseleng, o ile a diriša dibaka ka moka gore a bolele ka Mmušo wa Modimo. Ga go maroga goba tlaišo e lego molaleng yeo e bego e ka tšhošetša Jesu gomme ya dira gore a tswalele molomo. Go e na le moo, ka sebete o  ile a pepentšha mekgwa ya baetapele ba bodumedi bja maaka ba mehleng ya gagwe. (Mateo 23:13-36) Gaešita le ge a be a golegilwe e bile a sekišwa kgorong ya tsheko, Jesu o ile a bolela a sa boife.—Johane 18:6, 19, 20, 37.

Baapostola ba Jesu le bona ba be ba bolela ba lokologile. Ka Pentekoste ya 33 C.E., Petro o boletše a lokologile pele ga lešaba la batho ba fetago 3 000. Ke therešo gore pejana o ile a boifa ge a be a tsebja ke ngwanenyana wa mohlanka. (Mareka 14:66-71; Ditiro 2:14, 29, 41) Ge ba be ba gogwa-gogwa pele ga baetapele ba bodumedi, Petro le Johane ga se ba ka ba thothomedišwa ke poifo. Ba sa dika-dike, ba ile ba nea bohlatse ka sebete mabapi le Jesu Kriste yo a tsošitšwego. Ge e le gabotse, e be e le go bolela ka sebete mo ga Petro le Johane mo go ilego gwa dira gore baetapele ba bodumedi ba lemoge gore banna ba ba be ba kile ba ba le Jesu. (Ditiro 4:5-13) Ke’ng seo se ba thušitšego go bolela ka sebete ka tsela ye?

Jesu o holofeditše baapostola ba gagwe gore: “Ge ba le gafa, le se ke la belaela mabapi le kamoo le tlago go bolela ka gona goba seo le tlago go se bolela; gobane seo le tlago go se bolela le tla se newa ka nako yeo; gobane bao ba bolelago ga se lena feela, eupša ke moya wa Tatago lena wo o bolelago ka lena.” (Mateo 10:19, 20) Moya o mokgethwa o thušitše Petro le ba bangwe gore ba fenye dihlong goba poifo yeo e ka bago e ile ya šitiša go bolela ga bona ka bolokologi. Tutuetšo ya moya woo o matla e ka re thuša le rena.

Go oketša moo, Jesu o neile balatedi ba gagwe taelo ya gore ba dire barutiwa. Se se be se swanetše ka ge e le Yena yo a neilwego “matla ka moka legodimong le lefaseng.” Le gona ‘o na le bona.’ (Mateo 28:18-20) Go lemoga gore ba thekgwa ke Jesu ka tsela e bjalo go ile gwa nea barutiwa ba pele kholofelo ge ba be ba dutše ba lebeletšana le balaodi bao ba bego ba ikemišeditše go thibela modiro wa bona wa boboledi. (Ditiro 4:18-20; 5:28, 29) Go lemoga seo go ka dira gore le rena re be le kholofelo.

Ge a be a bontšha lebaka le lengwe gape la go bolela ka bolokologi, Paulo o ile a tswalanya kholofelo le “tokologo e kgolo ya go bolela.” (2 Bakorinthe 3:12; Bafilipi 1:20) Ka ge ba be ba ka se kgone go dula ba sa bolele molaetša o mobotse gakaakaa wo o neago kholofelo, Bakriste ba ile ba swanela ke go o botša ba bangwe. Ee, kholofelo ya rena ke yona e dirago gore re bolele ka bolokologi.—Baheberu 3:6.

Go Dira Boboledi ka Sebete

Re ka dira bjang boboledi ka sebete gaešita le ka tlase ga maemo a thata? Ela hloko mohlala wa moapostola Paulo. Ge a be a golegilwe kua Roma, o ile a kgopela badumedi-gotee le yena go rapelela taba ya gore ‘a newe bokgoni bja go bolela ge a ahlamiša molomo, gore a bolele ka sebete kamoo a swanelago go bolela ka gona.’ (Baefeso 6:19, 20) Na dithapelo tšeo di ile tša arabja? Ee! Ge a be a golegilwe, Paulo o ile a tšwela pele “a [bolela] ka mmušo wa Modimo . . . ka tokologo e kgolo kudu ya polelo, a se na tšhitišo.”—Ditiro 28:30, 31.

Go diriša dibaka tšeo re di hwetšago bakeng sa go nea bohlatse mošomong, sekolong goba ge re le leetong go ka leka bolokologi bja rena bja go bolela. Dihlong, go boifa tsela yeo ba bangwe ba ka arabelago ka yona goba go se holofele bokgoni bja rena go ka dira gore re se ke ra nyaka go bolela. Le tabeng ye, moapostola Paulo o re beela mohlala o mobotse. O ngwadile gore: “Re [ile] ra rapa sebete ka Modimo wa rena gore re bolele le lena ditaba tše dibotse tša Modimo ka go katana mo gogolo.” (1 Bathesalonika 2:2) Paulo o be a ka se kgone go dira seo ka matla a gagwe eupša o ile a kgona go se dira ka baka la ge a be a ithekgile ka Jehofa.

Thapelo e ile ya thuša mosadi yo a bitšwago Sherry gore a rape sebete ge go be go tšwelela sebaka sa gore a nee bohlatse bjo bo sa rulaganyetšwago. Ka letšatši le lengwe ge a be a emetše monna wa gagwe gore a boe mo a bego a ile gona, o ile a bona mosadi yo mongwe yo a bego a ikemetše kua thokwana. Sherry o boletše gore: “Ke tšhogile, ke ile ka rapela Jehofa gore a mphe sebete.” Ge Sherry a be a dutše a batamela mosadi yoo, moruti wa kereke ya Baptist o ile a fihla. Sherry o be a sa letela gore a ka kopana le moruti. Lega go le bjalo, o ile a rapela gape  gomme a kgona go nea bohlatse. O ile a sepedišetša mosadi yoo puku gomme a dira dithulaganyo tša go dira leeto la go boela. Ge re diriša dibaka tša go nea bohlatse, re ka kgodišega gore go ithekga ka Jehofa go tla re thuša go bolela re lokologile.

Ge re Ruta

Go bolela ka bolokologi go tswalanywa kgaufsi kudu le go ruta. Beibele e bolela mabapi le “banna bao ba hlankelago ka mokgwa o mobotse” ka phuthegong gore: “Ba ikhweletša boemo bjo bobotse le tokologo e kgolo ya polelo tumelong mabapi le Kriste Jesu.” (1 Timotheo 3:13) Ba hwetša tokologo ye ya polelo ka go diriša seo ba se rutago ba bangwe. Go dira bjalo go šireletša le go matlafatša phuthego.

Ge re bolela ka bolokologi ka tsela ye, keletšo ya rena e atlega kudu gomme go na le kgonagalo e kgolo ya gore e ka dirišwa. Go e na le go šitišwa ke mohlala wo e sego o mobotse, batheetši ba kgothatšwa ke go bona seo ba se rutwago se dirišwa. Tokologo ye e thuša bao ba nago le ditshwanelo tša moya go ‘bušetša ngwanabo bona tseleng’ pele ga ge bothata bo ka mpefala le go feta. (Bagalatia 6:1) Go fapana le seo, motho yo a sa beego mohlala o mobotse a ka dika-dika go nea keletšo, ka ge a nagana gore ga a swanelege go nea keletšo. Go dika-dika go nea keletšo e swanetšego go ka baka mafelelo a kotsi.

Go bolela ga rena ka sebete ga go bolele gore re be bao ba swayago diphošo goba go gatelela dikgopolo tša rena. Paulo o kgothaditše Filemone “ka baka la lerato.” (Filemone 8, 9) Le gona go bonagala mantšu a moapostola yo a ile a amogelwa gabotse. Ee, mogolo o swanetše go tutuetšwa ke lerato ge a nea keletšo le ge e le efe!

Ruri go bolela ka bolokologi go bohlokwa ge go newa keletšo. Le gona go bohlokwa le ka dinako tše dingwe. Paulo o ngwaletše phuthego ya Korinthe gore: “Go lena ke na le tokologo e kgolo ya go bolela. Ke ikgantšha kudu ka lena.” (2 Bakorinthe 7:4) Ge go be go swanetše gore a rete bana babo le dikgaetšedi, Paulo ga se a ka a dika-dika go dira bjalo. Lerato le ile la mo tutueletša go lebiša tlhokomelo dikeng tše dibotse tša badumedi-gotee le yena, gaešita le ge a be a lemoga diphošo tša bona. Phuthego ya Bokriste le yona lehono e a agwa ge bagolo ka bolokologi ba reta le go kgothatša bana babo bona le dikgaetšedi.

E le gore ba atlege ge ba ruta, Bakriste ka moka ba swanetše go bolela ba lokologile. Sherry, yo go boletšwego ka yena pejana o be a nyaka go kgothaletša bana ba gagwe gore ba nee bohlatse sekolong. O dumela ka gore: “Gaešita le ge ke godišeditšwe therešong, ke be ke nea bohlatse ka sewelo sekolong. Le gona ke be ke nea bohlatse bjo bo sa rulaganyetšwago ge ke be ke gopotše. Ke ile ka ipotšiša gore, ‘Ke beela bana ba-ka mohlala ofe?’” Se se ile sa tutueletša  Sherry gore a dire boiteko bjo bogolo bja go nea bohlatse bjo bo sa rulaganyetšwago.

Ee, ba bangwe ba lebelela ditiro tša rena gomme ba a lemoga ge re sa dire seo re se rutago. Ka gona, anke re direng gore re be le tokologo ya polelo ka go katanela go dira gore seo re se dirago se dumelelane le seo re se bolelago.

Ge re Rapela

Go bolela ka bolokologi go bohlokwa kudu ge go tliwa tabeng ya ge re rapela Jehofa. Re sa šitišwe ke selo, re ka ntšhetša Jehofa sa mafahleng ka kholofelo ya gore o kwa dithapelo tša rena le gore o tla di araba. Ka baka leo, re thabela go ba le tswalano e borutho le ya kgaufsi le Tatago rena wa legodimong. Ga se ra swanela go dika-dika go batamela Jehofa, re nagana gore ga re swanelege le ganyenyane. Go thwe’ng ge e ba go ikwa re le molato ka phošo e itšego goba sebe go re šitiša go ntšha sa mafahleng? Na re sa dutše re ka batamela Mmuši wa legohle ka bolokologi?

Boemo bja Jesu bjo bo phagamego bjalo ka Moperisita yo a Phagamego bo re nea motheo o oketšegilego wa go ba le kholofelo ge re rapela. Go Baheberu 4:15, 16, re bala gore: “Moperisita yo a phagamego yo re nago le yena ga se yo a ka se kego a re kwela bohloko bofokoding bja rena, eupša ke yo a lekilwego ka ditsela tšohle go swana le rena, eupša a se na sebe. Ka gona, a re batameleng ka tokologo ya go bolela sedulong sa bogoši sa botho bjo bo sa swanelago, gore re hwetše kgaugelo le botho bjo bo sa swanelago e le gore re thušwe ka nako e swanetšego.” Wo ke mohola wa lehu la Jesu le karolo ya gagwe bjalo ka Moperisita yo a Phagamego.

Ge e ba re fišegela go kwa Jehofa, re ba le kholofelo ya gore ruri o tla re kwa. Moapostola Johane o ngwadile gore: “Baratiwa, ge e ba dipelo tša rena di sa re ahlole, gona re bolela re lokologile go Modimo; gomme se sengwe le se sengwe se re se kgopelago re se hwetša go yena, gobane re boloka ditaelo tša gagwe e bile re dira dilo tše di kgahlišago mahlong a gagwe.”—1 Johane 3:21, 22.

Go rapela Jehofa ka ntle le tšhitišo go bolela gore re ka mmotša selo le ge e le sefe. Re ka botša Jehofa selo le ge e le sefe seo re se boifago, selo le ge e le sefe seo se re tshwenyago, se re belaetšago goba se se re nyamišago, re e-na le kholofelo ya gore o tla theetša dithapelo tša rena tše di tšwago pelong. Gaešita le ge re dirile sebe se segolo, go ikwa re le molato ga se gwa swanela go re thibela go bolela ka bolokologi thapelong ge e ba ka kgonthe re itshola.

Ruri mpho ye ya go bolela ka bolokologi ke ya bohlokwa. Ka yona, re ka tumiša Modimo modirong wa rena wa boboledi le wa go ruta gomme ra batamela kgaufsi kudu le yena ka thapelo. Anke re ‘se keng ra lahla tokologo ya rena ya go bolela, yeo e tlago go lefša ka moputso o mogolo’—moputso wa bophelo bjo bo sa felego.—Baheberu 10:35.

[Seswantšho go letlakala 13]

Moapostola Paulo o ile a bolela ka sebete

[Diswantšho go letlakala 15]

E le gore re rute ka katlego, go nyakega gore re bolele re lokologile

[Seswantšho go letlakala 16]

Go bohlokwa go bolela ka bolokologi ge re rapela