“Re Swanetše Go Kwa Modimo E Le Mmuši Go E-na LE BATHO”

‘Tlhabano ke ya Jehofa’

MANABA a mabedi a eme a lebane ka mahlakoreng ka bobedi a moedi. E šetše e le matšatši a 40 banna ba Isiraele ba aparetšwe ke letšhogo gomme ba rogwa ke Goliata, mogale wa Bafilisita.—1 Samuele 17:1-4, 16.

Goliata o rumola Baisiraele a goeletša ka mantšu a rego: “Hlaolang monna wa lena, a foloxêlê fá xo nna. Xe a ka kxôna xo hlabana le nna a mpolaya, xôna re tlo ba bahlanka ba lena. Xe nna nka mmolaya, xôna lena Le tlo ba balata ba rena la re hlankêla. . . . Lehono ke sa nyaditše dirá tša Isiraele. Nthšang monna a hlabanê le nna.”—1 Samuele 17:8-10.

Mehleng ya bogologolo, go be go tlwaelegile gore bagale ba babedi ba lwe ba emetše dinaga tša gabo bona. Phenyo e be e e-ba ya naga ya bo mothopa-sefoka. Eupša mohlohli yo wa Isiraele ga se mohlabani feela yo a tlwaelegilego. Ke tšitširipa—lenaba le lešoro le le le tšhošago. Lega go le bjalo, ge Goliata a kwera madira a batho ba Jehofa, o ipakela mathata.

Ye ga se ntwa feela e tlwaelegilego ya tša bohlabani. Tlhabano e magareng ga Jehofa le medimo ya Bafilisita. Go e na le gore Kgoši ya Isiraele e lego Saulo e etelele madira a yona pele ka sebete, e ile ya aparelwa ke poifo.—1 Samuele 17:11.

Lesogana le Bota Jehofa

Nakong ye ya ge go engwe, lesogana leo le bego le šetše le tloleditšwe go ba kgoši ya Isiraele le etela barwarre ba lona madireng a Saulo. Leina la lona ke Dafida. Go kweng ga lona mantšu a Goliata, le botšiša ka gore: “Mo-Filisita eo, lešoboro leo ké mang xe a bile a roxa dirá tša Modimo a phelaxo?” (1 Samuele 17:26) Go ya ka Dafida, Goliata o emela Bafilisita le medimo ya bona. A galefile ka mo go swanetšego, Dafida o kganyoga go emela Jehofa le Isiraele gotee le go lwa le tšitširipa ya moheitene. Eupša Kgoši Saulo o re: “O ka se kxônê xo xahlana le Mo-Filisita eo, wa lwa naê’; ka xobane wêna O sa le lesoxanyana.”—1 Samuele 17:33.

Ruri pono ya Saulo le ya Dafida di tloga di fapana! Saulo o iponela feela mošemanyana wa modiši yo a nyakago go lwa le tšitširipa e matla. Lega go le bjalo, Dafida o iponela feela motho yo a nyatšago Morena yo a Phagamego Jehofa. Sebete sa Dafida se theilwe kgodišegong yeo a nago le yona ya gore Modimo a ka se dumelele gore leina la Gagwe le batho ba Gagwe ba kwerwe ntle le kotlo. Ge Goliata a ikgantšha ka matla a gagwe, Dafida o holofela Jehofa gomme o lebelela boemo ka pono ya Modimo.

‘Nna ke tla go Wene ka Leina la Jehofa’

Tumelo ya Dafida e na le motheo o tiilego. O gopola gore Modimo o ile a mo thuša go phološa dinku tša gagwe go bere le tau. Modiši yo yo monyenyane o kgodišegile gore le mo nakong ye Jehofa o tla mo thuša go lebeletšana le lenaba le le matla la Mofilisita. (1 Samuele 17:34-37) Dafida o ya go lwa le Goliata a itlhamile feela ka seraga-mabje le mafsika a mahlano a boreletšana.

Dafida yo monyenyane o amogela tlhohlo ye yeo e bonalago e le e sa kgonegego ka go  ithekga ka matla ao Jehofa a a neago. O botša Mofilisita ka sebete gore: “O tla fá ka thšoša le ka lerumô le ka kôtsê. Xe e le nna ke tlile fá ka ’ina la Morêna wa Mašaba, Modimo wa dirá tša Isiraele tše O bexo O di roxa. Lehono Morêna ó tlo Xo xafêla ’atleng sa-ka, . . . lefase ka moka le tsebê xe xo Isiraele xò na le Modimo. Le lešaba lé ka moka le tlo lemoxa xobane Morêna xa’ thuše ka thšoša le ka lerumô. Thlabanô yé ké ya Morêna.”—1 Samuele 17:45-47.

Ka mafelelo afe? Pego e buduletšwego e re: “Ké wôna mokxwa wo Dafida a fentšexo Mo-Filisita eo ka wôna, ka se-raxa-mabyê le ka lexakabyê; a mmolaya à s’a swara thšoša.” (1 Samuele 17:50) O be a se a swara tšhoša, eupša o be a newa thekgo e matla ke Jehofa Modimo. *

Ruri tumelo ya Dafida go Jehofa e ile ya itlhatsela e le ya kgonthe ntweng yeo! Ge re swanelwa ke go dira kgetho ya gore na re tla boifa batho goba ra bota matla a Jehofa ao a phološago, kgetho e molaleng: “Re swanetše go kwa Modimo e le mmuši go e-na le batho.” (Ditiro 5:29) Go oketša moo, ge re lebelela maemo a thata ka pono ya Jehofa Modimo, re kgona go lebelela mathata a magolo kudu ka tsela e nepagetšego.

[Mongwalo wa ka tlase]

[Lepokisi/Seswantšho go letlakala 9]

GOLIATA E BE E LE YO MOGOLO GAKAAKA’NG?

Pego e lego go 1 Samuele 17:4-7 e re botša gore botelele bja Goliata bo be bo feta meelo e tshela—mo e ka bago dimithara tše tharo. Seo se bontšhago gore Mofilisita yo o be a le kaakang le matla a gagwe, ke sephema-sefega sa gagwe sa mphiri. E be e le sa boima bja dikhilograma tše 57! Theku ya lerumo la gagwe e be e swana le mpheng wa mogoma gomme bogale bja lona e be e le tšhipi ya dikhilograma tše šupago. Ruri ga go makatše gore ditlhamo tša Goliata di be di le boima go feta Dafida!