Lentšu la Jehofa le a Phela

Dintlha tše Kgolo go tšwa Pukung ya Bobedi ya Dipsalme

BJALO ka bahlanka ba Jehofa, re a tseba gore re tla tlelwa ke diteko. Moapostola Paulo o ngwadile gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Ke’ng seo se tla re thušago go kgotlelela diteko le ditlaišo, gomme ka go rialo ra ipontšha re botegela Modimo?

Karolo ya bobedi ya dikarolo tše hlano tša puku ya dipsalme e re nea thušo. Psalme 42 go ya go 72 e re bontšha gore ge e ba re nyaka go kgotlelela diteko ka katlego, re swanetše go bota Jehofa ka mo go feletšego gomme re ithute go letela yena gore a re phološe. Ruri yeo ke thuto ya bohlokwa kudu go rena! Molaetša wa Puku ya Bobedi ya Dipsalme, go etša Lentšu la Modimo ka moka, ‘o a phela e bile ke o matla’ e le ruri gaešita le lehono.—Baheberu 4:12.

JEHOFA KE “SEBÔ SA RENA LE MATLA A RENA”

(Psalme 42:1–50:23)

Molefi o bothopša. A nyamišitšwe ke gore a ka se kgone go ya ngwakong wa Jehofa wa borapedi go yo rapela, o ikhomotša ka gore: “Wêna môya wa-ka! O ithlokofaletša’ng? O ferehlêxêla’ng teng xa-ka? Bôta Modimo!” (Psalme 42:5, 11; 43:5) Temana ye yeo e tšwelelago leboelela e kgomaganya ditematheto tše tharo tša Psalme 42 le 43 gomme e di dira sereto se tee. Psalme 44 ke kgopelo legatong la Bajuda—setšhaba seo se gateletšegilego, mohlomongwe e le ka gobane Baasiria ba nyaka go se hlasela mehleng ya Kgoši Hiskia.

Psalme 45, e lego koša ya mabapi le lenyalo la kgoši, e porofeta ka Kgoši yeo e lego Mesia. Dipsalme tše tharo tše di latelago di hlalosa Jehofa e le “sebô sa rena le matla a rena,” “Kxoši-kxolo ya lefase lohle” le “Yêna Lentswê-sebô.” (Psalme 46:1; 47:2; 48:3) Psalme 49 e bontšha ka mo go kgahlišago gakaakang gore ga go motho ‘yo a ka lopollago ngwanabo’! (Psalme 49:7) Dipsalme tša pele tše seswai tša karolo ya bobedi ya puku ye di hlamilwe ke barwa ba Kora. Ya senyane, e lego Psalme 50, e hlamilwe ke Asafa.

Dipotšišo tša Mangwalo di a Arabja:

44:19—‘Dinaga tša diphukubje’ e be e le eng? Mohlomongwe mopsalme o be a bolela ka mogola wa ntwa, moo bao ba bolailwego ba bego ba fetoga dijo tša diphukubje.

45:13, 14a—“Morwedi wa kxoši,” yo a tlago go “išwa kxošing” ke mang? Ke morwedi wa “Kgoši ya bosafelego,” e lego Jehofa Modimo. (Kutollo 15:3) O emela phuthego ya Bakriste ba tagafaditšwego ba 144 000 bao Jehofa a ba thwalago e le bana ba gagwe ka go ba tlotša ka moya wa gagwe o mokgethwa. (Baroma 8:16) “Morwedi” yo wa Jehofa, ‘yo a itokišitšego bjalo ka monyadiwa yo a ikgabišeditšego monna wa gagwe,’ o tla tlišwa go monyadi—Kgoši yeo e lego Mesia.—Kutollo 21:2.

45:14b, 15—“Basetsana” ba emela bomang? Ke “lešaba le legolo” la barapedi ba therešo, bao ba tlatšago le go thuša mašaledi a tloditšwego. Ka ge ba “[e-tšwa] masetlapelong a magolo” ba phela, ba tla be ba le lefaseng ge lenyalo la Kgoši yeo e lego Mesia le fela legodimong. (Kutollo  7:9, 13, 14) Ka nako yeo, ba tla be ba “thabile bà xoloka.”

45:16—Ke bjang go tla bago le barwa sebakeng sa bo-tatago kgoši? Ge Jesu a be a belegwa lefaseng, o be a e-na le bo-rakgolokhukhu ba lefaseng. E tla ba barwa ba gagwe ge a ba tsoša bahung nakong ya Pušo ya gagwe ya Nywaga e Sekete. Ba bangwe ba bona ba tla ba gare ga bao ba kgethilwego gore e be “bakxôma lefaseng ka moka.”

50:2—Ke ka baka la’ng Jerusalema e bitšwa “felô xa letaxô-taxô”? E be e sa bitšwe bjalo ka baka la ponagalo ya yona. Go e na le moo, e be e le ka gobane Jehofa o be a e diriša gomme a e neile letago ka go e dira lefelo la tempele ya gagwe le motse-mošate wa dikgoši tša gagwe tše di tloditšwego.

Seo re Ithutago Sona:

42:1-3. Go etša ge tshepe, goba kgama ya tshadi, e llela meetse ge e le lefelong le le omilego, Molefi o be a llela Jehofa. O ile a nyama kudu ka ge a be a sa kgone go rapela Jehofa lefelong la Gagwe la borapedi moo ‘megokgo ya gagwe e ilego ya fetoga sejo sa gagwe mosegare le bošego’—o be a se sa duma dijo. Na ga se ra swanela go hlagolela tebogo e tseneletšego ya go leboga Jehofa ge re kgona go mo rapela re e-na le badumedi-gotee le rena?

42:4, 5, 11; 43:3-5. Ge e ba ka lebaka le itšego leo re sa kgonego go le laola re aroganywa ka nakwana le phuthego ya Bokriste, go gopola lethabo leo re bilego le lona ka go kopanela le yona nakong e fetilego go ka re matlafatša. Gaešita le ge go dira bjalo mathomong go ka gakatša bohloko bjoo bo bakwago ke go lewa ke bodutu, go ka re gopotša gore Modimo ke setšhabelo sa rena le gore re swanetše go letela yena gore a re phološe.

46:1-3. Go sa šetšwe manyami le ge e le afe ao a ka re welago, re swanetše go ba le kholofelo e feletšego ya gore “Modimo ké sebô sa rena le matla a rena.”

50:16-19. Motho le ge e le ofe yo a bolelago maaka le yo a dirago dilo tše mpe ga a na tokelo ya go ba moemedi wa Modimo.

50:20. Go e-na le gore re fišegele go bolela ka diphošo tša ba bangwe phatlalatša, re swanetše go di hlokomologa.—Bakolose 3:13.

“A MÔYA WA-KA O IKHOMOLÊLÊ Ò LETETŠE MODIMO FÊLA”

(Psalme 51:1–71:24)

Karolo ye ya dipsalme e thoma ka thapelo ya Dafida e tšwago pelong yeo a e rapetšego ka morago ga go dira sebe le Batseba. Dipsalme 52 go ya go 57 di bontšha gore Jehofa o tla phološa bao ba lahlelago merwalo ya bona go yena le bao ba letelago gore a ba phološe. Go etša ge go bontšhitšwe go Dipsalme 58-64, nakong ka moka ya kgateletšego ya gagwe, Dafida o ile a dira gore Jehofa e be setšhabelo sa gagwe. O opela ka gore: “A môya wa-ka o ikhomolêlê ò letetše Modimo fêla, xobane xe ke holofetše, di tšwa xo Yêna.”—Psalme 62:5.

Go ba le segwera sa kgaufsi le Mophološi wa rena go swanetše go re tutueletša gore re “[hlabe] sefela sa borêna bya ’ina la xaxwe.” (Psalme 66:2) Go Psalme 65, Jehofa o a tumišwa ka ge a nea ka seatla se se bulegilego, e le Modimo mophološi go Psalme 67 le 68 e bile e le Monamoledi go Psalme 70 le 71.

Dipotšišo tša Mangwalo di a Arabja:

51:12—Dafida o ile a kgopela gore a thekgwe ka “môya wa mafolofolo” wa mang? Temana ye ga e bolele ka go ikemišetša ga Modimo go thekga Dafida goba ka moya wa Jehofa o mokgethwa eupša e bolela ka moya wa Dafida ka noši—tshekamelo ya gagwe ya monagano. O  kgopela Modimo gore a mo nee kganyogo ya go dira se se lokilego.

53:1—Motho yo a rego Modimo ga a gona ke “setlaêla” ka tsela efe? Botlaela bjo go bolelwago ka bjona mo ga se bja go hlaelelwa ga motho ke bohlale. Gore motho yo bjalo ke setlaela go bonwa ka go goboga ga gagwe boitshwarong ka tsela yeo e hlalositšwego go Psalme 53:1-4.

58:3-5—Ke ka tsela efe ba babe ba swanago le noga? Maaka ao ba a bolelago ka ba bangwe a swana le bohloko bja noga. A senya botumo bjo bobotse bja bao ba bolelago maaka ka bona. “Byalo ka . . . nôxa ya petla ya sefoa,” ba babe ga ba theetše tlhahlo goba phošollo.

58:7—Ke bjang ba babe ‘ba felago go etša meetse ge a nyamelela’? Dafida a ka ba a be a nagana ka meetse a meedi e itšego ya Lefaseng la Kholofetšo. Le ge mafula a ka oketša meetse a moedi o bjalo, meetse a a ela ka lebelo gomme kapejana a nyamelela. Dafida o be a kgopela gore ba babe le bona ba nyamelele ka go akgofa.

68:13—Ke ka tsela efe “Diphêxô tša leeba di [bego di] phadima bo-ka thsipi-thsêhla; diphofa tša lôna di etša xauta e thsêhla”? Maeba a mangwe a mmala wa bosehla bjo bo nago le botala-lerata a na le mafofa a mangwe ao a nago le mmala o phadimago. Mafofa a ona a ba le go phadima go itšego ge a hlabelwa ke seetša sa letšatši. Mohlomongwe Dafida o be a swantšha bagale ba Isiraele ba fentšego ba tšwago ntweng le maeba a bjalo—a fofago ka bokgwari le a phadimago. Go etša ge diithuti tše dingwe di nagana, tlhaloso ye e ka dirišwa gape go selo sa bokgabo goba sefoka seo se thopilwego e le dithebola. Go sa šetšwe gore boemo e be e le bofe, Dafida o be a šupa go ditsela tšeo ka tšona Jehofa a ilego a thuša batho ba gagwe gore ba fenye manaba a bona.

68:18—“Dibexô tša batho” e be e le bomang? Ba e be e le banna ba lego gare ga mathopša nakong ya ge go thopša Naga ya Kholofetšo. Banna ba bjalo ka morago ba ile ba abelwa go thuša Balefi modirong wa bona.—Esera 8:20.

68:30—Kgopelo ya go “kxalemêla ’bata . . . sa lehlakanoka” e bolela’ng? Ge a be a bolela ka tsela ya seswantšhetšo ka manaba a batho ba Jehofa e le dibata, Dafida o ile a kgopela Modimo gore a ba kgalemele, goba gore a laole matla a bona a senyago.

69:23—‘Go dira gore matheka a manaba a loka-loke’ go bolela’ng? Mešifa yeo e lego lethekeng ke ya bohlokwa bakeng sa go phetha mediro e boima, e bjalo ka go kuka le go rwala merwalo e boima. Matheka ao a loka-lokago a bolela go se be le matla. Dafida o be a rapelela gore manaba a gagwe a se be le matla.

Seo re Ithutago Sona:

51:1-4, 17. Go dira sebe ga se gwa swanela go re aroganya le Jehofa Modimo. Ge e ba re itshola, re ka kgodišega gore o tla re gaugela.

51:5, 7-10. Ge e ba re dirile sebe, re ka kgopela  Jehofa gore a re lebalele ka baka la sebe seo re se abetšego. Le gona, re swanetše go mo rapela gore a re hlatswe, a re bušetše maemong a rena a pele, a re thuše go tloša ditshekamelo tša sebe dipelong tša rena gomme a re nee moya o tsepamego.

51:18. Setšhaba ka moka se be se le kotsing ka baka la dibe tša Dafida. Ka gona, o ile a rapela gore Modimo a be botho go Tsione. Ge re dirile sebe se segolo, gantši seo se tliša kgobogo leineng la Jehofa le phuthegong. Re swanetše go rapela Modimo e le gore re lokiše tshenyo yeo re ka bago re e bakile.

52:8. Re ka swana le “mohlware wa kxabane mo Ngwakong wa Modimo”—ra ba kgaufsi le Jehofa gomme ra enywa dienywa tirelong ya gagwe—ka go mo kwa le ka go amogela tayo ya gagwe ka pelo e tšhweu.—Baheberu 12:5, 6.

55:4, 5, 12-14, 16-18. Maano-mabe a morwa wa gagwe e lego Abesalomo le go ekwa ke moeletši wa gagwe yo a mmotilego kudu e lego Ahitofele go ile gwa kweša Dafida bohloko kudu. Lega go le bjalo, seo ga se sa ka sa dira gore Dafida a se sa bota Jehofa. Ga se ra swanela go dumelela manyami gore a fokodiše go bota ga rena Modimo.

55:22. Re lahlela bjang merwalo ya rena go Jehofa? Re dira se (1) ka go re ka thapelo re mmotše mathata ao a re tshwenyago, (2) ka go retologela Lentšung la gagwe le mokgatlong wa gagwe bakeng sa tlhahlo le thekgo le (3) ka go dira seo re ka se kgonago go rarolla bothata.—Diema 3:5, 6; 11:14; 15:22; Bafilipi 4:6, 7.

56:8. Jehofa ga a lemoge feela boemo bjo re lego go bjona eupša gape o tseba kamoo bo re kgomago ka gona maikwelong.

62:11. Modimo ga a hloke thekgo ya motho goba selo le ge e le sefe. Ke yena mothopo feela wa matla. ‘Matla ke a gagwe.’

63:3. “Botho bya [Modimo] bo phala bophelô ka botse” ka gobane ka ntle le bjona, bophelo ga bo na morero. Re ba bohlale ge re hlagolela segwera le Jehofa.

63:6. Bošego—nako e homotšego le yeo e se nago tšhitišo—e ka ba nako e botse kudu ya go naganišiša.

64:2-4. Lesebo le le gobatšago le ka senya botumo bjo bobotse bja motho. Ga se ra swanela go theetša lesebo le le bjalo goba go le phatlalatša.

69:4. E le gore re boloke khutšo, go ka ba bohlale gore ka dinako tše dingwe re ‘lefe’ ka go kgopela tshwarelo, gaešita le ge re kgodišegile gore ga se ra dira phošo.

70:1-5. Jehofa o kwa dithapelo tša rena tše di akgofilego tša go kgopela thušo. (1 Bathesalonika 5:17; Jakobo 1:13; 2 Petro 2:9) Modimo a ka dumelela gore teko yeo re lebeletšanego le yona e tšwele pele, lega go le bjalo o tla re nea bohlale bja go lebeletšana le boemo ka katlego le go re nea matla a go kgotlelela. A ka se ke a dumelela gore re lekwe go feta kamoo re ka kgonago go kgotlelela ka gona.—1 Bakorinthe 10:13; Baheberu 10:36; Jakobo 1:5-8.

71:5, 17. Dafida o ile a rapa sebete le matla ka gobane a be a ithekgile ka Jehofa bofseng bja gagwe—gaešita le pele ga ge a ka yo lwa le senatla sa Mofilisita e lego Goliata. (1 Samuele 17:34-37) Bafsa ba dira gabotse ge ba ithekga ka Jehofa go tšohle tšeo ba di dirago.

“Dinaxa ka Moka di Tlalê Letaxô la Xaxwe”

Kopelo ya mafelelo karolong ya bobedi ya dipsalme, e lego Psalme 72, e mabapi le bogoši bja Salomo, bjoo bo swantšhetšago maemo ao a tlago go ba gona ka tlase ga pušo ya Mesia. Ditšhegofatšo tšeo di hlaloswago mo ruri ke tše di kgahlišago—go ata ga khutšo, go fela ga kgatelelo le bošoro, motlalo wa dijo lefaseng! Na re tla ba gare ga bao ba tlago go thabela ditšhegofatšo tše gotee le tše dingwe tša Mmušo? Re tla ba gare ga bona ge e ba go swana le mopsalme, re kgotsofatšwa ke go letela Jehofa gomme re mo dira setšhabelo sa rena le matla a rena.

‘Dithapelo tša Dafida di fela’ ka mantšu a: “A xo rêtwê Morêna Modim’a Isiraele, Mo-dira-mehlôlô a nnoši. Xo rêtwê leina la xaxwe la borêna bya neng le neng, dinaxa ka moka di tlalê letaxô la xaxwe. Amene, Amene.” (Psalme 72:18-19) Anke le rena ka mo go swanago re rete Jehofa ka pelo ka moka gomme re tumiše leina la gagwe le le tagafetšego.

[Seswantšho go letlakala 9]

Na o tseba gore ke mang yo a swantšhetšwago ke “morwedi wa kxoši”?

[Seswantšho go letlakala 10, 11]

Na o tseba gore ke ka baka la’ng Jerusalema e bitšwa “felô xa letaxô-taxô”?