Hwetša Kgotsofalo ka go Diriša Melao ya Motheo ya Beibele

KA NTLE le pelaelo o kile wa bona katse e hudupane e bile e gona—e lego ponagatšo ya kgotsofalo ya kgonthe. E ka ba mo gobotse kudu go hudupana bjalo ka yona gomme ra thabela kgotsofalo e swanago! Lega go le bjalo, batho ba bantši ba thatafalelwa ke go hwetša kgotsofalo gomme e ba ya lebakanyana ge e ba e e-ba gona. Ke ka baka la’ng go le bjalo?

Ka gobane gantši re dira diphošo ka baka la go se phethagale ga rena, e bile re swanelwa ke go kgotlelela diphošo tša ba bangwe. Go feta moo, re phela nakong yeo Beibele e e bitšago ‘mehla ya bofelo,’ yeo e swawago ke “dinako tše di hlobaetšago tšeo go lego thata go lebeletšana le tšona.” (2 Timotheo 3:1-5) Gaešita le ge re thabela dikgopolo tše di kgahlišago tša kgotsofalo ya bjaneng bja rena, ba bantši ba rena ga bjale ba kwa ka mo go feletšego kgateletšo ya ‘dinako tše tše di hlobaetšago.’ Na go a kgonega go hwetša kgotsofalo mehleng ye ya rena?

Ela hloko gore Mangwalo ga a re go be go ka se kgonege go lebeletšana le dinako tše tše di hlobaetšago eupša a re go tla ba thata go lebeletšana le tšona. Re ka lebeletšana le tšona ka go diriša melao ya motheo ya Beibele. Ga se ka mehla re ka rarollago mathata a rena eupša re tla hwetša tekanyo e itšego ya kgotsofalo. Anke re hlahlobeng e meraro ya melao e bjalo ya motheo.

E-ba le Pono e Leka-lekanego

Gore re hwetše kgotsofalo, re swanetše go ba le pono e leka-lekanego ka mafokodi a rena le a ba bangwe. Moapostola Paulo o bontšha se lengwalong la gagwe le le yago go Baroma ka gore: “Bohle ba dirile sebe gomme ba hlaelelwa ke letago la Modimo.” (Baroma 3:23) Dibopego tše dintši tša letago la Jehofa di feta kwešišo ya rena kgole. Mohlala o mongwe ke therešo e bonolo yeo e boletšwego go Genesi 1:31 e rego: “Modimo a lebêlêla tšohle tše a di dirilexo, a bôna e le tše botse kudu.” Nako le nako ge Jehofa a kgetha go lebelela dilo ka moka tšeo a di dirilego, ka mehla a ka bolela gore ke tše “botse kudu.” Ga go motho yo a ka bolelago bjalo ka tšohle tšeo a di dirilego. Go amogela gore re na le mafokodi ke mogato wa pele o išago kgotsofalong. Lega go le bjalo, go na le se sengwe se se nyakegago. Re swanetše go kwešiša le go amogela pono ya Jehofa ka dilo.

Lentšu la Segerika leo le fetoletšwego e le “sebe” le tšwa modung wo o bolelago go foša leswao. (Baroma 3:9) Ka mohlala: Akanya ka motho yo a nyakago go thopa sefoka ka go hlaba mosebe mo go swanetšego. O na le mesebe e meraro feela. O thunya mosebe wa pele gomme a foša ka mithara. O lebanya mosebe wa bobedi bokaone eupša o foša gape ka disentimithara tše 30. A tsepamišitše kgopolo ka mo go feletšego, o thunya mosebe wa mafelelo gomme a foša ka disentimithara tše pedi feela. O nyakile o hlaba mo go swanetšego, eupša o tloga o fošitše.

Ka moka ga rena re bjalo ka mmetši yoo wa mesebe yo a nyamilego. Ka dinako tše dingwe go bonagala re foša leswao kudu. Ka dinako tše dingwe re nyaka go nepa eupša re sa no foša leswao. Re a ferekana ka gobane re katane ka thata eupša go be go sa lekana. Bjale a re boeleng go mmetši wa mesebe.

 Ka go nanya o retologa a nyamile ka gobane o be a tloga a nyaka sefoka seo. Kapejana, moswara-marapo o a mmitša gomme a mo fa sefoka, a re: “Ke nyaka go go fa sona ka gobane o a nkgahla e bile ke bone kamoo o lekilego ka thata ka gona.” Mmetši wa mesebe o thaba kudu!

O thabile kudu! Yo mongwe le yo mongwe yo a amogelago “mpho” e tšwago go Modimo ya bophelo bjo bo sa felego e le yo a phethagetšego o tla thaba ka mokgwa wo. (Baroma 6:23) Ka morago ga moo, dilo ka moka tšeo ba di dirago e tla ba tše dibotse—ba ka se tsoge ba fošitše leswao gape. Ba tla kgotsofala ka mo go feletšego. Mo lebakeng la bjale, ge e ba re dula re nagana ka se, re tla kwa re ithabela le go thabela bao ba re dikologilego.

Lemoga Gore Dilo di Tšea Nako

Ke therešo gore dilo ka moka di tšea nako. Lega go le bjalo, na o lemogile gore go thata gakaakang go dula o kgotsofetše ge e ba selo seo o se letetšego se bonala se tšea nako e telele go feta kamoo o bego o letetše goba ge boemo bjo bo sa thabišego bo bonala bo tšwela pele go feta kamoo o bego o hutša ka gona? Lega go le bjalo, ba bangwe ba ile ba kgona go dula ba kgotsofetše maemong a bjalo. Ela hloko mohlala wa Jesu.

Pele a e-tla lefaseng, Jesu e be e le mohlala wa go kwa kua legodimong. Lega go le bjalo, o ile a ‘ithuta go kwa’ ge a be a le mo lefaseng. Bjang? “Dilong tšeo a tlaišegilego ka tšona.” Nakong e fetilego, o be a ile a bona tlaišego eupša yena o be a se a ka a tlaišega. Ge a be a le lefaseng, kudu-kudu go tloga ge a se na go kolobetšwa Jorodane go fihla lehung la gagwe Gologotha, o ile a kgotlelela meleko e mentši. Ga re tsebe dintlha ka moka tša gore Jesu o “dirilwe yo a phethagetšego” bjang tabeng ye, eupša seo re se tsebago ke gore boemo bo tšere nako.—Baheberu 5:8, 9.

Jesu o ile a atlega ka gobane a ile a naganišiša ka “lethabo leo le bego le beilwe pele ga gagwe,” moputso wa potego ya gagwe. (Baheberu 12:2) Lega go le bjalo, ka dinako tše dingwe o be a “lopa le go kgopela . . . ka megoo e matla le megokgo.” (Baheberu 5:7) Ka dinako tše dingwe le rena re ka ikhwetša re rapela ka tsela e swanago. Jehofa o lebelela se bjang? Temana e swanago e bontšha gore Jehofa o ile a kwa Jesu “ka mo go amogelegago.” Le rena Modimo o tla re direla se se swanago. Ka baka la’ng?

Ka gobane Jehofa o tseba mo matla a rena a felelago gona gomme o a re thuša. Yo mongwe le yo mongwe o na le mo a felelago gona ge go tliwa go seo re ka se kgotlelelago. Batho ba kua Benin, Afrika, ba re: “Meetse a mantši kudu a tla feleletša a beta le digwagwa.” Jehofa o kgona go bona ge re le kgaufsi le go felelwa ke matla go feta rena. Ka lerato o fana ka “kgaugelo le botho bjo bo sa swanelago e le gore re thušwe ka nako e swanetšego.” (Baheberu 4:16) O diretše Jesu le batho ba bangwe ba sa balegego sona se. Ela hloko kamoo Monika a ilego a hwetša thušo ya Modimo ka mokgwa wo.

Monika o ikgoletše a se na mathata, a na le mahlahla e bile e le motho yo a dulago a thabile. Ka 1968, ge a be a sa le nywageng ya gagwe ya mathomong ya bo-20, o ile a se kgolwe ge a e-kwa gore o be a na le bolwetši bja multiple sclerosis, e lego bolwetši bjoo gantši bo feleletšago ka gore motho a hwe lehlakore. Se se ile sa fetoša bophelo bja gagwe ka mo go feletšego gomme gwa nyakega diphetogo tše dikgolo bodireding bja gagwe bja nako e tletšego. Monika o ile a  lemoga gore e be e le bolwetši bjo bo tšeago nako e telele. Nywaga e 16 ka morago, o itše: “Bolwetši bja-ka bo sa dutše bo sa alafege e bile go bonala bo tla dula bo le bjalo go fihlela tshepedišo e mpsha ya Modimo ya dilo e dira dilo ka moka tše difsa.” O dumela gore go be go se bonolo ka gore: “Gaešita le ge bagwera ba-ka ba re ke ile ka dula ke le motho yo a thabilego le gore ke thabile go feta le ge e le neng pele, . . . bagwera ba-ka ba paale ba tseba gore ka dinako tše dingwe megokgo ya-ka e ela ka bontši le gona ka nako e telele.”

Lega go le bjalo, o boletše gore: “Ke ithutile go ba yo a sa felego pelo le go thabela pontšhonyana le ge e le efe ya go ba kaone. Tswalano ya-ka le Jehofa e ile ya matlafatšwa ke go lemoga kamoo motho a sa kgonego go ithuša ka gona ge a e-lwa le bolwetši. Ke Jehofa feela yo a ka tlišago phodišo e feletšego.” Ka thušo ya Jehofa, Monika o ile a dula a kgotsofetše gomme ga bjale a ka lebelela morago nywageng ya ka godimo ga e 40 ya tirelo ya nako e tletšego.

Ke therešo gore boemo bja go swana le bja Monika ga bo bonolo. Eupša ka ntle le pelaelo o tla kgotsofala ka mo go oketšegilego ge e ba o lemoga gore dilo tše dingwe di ka tšea nako e telele go feta kamoo o hutšago ka gona. Ka go swana le Monika, le wena o ka kgonthišega ka ‘thušo ya Jehofa ka nako e swanetšego.’

O se ke wa Ipapetša le ba Bangwe—Ipeele Dipakane Tšeo di Fihlelelegago

Ga o swane le motho yo mongwe. Ga go motho yo a swanago tlwaa le wena. Polelwana ya leleme la se-Gun la Afrika e hlalosa therešo ye ka tsela e bonolo, ka gore: “Menwana ya motho ga e lekane.” E tla ba bošilo go bapetša monwana o itšego le o mongwe. O be o ka se nyake Jehofa a go bapetša le motho yo mongwe e bile a ka se tsoge a dirile bjalo. Lega go le bjalo, tshekamelo ya go ipapetša le ba bangwe e tloga e atile bathong gomme e ka ba amoga kgotsofalo. Ela hloko kamoo Jesu a bontšhitšego se ka tsela e matla ge re dutše re bala Mateo 20:1-16.

Jesu o boletše ka “mong” yo a bego a nyaka badiri bakeng sa serapa sa gagwe sa merara. O ile a hwetša banna bao ba bego ba sa šome gomme a ba thwala “e sa le bosasa,” mohlomongwe ka 6:00 mesong. Ba ile ba kwana ka moputso wa letšatši o tlwaelegilego ka nako yeo, e lego tenariase e tee bakeng sa mošomo wa letšatši wa diiri tše 12. Ka ntle le pelaelo banna ba ba be ba thabetše go hwetša mošomo le gore mogolo e be e tla ba o tlwaelegilego. Ka morago, mong wa serapa o ile a hwetša dihlopha tše dingwe gape tša banna bao ba bego ba sa šome gomme le bona a ba thwala—ka 9:00 mesong, 12:00 mosegare, 3:00 thapama, gaešita le ka 5:00 thapama. Ga go le o tee dihlopheng tše yoo a bego a tla šoma letšatši ka moka. Mong wa serapa o ba holofeditše go ba godiša “selo le ge e le sefe se se swanetšego,” gomme bašomi ba dumela.

Mafelelong a letšatši, mong wa serapa o ile a laela mohlokomedi gore a godiše bašomi. O itše go bitšwe bašomi gomme go godišwe bao ba thwetšwego mafelelong pele. Ba ba be ba šomile iri e tee feela, eupša seo se makatšago ke gore ba hweditše mogolo wa letšatši ka moka. Re ka akanya go ngunanguna moo go ilego gwa ba gona. Bao ba bego ba šomile diiri tše 12 letšatši ka moka ba ile ba nagana gore ba be ba tla hwetša mogolo o montši. Lega go le bjalo, le bona ba ile ba hwetša mogolo o swanago.

Ba ile ba arabela bjang? “Ge ba o amogela ba thoma go ngongorega go mong wa ntlo ba re, ‘Ba ba mafelelo ba šomile iri e tee; lega go le bjalo o ba lekantše le rena bao re rwelego boima bja letšatši ka moka le phišo e tšhumago!’”

Lega go le bjalo, mong wa serapa o be a lebelela dilo ka leihlo le le fapanego. O ba bontšhitše gore ba hweditše seo ba bego ba kwane ka sona, e sego ka tlase ga moo. Ba bangwe bona o ile a kgetha go ba fa mogolo wa letšatši ka moka, ka ntle le pelaelo a ba fa go fetiša seo ba bego ba se letetše. Ge e le gabotse ga go yo a ilego lefša ganyenyane go feta kamoo ba bego ba kwane; ge e le gabotse, ba bantši ba ile ba hwetša mogolo o montši go feta kamoo ba bego ba letetše. Ka gona, mafelelong mong wa serapa o ile a botšiša gore: “Na ga go dumelelwe ke molao gore ke dire se ke nyakago go se dira ka dilo tša-ka?”

Bjale akanya ge nkabe mong wa serapa a thomile ka go godiša sehlopha se a se thwetšego pele gomme se sepetše le semeetseng. Nkabe se  ile sa kgotsofala. Go se kgotsofale go ile gwa tšwelela feela ge ba bona gore ba bangwe ba godišwa mogolo o swanago le wa bona le ge ba sa šoma go lekana le bona. Se se ile sa ba befediša go ba go fihla bokgoleng bja go ngongorega malebana le mong, yo mathomong ba bego ba tla mo leboga ka gobane a ba thwetše.

Se se bontšha gabotse seo se diregago ge re ipapetša le ba bangwe. Ge o naganišiša ka tswalano ya gago le Jehofa gomme o leboga tsela yeo a go šegofatšago ka yona, o tla kgotsofala. O se ke wa bapetša boemo bja gago le bja ba bangwe. Ge e ba go bonala eka Jehofa o kgethile go direla ba bangwe selo se se oketšegilego, ba thabele o be o thabe le bona.

Lega go le bjalo, go na le seo Jehofa a se letetšego go wena. Ke eng seo? Bagalatia 6:4 e re: “Anke yo mongwe le yo mongwe a hlatsele seo modiro wa gagwe e lego sona, gomme o tla ba le lebaka la go hlalala ka yena ka noši.” Ka mantšu a mangwe, ipeele dipakane tšeo di fihlelelegago. Rulaganya seo o ka kgonago go se dira gomme o se dire. Ge pakane e le e fihlelelegago gomme wa kgona go e fihlelela, o tla “ba le lebaka la go hlalala.” O tla kgotsofala.

Go tla ba le Meputso

Melao e meraro ya motheo yeo re e ahla-ahlilego e bontšha gore go diriša melao ya motheo ya Beibele ge e le gabotse go ka re tlišetša kgotsofalo gaešita le mo mehleng ye ya bofelo e bile go sa šetšwe go se phethagale ga rena. Ke ka baka la’ng o sa tsome melao e bjalo ya motheo mmalong wa gago wa letšatši le letšatši wa Beibele, e ka ba e le molaleng goba e umakwa dikanegelong goba diswantšhong?

Ge e ba o ikwa gore o felelwa ke kgotsofalo, katanela go lemoga sebaki. Ke moka o tsome melao ya motheo yeo o ka e dirišago bakeng sa go lokiša boemo. Ka mohlala, o ka lebelela go matlakala 110-11 a puku ya ‘Mangwalo ka Moka a Buduletšwe ke Modimo Gomme a a Hola.’ * Matlakaleng ao go ahla-ahlwa puku ya Diema gomme o tla hwetša mehuta-huta ya melao ya motheo le keletšo yeo e lokeleditšwego ka tlase ga dihlogo tše 12. Watch Tower Publications Index * le Watchtower Library go CD-ROM * ke methopo e tšwago pele ya tsebišo. Ka go di diriša kgafetša-kgafetša, o tla ba mahlwa-a-di-bona ge go tliwa tabeng ya go hwetša melao e šomago ya motheo.

Go tla nako yeo ka yona Jehofa a tlago go nea batho ka moka bao ba swanelegago bophelo bjo bo sa felego e le ba phethagetšego lefaseng la paradeise. Maphelo a bona a tla tlala ka kgotsofalo.

[Mengwalo ya ka tlase]

[Ntlhakgolo go letlakala 12]

“Bohle ba dirile sebe gomme ba hlaelelwa ke letago la Modimo.”—Baroma 3:23

[Ntlhakgolo go letlakala 13]

Jesu “o ithutile go kwa dilong tšeo a tlaišegilego ka tšona.”—Baheberu 5:8, 9

[Ntlhakgolo go letlakala 15]

“O tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagalatia 6:4