“Ikxetheleng Bophelô Xore Le Phelê”

“Ke beile bophelô le lehu, le thšexofatšô le thoxô, pele xa lena. Hlê ikxetheleng bophelô xore Le phelê.”—DOITERONOMIO 30:19.

1, 2. Ke bjang go ka thwego motho o bopilwe ka seswantšho sa Modimo?

“A RE direng motho ka xo swanthša ka rena, a swanê le rena.” Mantšu ao a Modimo a ngwadilwe kgaolong ya pele ya Beibele. Genesi 1:26, 27 e bega ka mo go swanetšego gore: “Ké mo Modimo a bopilexo motho, a mmopa ka xo ithswanthša, a mmopa ka xo swanthša ka Yêna Modimo.” Ka gona motho wa pele o be a fapana le dibopiwa ka moka tša lefaseng. O be a swana le Mmopi wa gagwe, a kgona go ekiša mokgwa wa Modimo wa go nea mabaka, wa go bontšha lerato, toka, bohlale le matla. O be a e-na le letswalo leo le mo kgontšhago go dira diphetho tšeo di bego di tla mo hola gotee le tšeo di bego di tla thabiša Tatagwe wa legodimong. (Baroma 2:15) Ka boripana, Adama o be a e-na le tokologo ya boikgethelo. Ge a be a lebelela tlholo ya morwa wa gagwe ya lefaseng, Jehofa o ile a bolela ka mediro ya morwa wa gagwe gore: “Bôna [ke] tše botse kudu.”—Genesi 1:31; Psalme 95:6.

² Re le ditlogolo tša Adama, le rena re bopilwe ka seswantšho sa Modimo gomme re swana le yena. Lega go le bjalo, na ruri re na le kgetho ya mabapi le seo re swanetšego go se dira? Gaešita le ge Jehofa a kgona go tseba e sa le pele seo se tlago go direga, ga a rere e sa le pele seo yo mongwe le yo mongwe wa rena a tlago go se dira le gore mafelelo a gagwe e tla ba afe. Ga a dumelele bana ba gagwe ba lefaseng gore ba laolwe ke go rerwa ga dilo e sa le pele. E le go re thuša go  kwešiša bohlokwa bja go diriša tokologo ya rena ya boikgethelo gore re dire dikgetho tše di nepagetšego, anke sa pele re ithuteng setšhabeng sa Isiraele.—Baroma 15:4.

Tokologo ya Boikgethelo Isiraeleng

3. Molao wa pele go Melao e Lesome e be e le ofe, gomme Baisiraele bao ba botegago ba ile ba kgetha bjang go o kwa?

³ Jehofa o boditše Baisiraele gore: “Ké Nna Morêna Modimo wa xaxo, e a Xo nthšitšexo naxeng ya Egipita ngwakong wa bohlanka.” (Doiteronomio 5:6) Ka 1513 B.C.E., setšhaba sa Isiraele se ile sa phološwa ka mohlolo bothopša Egipita gomme se be se se na lebaka la go belaela mantšu ao. Molaong wa pele go Melao e Lesome, Jehofa ka mmoleledi wa gagwe Moše o tsebaditše gore: “Ke se kê ka bôna Ò na le medimo e šele.” (Ekisodo 20:1, 3) Ka nako yeo, setšhaba sa Isiraele se ile sa kgetha go kwa. Ka go rata, se ile sa ineela go Jehofa ka mo go feletšego.—Ekisodo 20:5; Numeri 25:11.

4. (a) Moše o ile a botša Baisiraele ka kgetho efe yeo ba bego ba swanetše go e dira? (b) Ke kgetho efe lehono yeo re swanetšego go e dira?

⁴ Nywaga e ka bago e 40 ka morago, Moše o ile a gatelela bohlokwa bja kgetho yeo moloko o mongwe wa Isiraele o bego o swanetše go e dira. O tsebaditše gore: “Lehono lexodimo le lefase ké dihlatse tša-ka xe ke beile bophelô le lehu, le thšexofatšô le thoxô, pele xa lena. Hlê ikxetheleng bophelô xore Le phelê, lena le bana ba lena.” (Doiteronomio 30:19) Le rena lehono re ka kgetha. Ee, re ka kgetha go hlankela Jehofa ka potego ka kholofelo ya go hwetša bophelo bjo bo sa felego goba re ka kgetha go se mo kwe gomme ra lebeletšana le mafelelo a go dira bjalo. Ela hloko mehlala e mebedi ya batho bao ba dirilego dikgetho tše di sa swanego.

5, 6. Jošua o dirile kgetho efe, gona ka mafelelo afe?

⁵ Ka 1473 B.C.E., Jošua o ile a etelela Baisiraele pele go ya Nageng ya Kholofetšo. Ka mantšu a kgothatšago a matla ao a a boletšego pele ga lehu la gagwe, Jošua o ile a kgothaletša setšhaba ka moka gore: “Xe Le ka hwetša xo hlankêla Morêna e se’ botse, xôna ikxetheleng lehono yo Le rataxo xo mo hlankêla, e ka ba medimo yela ye bô-tata-weno ba e hlanketšexo mola bà sa le mošola wa noka, xoba e ka ba medimo yé ya Ba-Amoro ba Le dutšexo mo naxeng ya bôná.” (Mongwalo o sekamego ke wa rena.) Ke moka ge a bolela ka lapa la gagwe, o tšwetše pele ka gore: “Xe e le nna le ba lapa la-ka, rena re dirêla Morêna.”—Jošua 24:15.

⁶ Pejana, Jehofa o be a ile a kgothaletša Jošua gore a be sebete le go tia, a mo laela gore a se ke a kgaotša go kwa Molao wa Modimo. Eupša Jošua o be a tla atlegiša tsela ya gagwe ka go bala puku ya Molao ka lentšu la tlasana bošego le mosegare. (Jošua 1:7, 8) Go bile bjalo. Kgetho yeo Jošua a e dirilego e mo tlišeditše ditšhegofatšo. Jošua o itše: “Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.”—Jošua 21:45.

7. Mehleng ya Jesaya, ke kgetho efe yeo Baisiraele ba bangwe ba ilego ba e dira, gona ka mafelelo afe?

⁷ Ka mo go fapanego, ela hloko boemo bja kua Isiraele nywageng e 700 ka morago. Ka nako yeo, Baisiraele ba bantši ba be ba latela metlwae ya boheitene. Ka mohlala, ka letšatši la mafelelo la ngwaga, batho ba be ba kgobokana tafoleng e nago le mehuta-huta ya dijo tše di rothišago mare le beine e theogelago. Wo e be e se feela monyanya wa pokano ya segwera. E be e le tirelo ya bodumedi yeo e bego e hlompha medimo e mebedi ya boheitene. Moporofeta Jesaya o begile pono ya Modimo mabapi le go se botege mo, a re: “Lena ba-hlala-Morêna, ba Le itebatšaxo thaba-kxêthwa ya-ka, ba Le ipexaxo kua Gadi ka merufsi, ba Le thšêlêlaxo Meni tše di hlotlilwexo.” Ba be ba dumela gore puno ya ngwaga e be e sa ithekga ka tšhegofatšo ya Jehofa, eupša e be e ithekgile ka go tumiša modimo wa “Gadi” le “Meni.” Lega go le bjalo, ge e le gabotse tsela ya bona ya borabele le go ikgethela ga bona ka go rata e ile ya dira gore ba be le mafelelo a sa kgahlišego. Jehofa o tsebaditše gore: “Lena ke tlo Le balêla thšoša, Le tlo ôbamišwa la bolawa; xobane ke biditše Le se arabe; xobane ke boletše Le se theetše, la dira tše di mpefetšexo, la ithlaolêla tše di sa nkxahlexo.” (Jesaya 65:11, 12) Kgetho ya bona e sego bohlale e ile ya dira gore ba fedišwe  gomme medimo ya Gadi le Meni e be e se na matla a go thibela seo.

Go Dira Kgetho e Nepagetšego

8. Go ya ka Doiteronomio 30:20, ke’ng seo se akaretšwago tabeng ya go dira kgetho e nepagetšego?

⁸ Ge Moše a be a kgothaletša Baisiraele gore ba kgethe bophelo, o ile a bontšha megato e meraro yeo ba bego ba swanetše go e gata, a re: “Lè le ba ba rataxo Morêna Modimo wa lena, Lè e-kwa se a se bolêlaxo, Lè mo xomaretše.” (Doiteronomio 30:20) Anke re hlahlobeng o mongwe le o mongwe wa megato ye e le gore re tle re dire kgetho e nepagetšego.

9. Re ka bontšha bjang gore re rata Jehofa?

⁹ Ka go rata Jehofa Modimo wa rena: Re kgetha go hlankela Jehofa ka gobane re mo rata. Ge re ela hloko mehlala ya temošo ya mehleng ya Baisiraele, re phema dilo ka moka tšeo di ka re lekago gore re itshware ka tsela e gobogilego le go phema mekgwa ya go phela yeo e ka dirago gore re tanywe ke molaba wa lefase wa go rata dilo tše di bonagalago. (1 Bakorinthe 10:11; 1 Timotheo 6:6-10) Re kgomarela Jehofa gomme ra boloka ditaelo tša gagwe. (Jošua 23:8; Psalme 119:5, 8) Pele ga ge Baisiraele ba ka tsena Nageng ya Kholofetšo, Moše o ile a ba kgothatša ka gore: “Bônang! Ke Le rutile melaô le mekxwa ka mo Morêna Modimo wa-ka a ntaetšexo ka xôna xore Le dirê ka yôna Lè le naxeng ye Le yaxo xo e tšea. E hlokômeleng Le dirê ka yôna; ka xobane ké yôna ye ba dithšaba tše dingwê ba tl’o xo re ké bohlale bya lena, le thlaoloxanyô ya lena. . . . Xe ba e-kwa melaô yé ka moka.” (Doiteronomio 4:5, 6) Bjale ke nako ya go bontšha gore re rata Jehofa ka go bea thato ya gagwe pele maphelong a rena. Ruri re tla šegofatšwa ge re kgetha go dira bjalo.—Mateo 6:33.

10-12. Re ithuta’ng ka go ela hloko seo se diregilego mehleng ya Noa?

¹⁰ Ka go theetša seo Modimo a se bolelago: Noa e be e le “mmoledi wa toko.” (2 Petro 2:5) Mo e nyakilego go ba batho ka moka ba mehleng ya pele ga Meetse-fula ba ile ba fapoga gomme “ba se ele hloko” ditemošo tša Noa. Mafelelo e bile afe? “Meetse-fula a [tla] a ba gogola ka moka.” Jesu o lemošitše gore mehla ya rena, e lego nakong ya “go ba gona ga Morwa wa motho,” e be e tla ba e swanago. Seo se diregilego mehleng ya Noa ke temošo e matla lehono go batho bao ba kgethago go se kwe molaetša wa Modimo.—Mateo 24:39.

¹¹ Bao ba kwerago ditemošo tša Modimo tšeo di tsebatšwago ke bahlanka ba Modimo ba mehleng yeno ba swanetše go lemoga mafelelo ao a ka bago gona a go palelwa ga bona ke go kwa ditemošo. Moapostola Petro o boletše ka bakweri ba bjalo gore: “Go ya ka go rata ga bona, ga ba kgone go lemoga taba ye ya gore go kile gwa ba le magodimo go tloga kgale le lefase le le tšwilego le bopagane meetseng le gare ga meetse ka lentšu la Modimo; gomme ka tšona lefase la nakong yeo le ile la senywa ge le be le apešwa ke meetse. Eupša ka lona lentšu leo, magodimo le lefase tše di lego gona, gona bjale di boloketšwe mollo gomme di lotetšwe letšatši la kahlolo le la tshenyego ya batho ba sa boifego Modimo.”—2 Petro 3:3-7.

¹² Ela hloko phapano e lego gona mo mabapi le kgetho yeo Noa le lapa la gagwe ba e dirilego. “Ka tumelo Noa ka morago ga go newa temošo ya Modimo mabapi le dilo tšeo di bego di sešo tša bonwa, o bontšhitše go boifa Modimo a aga areka.” Go ela hloko ga gagwe temošo go ile gwa phološa lapa la gagwe. (Baheberu 11:7) Anke re ipontšheng re le bao ba akgofelago go kwa molaetša wa Modimo gomme re o ele hloko le go ikokobeletša wona.—Jakobo 1:19, 22-25.

13, 14. (a) Ke ka baka la’ng go le bohlokwa ‘go kgomarela Jehofa’? (b) Ke bjang re ka dumelelago Jehofa, “Mmopi wa rena,” gore a re bope?

¹³ Ka go kgomarela Jehofa: E le gore re ‘kgethe bophelo gomme re phele,’ ga se ra swanela go fo rata Jehofa le go mo theetša feela eupša gape re swanetše go ‘kgomarela Jehofa,’ e lego, go phegelela go dira thato ya gagwe. Jesu o itše: “Ka go kgotlelela ga lena, le tla rua meoya ya lena.” (Luka 21:19) Ge e le gabotse, kgetho yeo re e dirago tabeng ye e utolla seo se lego ka dipelong tša rena. Diema 28:14 e re: “Wa lehlôxônôlô ké mo-hlwa-à-boifa; mo-ithatafiša-pelo ó tlo wêla bošuleng.” Farao wa Egipita ya bogologolo e be e le mohlala wa se. Ge e nngwe le e nngwe ya Dikotlo tše Lesome e be e wela Egipita, Farao o ile  a thatafiša pelo ya gagwe go e na le go bontšha gore o boifa Modimo. Jehofa ga se a ka a gapeletša Farao gore a kgomarele tsela ya go se kwe eupša o ile a dumelela mmuši yoo yo a ikgogomošago gore a ikgethele. Boemong le ge e le bofe, thato ya Jehofa e ile ya phethagatšwa, go etša ge moapostola Paulo a hlalositše mabapi le pono ya Jehofa ka Farao gore: “Ke ka lona lebaka le ke go dumeletšego gore o dule o le gona, gore ke bontšhe matla a-ka mabapi le wena, le gore leina la-ka le bolelwe lefaseng lohle.”—Baroma 9:17.

¹⁴ Nywaga-kgolo e mentši ka morago ga gore Baisiraele ba phološwe taolong ya Farao, moporofeta Jesaya o tsebaditše gore: “Byale, Morêna, O sa le Tata wešo; O Mmopi wa rena, ’me rena re letsopa; ka moka O re bopile ka ’atla tša xaxo.” (Jesaya 64:8) Ge re dutše re dumelela Jehofa gore a re bope ka thuto ya rena ya motho ka noši le go dirišwa ga Lentšu la gagwe, ganyenyane-ganyenyane, re apara motho yo mofsa. Re kgona go feto-fetoga le maemo le go ba boleta, re dira gore go kgomarela Jehofa ka potego go be bonolo ka gobane re tloga re nyaka go mo thabiša.—Baefeso 4:23, 24; Bakolose 3:8-10.

‘O di Anege’

15. Go ya ka Doiteronomio 4:9, Moše o ile a gopotša Baisiraele ka boikarabelo bofe bjo bo lego gabedi?

¹⁵ Moše o boditše setšhaba sa Isiraele seo se bego se le kgaufsi le go tsena Nageng ya Kholofetšo gore: “O fêlê O tiišê xo itôta, O tiišê xo diša môya wa xaxo xore O se lebalê tše O di bonexo ka mahlô, di se tloxê pelong ya xaxo ka mehla yohle xe O sa phela; O di anêxêlê bana ba xaxo, le bana ba bana ba xaxo.” (Doiteronomio 4:9) E le gore ba šegofatšwe ke Jehofa le go atlega nageng yeo ba bego ba le kgaufsi le go e tšea e le bohwa, batho ba ba be ba swanetše go phethagatša boikarabelo bjo bo lego gabedi go Jehofa Modimo wa bona. Ba be ba sa swanela go lebala dilo tše dibotse tšeo ba bonego Jehofa a ba direla tšona, gomme ba be ba swanetše go di ruta meloko ya bona e tlago. Bjalo ka batho ba Modimo lehono re swanetše go dira se se swanago ge e ba re nyaka go ‘kgetha bophelo gomme re phele.’ Ke’ng seo re iponetšego sona seo re se diretšwego ke Jehofa?

16, 17. (a) Baromiwa bao ba tlwaeditšwego ba Gilead ba kgonne go dira’ng modirong wa go bolela ka Mmušo? (b) Ke mehlala efe ya bao ba ilego ba dula ba le mafolofolo yeo o e tsebago?

¹⁶ Re thabišwa ke go bona kamoo Jehofa a šegofaditšego modiro wa rena wa boboledi le wa go dira barutiwa. Ga e sa le go tloga ge go hlongwa Sekolo sa Beibele sa Watchtower sa Gilead ka 1943, baromiwa ba ile ba etelela pele modiro wa go dira barutiwa dinageng tše dintši. Go ba go fihla le lehono, dialoga tša mathomo tša sekolo se di sa dutše di le mafolofolo modirong wa go bolela ka Mmušo, gaešita le ge di tšofetše gomme tše dingwe di paledišwa ke malwetši. Mohlala o mongwe o mobotse ke wa Kgaetšedi Mary Olson, yo a alogilego Gilead ka 1944. O thomile go hlankela e le moromiwa kua Uruguay, ka morago a ya Colombia gomme ga bjale o kua Puerto Rico. Gaešita le ge a fokola ka tsela e itšego mmeleng ka baka la malwetši ao a tlišwago ke botšofadi, Kgaetšedi Olson o sa dutše a fišegela go dira boboledi. Ka ge a ithutile Sepaniši, o rulaganya nako beke le beke bakeng sa go šoma  le bagoeledi ba lefelong leo bodireding bja tšhemo.

¹⁷ Nancy Porter yo ga bjale e lego mohlologadi, o alogile Sekolong sa Gilead ka 1947, gomme o sa dutše a hlankela kua Bahamas. Ke yo mongwe wa baromiwa bao ba dulago ba swaregile modirong wa boboledi. Kgaetšedi Porter o bega ka phihlelong ya gagwe gore: “Go ruta ba bangwe therešo ya Beibele e bile mothopo o kgethegilego wa lethabo. Go nea mokgwa wa ka mehla o rulagantšwego wa moya wo o mphilego thulaganyo le boitseparelo bophelong bja-ka.” * Ge Kgaetšedi Porter le bahlanka ba bangwe bao ba botegago ba nagana ka nako e fetilego, ga ba lebale seo Jehofa a se dirilego. Go thwe’ng ka rena? Na re lebelela ka tebogo tsela yeo Jehofa a šegofaditšego modiro wa Mmušo lefelong la gabo rena?—Psalme 68:11.

18. Re ka ithuta’ng ge re bala diphihlelo tša baromiwa?

¹⁸ Re thabišwa ke seo batho ba bao ba nago le nako e telele tirelong ya Jehofa ba se fihleletšego le seo ba sa dutšego ba se fihlelela. Go bala diphihlelo tša bona ke mothopo wa kgothatšo go rena ka gobane ge re bona seo Jehofa a se diretšego batho ba bao ba botegago, seo se matlafatša boikemišetšo bja rena bja go hlankela Jehofa. Na ka mehla o bala dipego tše bjalo tše di thabišago tšeo di gatišwago ka go Morokami gomme wa naganišiša ka tšona?

19. Ke bjang batswadi ba Bakriste ba ka dirišago gabotse diphihlelo tše di lego ka go Morokami?

¹⁹ Moše o gopoditše Baisiraele gore ba be ba sa swanela go lebala dilo ka moka tšeo Jehofa a ba diretšego tšona le gore dilo tše ga se tša swanela go tloga dipelong tša bona mehla yohle ya bophelo bja bona. Ke moka o ile a oketša ka mogato o mongwe, o rego: “O di anêxêlê bana ba xaxo, le bana ba bana ba xaxo.” (Doiteronomio 4:9) Diphihlelo di tloga di gogela. Bafsa bao ba golago ba nyaka go beelwa mehlala e mebotse. Dikgaetšedi tše di sego lenyalong di ka ithuta mohlaleng wa potego wa dikgaetšedi tše tše di tšofetšego tšeo diphihlelo tša tšona di laodišwago ka go Morokami. Go hlankela tšhemong ya leleme le šele nageng yeo ba dulago go yona go nea bana babo rena le dikgaetšedi dibaka tše di oketšegilego tša go dula ba swaregile modirong wa go bolela ditaba tše dibotse. Batswadi ba Bakriste, ke ka baka la’ng le sa diriše diphihlelo tša baromiwa gotee le ba bangwe bao ba botegago ba Gilead go tutueletša bana ba lena gore ba kgethe bophelo bja tirelo ya nako e tletšego?

20. Re swanetše go dira’ng e le gore re ‘kgethe bophelo’?

²⁰ Ka gona, ke bjang yo mongwe le yo mongwe wa rena a ka ‘kgethago bophelo’? Ka go diriša mpho e botse ya tokologo ya boikgethelo e le go bontšha Jehofa gore re a mo rata le ka go tšwela pele re dira sohle seo re ka se kgonago tirelong ya gagwe ge feela a sa re neile tokelo yeo. Go etša ge Moše a boletše: “Ka xobane xo phela xa xaxo le xo atêlwa ke matšatši di na le [Jehofa].”—Doiteronomio 30:19, 20.

[Mongwalo wa ka tlase]

Na o a Gopola?

• O ithutile’ng mehlaleng e fapa-fapanego ya dikgetho tšeo re di ahla-ahlilego?

• Re swanetše go gata megato efe e le gore re ‘kgethe bophelo’?

• Re kgothaletšwa go phethagatša boikarabelo bofe bjo bo lego gabedi?

[Dipotšišo tša Thuto]

[Seswantšho go letlakala 26]

“Ke beile bophelô le lehu, . . . pele xa lena”

[Seswantšho go letlakala 29]

Go theetša seo Modimo a se bolelago go ile gwa phološa Noa le lapa la gagwe

[Seswantšho go letlakala 30]

Mary Olson

[Seswantšho go letlakala 30]

Nancy Porter