Modimo o Hlokomela Batšofadi

GO ATA ga go swarwa gampe ga batšofadi lehono ga go makatše. Beibele e boletše e sa le pele gore “mehleng ya bofelo” ya tshepedišo ye ya go se boife Modimo, batho e tlo “ba baithati, . . . ba se nago maikwelo a borutho a tlhago.” (2 Timotheo 3:1-3) Lentšu la Segerika leo le fetoletšwego e le “maikwelo a borutho a tlhago,” le ka akaretša lerato la tlhago leo le lego gona gare ga ditho tša lapa. Ka go dumelelana le boporofeta bja Beibele, lehono go a bonala gore lerato le le bjalo ga le gona.

Go fapana le bao ba tlaišago batšofadi, Jehofa Modimo o tšeela batšofadi godimo e bile o tshwenyega ka bona. Ela hloko tsela yeo Beibele e bontšhago se ka gona.

“Moahloledi wa Bahloloxadi”

Go tshwenyega ga Jehofa Modimo ka batšofadi go hlatselwa gabotse ka Mangwalong a Seheberu. Ka mohlala, go Psalme 68:5 Dafida o bitša Modimo gore ke “moahloledi wa bahloloxadi,” bao gantši ba tšofetšego. * Diphetolelong tše dingwe tša Beibele, lentšu “moahloledi” le fetoletšwe e le “molwedi,” “mošireletši” le “nkgwete.” Go molaleng gore Jehofa o tshwenyega ka bahlologadi. Ge e le gabotse, Beibele e bolela gore ge ba tlaišwa bogale bja gagwe bo a tuka. (Ekisodo 22:22-24) Bahlologadi—le batšofadi ka moka bao ba botegago—ba tšeelwa godimo ke Modimo le bahlanka ba gagwe. Diema 16:31 e hlalosa pono ya Jehofa Modimo le ya batho ba gagwe ge e re: “Hlôxô-pududu ké ’ala sa bothšephi; se hwetšwa tseleng ya xo loka.”

Ga go makatše ge go hlompha batšofadi e be e le karolo ya motheo ya Molao wo Jehofa  a o neilego Isiraele. Baisiraele ba be ba laetšwe gore: “Xe O lebana le hlôxô e pududu o êmê; sefahloxô sa mokxalabyê O se hlomphê; xomme o boifê Modimo wa xaxo, Nna [Jehofa].” (Lefitiko 19:32) Ke ka baka leo kua Isiraele go hlompha batšofadi go bego go sepedišana le tswalano ya bohlokwa yeo motho a bego a e-ba le yona le Jehofa Modimo. Ge e ba Motho a be a tlaiša batšofadi o be a ka se ke a bolela gore o rata Modimo.

Bakriste ga ba ka tlase ga Molao wa Moše. Lega go le bjalo, ba ka tlase ga “molao wa Kriste,” wo o tlogago o e-na le tutuetšo e kgolo boitshwarong bja bona le tseleng yeo ba lebelelago dilo ka yona, go akaretša go tshwenyega ka batswadi le batšofadi le go ba bontšha lerato. (Bagalatia 6:2; Baefeso 6:1-3; 1 Timotheo 5:1-3) Le gona Bakriste ba bontšha lerato e sego ka baka la gore ba laelwa go dira bjalo eupša ka baka la gore ba tutuetšwa ke dipelo tša bona. Moapostola Petro o ile a kgothaletša gore: “Ratanang ka mo go tseneletšego go tšwa pelong.”—1 Petro 1:22.

Morutiwa Jakobo o neile lebaka le lengwe leo le dirago gore re tshwenyege ka batšofadi. O ngwadile gore: “Mohuta wa borapedi bjo bo hlwekilego le bjo bo sa šilafalago ponong ya Modimo wa rena le Tate ke wo: go babalela ditšhiwana le bahlologadi ditlaišegong tša bona le go itota ga motho a se na sepatso go tšwa lefaseng.” (Jakobo 1:27) Jakobo o tšweletša ntlha ya bohlokwa yeo e dirago gore re nagane. E dira gore re lemoge kamoo baratiwa ba ba tlogago ba le bohlokwa go Jehofa.

Ka gona, ga se gore go fo tlogela go tlaiša batšofadi go lekane. Go e na le moo, re swanetše go bontšha gore re tloga re tshwenyega ka bona ka go ba direla mediro e ba holago. (Bona lepokisi le le rego “Mediro ya go Bontšha Lerato,” go matlakala 6-7.) Jakobo o ngwadile gore: “Tumelo ka ntle le mediro e hwile.”—Jakobo 2:26.

Khomotšo “Ditlaišegong tša Bona”

Go na le ntlha e nngwe yeo re swanetšego go ithuta yona go tšwa mantšung a Jakobo. Ela hloko gore Jakobo o boditše Bakriste gore ba hlokomele bahlologadi “ditlaišegong tša bona.” Lentšu la Segerika leo le fetoletšwego e le ‘tlaišego’ ge e le gabotse le bolela go nyama, go kwešwa bohloko goba ditlaišo tšeo di bakwago ke maemo a rena a gateletšago a bophelo. Ga go na pelaelo gore batšofadi ba bantši ba tlaišwa ke dilo tše bjalo. Ba bangwe ba lewa ke bodutu. Ba bangwe ba nyamišwa ke mafokodi ao a tlišwago ke botšofadi. Gaešita le bao ba tlogago ba hlankela Modimo ka mafolofolo ba ka nyama. Ela hloko John, * mogoeledi yo a botegago wa Mmušo wa Modimo yo a hlanketšego ka nywaga e fetago e 40, yoo a feditšego nywaga ya mafelelo e masome a mararo a le tirelong e kgethegilego ya nako e tletšego. Ga bjale a le nywageng ya gagwe ya bo-80, John o dumela gore ka dinako tše dingwe o ikwa a nyamile. O boletše gore: “Gantši ge ke nagana ka dilo tše di fetilego ke gopola diphošo tša-ka, diphošo tše dintši. Ke ipotša leboelela gore nkabe ke ile ka dira bokaone.”

Batho ba bjalo ba ka homotšwa ke go tseba gore le ge Jehofa a phethagetše, ga a letela gore re dire dilo ka tsela e phethagetšego. Le ge a tseba diphošo tša rena, Beibele e re ka yena: “Xe Wene Morêna Ò latiša molato xôna xo ka êma mang?” (Psalme 130:3) Ee, Jehofa o bona ka  kua ga diphošo tša rena gomme o šetša seo se lego ka dipelong tša rena. Re tseba se bjang?

Kgoši Dafida—yo a sego a phethagala le yo a bego a dira diphošo—o ile a budulelwa ke Modimo go ngwala mantšu a latelago ao a ngwadilwego go Psalme 139:1-3, a rego: “Morêna, O a nthlaoloxanya, O a ntseba, O ntseba xe ke dula, le xe ke tsoxa; O ntemoxa tša pelong, xe di sa le kxolê. Xe ke sepela, le xe ke y’o lala, O a nthšetša; ditsela tša-ka tšohle O di êla thlôkô.” Mo, polelwana “o a nthšetša” ge e le gabotse e bolela go “sefa,” go swana le ka tsela yeo molemi a tlhokolago ditlhoka mabeleng e le gore go šale dithoro. Modimo o buduletše Dafida gore a re kgonthišetše gore Jehofa o tseba go sefa diphošo tša rena gomme a boloke mediro ya rena e mebotse ka kgopolong ya gagwe.

Tatago rena wa legodimong yo a nago le kgaugelo o gopola—le go rata—mediro ya rena e mebotse ge feela re dula re mmotegela. Ka kgonthe, Beibele e re O tla bona e le go hloka toka ge a ka lebala mediro ya rena le lerato leo re le bontšhitšego leineng la gagwe.—Baheberu 6:10.

“Dilo tša Pele di Fetile”

Beibele e bontšha gore Modimo o be a se a rerela batho gore ba be le mathata ao a tlišwago ke botšofadi. Ke fela ka morago ga ge batswadi  ba rena, monna wa pele le mosadi, ba rabetše kgahlanong le Mmopi moo mathata a botšofadi a ilego a fetoga karolo ya bophelo bja motho. (Genesi 3:17-19; Baroma 5:12) Se se ka se tšwele pele go ya go ile.

Ka ge go bontšhitšwe ka mo godimo, maemo a mabe ao re phelago go ona lehono—go akaretša le go tlaišwa ga batšofadi—a gatelela bohlatse bja gore re phela “mehleng ya bofelo” bja tshepedišo ye ya dilo. (2 Timotheo 3:1) Morero wa Modimo ke go phumola ditla-morago tša sebe, go akaretša mathata a botšofadi le lehu. Beibele e re: “[Modimo] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

Lefaseng le lefsa la Modimo, mahloko le dihlabi tša botšofadi e tla ba dilo tše di fetilego. Go tla ba bjalo le ka go tlaišwa ga batšofadi. (Mika 4:4) Gaešita le bao ba hwilego gomme ba le ka mogopolong wa Modimo ba tla tsošetšwa bophelong gape, gore le bona ba be le sebaka sa go phela ka mo go sa felego lefaseng la paradeise. (Johane 5:28, 29) Ka nako yeo, go tla bonala gabotse go feta le ge e le neng pele gore Jehofa Modimo ga a hlokomele batšofadi feela eupša o hlokomela bohle bao ba mo kwago.

[Mengwalo ya ka tlase]

[Lepokisi/Diswantšho go letlakala 6, 7]

Mediro ya go Bontšha Lerato

Phuthegong ya Dihlatse tša Jehofa, bagolo ba etelela pele go šetšeng batšofadi. Ba tloga ba tšeela keletšo ya moapostola Petro godimo e rego: “Dišang mohlape wa Modimo wo o lego tlhokomelong ya lena.” (1 Petro 5:2) Go hlokomela batšofadi ka ditsela tše di bonalago ke karolo ya go diša mohlape wa Modimo. Lega go le bjalo, seo se akaretša’ng?

Se se akaretša go se felele motšofadi pelo le go mo etela kgafetša-kgafetša ge go kgonega le go boledišana le yena e le gore bagolo ba kwešiše gabotse moo a tlogago a nyaka thušo. Mohlomongwe o nyaka motho yo a ka mo romago mabenkeleng le yo a ka mo hlwekišetšago legae, senamelwa sa go mo iša dibokeng tša Bokriste, go balelwa Beibele le dikgatišo tše dingwe tša Bokriste gaešita le go thušwa ka dilo tše dingwe. Moo go kgonegago, go swanetše gore go dirwe ditokišetšo tšeo di šomago le go tiišetša gore di a latelwa. *

Lega go le bjalo, go ka thwe’ng ge e ba ngwanabo rena goba kgaetšedi yo a tšofetšego ka phuthegong a le bothateng bjo bo nyakago tlhokomelo ya ka pela, mohlomongwe a nyaka go thušwa ka tšhelete? Sa pele, e ka ba mo go botse go nyakišiša ge e ba a na le bana goba meloko yeo e ka mo thušago. Se se tla sepedišana gabotse le seo se ngwadilwego go 1 Timotheo 5:4 ye e rego: “Ge e ba mohlologadi le ge e le ofe a e-na le bana goba ditlogolo, anke ba ba ithute pele go tlwaela go diriša boineelo go Modimo go ba ntlo ya bona le go lefa batswadi le bo-rakgolo le bo-makgolo ba bona pušeletšo e swanetšego, gobane se se a kgahliša mahlong a Modimo.”

Mohlomongwe motšofadi o nyaka thušo ya go botšišetšwa ge e ba a swanelegela go hwetša thušo le ge e le efe yeo mmušo o e neago. Mohlomongwe ba bangwe ka phuthegong ba ka kgona go thuša. Ge e ba go sa kgonagale gore a thušwe ka ditsela tšeo go boletšwego ka tšona ka mo godimo, bagolo ba ka dira nyakišišo go bona ge e ba motšofadi a swanelegela go thušwa ke phuthego. Mabakeng a mangwe, se se ile sa dumelelwa ka phuthegong ya lekgolong la pele la nywaga, ke ka fao moapostola Paulo a ngwaletšego mošomi-gotee le yena Timotheo gore: “Mohlologadi yo a tsenywago lelokelelong a e be yo a sego ka tlase ga nywaga e masome-tshela, e be yo e bego e le mosadi wa monna o tee, a hlatselwa ka mediro e mebotse, ge e ba a ile a godiša bana, a amogela basepedi, a hlapiša bakgethwa dinao, a imolla bao ba lego masetlapelong le go latela modiro o mongwe le o mongwe o mobotse ka mafolofolo.”—1 Timotheo 5:9, 10.

[Mongwalo wa ka tlase]

[Seswantšho go letlakala 5]

Dorokase o be a hlokomela bahlologadi ba badiidi.—Ditiro 9:36-39