‘Dikgopotšo tša Gago ke Tšona tše ke di Ratago’

“Dilo tšohle tšeo di ilego tša ngwalwa e sa le pele di ile tša ngwalelwa go re ruta.”—BAROMA 15:4.

1. Jehofa o re nea dikgopotšo ka tsela efe, gomme ke ka baka la’ng re di nyaka?

JEHOFA o nea batho ba gagwe dikgopotšo e le go ba thuša go lebeletšana le dikgateletšo tša dinako tše tše thata. Tše dingwe tša dikgopotšo tše di tšwelela nakong ya ge motho a ipalela Beibele, tše dingwe di tla di le bjalo ka tsebišo goba ditlhaloso tšeo di tšweletšwago dibokeng tša Bokriste. Bontši bja dilo tšeo re di balago goba re di kwago ka dinako tše ga se tše difsa go rena. Mohlomongwe re ka ba re ile ra bala tsebišo yeo pele. Lega go le bjalo, ka ge re e-na le tshekamelo ya go lebala, ka mehla re swanetše go dula re ikgopotša merero ya Jehofa, melao ya gagwe le ditaelo tša gagwe. Re swanetše go leboga dikgopotšo tša Modimo. Di re kgothatša ka go re gopotša mabaka ao a re tutueleditšego go phela ka go dumelelana le thato ya Modimo. Ka gona, mopsalme o opeletše Jehofa gore: ‘Dikgopotšo tša gago ke tšona tše ke di ratago.’—Psalme 119:24, bapiša le NW.

2, 3. (a) Ke ka baka la’ng Jehofa a ile a boloka dipego tša baanegwa ba ka Beibeleng go ba go fihla mehleng ya rena? (b) Ke dipego dife tše di lego ka Mangwalong tšeo re tlago go di ahla-ahla sehlogong se?

² Gaešita le ge Lentšu la Modimo le ngwadilwe nywaga-kgolong e mentši e fetilego, ke le matla. (Baheberu 4:12) Le re hlalosetša ka dipego tša kgonthe tša maphelo a baanegwa ba ka Beibeleng. Gaešita le ge metlwae le dipono tša batho di fetogile kudu ga e sa le go tloga mehleng ya Beibele, mathata ao re lebeletšanago le ona gantši a swana le ao batho ba morago mehleng yeo ba ilego ba lebeletšana le ona. Dikanegelo tše dintši tšeo di bolokilwego ka Beibeleng bakeng sa go re hola di re nea mehlala e kgomago pelo ya batho bao ba bego ba rata Jehofa le bao ba ilego ba mo hlankela ka potego go sa šetšwe maemo a thata ao ba bego ba lebeletšane le ona. Dipego tše dingwe di re botša ka mohuta wa boitshwaro bjoo Modimo a bo hloilego. Jehofa o ile a lokišetša gore dipego tše tša batho, tše dibotse le tše mpe, di ngwalwe ka Beibeleng e le dikgopotšo. Go bjalo ka ge moapostola Paulo a ngwadile gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.”—Baroma 15:4.

³ Anke re lebišeng tlhokomelo ya rena dipegong tše tharo tše di lego ka Mangwalong: pego ya ditirišano tša Dafida le Saulo, ya Anania le Safira le ya tsela yeo Josefa a ilego a itshwara ka yona go mosadi wa Potifara. E nngwe le e nngwe ya dipego tše e re ruta dithuto tša bohlokwa.

Go Botegela Dithulaganyo tša Modimo

4, 5. (a) Ke boemo bofe bjo bo bego bo le gona magareng ga Kgoši Saulo le Dafida? (b) Dafida o ile a arabela bjang lehloyong la Saulo?

⁴ Kgoši Saulo o ile a ipontšha a sa botegele Jehofa e bile a sa swanelegele go buša batho ba Gagwe. Ka gona, Modimo o ile a mo lahla gomme a hlahla moporofeta Samuele gore a yo tlotša Dafida gore e be kgoši e latelago ya Isiraele. Ge Dafida a be a bontšha bokgoni le sebete bjalo ka mohlabani e bile a retwa ke batho, Saulo o ile a thoma go lebelela Dafida e le mophenkgišani. Saulo o ile a leka ka makga a mantši gore a mmolaye. Dafida o ile a phologa ka dinako ka moka ka gobane Jehofa o be a e-na le yena.—1 Samuele 18:6-12, 25; 19:10, 11.

⁵ Ka nywaga e mentši, Dafida o ile a gapeletšega go phela bjalo ka motšhabi. Ge sebaka sa  gore a bolaye Saulo se be se bulega, badirišani ba Dafida ba ile ba mo kgothaletša gore a dire bjalo, ba bolela gore Jehofa o gafetše lenaba la Dafida diatleng tša gagwe. Lega go le bjalo, Dafida o ile a gana go dira bjalo. Go botegela ga gagwe Jehofa le go hlompha boemo bja Saulo bjalo ka kgoši ya batho ba Modimo e tloditšwego go ile gwa mo tutueletša gore a dire dilo ka tsela ye. Na ga se Jehofa yo a bego a kgethile Saulo gore e be kgoši ya Isiraele? Jehofa e be e tla ba yena a mo tlošago ge e ba a bona gore go swanetše go dira bjalo. Dafida o ile a nagana gore o be a se na tokelo ya go tsena ditaba gare. Ka morago ga go dira sohle seo a bego a ka se kgona maemong ao a bego a lebeletšane le ona e le gore a fokotše lehloyo la Saulo go yena, Dafida o ile a phetha ka gore: “Morêna a ka se lesê xo mo ôtla xe letšatši la xaxwe le tlile a hwa, xoba a tšwêla ntweng ya mo xoxola. Nna Morêna a a nthšexêlê xore motlotšwa é wa Morêna ke se mo išê seatla sa-ka.”—1 Samuele 24:3-15; 26:7-20.

6. Ke ka baka la’ng pego ya Dafida le Saulo e le ya bohlokwa go rena?

⁶ Pego ye e re ruta thuto ya bohlokwa. Na o kile wa ipotšiša gore ke ka baka la’ng mathata a itšego a rotoga ka phuthegong ya Bokriste? Mohlomongwe motho yo a itšego o itshwara ka tsela e fošagetšego. Seo a se dirago e ka no se be sebe se segolo, eupša se a go tshwenya. O swanetše go dira’ng? E le go bontšha gore o tshwenyega ka ngwaneno wa Mokriste le gore o botegela Jehofa, o ka kgetha go bolela le yena ka botho, ka morero wa go mo rua. Lega go le bjalo, go thwe’ng ge e ba bothata bo tšwela pele? Ka morago ga ge o dirile sohle seo o ka se kgonago, o ka tlogelela bothata bjoo go Jehofa. Dafida o ile a dira sona seo.

7. E le go ekiša Dafida, re swanetše go dira’ng ge re lebeletšane le go hloka toka goba kgethollo?

⁷ Goba o ka ba o lebeletšane le bothata bja go hloka toka setšhabeng goba kgethollo ya bodumedi. Mohlomongwe mo nakong ye ga go na seo o ka se dirago ka bothata bjoo. Go ka ba thata kudu go kgotlelela boemo bjo bo bjalo, eupša karabelo ya Dafida tabeng ya go hloka toka e re ruta thuto ya bohlokwa. Dipsalme tšeo Dafida a di ngwadilego ga se feela pego e kgomago pelo ya dithapelo tša gagwe tše di tšwago pelong tša ge a kgopela Modimo gore a mo šireletše go Saulo eupša gape ke pego ya go botegela ga gagwe Jehofa le go tshwenyega ka go godišwa ga leina la Modimo. (Psalme 18:1-6, 25-27, 30-32, 48-50; 57:1-11) Dafida o ile a dula a botegela Jehofa gaešita le ge Saulo a ile a tšwela pele a dira dilo ka go hloka toka ka nywaga e mentši. Le rena re swanetše go dula re botegela Jehofa le mokgatlo wa gagwe go sa šetšwe go swarwa ga rena ka go hloka toka le seo ba bangwe ba se dirago. Re ka dula re kgodišegile gore Jehofa o tloga a lemoga boemo bja rena.—Psalme 86:2.

8. Dihlatse tša Jehofa tša Mozambique di ile tša dira’ng ge potego ya tšona go Jehofa e be e lekwa?

⁸ Bakriste ba kua Mozambique ba re beela mohlala o mobotse wa mehleng yeno wa batho bao ba ilego ba kgomarela Jehofa ka potego nakong ya diteko. Ka 1984 metsana ya bona e be e hlaselwa kgafetša-kgafetša ke ditho tšeo di itlhamilego tša mokgatlo woo o lwantšhanago le mmušo, tšeo di bego di ba hula dilo tša  bona, di fiša nywako ya bona le go ba bolaya. Go be go bonagala go se na seo Bakriste ba ba therešo ba bego ba ka se dira e le gore ba itšhireletše. Go ile gwa dirwa boiteko bja go kgothaletša badudi ba tikologong yeo gore e be ditho tša mokgatlo wa tša bohlabani goba go ba gapeletša go o thekga ka ditsela tše dingwe. Dihlatse tša Jehofa di be di lebelela go dira bjalo go le kgahlanong le boemo bja tšona bja Bokriste bja boema-gare. Go gana ga tšona go o tsenela go ile gwa galefiša mokgatlo woo. Dihlatse tše ka bago 30 di ile tša bolawa ka nako yeo ya moferefere, eupša gaešita le go tšhošetšwa ka lehu ga se gwa ka gwa dira gore batho ba Modimo ba se sa botega. * Ka go swana le Dafida, ba ile ba kgotlelela go hloka toka eupša mafelelong ya ba bafenyi.

Kgopotšo Yeo e Šomago e le Temošo

9, 10. (a) Re ka holwa bjang ke mehlala e itšego e tšwago ka Mangwalong? (b) Ke’ng se se bego se fošagetše ka ditiro tša Anania le Safira?

⁹ Batho ba bangwe bao go bolelwago ka bona ka Mangwalong ke dikgopotšo tšeo di šomago e le temošo tša boitshwaro bjo bo swanetšego go phengwa. Ee, Beibele e na le dipego tše dintši tša batho, gaešita le gare ga bahlanka ba Modimo, bao ba ilego ba dira diphošo gomme ba lebeletšana le ditla-morago tša seo. (1 Bakorinthe 10:11) E nngwe ya dipego tše bjalo ke ya Anania le Safira, banyalani bao e bego e le ditho tša phuthego ya Bokriste ya lekgolong la pele la nywaga ya kua Jerusalema.

¹⁰ Ka morago ga Pentekoste ya 33 C.E., go ile gwa nyakega gore go newe thušo ya dilo tše di bonagalago go bao e sa tšwago go ba badumedi bao ba ilego ba tšwela pele ba le Jerusalema e le gore ba holwe ke go kopanela le baapostola. Ditho tše dingwe tša phuthego di ile tša rekiša dithoto tša tšona e le go kgonthišetša gore go se be le bahloki. (Ditiro 2:41-45) Anania le Safira ba ile ba rekiša tšhemo gomme ba nea baapostola karolwana feela ya tšhelete yeo ba e hweditšego, ba bolela gore mpho yeo e be e le tšhelete ka moka yeo ba rekišitšego tšhemo ka yona. Ke therešo gore Anania le Safira ba be ba ka neela go ya kamoo ba bego ba ka kgona, eupša boikemišetšo bja bona bo be bo fošagetše e bile ditiro tša bona e be e le tša go se botege. Ba be ba nyaka go kgahla batho gomme ba bonagale eka ba ntšhitše mo gontši mola ge e le gabotse go be go se bjalo. Moapostola Petro o ile a budulelwa ka moya o mokgethwa gore a utolle go se botege ga bona le boikaketši bja bona gomme Jehofa o ile a ba bolaya.—Ditiro 5:1-10.

11, 12. (a) Dikgopotšo tše dingwe tša mabapi le go botega ke dife? (b) Ke mehola efe yeo e tlišwago ke go botega?

¹¹ Ge e ba re ka lekega gore re bolele maaka e  le go dira gore batho ba nagane gabotse ka rena, eka pego ya Anania le Safira e ka ba kgopotšo e matla go rena. Re ka kgona go fora batho, eupša re ka se ke ra fora Jehofa. (Baheberu 4:13) Mangwalo a re kgothaletša kgafetša-kgafetša gore re botegelane, ka gobane batho bao ba bolelago maaka ba ka se phele lefaseng leo le se nago go hloka toka. (Diema 14:2; Kutollo 21:8; 22:15) Lebaka la seo ruri le molaleng. Mokgothaletši wa maaka ka moka ke Sathane Diabolo.—Johane 8:44.

¹² Go phela ka go botega go re tlišetša mehola e mentši. E mengwe ya yona ke go ba le letswalo le lebotse le go botwa ke batho ba bangwe. Maemong a mantši, Bakriste ba hweditše mešomo goba ba se lahlegelwe ke yona ka gobane ba botega. Lega go le bjalo, mohola o mogolo go feta e mengwe ka moka ke gore go botega go dira gore re be bagwera ba Modimo yo Matla ohle.—Psalme 15:1, 2.

Go Dula re Hlwekile Boitshwarong

13. Josefa o ile a ikhwetša a le boemong bofe, gomme o ile a arabela bjang?

¹³ Josefa, morwa wa mopatriareka Jakobo, o ile a rekišwa gore e be lekgoba a e-na le nywaga e 17. Mafelelong Josefa o ile a ikhwetša a le legaeng la Potifara, e lego letona la ka mošate wa Egipita, moo a ilego a utswa pelo ya mosadi wa mong wa gagwe. Mosadi yo o be a nyaka go robala le Josefa, yo e bego e le lesogana la go bogega, gomme letšatši le letšatši o be a dula a mo opeletša ka gore: “Rôbala le nna!” Josefa o be a le kgole le ba lapa labo e bile a le nageng yeo go yona go bego go se yo a mo tsebago. A ka ba a ile a robala le mosadi yo ntle le gore ba bangwe ba tsebe ka seo. Lega go le bjalo, ge mosadi wa Potifara mafelelong a mo swara, Josefa o ile a tšhaba.—Genesi 37:2, 18-28; 39:1-12.

14, 15. (a) Ke ka baka la’ng pego ya Josefa e le ya bohlokwa go rena? (b) Ke ka baka la’ng mosadi yo mongwe wa Mokriste a ile a thabišwa ke gore o ile a ela hloko dikgopotšo tša Modimo?

¹⁴ Josefa o be a godišeditšwe lapeng leo le boifago Modimo, gomme o be a kwešiša gore dikopano tša botona le botshadi magareng ga batho bao ba sego ba nyalana di fošagetše. O ile a botšiša gore: “Nka dira bya’ng bobe byo boxolo byoo ka senya pele xa Modimo?” Go molaleng gore phetho ya gagwe e be e hlahlwa ke tsebo yeo a bego a e-na le yona ka ditekanyetšo tša Modimo bakeng sa batho go etša ge e be e hlalositšwe kua Edene, ya go ba le molekane o tee. (Genesi 2:24) Batho ba Modimo lehono ba ka holwa ke go naganišiša ka tsela yeo Josefa a ilego a arabela ka yona boemong bjoo. Ditikologong tše dingwe, batho ba tšea dikopano tša botona le botshadi gabohwefo mo e lego gore bafsa bao ba ganago go kopanela go tšona ba kwerwa ke dithaka tša bona. Go ratana le batho ba bangwe ka ntle ga lenyalo go tlwaelegile kudu bathong ba bagolo. Ka gona, pego ya Josefa e tloga e le kgopotšo e lego nakong go rena.  Ditekanyetšo tša Modimo e sa dutše e le gore bootswa le bohlotlolo ke dibe. (Baheberu 13:4) Batho ba bantši bao ba ilego ba ineela kgateletšong ya go ba le dikopano tša botona le botshadi tše di sego molaong ba a dumela gore go na le mabaka a kwagalago a gore re se ke ra dira bjalo. Gare ga ditla-morago tše dingwe tše di sa rategego go ka ba le go inyatša, letswalo le molato, lehufa, go ima le malwetši ao a fetelago ka dikopano tša botona le botshadi. Go etša ge Mangwalo a re gopotša, motho yo a dirago bootswa “o direla mmele wa gagwe sebe.”—1 Bakorinthe 5:9-12; 6:18; Diema 6:23-29, 32.

¹⁵ Jenny, * e lego yo mongwe wa Dihlatse tša Jehofa yo a sego lenyalong, o na le lebaka la go leboga dikgopotšo tša Modimo. Kua mošomong, lesogana la go bogega leo a šomago le lona le be le mo fereya. Ge Jenny a be a sa dumelelane le seo le se dirago, le ile la gakala. O dumela ka gore: “Ke ile ka hwetša go le thata gore ke dule ke hlwekile boitshwarong, ka gobane go a kgahliša ge motho wa bong bjo bo sa swanego le bja gago a go kgahlegela.” Lega go le bjalo, o ile a lemoga gore lesogana le le be le leka feela go mo tsenya palong ya basadi ba bantši bao le kilego la robala le bona. Ge a be a e-kwa gore boikemišetšo bja gagwe bja go ganetša teko ye bo a fokola, o ile a rapela Jehofa gore a mo thuše gore a tšwele pele a Mmotegela. Jenny o hweditše gore dilo tšeo a ithutilego tšona ge a be a dira nyakišišo ka Beibeleng le ka dikgatišong tša Bokriste di be di le bjalo ka dikgopotšo tšeo di bego di mo matlafatša gore a dule a itišitše. E nngwe ya dikgopotšo tšeo e be e le pego ya Josefa le mosadi wa Potifara. O phetha ka gore: “Ge feela ke dutše ke ikgopotša kamoo ke ratago Jehofa ka gona, ga ke na lebaka la go boifa gore ke tla dira sebe se se segolo gomme ka senyetša Modimo.”

Ela Hloko Dikgopotšo tša Modimo!

16. Re ka holwa bjang ke go bala le go naganišiša ka maphelo a batho bao go boletšwego ka bona ka Beibeleng?

¹⁶ Ka moka ga rena re ka godiša tebogo ya rena bakeng sa ditekanyetšo tša Jehofa ka go katanela go kwešiša lebaka leo ka lona a dirilego gore dipego tše itšego di bolokwe ka Mangwalong bakeng sa rena. Di re ruta’ng? Ke dika dife goba ditshekamelo dife tšeo di bontšhitšwego ke baanegwa ba Beibele tšeo re swanetšego go di ekiša goba go di phema? Ge e le gabotse, go bolelwa ka batho ba makgolo ka Lentšung la Modimo. Bohle bao ba ratago ditaelo tša Modimo ba ka holwa ke go hlagolela lerato la go rata bohlale bjo bo neago bophelo, go akaretša le dithuto tšeo re ka ithutago tšona mehlaleng yeo Jehofa a e bolokilego ka kelohloko. Makasine wo gantši o ba le dihlogo tšeo di bolelago ka batho bao dipego tša bona di ka re rutago se itšego. Ke ka baka la’ng o sa iphe nako ya go o bala?

17. O ikwa bjang ka dikgopotšo tša Jehofa, gomme ka baka la’ng?

¹⁷ Ruri re leboga go tshwenyega ka lerato moo Jehofa a go bontšhago bakeng sa bao ba katanelago go dira thato ya gagwe! Re tloga re sa phethagala, go fo etša ge banna le basadi bao go boletšwego ka bona ka Beibeleng ba be ba sa phethagala. Lega go le bjalo, pego yeo e ngwadilwego ya ditiro tša bona ke ya bohlokwa kudu go rena. Ka go ela hloko dikgopotšo tša Jehofa, re ka phema go dira diphošo tše dikgolo kudu, gomme re ka ekiša mehlala e mebotse ya bao ba bego ba sepela ditseleng tša go loka. Ge re dira bjalo, re tla kgona go opela le mopsalme gore: “Ba lehlôxônôlô ké ba-lôta-mabohlatse-’axwe [“dikgopotšo tša gagwe,” NW], ba a nyaka ka pelo ka moka. Môya wa-ka o lôtôla mabohlatse ’axo, ke a rata xa-xolo.”—Psalme 119:2, 167.

[Mengwalo ya ka tlase]

O tla Araba Bjang?

• Re ka ithuta’ng tseleng yeo Dafida a bego a lebelela Saulo ka yona?

• Pego ya Anania le Safira e re ruta’ng?

• Ke ka baka la’ng pego ya bophelo bja Josefa e le ya bohlokwa kudu lehono?

[Dipotšišo tša Thuto]

[Seswantšho go letlakala 26]

Ke ka baka la’ng Dafida a ile a gana go bolaya Saulo?

[Seswantšho go letlakala 27]

Re ithuta’ng pegong ya Anania le Safira?

[Seswantšho go letlakala 28]

Ke’ng se ilego sa dira gore Josefa a gane ge a gokeletšwa boitshwarong bjo bo gobogilego?