Dipotšišo tše Tšwago go Babadi

Ke’ng seo Jesu a bego a se bolela ge a be a re go Nikodemo: “Ga go motho yo a kilego a rotogela legodimong ge e se yo a theogilego a e-tšwa legodimong, e lego Morwa wa motho”?—Johane 3:13.

Ka nako yeo Jesu o be a le mo lefaseng, gomme o be a se a hlwa a rotoga goba go boela legodimong. Lega go le bjalo, seo re se tsebago ka Jesu le taba e dikologilego mantšu a gagwe, se ka re thuša go kwešiša ntlha ya gagwe.

Jesu o ‘theogile a e-tšwa legodimong’ ka kgopolo ya gore o kile a phela lefelong la moya le Tatagwe, eupša ka nako e beilwego, bophelo bja Morwa bo ile bja fetišetšwa popelong ya Maria, e le gore Jesu a ka belegwa e le motho. (Luka 1:30-35; Bagalatia 4:4; Baheberu 2:9, 14, 17) Ka morago ga lehu la gagwe, Jesu o be a tla tsošwa e le sebopiwa sa moya le go bušetšwa gore a boele a be le Jehofa. Ka gona, pele a bolawa, Jesu o ile a rapela ka gore: “Tate, ntagafatše ke le kgaufsi le wena ka letago leo ke bego ke e-na le lona ke le kgaufsi le wena pele lefase le e-ba gona.”—Johane 17:5; Baroma 6:4, 9; Baheberu 9:24; 1 Petro 3:18.

Ge Jesu a be a bolela le Nikodemo, Mofarisei wa morutiši kua Isiraele, Jesu o be a se a hlwa a boela legodimong. Ke therešo gore ga go motho yo a bego a ile a hwa le go rotogela lefelong la moya, legodimong. Jesu ka boyena o boletše gore go be go se yo a lekanago le Johane Mokolobetši bjalo ka moporofeta wa Modimo, eupša “motho yo e lego yo monyenyane mmušong wa magodimo ke yo mogolo go mo feta.” (Mateo 11:11) Le gona, moapostola Petro o hlalositše gore le Kgoši Dafida yo a botegago o hwile e bile o sa le ka lebitleng; Dafida ga se a rotogela legodimong. (Ditiro 2:29, 34) Go be go e-na le lebaka leo le dirilego gore batho bao ba hwilego pele ga Jesu, ba bjalo ka Dafida, Johane Mokolobetši le banna ba bangwe ba tumelo ba se ke ba ya legodimong. Ba hwile pele Jesu a bula tsela goba go dira gore go kgonege gore batho ba tsošetšwe bophelong bja legodimo. Moapostola Paulo o ngwadile gore Jesu go etša mmulamadibogo, o ‘kgakotše tsela e mpsha le e phelago’ ya go ya legodimong.—Baheberu 6:19, 20; 9:24; 10:19, 20.

Ka ge Jesu a be a se a hlwa a e-hwa le go tsošwa, o be a bolela’ng ge a be a re go Nikodemo: “Ga go motho yo a kilego a rotogela legodimong ge e se yo a theogilego a e-tšwa legodimong, e lego Morwa wa motho”? (Johane 3:13) Ela hloko taba e dikologilego goba seo Jesu a bego a boledišana le Nikodemo ka sona.

Ge mmuši yoo wa Mojuda a be a e-tla go Jesu bošego, Jesu o mmoditše gore: “Ruri-ruri ke re go wena, Ka ntle le gore motho a tswalwe gape, a ka se ke a bona mmušo wa Modimo.” (Johane 3:3) Ge Nikodemo a araba o botšišitše gore: ‘Seo se ka kgonega bjang? Motho a ka tswalwa bjang la bobedi?’ O be a sa kwešiše thuto ye ya Modimo ya mabapi le go ba Mmušong wa Gagwe. Na go na le tsela e nngwe yeo a bego a ka ithuta se ka yona? Ee, eupša e sego ka tsela ya batho; go be go se na motho yo a bego a ka mo ruta yona ka gore go be go se motho yo a kilego a ya legodimong le yo a bego a ka kgona go mo hlalosetša dilo le ge e le dife mabapi le go tsena Mmušong. Ke Jesu feela yo a bego a ka mo ruta. O be a ka ruta Nikodemo le ba bangwe ka gobane O ile a theoga a e-tšwa legodimong le gona o be a swanelegela go ruta batho ka dilo tše bjalo.

Ka gona, potšišo yeo e botšišwago ka temana ye e bontšha ntlha ya bohlokwa mabapi le go ithuta Lentšu la Modimo. Ga se ra swanela go kgopišwa ke temana ka gobane go bonala go le thata go e kwešiša. Seo Beibele e se bolelago temaneng e itšego se swanetše go bapišwa le seo e se bolelago ditemaneng tše dingwe gomme se sepedišane le tšona. Go feta moo, gantši taba e dikologilego—boemo goba seo go bego go bolelwa ka sona—e ka re thuša go hwetša tlhaloso e kwagalago ya temana yeo re sa e kwešišego.