Ee, Ruri o ka Hwetša Lethabo

KA DINAKO tše dingwe go thata go hwetša lethabo—lethabo la kgonthe le leo le swarelelago. Go bjalo ka gobane gantši ge batho ba tsoma lethabo, ba le tsoma mothopong o fošagetšego. Selo feela seo ba se nyakago ke go ba le mogwera yo a swanelegago le yo a ka botwago yoo a ka ba thušago go hwetša mothopo o swanetšego!

Beibele ke mothopo wa tlhahlo yeo e nyakegago. Ela hloko e nngwe ya dipuku tša yona—Dipsalme. Puku ye e akaretša dikoša tše kgethwa tše 150 tšeo di opelelwago Jehofa Modimo, tšeo seripa-gare sa tšona se hlamilwego ke Kgoši Dafida wa Isiraele ya bogologolo. Eupša selo sa bohlokwa kudu go feta go tseba bangwadi ba yona ke go tseba gore puku ye e ngwadilwe ka pudulelo ya Mogwera yo mogolo kudu wa batho, e lego Jehofa. Ka gona re ka kgodišega gore e hupere tlhahlo e tšwago go Modimo yeo e ka re holago le yeo e ka re thušago go hwetša lethabo.

Bangwadi ba Dipsalme ba be ba kgodišegile gore lethabo le tlišwa ke go ba ga motho le tswalano e botse le Modimo. Mopsalme o ngwadile gore: “Monna wa lehlôxônôlô ké e a boifaxo Morêna.” (Psalme 112:1) Ga go tswalano yeo batho ba ka bago le yona, dilo tše di bonagalago le dilo tšeo motho a ka di fihlelelago tšeo di ka tlišago lethabo leo le swanago le leo le tlišwago ke go ba gare ga “sethšaba seo [Jehofa] e lexo Modimo wa sôna.” (Psalme 144:15) Diphihlelo tša bahlanka ba bantši ba Modimo ba lehono di hlatsela se.

Mohlala o mongwe ke wa Susanne, yoo a sa tšwago go feta nywaga e 40. * O itše: “Lehono batho ba bantši ba tsenela dihlopha tše itšego e le gore ba fihlelele dipakane tše di swanago goba ba dire mediro e swanago. Lega go le bjalo, ke ka sewelo ba lebelelago motho yo mongwe le yo mongwe sehlopheng seo e le mogwera.  Ga go bjalo ka batho ba Jehofa. Lerato la rena go Jehofa le dira gore re ratane. Ge re e-na le batho ba Modimo, re ikwa re lokologile go sa šetšwe moo re ka bago re le gona. Botee bjo bo kgotsofatša maphelo a rena kudu. Ke bomang gape bao ba ka bolelago gore ba na le bagwera bao ba tšwago ditšhabeng tše di fapanego ka mo go feletšego, ditlogong le merafong e sa swanego? Ka pelo ya-ka ka moka nka re go ba yo mongwe wa batho ba Jehofa go tliša lethabo.”

Maree, yoo a belegetšwego Scotland, le yena o ithutile gore go ba le tswalano ya kgaufsi le Jehofa go bohlokwa e le gore motho a hwetše lethabo. O laodišitše gore: “Pele ke ithuta therešo ya Beibele, ke be ke thabela go bogela difilimi tše di tletšego bošoro. Eupša bošego ke be ke sa kgone go robala ke sa swara sefapano e le gore ke rake dipoko le dinwa-madi (vampires) tšeo di bego di tšweletšwa difiliming tšeo. Lega go le bjalo, ge ke se na go ithuta therešo le go kgaotša go bogela difilimi tšeo, tswalano ya-ka le Jehofa e ile ya dira gore ke kgone go robala ke se na poifo, ke thabela go hlankela Modimo yo matla kudu go feta batemona le dinwa-madi tšeo tša boikgopolelo.”

Go Bota Jehofa go Tliša Lethabo

Ga re na lebaka la go belaela matla a magolo le bohlale bja Mmopi bjo bo sa lekanywego. Ka ge a be a tseba gore a ka bota Jehofa ka mo go feletšego le gore e ka ba setšhabelo sa gagwe, Dafida o ngwadile gore: “Wa lehlôxônôlô ké monna eo a itšexo: Kholofêlô ya-ka ké Morêna!”—Psalme 40:4.

Maria o itše: “Phihlelo yeo ke bilego le yona kua Sepania le dinageng tše dingwe e nthutile gore ge re dira dilo ka tsela ya Jehofa, gaešita le ge maikwelo le menagano ya rena e ka re tutueletša gore re dire ka tsela e fapanego, re ba le mafelelo a mabotse kudu ao motho a ka a hwetšago. Se se tliša lethabo ka gobane tsela ya Jehofa ka mehla ke e kaone kudu.”

Andreas, mogolo wa Mokriste yo a ilego a hlankela dinageng tše dintši tša Yuropa, le yena o ithutile ka phihlelo gore re ka bota Jehofa. O itše: “Mogolo’a-ka, yoo e sego Hlatse, o bile le tutuetšo e kgolo kudu go nna nakong ya ge ke sa le mofsa, a nkgothaletša gore ke phegelele mošomo woo o bego o tla nnea tšhelete e ntši. O ile a nyama kudu ge ke tsenela tirelo ya nako e tletšego gomme ke sa ithekge ka seo go thwego ke tšhireletšo yeo e tlišwago ke ditokišetšo tša mošomo tša phenšene. Ga ke a ka ka hlaela selo nakong ya ge ke le tirelong ya nako e tletšego, e bile ke hweditše ditšhegofatšo tšeo ba bangwe ba dumago feela gore ba ka di hwetša.”

Ka 1993, Felix o ile a laletšwa gore a tle go thuša go katološa meago ya ofisi ya lekala ya Dihlatse tša Jehofa kua Selters, Jeremane. O ile a laletšwa gore e be setho sa sa ruri sa lapa la Bethele  ge moago o fedile. O ile a arabela bjang? O itše: “Ke ile ka amogela taletšo yeo ke e-na le dipelaelo. Eupša ga bjale ke šetše ke e-na le nywaga e ka bago e lesome ke le mo, gomme ke kgodišegile gore Jehofa o arabile dithapelo tša-ka. O tseba selo seo se ntshwanetšego. Ka go mmota ka mo go feletšego le ka go mo dumelela gore a ntlhahle, ke mo nea sebaka sa gore a mpontšhe gore ke eng seo a nyakago gore ke se dire.”

Susanne, yoo go boletšwego ka yena pejana, o be a nyaka go hlankela bjalo ka modiredi wa nako e tletšego wa mmulamadibogo, eupša o be a thatafalelwa ke go hwetša mošomo wa nakwana. Ka morago ga go fetša ngwaga a sa o hwetše, o ile a tsenela tirelo ya nako e tletšego a botile Jehofa. O laodišitše gore: “Ke ile ka romela kgopelo ya-ka ya bobulamadibogo bja ka mehla. Ke be ke bolokile tšhelete e lekanego gore ke kgone go lefelela ditshenyagalelo tša-ka tše di tlwaelegilego tša kgwedi e tee. Gomme yeo e ile ya ba kgwedi e thabišago gakaakang! Bodiredi bja-ka bo ile bja ntlišetša lethabo le legolo, eupša ke ile ka palelwa ke go hwetša mošomo. Lega go le bjalo, go etša ge Jehofa a holofeditše, ga a ka a ntlogela. Ke ile ka kgona go hwetša mošomo letšatšing la mafelelo la kgwedi. Bjale ke ile ka bona gore ruri nka bota Jehofa! Phihlelo ye ya mathomo yeo ke bilego le yona tirelong ya nako e tletšego e dirile gore ke be le bophelo bjo bo kgotsofatšago le bjo bo tletšego lethabo.”

Go Amogela Keletšo e Tšwago go Modimo go Tlaleletša Lethabong

Kgoši Dafida o ile a dira diphošo tše dikgolo. Ka dinako tše dingwe o be a nyaka keletšo e bohlale. Na le rena re ikemišeditše go amogela tayo le keletšo go etša Dafida?

Aida, yo a dulago France, le yena o kile a lemoga gore o dirile phošo e kgolo. O itše: “Ke be ke tshwenyegile kudu ka go tsošološa tswalano ya-ka le Jehofa. Ga go selo seo se bego se le bohlokwa go feta seo.” O ile a kgopela thušo go bagolo ba Bakriste. Ka ge a bile tirelong ya nako e tletšego ka nywaga e 14, ga bjale o re: “Ruri go a kgotsofatša go tseba gore Jehofa o ntebaletše!”

Go amogela keletšo e tšwago go Modimo go ka re thuša gore re pheme go dira diphošo. Judith o hlalositše gore: “Ge ke be ke e-na le nywaga e 20, ke ile ka kgahlegela rakgwebo yo mongwe wa Jeremane yoo a bego a lekile ka matla go nkgoketša. O be a hlompšha, a atlegile mošomong e bile a nyetše. Ke ile ka lemoga gore ke swanetše go kgetha magareng ga go kwa melao ya Jehofa le go Mo furalela. Ke ile ka tsebiša batswadi ba-ka ka se. Tate o ile a nkgopotša a sa itome maleme gore ke eng seo Jehofa a bego a se letetše go nna. O ile a mpotša a sa pepetletše—e lego selo seo ke bego ke se nyaka! Lega go le bjalo, ke ile ka leka go hwetša sehlare sa ntšhirela melaong ya motheo ya Modimo. Mma o ile a fetša dibeke tše dintši a bolela le nna mantšiboa e le ge a leka go mpontšha kamoo melao ya Modimo e lego bohlokwa le kamoo e phološago bophelo ka gona. Ke leboga kudu gore ganyenyane-ganyenyane pelo ya-ka e ile ya retologela go Jehofa. Go laiwa le go rutwa ke yena go ntlišeditše lethabo le legolo—nywaga e mentši tirelong ya nako e tletšego le molekane wa Mokriste yoo a nthatago le yoo a ratago Jehofa ka pelo ya gagwe ka moka.”

Ruri mehlala ye e gatelela bohlokwa bja mantšu a Dafida a rego: “Wa lehlôxônôlô ké mo-lebalêlwa-dikaroxô, yo dibe tša xaxwe di khupeditšwexo. Wa lehlôxônôlô ké motho eo Morêna a sa mmalelexo molato.”—Psalme 32:1, 2.

Lethabo Leo le Tlišwago ke go Hlokomela ba Bangwe

Dafida o ngwadile gore: “Wa lehlôxônôlô ké mo-šetša-mohloki.” O tšwetše pele ka gore: “Ka mohla-mobe ô tlo namolêlwa ke Morêna. Morêna ó tlo mo lôtôla, ó tlo mo phediša a lêtlêxa.” (Psalme 41:1, 2) Tlhokomelo e lerato yeo Dafida a ilego a e nea Mefibosethe, e lego morwa wa segole wa mogwera yo a rategago wa Dafida, ke mohlala o mobotse wa tsela yeo bahloki ba swanetšego go swarwa ka yona.—2 Samuele 9:1-13.

Marlies, yo a hlanketšego bjalo ka moromiwa ka nywaga e 47, o na le tokelo ya go nea bohlatse bathong bao ba ilego ba swanelwa ke go tšhaba ditikologong tše kotsi tša Afrika, Asia le Yuropa Bohlabela. O itše: “Ba na le mathata a fapa-fapanego, gomme ka kakaretšo ba ikwa eka ga ba amogelege gabotse le gore ge e le gabotse ba a  kgethollwa. Go thuša batho ba bjalo ka mehla go tliša lethabo.”

Marina, yo a sa tšwago go feta nywaga e 40, o ngwadile gore: “Ka ge ke se ka nyalwa, ke tseba kamoo go homotšago go lemoga gore go na le batho bao ba tshwenyegago ka wena. Se se ntutueletša gore ke kgothatše batho ka go ba leletša mogala goba ka go ba ngwalela mangwalo. Ba bantši ba ile ba bontšha tebogo. Go thuša ba bangwe go a nthabiša.”

Dimitar, yo a lego nywageng ya gagwe ya magareng ya bo-20, o itše: “Mma o nkgodišitše a se na molekane. Ge ke be ke sa le yo monyenyane, ke ile ka thabišwa ke ge molebeledi wa Thuto ya Puku ya Phuthego a sepela le nna beke e nngwe le e nngwe gore a ntlwaetše bodireding. Le gona bjale ke sa dutše ke leboga go phegelela ga gagwe. Ke a tseba gore ga se ka mehla go bego go le bonolo gore a ntutueletše go dira bjalo.” Ka baka la go leboga thušo yeo a ilego a e hwetša, Dimitar ga bjale o thuša ba bangwe, o re: “Ke leka gore bonyenyane gatee ka kgwedi ke sepele le mofsa goba motho yo a godilego tirelong ya tšhemo.”

Puku ya Dipsalme e bolela le ka dilo tše dingwe gape tšeo di tlišago lethabo. E nngwe ya tšona ke bohlokwa bja go ithekga ka matla a Jehofa go e na le go ithekga ka matla a rena: “Ba lehlôxônôlô ké batho bao [Jehofa e] lexo matla a bôná.”—Psalme 84:5.

Corinna le yena o tseba se. O ile a hudugela nageng yeo go yona go bego go nyakega bagoeledi ba bantši. O itše: “Ke ile ka swanelwa ke go ithuta leleme le lefsa, setšo se sefsa le mokgwa o mofsa wa go nagana. Ke ile ka ikwa eka ke polaneteng e nngwe. Ke ile ka tšhošwa ke kgopolo ya go nea bohlatse boemong bjo ke sa bo tlwaelago. Ke ile ka kgopela thušo go Jehofa, gomme o ile a nnea matla a gore ke nee bohlatse letšatši ka moka tšhemong e lego lekatana. Ge nako e dutše e e-ya, ke ile ka thoma go tlwaela go dira bjalo. Ke ile ka thoma dithuto tše dintši tša Beibele gomme le gona bjale ke sa dutše ke holwa ke phihlelo ye. Ke ithutile gore ka matla a Jehofa, re ka fenya gaešita le mathata ao go bonagalago e le a magolo kudu.”

Ee, go na le dilo tše dintši tšeo di tlišago lethabo, tše bjalo ka go ba le tswalano ya kgaufsi le Modimo le batho ba gagwe, go bota Jehofa ka mo go feletšego, go amogela keletšo e tšwago go yena le go hlokomela ba bangwe. Ka go sepela ditseleng tša Jehofa le go kwa melao ya gagwe, re ka thabela go amogelwa ke yena.—Psalme 89:15; 106:3; 112:1; 128:1, 2.

[Mongwalo wa ka tlase]

[Seswantšho go letlakala 12]

Maria

[Seswantšho go letlakala 13]

Maree

[Seswantšho go letlakala 13]

Susanne le Andreas

[Seswantšho go letlakala 15]

Corinna

[Seswantšho go letlakala 15]

Dimitar