Koketšego Gare ga Batho ba Ditlogo tše di Fapa-fapanego ba Uganda

UGANDA, yeo e lego magareng ga bohlabela le bodikela bja Moedi o Mogolo wa ka Bohlabela bja Afrika, e ka mahlakoreng ka bobedi a mogarafase, gape ke lefelo le lebotse kudu. E na le dimela tša mehuta-huta le diphoofolo tša go fapa-fapana. Ka ge e le mmotong o mogolo o phagamego wa Afrika, e na le boemo bjo bobotse bja leratadima le meboto e ikadilego gabotse yeo e nabago dikhilomithara tše dintši.

Ga se dinaga tše dintši tšeo di nago le boemo bja go tonya le bja phišo ya mola-tšatšing ka nako e tee, eupša Uganda yona e na le bjona. E nabile go tloga ditlhoreng tšeo di apešitšwego ke lehlwa tša Dithaba tša Moon, goba Dithaba tša Ruwenzori, ka bodikela go fihla nageng ya go nyaka go swana le leganata ka bohlabela. O ka hwetša ditlou, dinare le ditau melaleng ya gona moo. Dithabeng tša yona le dithokgweng tša yona tše di kitlanego go dula di-gorilla le di-chimpanzee le mehuta ya dinonyana ya ka godimo ga e 1 000. Dikontinente tše dintši tša Afrika di katana le komelelo le tlala, eupša Uganda e šegofaditšwe ka dinoka le matsha a go swana le la Victoria, e lego letsha le legolo la bobedi la meetse a hwekilego lefaseng ka bophara. Karolo ya ka leboa ya Letsha la Victoria e elela ka Nokeng ya Nile. Ga go makatše ge Winston Churchill a ile a swantšha naga ye le “perela ya Afrika!”

“Perela” e a Phadima Lehono

Lega go le bjalo, selo se se kgahlišago kudu ka Uganda ke batho ba gona—ba na le bogwera, ba amogela baeng e bile ba tšwa ditšong tše di fapa-fapanego. Le lehono, batho bao ba fapa-fapanego ba ka hlaolwa ka setšo sa bona le ka moaparo.

Morago bjale, palo e oketšegago ya batho ba Uganda e amogela ditaba tše dibotse tša Beibele tša mabapi le go tla ga nako ya khutšo ya ka mo go sa felego yeo e tlago go fenya lefaseng ka bophara. (Psalme 37:11; Kutollo 21:4) Ke tlhohlo go  tliša molaetša go batho ka moka nageng ye yeo e lekanago le Great Britain.

Go tloga nakong ya ge go kolobetšwa Hlatse ya Jehofa ya mathomo kua Uganda Letsheng la Victoria ka 1955, ruri “e monyenyane” o ile a fetoga ba sekete ka 1992. Ga e sa le go tloga ka nako yeo, go bile le koketšego. Se se dumelelana le mantšu a kgothatšago a Modimo a rego: “Ké Nna Morêna e ke tl’o xo dira tšeo ka pelá lebakeng la xôna.”—Jesaya 60:22.

Go Fenya Mapheko a Bakwago ke Maleme

Seisemane ke leleme la semmušo leo le dirišwago ka nageng, kudu-kudu go tša thuto, lega go le bjalo, ga se leleme la setlogo la batho ka moka ba Uganda. Ka gona, e le go leka go fihlelela batho ka ditaba tše dibotse, Dihlatse tša Jehofa di diriša gape le maleme a mangwe a magolo ao a bolelwago moo. Se se bonagetše se nyakega ka gobane palo ya ka godimo ga 80 lekgolong ya baagi ba Uganda ba dimilione tše 25 e dula dinaga-magaeng le ditoropong tše dinyenyane, moo batho ba boledišanago letšatši le letšatši ka leleme la bona la setlogo. Go fihlelela dihlopha tše le go kgotsofatša dinyakwa tša tšona tša moya go nyaka boiteko bjo bogolo.

Lega go le bjalo, Dihlatse tša Jehofa di leka go fihlelela dinyakwa tše ka go boledišana le batho ka maleme a bona le ka go lokišetša dipuku tša Beibele ka maleme a go fapa-fapana. Ofising ya lekala kua motseng-mošate wa Kampala, go na le dihlopha tše nne tša bafetoledi ba maleme a: se-Acholi, se-Lhukonzo, se-Luganda le se-Runyankore. Go feta moo, dikopano tša Bokriste tšeo di swarwago ka maleme a go fapa-fapana nageng ka moka di bile le palo e botse ya bao ba bilego gona, e lego ya go feta palo ya Dihlatse tša Jehofa gabedi. Se se bontšha gabotse gore boiteko bja go fihlelela dihlopha tša maleme a go fapana bo tliša koketšego ya moya. Eupša ga go felele moo.

Babulamadibogo ba Etelela Pele Modirong

Diphuthego ka lethabo di thekga masolo a ngwaga le ngwaga a dikgwedi tše tharo a nakong ya ge go šongwa tšhemo e lego lekatana. (Ditiro 16:9) Bafsa ba mafolofolo ba babulamadibogo, goba baebangedi ba nako e tletšego, bao ba oketšegago ka palo ba etelela pele modiro wo. Ka dinako tše dingwe ba ya mafelong a kgole, moo ditaba tše dibotse di sa kago tša kwewa.

 Dihlatse tše pedi di be di abetšwe gore di yo hlankela bjalo ka babulamadibogo ba kgethegilego ka dikgwedi tše tharo kua Bushenyi, e lego torotswana yeo e lego ka bodikela bja Uganda. Ba ile ba tlatša Hlatse e tee ya Jehofa lefelong leo boboleding le go rulaganya diboka tša Bokriste. Ka kgwedi e tee feela, babulamadibogo ba ba be ba šetše ba ithuta Beibele le batho ba 40 ba go fapa-fapana, gomme ba 17 ba bona ba be ba thoma go ba gona dibokeng tša Dihlatse tša Jehofa. Babulamadibogo ba ba hlalosa gore: “Ba bangwe bao re ba tlogeletšego poroutšha ya Ke Eng Seo Modimo a se Nyakago go Rena? * ba ile ba tla legaeng la rena matšatši a mmalwa ka morago, ba swere matlakala a mmalwa ba ngwadile dikarabo tša dipotšišo tšeo ba di hweditšego ka poroutšheng. Ba be ba nyaka go tseba ge e ba dikarabo tša bona di nepagetše.” Lehono, go na le phuthego yeo e nago le Holo ya yona ya Mmušo torotswaneng yeo.

Babulamadibogo ba babedi ba ile ba ya tšhemong ka bodikela bja Uganda moo ditaba tše dibotse di sa kago tša bolelwa. Ba ngwadile gore: “Ka kgonthe batho ba nyoretšwe ditherešo tša Beibele. Nakong ya dikgwedi tše tharo tšeo re bilego moo ka tšona, re kgonne go thoma le go swara dithuto tša Beibele tše 86.” Kapejana sehlopha sa Dihlatse se ile sa hlongwa lefelong leo.

Badiri ba Bangwe ba Mafolofolo Tšhemong

Gare ga babulamadibogo ba mafolofolo go na le ba bangwe bao ba šomilego ka nywaga e mentši. Pele ga ge Patrick e e-ba yo mongwe wa Dihlatse tša Jehofa, o be a bapala clarinet sehlopheng sa mašole sa mmuši wa Uganda e lego Idi Amin. Dikgwedi tše tshela ka morago ga gore Patrick a kolobetšwe ka 1983, o ile a tsenela tirelo ya nako e tletšego. Lehono ke molebeledi wa mosepedi, o etela le go kgothatša diphuthego.

Margaret o kolobeditšwe ka 1962. Go sa šetšwe gore o obelela nywaga e 80 e bile o na le bothata bja letheka bjo bo mo šitišago go sepela, o fetša mo e ka bago diiri tše 70 ka kgwedi a boledišana le baagišani ba gagwe ka kholofelo yeo e theilwego Beibeleng. O bea dipuku pankeng ka ntle legaeng la gagwe gomme a thoma poledišano le batho bao ba fetago ka tsela bao ba ratago go kwa ditaba tše dibotse tša lefase le lefsa la khutšo.

Simon, yo e lego molemi ka bohlabela bja Uganda, o be a tsoma therešo ka nywaga e ka bago e 16, gomme ka 1995 o ile a hwetša dipuku tše dingwe tše di gatišitšwego ke Dihlatse tša Jehofa. Seo a se badilego se ile sa mo nea kganyogo ya go nyaka go tseba mo go oketšegilego ka Mmušo wa Modimo le morero wa Jehofa ka lefase le le lebotse. Go be go se na Dihlatse kua Kamuli moo a bego a dula gona, ka gona Simon o  ile a sepela mo e ka bago dikhilomithara tše 140 go ya Kampala go yo di nyaka. Lehono, go na le phuthego motseng wa gabo.

“Re Tletše sa Ruri”

Go etša ge go le bjalo ka mafelo a mangwe a Afrika, batho ba bantši ba letetše gore sehlopha sa bodumedi se be le mafelo a swanetšego a borapedi. Se se ile sa tšweletša bothata bjo bogolo diphuthegong tše dingwe tša Dihlatse tša Jehofa, ka ge di hloka tšhelete ya go aga Holo ya Mmušo e swanetšego. Bana babo rena ba ile ba thaba kudu ge mafelelong a 1999, lenaneo la go agwa ga Diholo tša Mmušo le thongwa lefaseng ka bophara. Nywageng e mehlano e latetšego, go ile gwa agwa Diholo tša Mmušo tše 40 tše difsa kua Uganda. Lehono, mo e ka bago phuthego e nngwe le e nngwe e na le Holo ya yona e botse ya Mmušo. Molaetša wo o fetišeditšwego bathong ba lefelong leo wa modiro wa go aga e be e le gore, “Re tletše sa ruri.” Go agwa ga Diholo tša Mmušo le gona go dirile gore go be le koketšego.

Phuthego e nyenyane ka leboa la Uganda e be e swarela diboka tša yona ka tlase ga dihlare tše di kitlanego tša me-mango. Ge e hwetša setsha, mošomo o ile wa tšwela pele. Bana babo rena ba sehlopha sa go aga, ba šoma le Dihlatse tša lefelong leo, ba ile ba thoma go aga Holo ya Mmušo. Yo e bego e le radipolitiki yo a tumilego wa lefelong leo o ile a kgahlwa ke mošomo wo. O ile a ithapela gore ba šomiše karatšhe ya gagwe bakeng sa diboka go fihlela ge ba feditše go aga Holo ya Mmušo. O ile a amogela thuto ya Beibele go yo mongwe wa baithapi ba go aga. Ga bjale ke mogoeledi yo a kolobeditšwego yo mafolofolo gomme o thabela go rapela Jehofa Holong e mpsha e botse ya Mmušo!

Ge go be go agwa Holo ya Mmušo karolong e nngwe ka borwa-bohlabela bja naga, moagi wa lefelong leo o ile a kgahlwa ke moya wa bogwera, wa lerato le wa tirišano woo a o lemogilego gare ba bana babo rena moo a ilego a ithapela go ba thuša. Ge modiro wa go aga o le kgaufsi le go fela, o ile a šoma bošego ka moka e le gore bana babo rena ba ka kgona go fetša Holo ya Mmušo gore e neelwe mesong e latelago. O boletše gore: “Ka kgonthe ke lena feela bao le ratanago—ga le bolele feela ka molomo.”

Koketšego e Tšwela Pele go sa Šetšwe Mathata

Ka ge go šetše go akareditšwe tšhemo e kgolo kua Uganda, go na le koketšego e sa kgaotšego ya palo ya Dihlatse le ba bantši bao ba thabelago ba ba kopanelago le diphuthego. Lega go le bjalo, bana babo rena ba tshwenyegile kudu ka bafaladi bao ba tlago ka bontši ka Uganda. Ntwa ya selegae e kgomile le batho ba Jehofa dinageng tša kgaufsi. Dihlatse tše di lego dikampeng tša bafaladi di bontšhitše kholofelo e tiilego go Jehofa. Yo e bego e le mohlankedi wa naga ya kgaufsi le yo a ilego a ba le letsogo go tlaišeng Dihlatse ge di be di thibetšwe ka nageng, o gopola gore o be a thabela bophelo. Ka morago ga go ithuta Beibele dikampeng tša bafaladi le gore e be Hlatse, o bolela gore: “Go ba le dilo tše di bonagalago le maemo a godimo lefaseng le, ga go hole ka selo. Gaešita le ge ke diila e bile ke babja, ke na le morero bophelong. Ke tseba Jehofa gomme ke leboga tokelo ya thapelo. Go oketša moo, ke na le kholofelo e tiilego ka bokamoso e bile ke a tseba gore ke ka baka la eng re swanetše go lebeletšana le mathata lehono. Ka gona ke na le khutšo ya monagano yeo ke sa kago ka ba le yona pele.”

Go bolelwa gore ge e ba o hloma thupa mmung o nonnego wa Uganda mantšiboa, mesong o tla hwetša e hlogile medu. Koketšego ya moya yeo e tšwelago pele e bontšha gore mmu wa moya ke o nonnego. Re leboga Jehofa Modimo ge a dumeletše batho ba ditlogo tše di fapa-fapanego ba Uganda gore ba kgone go ithuta ka Mmušo wa gagwe. Jesu o ile a swantšha bohlokwa bja yona le ‘perela ya theko e kgolo.’ Batho ba oketšegilego ba Uganda ba thoma go kwešiša seo.—Mateo 13:45, 46.

[Mongwalo wa ka tlase]

[Mebapa go letlakala 8]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

SUDAN

UGANDA

Noka ya Nile

Kamuli

Tororo

Kampala

Bushenyi

Letsha la Victoria

KENYA

TANZANIA

RWANDA

[Seswantšho go letlakala 9]

Badiredi ba bararo ba mafolofolo ba babulamadibogo go ba bantši ba ba lego gona

[Seswantšho go letlakala 10]

Patrick

[Seswantšho go letlakala 10]

Margaret

[Seswantšho go letlakala 10]

Simon

[Seswantšho go letlakala 10]

Kopano ya selete kua Tororo

[Mothopo wa Seswantšho go letlakala 8]

Background: © Uganda Tourist Board