Na Thelebišene ke Mohlokomedi yo Mobotse wa Bana?

KA DINAKO tše dingwe, go dira gore bana ba gago ba ithabiše ka go bogela thelebišene ge wena o swaregile ka mešomo e mengwe go ka bonagala e le mo go ipiletšago kudu. Eupša se se ka kgoma bjang bana ba gago?

The New York Times e bega gore: “Gaešita le masea a ka tutuetšwa ke melaetša yeo e kgomago maikwelo yeo e bontšhwago thelebišeneng.” Nyakišišong ya morago bjale, bana ba nago le ngwaga feela ba ile ba bontšhwa dikarolwana tše kopana tša mananeo a thelebišene tšeo go tšona sebapadi sa mosadi se bego se arabela ka ditsela tše di fapanego sebapadišweng se itšego. Times e re: “Ge sebapadi se be se boifa sebapadišwa, masea a be a phema go bapala ka sebapadišwa seo gomme gantši a bonala a tshwenyegile, a šošobantše difahlego goba a lla. Ge sebapadi se be se thabela sebapadišwa, masea a be a rata go bapala ka sona.”

Go molaleng gore thelebišene e ka kgoma le masea. Go thwe’ng ka tutuetšo ya yona ya nako e telele baneng? Dr. Naoki Kataoka, moprofesara wa malwetši a bana Kholetšheng ya tša Kalafo ya Kawasaki kua Kurashiki, Japane, o ile a dira nyakišišo baneng ba bantši ba homotšego kudu le bao ba palelwago ke go bontšha maikwelo a bona. Ka moka ga bona ba be ba ile ba bogela TV goba dibidio ka nako e telele. Mošemane wa nywaga e mebedi o be a šitwa ke go bolela le batho, le gona a na le tlotlontšu e lekanyeditšwego. O be a ile a bogela dibidio go tloga mesong go fihla mantšiboa letšatši le lengwe le le lengwe ga e sa le go tloga ge a e-na le ngwaga feela. E bile feela ka morago ga ge mmagwe, ka go latela keletšo ya ngaka, a ile a thibela mošemane yo go bogela dibidio gomme a thoma go bapala le yena, moo tlotlontšu ya mošemane e ilego ya thoma go oketšega ganyenyane-ganyenyane. Ee, batswadi ba swanetše go dira dilo gotee le bana ba bona.

Jehofa Modimo, Mohlami wa thulaganyo ya lapa, o ile a gatelela bohlokwa bja go dira dilo gotee ga batswadi le bana. O boditše batho ba gagwe go tloga kgale gore: “[Mantšu a Modimo] O a tiišetšê bana ba xaxo; O bolêlê ôna Ò dutše ngwakong wa xaxo, le xe O le tseleng, xe O y’o rôbala le xe Ò tsoxa.” (Doiteronomio 6:7) Ke batswadi, e sego thelebišene, bao ba ka kgonago go ruta bana gakaone kudu ka mantšu le ka mohlala, ‘ka tsela yeo ba swanetšego go sepela ka yona.’—Diema 22:6.