O Thabile Gakaaka’ng?

GO BA gona, ruri o ka ipotšiša gore: ‘Ke thabile gakaaka’ng?’ Ditsebi tša tša leago di dira nyakišišo e tseneletšego go leka go tseba gore wena goba ba bangwe le tla araba potšišo ye bjang, eupša mošomo wa tšona ga se o bonolo. Go kala lethabo la motho go ka swantšhwa le go leka go kala lerato leo monna a ratago mosadi wa gagwe ka lona goba go kala bogolo bja bohloko bjo lehu le bo bakago ka malapeng. Ga go bonolo go kala maikwelo. Lega go le bjalo, bo-rathutamahlale ba tloga ba lemoga therešo ya motheo ya gore: Batho ka moka ba ka kgona go thaba.

Go sa šetšwe gore batho ba na le bokgoni bja leabela bja go thaba, mathata a magolo a dira gore batho ba se ke ba thaba. Ela hloko mohlala wo: Ditoropong tše dingwe dirapa di tletše ka mabitla a bao ba bolailwego ke AIDS. Bahlankedi ba mmušo ba epolla mabitla a kgale e le gore ba boloke bao ba sa tšwago go hwa. Dikarolong tše dingwe tša Afrika, batho ba iphediša ka go dira mapokisi a bahu. Le gona go sa šetšwe gore o dula kae, o lemogile gore bao ba swerwego ke malwetši a šoro le ba bangwe ba bao ba lahlegetšwego ke meloko le bagwera, ba nyamile.

Go ka thwe’ng ka dinaga tšeo di humilego? Ge maemo a ka fetoga ka tšhoganetšo a ka di amoga tšhireletšo ya tša ditšhelete di se tša itokišetša seo. Kua United States, batho ba bantši bao ba rotšego modiro ba ile ba swanelwa ke gore ba boele mošomong ka baka la ge ba se sa hwetša mo-tla-o-dutše. Ditefelo tša kalafo gantši di tšea tšhelete ka moka ye lapa le nago le yona. Moeletši yo mongwe wa tša melao o bolela gore: “Batho ba bantši ba tla mo ba e-na le mathata a malwetši le dikoloto gomme seo se a nyamiša. O swanetše go ba botša leboelela gore, ‘O tlo lahlegelwa ke ntlo ya gago.’” Eupša go thwe’ng ka bao ba se nago mathata a tša ditšhelete? Na bona ba ka hloka lethabo?

Batho ba bangwe ba swana le mohlami wa dikoša yo a tumilego, Richard Rodgers. Go boletšwe ka yena gore: “Ga se banna ba bantši bao ba kgonnego go thabiša batho go swana le yena.” Le ge dikoša tša gagwe di ile tša thabiša batho ba bantši, yena o be a dula a gateletšegile. O ile a fihlelela dipakane tše pedi tšeo batho ba bantši ba di kganyogago—tšhelete le botumo—eupša na o ile a hwetša lethabo? Mongwadi yo mongwe wa taodišo-phelo o ile a lemoga gore: “[Rodgers] o be a atlegile ka tsela e sa tlwaelegago mošomong wa gagwe, a thabela bophelo bja maemo, le gona ke gabedi a thopa sefoka sa Pulitzer Prize seo a ilego a se hlakanela le yo mongwe. Le gona gantši o be a dula a se a thaba a bile a gateletšegile.”

Ka ge o ka ba o lemogile, go nagana gore mahumo a ka dira gore re thabe gantši ke go iphora. Mmegi wa ditaba tša peeletšo wa kuranta ya The Globe and Mail ya Toronto kua Canada o hlalositše “go ikarola le go hloka morero” e le dilo tšeo batho ba bantši ba go huma ba swanetšego go di kgotlelela. Go ya ka moeletši yo mongwe wa tša ditšhelete, ge batswadi bao ba humilego ba nea bana ba bona tšhelete le dilo tšeo e di rekago, “gantši go bjalwa peu yeo ka morago e bakago manyami.”

 Na go na le Motheo wa Kgonthe wa Lethabo?

E le gore letšoba le gole gabotse le nyaka mmu o mobotse, meetse le boemo bjo bo nepagetšego bja leratadima. Ka mo go swanago, banyakišiši ba kwešiša gore maemo a mangwe a tlaleletša lethabong. A akaretša go phela gabotse mmeleng; go šoma mošomo o kgotsofatšago; dijo tše di lekanego, legae le diaparo; go kgotsofatša dikganyogo tša boithabišo; le bagwera ba paala.

Ka ntle le pelaelo o ka se ke wa ganetša tutuetšo yeo maemo a nepagetšego a ka bago le yona go dira gore motho a thabe. Eupša go na le ntlha ya bohlokwa kudu. Ke go tseba “Modimo yo a thabilego,” yo leina la gagwe e lego Jehofa. (1 Timotheo 1:11) Tsebo yeo e thuša bjang? Jehofa ke Mmopi wa rena, le gona o re neile bokgoni bja gore re thabe. Ka bohlale, o tseba seo se ka re thabišago e le ka kgonthe. Sehlogo se se latelago se ahla-ahla tsela ya gagwe ya go hlahla batho lefelong le ge e le lefe goba maemong le ge e le afe gore ba be le lethabo la ka mo go sa felego.

[Seswantšho go letlakala 4]

Go swana le letšoba, lethabo le nyaka maemo a swanetšego gore le gole

[Mothopo wa Seswantšho go letlakala 3]

© Gideon Mendel/CORBIS