Tlhahlo ya Kgonthe ya go Hwetša Lethabo

KE TSHWANELO ya batho ka moka “go phegelela Lethabo.” Yeo e be e le pono ya bathomi ba sehlopha sa Boipolelo bja Boipušo sa United States of America. Eupša go phegelela pakane ga go swane le go e fihlelela. Le ge bafsa ba bantši ba phegelela boithabišo le dipapadi, ke ba bakae ba o ba tsebago ba ba kgonnego go atlega kamoo ba bego ba nyaka ka gona? Seopedi se sengwe sa go tuma seo se tlwaelanego le go šoma ka thata e le gore e be seopedi se se atlegilego, se re: “Mohlomongwe o ka no se atlege.”

Ge e ba o be o ikwa ka tsela yeo mabapi le go hwetša lethabo, o se ke wa nyama. Lethabo o ka le hwetša ge e ba o le phegelela ka tsela e nepagetšego. Ke ka baka la’ng go bolelwa bjalo? Sehlogo se se fetilego se boletše ka “Modimo yo a thabilego,” e lego Jehofa. (1 Timotheo 1:11) Ka Beibeleng, Modimo o go nea tlhahlo e le gore o se ke wa feleletša o nyamišwa ke go phegelela go hwetša lethabo. Jehofa a ka go thuša go fenya dibaki tšeo di tlwaelegilego tša manyami tša lehono. Ka mohlala, ela hloko kamoo a go homotšago ka gona ge motho yo o mo ratago a e-hwa.

Ge yo o mo Ratago a E-hwa

Na go na le selo se sebotse se re ka se bolelago ka lehu? Lehu le aroganya bana le batswadi le batswadi le bana. Le aroganya bagwera ba kgaufsi gomme la tliša go se šireletšege bathong bao e lego monwana le lenala. Ge lehu le hlaga, lapa leo le thabilego le ka welwa ke manyami.

Ga go na yo a swanetšego gore a go botše gore lehu le baka manyami. Lega go le bjalo, batho  ba bangwe ga ba dumele therešo yeo gomme ba swantšha lehu le tšhegofatšo. Ela hloko se se ilego sa direga ka morago ga ge Ledimo la Katrina le sentše kua Gulf of Mexico ka August 2005. Polokong ya motho yo a hwilego kotsing yeo, moruti o boletše gore: “Ga se a bolawa ke Katrina. Modimo o mmileditše gae.” Ka nako e nngwe, mongwaledi wa sepetlele ka maikemišetšo a mabotse o ile a botša ngwanenyana yo mongwe gore a se ke a tshwenyega ka ge Modimo a išitše mmagwe legodimong. Ngwanenyana yo o ile a lla a re: “Ke ka baka la’ng, ke ka baka la’ng a ntšeetše mma?”

Go molaleng gore dipolelo tše bjalo tše di fošagetšego ka bahu gantši ga di homotše bao ba lahlegetšwego. Ka baka la’ng? Ka baka la gore dipolelo tše bjalo ga se tša therešo mabapi le lehu. Taba ya go tshwenya le go feta ke gore di tšweletša Modimo e le lehodu leo le utswetšago malapa le bagwera batho bao ba ba ratago ka tsela e sehlogo le e bohloko. Go e na le gore e be mothopo wa khomotšo, Modimo o tšweletšwa e le motho yo mobe yo a bakago dikotsi tša lehu. Eupša Lentšu la Modimo le bolela therešo ka lehu.

Beibele e bitša lehu gore ke lenaba. E swantšha lehu le kgoši yeo e bušitšego batho. (Baroma 5:17; 1 Bakorinthe 15:26) Lehu ke lenaba le kotsi kudu leo go se nago motho yo a ka le lwantšhago, le gona moratiwa yo mongwe le yo mongwe yo a hwago e no ba yo mongwe wa bahlaselwa ba bantši ba lehu. Therešo ye ya Beibele e hlalosa gabotse manyami le go felelwa ke matla tšeo re di kwago ge yo re mo ratago a e-hwa. E tiišetša gore maikwelo a bjalo ke a tlhago. Lega go le bjalo, na Modimo o diriša lenaba la rena e lego lehu go tšeela bao re ba ratago legodimong? E re Beibele e arabe potšišo yeo.

Mmoledi 9:5, 10 e re: “’Me xo bahu xa xo se se tsebyaxo, . . . xobane kwa bo-dula-bahu [Sheole] mo O yaxo xôna, xa xo na modirô, xa xo na kxopolô, xa xo tsebô le bohlale.” Sheole ke’ng? Ke lebitla la batho le le tlwaelegilego leo batho ba išwago go lona ge ba hwile. Ka lebitleng bahu ga ba na mohola, ga ba kgone go dira selo, ga ba kgone go itšhišinya goba go kgona go nagana. Go ka swantšhwa le boroko bjo bogolo. * Ka gona Beibele e hlalosa gabotse gore Modimo ga a tšeele bao re ba ratago legodimong ge ba hwile gore ba be le yena. Dilo tše di bakilego gore ba hwe di ba dirile gore ba se sa kgona go phela le ka lebitleng.

Jesu o tiišitše therešo ye ka morago ga gore mogwera wa gagwe Latsaro a hwe. Jesu o swantšhitše lehu le boroko. Ge e ba Latsaro o be a ile legodimong go ya go ba le Modimo Ramatla-ohle, gona e be e ka se be botho gore Jesu a mmušetše lefaseng gore mafelelong a tle a hwe gape. Pego ye e buduletšwego e bolela gore Jesu mabitleng o boletše ka lentšu le le hlabošago gore: “Latsaro, tšwaa!” Beibele e tšwela pele ka gore: “Motho yo a bego a hwile a tšwa.” Latsaro o ile a phela gape. Jesu o be a tseba gore Latsaro ga se a ka a tloga lefaseng. Ka lebitleng leo a bego a robetše go lona o be a sa phele.—Johane 11:11-14, 34, 38-44.

 Pego ye e begilwego ka Beibeleng e re thuša go kwešiša gore lehu ga se tsela yeo Modimo a e dirišago go fetiša batho go tloga lefaseng go ya legodimong. Ka gona re ka batamela Modimo, re tseba gore ga se yena a re baketšego manyami. Le gona re ka holofela gore o kwešiša gabotse manyami a rena le bohloko bjo bo bakwago ke lehu. Le gona therešo ya Beibele mabapi le boemo bja bahu e hlatsela gore bahu ga ba tlaišwe diheleng goba pakatoring eupša gore ba ka lebitleng gomme ga ba phele. Ka gona, megopolo ya rena ka baratiwa ba rena ga se ya swanela go re kgaoganya le Modimo goba go dira gore re boife lefeela. Le gona, Jehofa o re nea khomotšo e nngwe ka Beibeleng.

Kholofelo e Dira Gore re Thabe

Mangwalo ao re a ahla-ahlilego a šupa kholofelo e le senyakwa sa bohlokwa sa lethabo. Lentšu “kholofelo” ka ge le dirišwa ka Beibeleng le bolela go letela tše dibotse ka kgodišego. Go bona gore ga bjale kholofelo e ka lebiša bjang lethabong, a re boele pegong ya ge Jesu a be a tsoša Latsaro.

Bonyenyane go na le mabaka a mabedi a gore ke ka baka la eng Jesu a ile a dira mohlolo woo. Le lengwe ke gore o be a nyaka go tloša manyami a Mareta, Maria le a bagwera ba ba nyamilego. Ba be ba tla thabela segwera sa moratiwa wa bona gape. Eupša Jesu o boditše Mareta lebaka le lengwe la bobedi la bohlokwa, gore: “Na ga se ka go botša gore ge e ba o ka dumela o tla bona letago la Modimo?” (Johane 11:40) The New Testament in Modern English, ya J. B. Phillips e fetolela lefokwana la mafelelo e le “mohlolo wo o ka dirwago ke Modimo.” Ka go tsošetša Latsaro gape bophelong, Jesu o re bontšhitše seo Jehofa Modimo a ka se dirago le seo a tlago go se dira nakong e tlago. Mo go na le dintlha tše di oketšegilego ka “mehlolo yeo e ka dirwago ke Modimo.”

Go Johane 5:28, 29 Jesu o itše: “Le se ke la makatšwa ke se, gobane nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe gomme ba tšwa.” Se se ra gore bahu bohle bao ba lego Sheole, go akaretša le baratiwa ba rena ba tlo tsogela bophelong. Ditiro 24:15 e utolla mo gontši ka modiro wo wa go kgahliša, ge e re: “Go tla ba le tsogo ya ba lokilego gotee le ba sa lokago.” Ka gona gaešita le “ba sa lokago,” e lego batho bao ba bego ba sa tsebe Jehofa le go mo hlankela ba tla hwetša sebaka sa gore ba amogelwe ke Modimo.

Tsogo ye e tla direga kae? Psalme 37:29 e re: “Baloki e ba beng ba naxa, ba dula mo xo yôna ka mehla le ka mehla.” Nagana gore seo se bolela eng! Malapa le bagwera bao lehu le ba arogantšego ba tla ba gotee gape mo lefaseng. Go a kwešišega ge pelo ya gago e tlala lethabo ge o dutše o nagana ka go ba le lethabo le bao o ilego wa tšeela segwera sa bona godimo.

Jehofa o Nyaka Gore o Thabe

Re ahla-ahlile ditsela tše pedi tšeo ka tšona Jehofa a ka oketšago lethabo la gago go sa šetšwe mathata. Ya pele, ka Beibele o re nea tsebo le tlhahlo go re thuša go lebeletšana le mathata ka katlego. Ka ntle le gore o re thuša go lebeletšana ka katlego le manyami ao a bakwago ke lehu, keletšo ya Beibele e ka re thuša gore re kgone go lebeletšana le mathata a tša maphelo le a tša ditšhelete. E ka go fa matla a go kgona go kgotlelela mathata a go hloka toka setšhabeng le moferefere wa tša dipolitiki. Le gona ge e ba o diriša tlhahlo ya yona bophelong bja gago, e ka go thuša go lebeletšana le a mangwe a mathata a gago.

Ya bobedi, ge o ithuta Beibele o hwetša kholofelo ya go phala selo le ge e le sefe seo lefase le ka se neago. Go tsošwa ga bagwera le meloko ke karolo ya kholofelo yeo Beibele e e rutago. Kutollo 21:3, 4 e re nea ditaba ka botlalo ge e re: “Modimo ka noši o tla ba le [batho]. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Se se ra gore selo le ge e le sefe seo se go nyamišago bophelong bja gago se tla fedišetšwa sa ruri. Seo Beibele e se holofetšago se tla phethega, gomme o tla thaba ge se phethega. Go tseba feela gore dinako tša lethabo di letše ka pele ga rena go a re imolla. Go tseba gore ga o kwe bohloko  ka mo go sa felego ka morago ga lehu go dira gore o thabe.

Ka mohlala: Nywaga e mmalwa e fetilego Maria o be a lebeletše ge monna wa gagwe a e-hwa lehu le bohloko la kankere. Kapejana ka morago ga moo, yena le barwedi ba gagwe ba bararo ba gapeletšwa ke mathata a tša ditšhelete gore ba tlogele ntlo ya bona. Nywaga e mebedi ka morago, Maria o ile a lemoga gore o na le kankere. O ile a swanelwa ke go kgotlelela dihlabi tše bohloko letšatši le letšatši ka ge a ile a buiwa gabedi. Go sa šetšwe mathata a, o dula a nagana dilo tše di nepagetšego moo a bilego a tutueletšega go matlafatša batho ba bangwe. O kgona bjang go dula a thabile?

Maria o re: “Ge ke e-na le bothata ke leka gore ke se ke ka nagana kudu ka bjona. Ke phema go ipotšiša dipotšišo tša go swana le tše rego: ‘Ke ka baka la’ng se se direga go nna? Ke ka baka la’ng ke swanetše go tlaišega ka tsela ye? Ke ka baka la’ng ke babja ka tsela ye?’ Go naganela thoko go a lapiša. Go e na le moo, ke šomiša matla a-ka go hlankela Jehofa le go thuša batho ba bangwe. Seo se ntlišetša lethabo.”

Kholofelo e kgatha tema efe bophelong bja Maria? O lokišeditše pelo ya gagwe bakeng sa nako e tlago ya ge Jehofa a tla be a fediša malwetši le mathata a mangwe a batho. Ge a e-ya sepetlele go hlahlobja, o boledišana le balwetši ba bangwe ba ba swerwego ke kankere, bao ba ka bago ba se na kholofelo. Kholofelo e bohlokwa gakaaka’ng go Maria? O re: “Gantši ke nagana ka seo Beibele e se bolelago go Baheberu 6:19, moo Paulo a hlalosago kholofelo e le tshetledi ya moya. Ka ntle ga tshetledi yeo, o tla gogolwa go swana le sekepe seo se sa šireletšegago ledimong. Eupša ge o tlemeletšwe tshetleding yeo o tla šireletšega go sa šetšwe ledimo la mathata ao o lebeletšanego le ona.” “Kholofelo [yeo] ya bophelo bjo bo sa felego bjo Modimo yo a ka se kego a aketša a bo holofeditšego,” ke yona e thušago Maria go dula a thabile. Le wena e ka go thuša go dula o thabile.—Tito 1:2.

Ka thuto ya Beibele, o ka hwetša lethabo la kgonthe le ge o e-na le mathata. Lega go le bjalo, o ka ba le dipotšišo tša kamoo se se ka phethwago ka gona. Dihlatse tša Jehofa di tla thabela go go bontšha dikarabo tša Mangwalo tšeo o nyakago go di tseba e le gore o thabe e le ka kgonthe. Ge o sa letetše go phethagatšwa ga dikholofetšo tša Jehofa o ka ba gare ga bao ba hlalositšwego ka tsela ye: “Ba tlo tlêlwa ke xo nyakalala le xo thaba; ’me mahlomola le ’phêxêlô di tlo ba di fulere.”—Jesaya 35:10.

[Mongwalo wa ka tlase]

[Seswantšho go letlakala 5]

Ke therešo ya Beibele feela yeo e ka re imollago manyaming

[Seswantšho go letlakala 7]

Kholofelo yeo e theilwego Beibeleng ya go tsošwa ga bahu e ka dira gore o thabe