Ba Thabela go Dira Thato ya Modimo

JESU o beetše Bakriste ka moka mohlala ka go rapela Tatagwe ka gore: “Go se phethege thato ya-ka eupša go phethege ya gago.” (Luka 22:42) Ponagatšo e bjalo ya go ikokobeletša Jehofa e bonagatšwa ke bahlanka ba Modimo ba dimilione lehono. Gare ga batho bao, go na le barutwana ba 52 ba sehlopha sa bo-120 sa Sekolo sa Watchtower sa Beibele sa Gilead. Ka March 11, 2006, sehlopha se se alogago se be se thabišitšwe ke tebelelo ya go dira thato ya Modimo dinageng tše di fapa-fapanego, gaešita le ge se ka lebeletšana le maemo a thata.

Ke’ng seo se dirago gore dialoga tše di dire gore thato ya Jehofa e hlahle maphelo a tšona? Chris le Leslie, e lego banyalani bao ba abetšwego go yo hlankela e le baromiwa kua Bolivia, ba bea taba ka tsela ye: “Ka ge re itatotše, re nyaka go ithapa bakeng sa go dira selo le ge e le sefe seo se tswalanago le mokgatlo wa Jehofa.” (Mareka 8:34) Jason le Chere, bao ba abetšwego go ya Albania, ba oketša ka gore: “Kabelo e nngwe le e nngwe yeo re e hweditšego mokgatlong wa Jehofa e bile le ditlhohlo tša yona. Lega go le bjalo, re ithutile go bota Jehofa ka mo go feletšego.”

Go Kgothaletšwa go Ikokobeletša Thato ya Jehofa

George Smith, e lego setho sa lapa la Bethele yo a hlankelago Lefapheng la tša Bokgabo o butše lenaneo la go aloga ka thapelo. Stephen Lett, e lego setho sa Sehlopha se Bušago sa Dihlatse tša Jehofa yoo gape e bego e le modula-setulo wa lenaneo la go aloga, o ile a amogela bohle bao ba bego ba le gona. Baeng bao ba tšwago dinageng tše 23 ba be ba tšere leeto la go ya Lefelong la tša Thuto la Watchtower kua Patterson, New York, e le gore ba be gona tiragalong ye e thabišago. Ngwanabo Rena Lett o boditše sehlopha se se alogago gore se tla phetha “selo se segolo kudu.” O ile a lebiša tlhokomelo go “dilo tše di tsemilwego”—tše bjalo ka dithuto tša maaka—tšeo baromiwa ba bafsa ba bego ba tla kgona go di phethola ba diriša matla a Mangwalo. (2 Bakorinthe 10:4, 5) O phethile ka gore: “Ruri le tla thaba ge le dirišwa ke Jehofa go phethola dilo tše di tsemilwego go batho ba dipelo tše di botegago dikabelong tša lena!”

Harold Jackson, e lego yo mongwe wa bašomi ba ntlong-kgolo, o boletše ka sehlogo se se rego, “Dilo tše Mmalwa Tšeo di Swanetšego go Gopolwa.” O boletše gore baromiwa ba ba bafsa ga se ba swanela go lebala go ‘tsoma mmušo pele le toko ya Modimo.’ (Mateo 6:33) Ba swanetše go gopola gore “lerato le a aga” gomme ke tsela e atlegago ya go hwetša katlego. (1 Bakorinthe 8:1) O itše: “Dirang gore lerato e be lona leo le le tutuetšago ditirišanong tša lena le ba bangwe.”

Ke moka, Geoffrey Jackson, e lego setho sa Sehlopha se Bušago yo a hlanketšego e le moromiwa go tloga ka 1979 go fihla ka 2003, o botšišitše dialoga gore, “Na le na le Boikarabelo?” O ile a gatelela go nyakega ga gore motho a be le pono e leka-lekanego ka yena mong le ka bodiredi. Bakriste ba na le boikarabelo bja go šoma ka thata tabeng ya go bjala le go  nošetša dipeu tša therešo. Lega go le bjalo, Jehofa ke yena a dirago gore go be le tšwelopele ya moya, ka ge “Modimo [e le] yo a godišago.” (1 Bakorinthe 3:6-9) Ngwanabo Rena Jackson o okeditše ka gore: “Le a ikarabela go Jehofa gore le dule le le matla moyeng. Eupša boikarabelo bja lena bjo bogolo ke bofe? Ke go rata Jehofa le go rata batho bao le yago go ba hlankela.”

Mohlahli wa Gilead e lego Lawrence Bowen o ahla-ahlile sehlogo se se rego, “Tsebang Kamoo le Swanetšego go Itshwara ka Gona.” O ile a gopotša barutwana gore Jehofa o ile a hlahla le go šireletša Baisiraele ka tsela ya mohlolo nakong ya ge ba le lešokeng. (Ekisodo 13:21, 22) Lehono o a re hlahla le go re šireletša go fihla bokgoleng bjo itšego, a diriša phuthego ya Bokriste ya batlotšwa, e lego “kokwane le sethekgo sa therešo.” (1 Timotheo 3:14, 15) Baromiwa ba bafsa ba swanetše go thekga therešo ya Beibele, yeo e neago tlhahlo le tšhireletšo go bao ba ikokobeditšego.

Wallace Liverance, e lego mohlahli yo mongwe wa Gilead, o kgothaleditše dialoga gore di  se ke tša lebala lentšu la Modimo leo le lego ka “nthaxo” ga tšona. Lentšu la Modimo le ka morago ga rena ka kgopolo ya gore Beibele e feditšwe nywaga-kgolong e mentši e fetilego. Ka go swana le modiši yo a goeletšago mohlape wa dinku a le ka morago, Jehofa o ka morago ga batho ba gagwe, o ba nea tlhahlo ka “mohlanka yo a botegago le wa temogo.” (Jesaya 30:21; Mateo 24:45-47) Sekolo sa Gilead se thušitše dialoga gore di tšeele sehlopha seo sa mohlanka godimo kudu. Le gona “mohlanka” yo o dirile gore go be le New World Translation of the Holy Scriptures. Seboledi se ile sa kgothatša dialoga ka gore: “Tšeang lehumo le leo le bolokilwego la tsebišo, gomme le le dirišetše go ruta ba bangwe.”—Mateo 13:52.

Go Dira Thato ya Jehofa Bodireding bja Tšhemo

Karolong ya lenaneo yeo e rego, “Go Fišegela go Tsebatša Ditaba tše Dibotse,” Mohlahli wa Gilead e lego Mark Noumair o gateletše tše dingwe tša diphihlelo tšeo dialoga di bilego le tšona bodireding bja phatlalatša ge di le gare di tsena Sekolo sa Gilead. (Baroma 1:15) Dipoledišano tšeo di ilego tša swarwa di utolotše gore dialoga di bontšhitše phišego e kgolo ya go dira boboledi maemong ka moka.

Dialoga di ile tša amogela kgothatšo e oketšegilego ka poledišano yeo Kenneth Flodin a bego a e swere le balebeledi ba bararo ba basepedi bao ga bjale ba hlankelago kua United States. Richard Keller le Alejandro Lacayo, bao ba kilego ba hlankela karolong ya ka Borwa le ya Bogareng ya Amerika, ba hlalositše kamoo ba ilego ba lebeletšana le diteko tše di fapa-fapanego gomme ba laodiša tše dingwe tša ditšhegofatšo tšeo ba di hweditšego ge ba be ba dutše ba hlankela e le baromiwa. Moacir Felisbino o ile a hlalosa tlwaetšo yeo a e hweditšego ge a be a šoma gotee le baromiwa ba kua Brazil, moo a goletšego gona.

David Schafer o ile a boledišana le baromiwa ba bararo bao ba nago le phihlelo, e lego Robert Jones, Woodworth Mills le Christopher Slay. Bana babo rena ba ba bararo ba ile ba laodiša tsela yeo ka yona ba ithutilego go gata mogato ba botile Jehofa ge ba be ba lebeletšane le mathata. Bana babo rena ba ba ile ba kgonthišetša sehlopha gore tlwaetšo yeo se e hweditšego mokgatlong wa Jehofa e se tlwaeditše gabotse bakeng sa dikabelo tša sona tša boromiwa. Ngwanabo Rena Mills o akareditše taba ka tsela ye: “Ga se thuto ya Gilead yeo e nthušitšego kudu, eupša ke thušitšwe ke seo sekolo se nthutilego sona ka boikokobetšo le lerato.”

Guy Pierce, e lego setho sa Sehlopha se Bušago, o neile polelo ya thwadi e rego, “Jehofa a ka se ke a Palelwa.” Adama o ile a palelwa, eupša na seo se be se bolela gore Modimo le yena o paletšwe? Na Modimo o paletšwe ke go bopa Adama a phethagetše, go etša ge batho ba bangwe ba bolela? Ga go bjalo le gatee, ka gobane “batho, Modimo ó ba dirile baloki.” (Mmoledi 7:29) Seboledi se boletše gore go botega ga Jesu ka tlase ga teko e kgolo lefaseng go bontšhitše gore “Adama o be a ka se lokafatše, goba go nea lebaka la go palelwa ga gagwe.” Go lekwa ga potego ya Adama kua tšhemong ya Edene go be go se thata kudu go swana le teko yeo Jesu a ilego a lebeletšana le yona ka katlego. Eupša, Adama o ile a palelwa. Lega go le bjalo, Jehofa a ka se ke a palelwa. Morero wa gagwe o tla phethagatšwa. (Jesaya 55:11) Ngwanabo Rena Pierce o boditše baromiwa ba bafsa gore: “Le na le tokelo ya go tumiša Jehofa ka moya wa lena wa boikgafo. Eka Jehofa a ka ba le yo mongwe le yo mongwe wa lena kae le kae mo le tla bago le mo hlankela gona le le baromiwa.”

Ka morago ga ge modula-setulo, e lego Ngwanabo Rena Lett a fetišeditše madume ao a tšwago diofising tše di fapa-fapanego tša makala tša Dihlatse tša Jehofa, o ile a nea dialoga di-diploma tša tšona le dikabelo. Vernon Wisegarver, setho sa nako e telele sa lapa la Bethele, o ile a phetha lenaneo ka thapelo.

Batho ba 6 872 bao ba bego ba le gona lenaneong le la go aloga ba ile ba tsošološa phišego ya bona bakeng sa go dira thato ya Modimo. (Psalme 40:8) Andrew le Anna, bao e lego dialoga ba itše: “Re neetše maphelo a rena go Jehofa. Re holofeditše Jehofa gore re tla dira selo le ge e le sefe seo a re kgopelago sona. Go fo ba go bile ka wona mokgwa woo gore Jehofa a re kgopele go ya Cameroon, Afrika.” Bona le ditho tše dingwe tša sehlopha seo se alogago ba fagahletše go tsenela modiro wo o tla ba neago kgotsofalo le lethabo. Ee, ba thabela go dira thato ya Modimo.

[Lepokisi go letlakala 17]

DIPALO-PALO TŠA SEHLOPHA

Palo ya dinaga tše di emetšwego: 6

Palo ya dinaga tšeo ba abetšwego go tšona: 20

Palo ya barutwana: 52

Palo-gare ya nywaga: 35,7

Palo-gare ya nywaga therešong: 18,3

Palo-gare ya nywaga bodireding bja nako e tletšego: 14,5

[Seswantšho go letlakala 18]

Sehlopha se se Alogago sa bo-120 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Wright, S.; Suárez, B.; Croisant, B; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.