Ba Tswaletšwe Setšhabeng se se Kgethilwego sa Modimo

“Wêna O sethšaba se se kxethetšwexo Morêna Modimo wa xaxo.”—DOITERONOMIO 7:6.

1, 2. Ke ditiro dife tše matla tšeo Jehofa a ilego a di direla batho ba gagwe, gomme ke tswalano efe yeo Baisiraele ba ilego ba ba le yona le Modimo?

KA 1513 B.C.E., Jehofa o bile le tswalano e mpsha le bahlanka ba gagwe ba lefaseng. Ka ngwaga woo, o ile a kokobetša mmušo wa lefase gomme a phološa Baisiraele bokgobeng. Ka go dira bjalo, o bile Mophološi le Mong wa bona. Pele ga ge a ka gata mogato, Modimo o boditše Moše gore: “Botša Ba-Isiraele O re: Ké Nna Morêna; ’me ke tlo Le nthša mothubong wa Ba-Egipita; ke tlo Le lokolla botlapyeng; ke tlo Le namolêla kè emišitše letsôxô, le ka dikahlolô tše kxolo. Ke tlo Le tšea ka Le dira sethšaba sa-ka, Nna ka ba Modimo wa lena.”—Ekisodo 6:6, 7; 15:1-7, 11.

² Nakwana ka morago ga Khudugo ya bona Egipita, Baisiraele ba ile ba ba le tswalano ya kgwerano le Modimo wa bona, Jehofa. Go e na le go dirišana le batho ba le ka o tee ka o tee, e le malapa, goba e le mašika, go tloga bjale go ya pele Jehofa o be a tla ba le batho bao ba rulagantšwego lefaseng, e lego setšhaba. (Ekisodo 19:5, 6; 24:7) O neile batho ba gagwe melao yeo e bego e laola maphelo a bona a letšatši le letšatši gomme sa bohlokwa kudu, a laola le borapedi bja bona. Moše o ba boditše gore: “Xa xo sa na sethšaba se sekaakaa, seo medimo ya sôna e lexo kxaufsi le sôna, byalo ka Morêna Modimo wa rena à le kxaufsi le rena xe re mmitša. Ké sefe sethšaba se sekaakaa, se se naxo le melaô le mekxwa e lokilexo ya etša molaô wó nna ke o beaxo pele xa lena lehono?”—Doiteronomio 4:7, 8.

Ba Tswaletšwe Setšhabeng sa Dihlatse

3, 4. Lebaka la bohlokwa la go ba gona ga Isiraele e le setšhaba e be e le lefe?

³ Nywaga-kgolo e mentši ka morago, Jehofa ka moporofeta wa gagwe Jesaya o ile a gopotša Baisiraele mabapi le lebaka la bohlokwa la go ba gona ga bona e le setšhaba. Jesaya o itše: “Yêna Mmopi wa xaxo, wene Jakobo, e a Xo dirilexo, wene Isiraele, ó bolêla ó re: Se boifê, xobane ke Xo lopolotše; ke Xo biditše ka leina la xaxo, O wa-ka. Xobane Nna Morêna ke Modimo wa xaxo, Nna Mokxêthwa wa Isiraele, ke Mophološi wa xaxo. . . . Tšiša barwa ba-ka ba tšwê moo kxolê, le barwedi ba-ka ba tšwê moo maxomong a lefase, Bohle ba bitšwaxo ka leina la-ka, ba ke ba hlodilexo ka ithetiša ka bôná, ba ke ba bopilexo ka ba dira. Morêna Yêna ó re: Lena Le dihlatse tša-ka, Le bahlanka ba-ka ba ke ba hlaotšexo . . . sethšaba sé, se ke ipopetšexo  sôna se tlo mpolêla ka dirêtô.”—Jesaya 43:1, 3, 6, 7, 10, 21.

⁴ Bjalo ka batho bao ba bitšwago ka leina la Jehofa, Baisiraele ba be ba tla hlankela e le dihlatse tša bogoši bja gagwe ditšhabeng. Ba be ba tla ba batho ‘bao ba bopetšwego letago la Jehofa.’ Ba be ba tla ‘bolela Jehofa ka direto,’ ba laodiše ditiro tša gagwe tše dibotse tša phološo gomme ka go rialo ba tagafatše leina la gagwe le lekgethwa. Ka boripana, ba be ba swanetše go ba setšhaba sa dihlatse tša Jehofa.

5. Isiraele e be e le setšhaba se se ineetšego ka tsela efe?

⁵ Lekgolong la bo-11 la nywaga B.C.E., Kgoši Salomo o bontšhitše gore Jehofa o dirile Isiraele gore e be setšhaba se se fapanego. Ge a be a rapela Jehofa, o itše: “Wene O ba hlaotšexo, ya ba ba xaxo mo xar’a dithšaba tšohle tša lefase.” (1 Dikxoši 8:53) Le gona, motho yo mongwe le yo mongwe Isiraeleng o be a e-na le tswalano e kgethegilego le Jehofa. Pejana, Moše o be a ba boditše gore: “Lena Le bana ba Morêna Modimo wa lena. . . . Xobane Le sethšaba se sekxêthwa sa Morêna Modimo wa lena.” (Doiteronomio 14:1, 2) Ka gona, go be go sa nyakege gore bana ba Baisiraele ba neele maphelo a bona go Jehofa. Ba ile ba tswalwa e le ditho tša batho ba Modimo bao ba ineetšego. (Psalme 79:13; 95:7) Moloko o mongwe le o mongwe o mofsa o be o hlahlwa ka melao ya Jehofa gomme o be o gapeletšega go e boloka ka baka la kgwerano yeo e bego e tlemagantše Baisiraele le Jehofa.—Doiteronomio 11:18, 19.

Ba be ba E-na le Tokologo ya go Ikgethela

6. Baisiraele ba ile ba swanelwa ke go dira phetho efe?

⁶ Le ge Baisiraele ba tswaletšwe setšhabeng seo se ineetšego, motho yo mongwe le yo mongwe o be a swanetše go itirela phetho ya go hlankela Modimo. Pele ga ge ba ka tsena Nageng ya Kholofetšo, Moše o ba boditše gore: “Lehono lexodimo le lefase ké dihlatse tša-ka xe ke beile bophelô le lehu, le thšexofatšô le thoxô, pele xa lena. Hle ikxetheleng bophelô xore Le phelê, lena le bana ba lena, Lè le ba ba rataxo Morêna Modimo wa lena, Lè e-kwa se a se bolelaxo, Lè mo xomaretše; Ka xobane xo phela xa xaxo le xo atêlwa ke matšatši di na le Yêna; le xe O tlo dula mo naxeng ye Morêna Modimo wa xaxo a e enetšexo bô-tat’axo Aborahama le Isaka le Jakobo a re ó tlo ba nea yôna, di na le Yêna.” (Doiteronomio 30:19, 20) Ka go rialo, motho yo mongwe le yo mongwe Isiraeleng o be a swanelwa ke go ikgethela go rata Jehofa, go theetša lentšu la gagwe le go mo kgomarela. Ka ge Baisiraele ba be ba e-na le tokologo ya boikgethelo, ba be ba tla swanelwa ke go lebeletšana le mafelelo a kgetho ya bona.—Doiteronomio 30:16-18.

7. Go diregile’ng ka morago ga lehu la moloko wa Jošua?

⁷ Mehla ya Baahlodi e hlalosa gabotse mafelelo ao a tlišwago ke go botega le go se botege. Nakwana pele ga ge mehla yeo e ka thoma, Baisiraele ba ile ba latela mohlala o mobotse wa Jošua gomme ba ile ba šegofatšwa. “Mehleng yohle ya xe Jošua à sa phela, sethšaba se be se dirêla Morêna, le mehleng yohle ya xe xò sa phela baxolo bao ba ba phetšexo xa-lelele mehleng ya xe Jošua à šetše à ile; bôná-bao ba ba bonexo ditirô tše kxolo tše Morêna a di diretšexo Isiraele.” Lega go le bjalo, nakwana ka morago ga lehu la Jošua, “xwa rotoxa thaká e šele ya ba ba sa tsebexo Morêna le ditirô tše kxolo tše a di diretšexo Isiraele. ’Me Ba-Isiraele ba dira tše di befetšexo Morêna.” (Baahlodi 2:7, 10, 11) Go bonagala eka moloko o latelago, wo o se nago phihlelo o be o sa tšeele bohwa bja wona godimo bjalo ka karolo ya batho bao ba ineetšego, bao Modimo wa bona, Jehofa a ba diretšego mediro e matla nakong e fetilego.—Psalme 78:3-7, 10, 11.

Go Phelela Boineelo bja Bona

8, 9. (a) Ke thulaganyo efe yeo e bego e dumelela Baisiraele go bontšha gore ba ineetše go Jehofa? (b) Ke’ng seo se ilego sa hwetšwa ke bao ba bego ba dira dihlabelo tša boithatelo?

⁸ Jehofa o neile batho ba gagwe dibaka tša go phelela boineelo bja bona e le setšhaba. Ka mohlala, Molao wa gagwe o dirile gore go be le tokišetšo ya dihlabelo, goba dineo, tše dingwe tša tšona e le tša kgapeletšo mola tše dingwe  e le tša boithatelo. (Baheberu 8:3) Dihlabelo tše bjalo di be di akaretša dihlabelo tše di fišitšwego, dihlabelo tša mohlakanelwa tšeo di bego di dirwa ka boithatelo—dimpho tšeo di bego di newa Jehofa bakeng sa go amogelwa ke yena le bakeng sa go mo leboga.—Lefitiko 7:11-13.

⁹ Dihlabelo tšeo tša boithatelo di be di thabiša Jehofa. Go be go bolelwa ka dihlabelo tšeo di fišitšwego le tša dilewa e le tša “monkô o bose wa Morêna.” (Lefitiko 1:9; 2:2) Sehlabelong sa mohlakanelwa, madi le makhura a phoofolo a be a neelwa Jehofa, mola nama e be e jewa ke baperisita le motho yo a ntšhago sehlabelo. Ka gona e be e le dijo tša seswantšhetšo tšeo di bonagatšago tswalano ya khutšo le Jehofa. Molao o itše: “Xe Le tlišetša Morêna sedimo sa lena sa seleboxá, Le tlišê se Le kaxo thabêlwa ka sôna.” (Lefitiko 19:5) Gaešita le ge Baisiraele ka moka ba be ba ineetše go Jehofa ka tswalo, bao ba ilego ba dira gore boineelo bja bona e be bjo bo nago le morero ka go dira dihlabelo tša boithatelo ba ile ba “thabêlwa” gomme ba šegofatšwa kudu.—Maleaki 3:10.

10. Mehleng ya Jesaya le ya Maleaki, Jehofa o ile a bontšha bjang gore ga a thaba?

¹⁰ Lega go le bjalo, gantši setšhaba se se ineetšego sa Isiraele se be se sa botegele Jehofa. Jehofa o se boditše ka moporofeta wa gagwe Jesaya gore: “Dikwanyana tša didimo tš’axo, xa wa ka wa di tlišetša Nna. Xa wa ka wa xodiša Nna ka dihlabêlô tša xaxo; xa nka ka Xo rwadiša dilobá.” (Jesaya 43:23) Go oketša moo, dihlabelo tšeo motho a bego a di dira eka o a gapeletšwa e bile a sa rate di be di se na mohola mahlong a Jehofa. Ka mohlala, nywaga-kgolong e meraro ka morago ga mehla ya Jesaya, mehleng ya moporofeta Maleaki, Baisiraele ba be ba neela ka diphoofolo tše di šilafetšego. Ka go rialo, Maleaki o ba boditše gore: “Xa ke Le thabele!—Ó r’yalo Morêna wa mašaba.—Dibexô se di rate di e-tšwa ’atleng tša lena. . . . La tšiša tša xo tšeêlwa batho, le tše di hlotšaxo, le tše di babyaxo; xe Le tšiša dibexô ka mokxwa woo, xôna Morêna wa mašaba ó re: A Le re nka kxahlwa ke tšôna-tšeo di e-tšwa diatleng tša lena?—Ó r’yalo Morêna.”—Maleaki 1:10, 13; Amosi 5:22.

 Ba Lahlilwe e le Setšhaba se se Ineetšego

11. Ke sebaka sefe seo se ilego sa newa Baisiraele?

¹¹ Nakong ya ge Baisiraele ba e-ba setšhaba se se ineetšego go Jehofa, o ile a ba holofetša gore: “Xe Le tlo theetša ruri se ke se bolêlaxo, la hlôkômêla kxwêranô ya-ka, ké mo Le tl’o xo ba baruiwa ba-ka mo dithšabeng ka moka; ka xobane lefase ka moka ké la-ka. Xomme lena Le tlo ba sethšaba sa-ka sa bô-mphamodimo, sethšaba se sekxêthwa.” (Ekisodo 19:5, 6) Mesia yo a holofeditšwego o be a tla tšwelela gare ga bona gomme a ba nea sebaka sa pele sa go ba ditho tša pušo ya Mmušo wa Modimo. (Genesi 22:17, 18; 49:10; 2 Samuele 7:12, 16; Luka 1:31-33; Baroma 9:4, 5) Eupša bontši bja batho ba setšhaba sa Isiraele ba be ba sa phele ka go dumelelana le boineelo bja bona. (Mateo 22:14) Ba ile ba gana Mesia gomme ba feleletša ba mmolaile.—Ditiro 7:51-53.

12. Ke dipolelo dife tšeo di ilego tša bolelwa ke Jesu tše di bontšhago gore Isiraele e ile ya lahlwa e le setšhaba sa Jehofa se se ineetšego?

¹² Matšatši a sego kae pele ga lehu la gagwe, Jesu o boditše baetapele ba bodumedi ba Bajuda gore: “Na ga se la ka la bala ka Mangwalong go re, ‘Lefsika leo baagi ba le gannego ke lona leo e bilego lefsika le legolo la sekhutlo. Se se tšwa go Jehofa, gomme ke se se makatšago mahlong a rena’? Ke ka baka leo ke rego go lena, Le tla amogwa mmušo wa Modimo wa newa setšhaba seo se tšweletšago dienywa tša wona.” (Mateo 21:42, 43) Ge Jesu a bontšha gore Jehofa o ba ganne e le setšhaba se se ineetšego go Yena, o itše: “Jerusalema, Jerusalema, mmolai wa baporofeta le yo a kgatlago ka mafsika bao ba rometšwego go yena,—ke gantši gakaakang ke nyaka go bokanya bana ba gago gotee, ka tsela yeo kgogo e bokanyago matswiana a yona gotee ka tlase ga diphego tša yona! Eupša ga se la ka la nyaka. Bonang! Le tlogeletšwe ntlo ya lena.”—Mateo 23:37, 38.

Setšhaba se Sefsa se se Ineetšego

13. Ke mantšu afe a boporofeta ao Jehofa a a boletšego mehleng ya Jeremia?

¹³ Mehleng ya moporofeta Jeremia, Jehofa o boletše selo se sengwe e sa le pele mabapi le batho ba gagwe. Re bala gore: “Tsebang! Xo tlo tla letšatši le ke tl’o xo dira kxwêranô e mphsa le ba leloko la Isiraele le la Juda. O r’yalo Morêna. E ka se bê kxwêranô e ka-kaxo yela ke e dirilexo le bô-rr’abô, mola kè ba swara ka seatla ka ba nthša Egipita. Kxwêranô yeo ba e sentše, mola kè le Mong wa bônà. Ó r’yalo Morêna. Xobane kxwêranô ye ke tl’o xo e dira le bôná xe xo fetile mehla yeno, Morêna ó re, šé: Ke tlo bea melaô ya-ka matswalong a bôná, ke tlo e tlôka dipelong tša bôná. Ké tlo ba Modimo wa bôná; ’me bôná e tlo ba sethšaba sa-ka.”—Jeremia 31:31-33.

14. Setšhaba se sefsa se se ineetšego sa Jehofa se bile gona neng le gona motheong ofe? Bontšha gore setšhaba seo se sefsa ke sefe.

¹⁴ Motheo wa kgwerano ye e mpsha o beilwe ge Jesu a be a e-hwa gomme ka morago mohola wa madi a gagwe ao a tšholotšwego a o tliša go Tatagwe, ka 33 C.E. (Luka 22:20; Baheberu 9:15, 24-26) Lega go le bjalo, nakong ya ge go tšhollwa moya o mokgethwa ka Pentekoste ya 33 C.E. gomme go tswalwa setšhaba se sefsa, e lego “Isiraele wa Modimo,” kgwerano e mpsha e ile ya thoma go šoma. (Bagalatia 6:16; Baroma 2:28, 29; 9:6; 11:25, 26) Ge moapostola Petro a be a ngwalela Bakriste ba tloditšwego, o itše: “Lena le ‘morafo wo o kgethilwego, boperisita  bja bogoši, setšhaba se sekgethwa, batho ba e lego leruo le le kgethegilego, gore le bolele ka gohle mabothakga’ a yo a le biditšego lefsifsing gomme a le biletša seetšeng sa gagwe se se makatšago. Gobane le kile la se be setšhaba, eupša bjale le setšhaba sa Modimo.” (1 Petro 2:9, 10) Tswalano e kgethegilego magareng ga Jehofa le Isiraele ya nama e be e fedile. Ka 33 C.E., Jehofa o be a se sa hlwa a amogela Isiraele ya nama eupša o be a amogela Isiraele ya moya, phuthego ya Bokriste, e lego “setšhaba seo se tšweletšago dienywa” sa Mmušo wa Mesia.—Mateo 21:43.

Go Ineela ga Bona e le Motho ka o Tee ka o Tee

15. Ka letšatši la Pentekoste ya 33 C.E., ke kolobetšo efe yeo Petro a ilego a kgothaletša batheetši ba gagwe gore ba kolobetšwe ka yona?

¹⁵ Ka morago ga Pentekoste ya 33 C.E., motho yo mongwe le yo mongwe, Mojuda goba yo mongwe wa Bantle, o be a swanetše go ineela ka boyena go Modimo gomme a kolobetšwe “leineng la Tate le la Morwa le la moya o mokgethwa.” * (Mateo 28:19) Ka Pentekoste, moapostola Petro o boditše Bajuda bao ba dumelago le basokologi gore: “Itsholeng, gomme yo mongwe le yo mongwe a kolobetšwe leineng la Jesu Kriste bakeng sa tebalelo ya dibe tša lena, gomme le tla amogela mpho e sa lefelelwego ya moya o mokgethwa.” (Ditiro 2:38) Ka kolobetšo ya bona, Bajuda ba bjalo le basokologi ba be ba swanetše go bontšha gore ba neetše maphelo a bona go Jehofa le gore ba amogetše Jesu e le yoo ka yena Jehofa a tlago go ba lebalela dibe. Ba be ba swanetše go mo amogela e le Moperisita yo a Phagamego wa Jehofa le Moetapele wa bona, Hlogo ya phuthego ya Bokriste.—Bakolose 1:13, 14, 18.

16. Mehleng ya Paulo, ke bjang bao ba nago le tshekamelo e swanetšego—Bajuda le Bantle—ba ilego ba ba karolo ya Isiraele ya moya?

¹⁶ Nywaga e mentši ka morago, moapostola Paulo o boletše gore: “Ke ile ka iša molaetša go bao ba lego Damaseko pele, gotee le go bao ba lego Jerusalema le nageng ka moka ya Judea le ditšhabeng, wa gore ba swanetše go itshola, gomme ba retologele go Modimo ka mediro yeo e swanelago boitsholo.” (Ditiro 26:20) Ka morago ga go kgodiša batho—Bajuda le Bantle—gore Jesu e be e le Kriste, e lego Mesia, Paulo o ba thušitše gore ba ineele le go kolobetšwa. (Ditiro 16:14, 15, 31-33; 17:3, 4; 18:8) Ka go retologela go Modimo, batho ba bao ba bego ba sa tšwa go ba barutiwa, ba bile ditho tša Isiraele ya moya.

17. Ke modiro ofe wa go swaya wo o lego kgaufsi le go fetšwa, gomme ke modiro ofe o mongwe wo o diregago ka lebelo?

¹⁷ Lehono, go swawa ga mafelelo ga mašaledi a Baisiraele ba moya go kgaufsi. Ge go tla be go feditšwe, “barongwa ba bane” bao ba kakatletšego diphefo tša tshenyo tša ‘masetlapelo a magolo’ ba tla dumelelwa gore ba di lokolle. Mo nakong ye, go kgoboketšwa ga “lešaba le legolo,” leo le nago le kholofelo ya go phela ka mo go sa felego lefaseng, go direga ka lebelo. ‘Dinku tše tše dingwe’ di kgetha ka bolokologi go bontšha tumelo “mading a Kwana” gomme di kolobetšwa e le seka sa boineelo bja tšona go Jehofa. (Kutollo 7:1-4, 9-15; 22:17; Johane 10:16; Mateo 28:19, 20) Gare ga tšona, go na le bafsa ba bantši bao ba godišitšwego ke batswadi ba Bakriste. Ge e ba o le mofsa yo bjalo, o tla thabela go bala sehlogo se se latelago.

[Mongwalo wa ka tlase]

E le go Boeletša

• Ke ka baka la’ng bana ba Baisiraele ba be ba sa swanela go ineela go Jehofa ka bobona?

• Baisiraele ba be ba ka bontšha bjang gore ba phela ka go dumelelana le boineelo bja bona?

• Ke ka baka la’ng Jehofa a ile a lahla Isiraele e le setšhaba sa gagwe se se ineetšego, gona se ile sa tšeelwa legato bjang?

• Go tloga ka Pentekoste ya 33 C.E. go ya pele, ke’ng seo Bajuda le Bantle ba bego ba swanetše go se dira gore e be ditho tša Isiraele ya moya?

[Dipotšišo tša Thuto]

[Seswantšho go letlakala 21]

Bana ba Baisiraele ba tswetšwe e le ditho tša setšhaba sa Modimo se se kgethilwego

[Seswantšho go letlakala 23]

Moisiraele yo mongwe le yo mongwe o be a swanetše go itirela phetho ya gore o hlankela Modimo

[Seswantšho go letlakala 23]

Dihlabelo tša boithatelo di ile tša nea Baisiraele sebaka sa go bontšha gore ba rata Jehofa

[Seswantšho go letlakala 25]

Ka morago ga Pentekoste ya 33 C.E., balatedi ba Kriste ba ile ba swanela ke go ineela ka bobona go Modimo gomme ba bonagatše se ka go kolobetšwa