Bafsa, Kgethang go Hlankela Jehofa

“Ikxetheleng lehono yo Le rataxo xo mo hlankêla.”—JOŠUA 24:15.

1, 2. Ke mehuta efe ya kolobetšo yeo e bego e dutše e dirwa Bojakaneng?

“A [BANA] e be Bakriste ge ba šetše ba tseba Kriste.” Mongwadi yo a bitšwago Tertullian o ngwadile mantšu ao go ya bofelong bja lekgolo la bobedi la nywaga C.E. O be a le kgahlanong le go kolobetšwa ga bana, e lego mokgwa wo o bego o šetše o amogelwa Bokristeng bja bohlanogi bja mehleng ya gagwe. Ka go se dumelelane le Tertullian le Beibele, Augustine, e lego Moruti wa Kereke o boletše gore kolobetšo e tloša tšhila ya sebe sa mathomo le gore bana bao ba hwago ba sa kolobetšwa ba ya diheleng. Tumelo yeo e be e kgothaletša mokgwa wa go kolobetša masea ka pela ka mo go ka kgonegago ka morago ga ge a sa tšwa go belegwa.

² Dikereke tše dintši tše dikgolo tša Bojakane di sa dutše di kolobetša masea ao a sa tšwago go belegwa. Go oketša moo, go theoša le histori, kolobetšo ya kgapeletšo ya “baheitene” bao ba fentšwego e be e dirwa ke babuši le baetapele ba bodumedi ba ditšhaba tšeo go thwego ke tša Bakriste. Eupša kolobetšo ya masea le kolobetšo ya kgapeletšo ya batho ba bagolo ga di a thewa Beibeleng.

Lehono ga go na Boineelo bja go fo Itiragalela

3, 4. Bana bao batswadi ba bona ba ineetšego ba ka thušwa ke’ng gore ba ineele ka go rata?

³ Beibele e bontšha gore Modimo o lebelela bana e le ba bakgethwa gaešita le ge e le motswadi o tee feela wa ngwana yoo yo e lego Mokriste yo a botegago. (1 Bakorinthe 7:14) Na seo se dira gore bana ba bjalo e be bahlanka bao ba ineetšego ba Jehofa? Aowa. Lega go le bjalo, bana bao ba godišwago ke batswadi bao  ba ineetšego go Jehofa ba hwetša tlwaetšo yeo e ka ba thušago gore ba ineele go Jehofa ka go rata. Kgoši Salomo yo bohlale o ngwadile gore: “Ngwan’a-ka! Boloka ditaêlô tša tat’axo, O se lahlê ’thutô tša mm’axo. . . . A di Xo hlahlê mo O yaxo, di Xo dišê xe O robetše, di bolêlê naxô’ xe O tsoxa. Xobane tayô ké lebônê, thutô ké seetša; thsôlô le keletšô ké tsela ya bophelô.”—Diema 6:20-23.

⁴ Tlhahlo ya batswadi ba Bakriste e ka ba tšhireletšo go bana, ge feela ba rata go e latela. Le gona, Salomo o itše: “Ngwana yo bohlale ó kxahla tat’axwe; ’me ngwana wa lešilo ó nyamiša mm’axwe.” “Wene Ngwan’a-ka! Kwaa, O hlalefê; hlahla pelo ya xaxo tseleng.” (Diema 10:1; 23:19) Ee, e le gore le holwe ke tlwaetšo ya batswadi, lena bafsa le swanetše go amogela tayo, keletšo le tsholo ka go rata. Ga le belegwe le le bohlale, eupša le ka ‘hlalefa’ gomme la latela “tsela ya bophelô.”

Tlhahlo ya Monagano ke Eng?

5. Paulo o neile batswadi le bana keletšo efe?

⁵ Moapostola Paulo o ngwadile gore: “Bana, kwang batswadi ba lena boteeng le Morena gobane se se lokile: ‘Godiša tatago le mmago’; e lego taelo ya pele yeo e nago le kholofetšo: ‘Gore di go sepelele gabotse le gore o phele galelele lefaseng.’ Lena bo-tate, le se ke la befediša bana ba lena, eupša tšwelang pele le ba godiša ka tayo le tlhahlo ya monagano ya Jehofa.”—Baefeso 6:1-4.

6, 7. Go godiša bana ka “tlhahlo ya monagano ya Jehofa” go akaretša’ng, gona ke ka baka la’ng se se sa bolele gore batswadi ba tutuetša bana ba bona ka tsela e fošagetšego?

⁶ Na batswadi ba Bakriste ba tutuetša bana ba bona ka tsela e fošagetšego ge ba ba godiša ka “tayo le tlhahlo ya monagano ya Jehofa”? Aowa. Ke mang yo a ka beago batswadi molato ge ba ruta bana ba bona seo ba se lebelelago e le se se nepagetšego le seo se holago boitshwarong? Baila-modimo ga ba bewe molato ge ba ruta bana ba bona gore Modimo ga a gona. Makatholika a Roma a ikwa a gapeletšega go godišetša bana ba ona tumelong ya Katholika, gomme ke ka sewelo mo a bewago molato ge a katanela go dira bjalo. Ka mo go swanago, Dihlatse tša Jehofa le tšona ga se tša swanela go bewa molato wa go laola menagano ya bana ba tšona ge di ba godiša gore ba amogele pono ya Jehofa ya ditherešo tša motheo le melao ya motheo ya boitshwaro.

⁷ Go ya ka Theological Dictionary of the New Testament, lentšu la mathomong la Segerika leo le fetoletšwego go Baefeso 6:4 e le “tlhahlo ya monagano” le bolela mokgwa wa go “nyaka go lokiša monagano, go phošolla se se fošagetšego le go kaonefatša tsela yeo motho a naganago ka yona ka Modimo.” Go thwe’ng ge e ba mofsa a gana tlwaetšo yeo batswadi ba mo neago yona ka baka la kgateletšo ya dithaka, e lego kganyogo ya go nyaka go ya le mogofe? Ke mang yo go ka thwego o gatelela mofsa yo ka tsela e gobatšago—na ke batswadi goba ke dithaka? Ge e ba dithaka tša mofsa di mo gatelela gore a diriše dihlare-tagi, a nwe dino-tagi ka mo go feteletšego goba gore a itshware ka tsela e gobogilego, na batswadi ba swanetše go bewa molato ge ba leka go hlahla kgopolo ya ngwana wa bona le go mo thuša go lemoga mafelelo a boitshwaro bjo bjalo bjo kotsi?

8. ‘Go kgodišwa ga Timotheo gore a dumele’ go be go akaretša’ng?

⁸ Moapostola Paulo o ngwaletše Timotheo wa mofsa gore: “Tšwela pele dilong tše o ithutilego tšona gomme wa kgodišwa gore o di dumele, o tseba batho bao o ithutilego tšona go bona le gore go tloga boseeng o tsebile mangwalo a makgethwa, ao a kgonago go go hlalefišetša phologo yeo e lego mabapi le Kriste Jesu.” (2 Timotheo 3:14, 15) Go tloga ge Timotheo e be e sa le ngwana, mmagwe le makgolo’agwe ba ile ba thea tumelo ya gagwe ka go tia go Modimo ka tsebo ya Mangwalo a Makgethwa. (Ditiro 16:1; 2 Timotheo 1:5) Ka morago, ge ba be ba e-ba Bakriste, ga se ba ka ba gapeletša Timotheo go dumela eupša ba ile ba mo ‘kgodiša’ ka go mo nea mabaka a kwagalago ao a theilwego tsebong ya Mangwalo.

 Jehofa o go Laletša Gore o Kgethe

9. (a) Jehofa o neile dibopiwa tša gagwe seriti ka tsela efe, gona ka baka la’ng? (b) Morwa wa Modimo yo a tswetšwego a nnoši o bontšhitše bjang tokologo ya gagwe ya boikgethelo?

⁹ Jehofa a ka ba a ile a dira gore dibopiwa tša gagwe e be diroboto tšeo di hlametšwego gore di dire thato ya gagwe gomme di se ke tša kgona go ikgethela. Go e na le moo, o di neile tokologo ya boikgethelo. Modimo wa rena o rata batho bao ba dirago dilo ka go rata. O thabela go bona dibopiwa tša gagwe, e lego batho bao ba godilego le ba bafsa, di mo hlankela ka lerato. Mohlala o mobotse kudu wa go ikokobeletša thato ya Modimo ka go rata ke wa Morwa wa gagwe yo a tswetšwego a nnoši, yo Jehofa a bolelago ka yena gore: “Yo ke Morwa wa-ka, morategi, yo ke mo amogetšego.” (Mateo 3:17) Morwa yo wa leitšibulo o boditše Tatagwe gore: “Ke kxahlwa ke xo dira tše di thabêlwaxo ke Wêna Modimo wa-ka; molaô wa xaxo o dula ò le pelong ya-ka.”—Psalme 40:8; Baheberu 10:9, 10.

10. Motheo wa go hlankela Jehofa ka mo go amogelegago ke ofe?

¹⁰ Jehofa o letetše gore bao ba mo hlankelago ka tlase ga tlhahlo ya Morwa wa gagwe ba bontšhe gore ba ikokobeletša thato ya Gagwe ka go rata ka tsela e swanago. Ka tsela ya boporofeta, mopsalme o opetše ka gore: “Mohla Ò e-tšwa dirá, sethšaba sa xaxo se tlo ithapa; ba bafsa ba xaxo ba tlo thšêpa ka tše kxêthwa bo-ka phoka ngwana wa mahuba.” (Psalme 110:3) Mokgatlo ka moka wa Jehofa, karolo ya legodimong le ya lefaseng, o šoma motheong wa go nyaka go dira thato ya Modimo ka go rata.

11. Bafsa bao ba godišitšwego ke batswadi bao ba ineetšego ba swanetše go dira kgetho efe?

¹¹ Ka gona lena bafsa le swanetše go kwešiša gore batswadi ba lena goba bagolo ka phuthegong ya Bokriste ba ka se le gapeletše go kolobetšwa. Kganyogo ya go hlankela Jehofa e swanetše go tšwa go lena. Jošua wa mehleng ya bogologolo o boditše Baisiraele gore: “[Hlankelang Jehofa] ka tlálô le ka xo mmôtêxêla . . . ikxetheleng lehono yo Le rataxo xo mo hlankêla.” (Jošua 24:14-22) Ka mo go swanago, e swanetše go ba ka go rata ga lena gore le kgethe go ineela go Jehofa le go neela maphelo a lena bakeng sa go dira thato ya gagwe.

Go Amogela Boikarabelo bja Gago

12. (a) Gaešita le ge batswadi ba ka tlwaetša bana, ke’ng seo ba ka se ba direlego sona? (b) Ke neng mo mofsa a thomago go ba le boikarabelo pele ga Jehofa bja mabapi le diphetho tšeo a di dirago?

¹² Go na le nako yeo ka yona lena bafsa le ka se sa hlwago le šireletšwa ke go botega ga batswadi ba lena. (1 Bakorinthe 7:14) Morutiwa Jakobo o ngwadile gore: “Ge e ba motho a tseba go dira seo se lokilego, fela a sa se dire, ke sebe go yena.” (Jakobo 4:17) Batswadi ba ka se ke ba hlankela Modimo bakeng sa bana ba bona le bana ba ka se hlankele Modimo bakeng sa batswadi ba bona. (Hesekiele 18:20) Na o ithutile ka Jehofa le merero ya gagwe? Na o godile ka mo go lekanego gore o ka kwešiša seo o ithutilego sona gomme wa thoma go ba le tswalano ya motho ka noši le yena? Ka gona, na e ka se be mo go kwagalago go nagana gore Modimo o go lebelela o ikarabela gore o ka dira phetho ya go mo hlankela?

13. Bafsa bao ba lego mahlalagading bao ba sa kolobetšwago ba swanetše go ipotšiša dipotšišo dife?

¹³ Na o mofsa yo a sa kolobetšwago yo a godišwago ke batswadi bao ba boifago Modimo, yo a bago gona dibokeng tša Bokriste le yo gape a tšeago karolo modirong wa go bolela ka ditaba tše dibotse tša Mmušo? Ge e ba go le bjalo, ipotšiše ka potego gore: ‘Ke ka baka la’ng  ke dira se? Na ke ba gona dibokeng le go tšea karolo modirong wa boboledi ka gobane batswadi ba-ka ba letetše gore ke dire bjalo goba na ke ka baka la gore ke nyaka go kgahliša Jehofa?’ Na wena ka bowena o hlatsetše se e lego “thato e botse le e amogelegago le e phethegilego ya Modimo”?—Baroma 12:2.

Ke ka Baka La’ng o Diega go Kolobetšwa?

14. Ke mehlala efe ya Beibele yeo e bontšhago gore kolobetšo ga se ya swanelwa go diegišwa ntle le ge go e-na le lebaka le le kwagalago?

¹⁴ “Ke’ng seo se nthibelago go kolobetšwa?” Monna wa Moethiopia yo a ilego a botšiša moebangedi Filipi potšišo yeo o be a sa tšwa go ithuta gore Jesu e be e le yena Mesia. Eupša Moethiopia yo o be a tseba Mangwalo gabotse mo a ilego a kgona go lemoga gore ga se a swanela go senya nako ka go bontšha gore go tloga ka nako yeo go ya pele o be a tla hlankela Jehofa e le karolo ya phuthego ya Bokriste, gomme seo se ile sa mo thabiša kudu. (Ditiro 8:26-39) Ka mo go swanago, mosadi yo a bitšwago Lidia, yo pelo ya gagwe e ilego ya ahlamišwa “gore a ele hloko dilo tšeo di bolelwago ke Paulo,” kapejana o ile a ‘kolobetšwa,’ yena le ba lapa la gagwe. (Ditiro 16:14, 15) Ka mo go swanago, mohlapetši wa kgolego kua Filipi o ile a theetša Paulo le Silase ge ba be ba “[mmotša] lentšu la Jehofa,” gomme “yena le ba lapa la gagwe ba kolobetšwa ka ntle le go dika-dika.” (Ditiro 16:25-34) Ka gona, ge e ba o e-na le tsebo ya motheo ka Jehofa le merero ya gagwe, o e-na le kganyogo e tšwago pelong ya go nyaka go dira thato ya gagwe le botumo bjo bobotse ka phuthegong gomme o e-ba gona dibokeng ka mehla le go tšea karolo boboleding bja ditaba tše dibotse tša Mmušo, ke ka baka la’ng o diega go kolobetšwa?—Mateo 28:19, 20.

15, 16. (a) Ke mabaka afe a fošagetšego ao a ka thibelago bafsa ba bangwe go kolobetšwa? (b) Boineelo le kolobetšo di ka šireletša bafsa bjang?

¹⁵ Na go ka direga gore o diega go gata mogato wo ka baka la ge o boifa gore o tla ikarabela ge e ba o ka welwa boitshwarong bjo bo fošagetšego? Ge e ba go le bjalo, nagana ka se: Na o be o ka gana go dira kgopelo ya lengwalo la go otlela e le feela ka baka la gore o boifa gore ka letšatši le lengwe o ka dira kotsi? Ruri ga go bjalo! Ga se wa swanela go diega go kolobetšwa ge e ba o swanelega. Ge e le gabotse, o tla tutuetšwa ka matla go dira sohle seo o ka se kgonago bakeng sa go phema go dira diphošo ge e ba o neetše bophelo bja gago go Jehofa gomme o dumetše go dira thato ya gagwe. (Bafilipi 4:13) Bafsa, hle le se ke la nagana gore ge le dutše le šuthiša nako ya lena ya go kolobetšwa, le phema go ba le boikarabelo. Ge o fihlile nywageng ya gore o be le boikarabelo, o a ikarabela go Jehofa mabapi le tsela yeo o dirago dilo ka yona go sa šetšwe gore o kolobeditšwe goba ga wa kolobetšwa.—Baroma 14:11, 12.

¹⁶ Dihlatse tše dintši lefaseng ka bophara di nagana gore phetho yeo di e dirilego ya gore di kolobetšwe ge e be e sa le bafsa e di thušitše kudu. Ka mohlala, nagana ka Hlatse ya nywaga  e 23 ya kua Bodikela bja Yuropa. E gopola gore go kolobetšwa ga yona e e-na le nywaga e 13 go e thušitše go ela hloko gore e se ke ya metšwa ke “dikganyogo tšeo di sepedišanago le bofsa.” (2 Timotheo 2:22) Ge e be e sa le mofsa, e ile ya dira phetho ya go hlankela e le modiredi wa nako e tletšego. Lehono, e hlankela ka lethabo ofising ya lekala ya Dihlatse tša Jehofa. Bafsa ka moka, go akaretša le wena, bao ba kgethago go hlankela Jehofa ba tla šegofatšwa.

17. Ke dikarolong dife mo go lego bohlokwa go ‘tšwela pele re hlatha seo “thato ya Jehofa” e lego sona’?

¹⁷ Boineelo le kolobetšo ke mathomo a bophelo bjoo go bjona re naganago ka go dira thato ya Jehofa medirong ya rena ka moka. Go phethagatša boineelo bja rena go akaretša ‘go reka nako.’ Re dira seo bjang? Ka go tšea nako yeo re bego re ka e fetša medirong ya lefeela gomme ra e dirišetša go ithuta Beibele ka kelohloko, go ba gona dibokeng ka mehla le go tšea karolo ka botlalo kudu ka mo go kgonegago boboleding bja ‘ditaba tše dibotse tša mmušo.’ (Baefeso 5:15, 16; Mateo 24:14) Go ineela ga rena go Jehofa le kganyogo ya rena ya go dira thato ya gagwe go tla re hola dikarolong ka moka tša maphelo a rena, go akaretša le tsela yeo re dirišago nako ya rena ya boiketlo, mokgwa wo re jago le go nwa ka wona le mohuta wa mmino wo re o theetšago. Ke ka baka la’ng o sa kgethe mohuta wa boiketlo bjo o tla kgonago go bo thabela ka mo go sa felego? Bafsa ba Dihlatse ba dikete-kete ba ka go botša ka ditsela tše dintši tše di lego gona tše dibotse tša go thaba mola o dutše o kgomaretše “thato ya Jehofa.”—Baefeso 5:17-19.

“A Nkê re yê le Lena”

18. Bafsa ba swanetše go ipotšiša potšišo efe?

¹⁸ Go tloga ka 1513 B.C.E. go ya go Pentekoste ya 33 C.E., Jehofa o be a e-na le batho bao ba rulagantšwego lefaseng bao a ba kgethilego gore ba mo rapele le gore e be dihlatse tša gagwe. (Jesaya 43:12) Bana ba Baisiraele ba tswaletšwe setšhabeng seo. Go tloga ka Pentekoste, Jehofa o bile le “setšhaba” se sefsa lefaseng, e lego Isiraele ya moya, “batho ba leina la gagwe.” (1 Petro 2:9, 10; Ditiro 15:14; Bagalatia 6:16) Moapostola Paulo o bolela gore Kriste o itlhwekišeditše “batho bao e lego ba gagwe ka mo go kgethegilego, bao ba fišegelago mediro e mebotse.” (Tito 2:14) Lena bafsa le lokologile go ikgethela moo batho bao ba ka hwetšwago gona. Ke bomang lehono bao ba bopago “sethšaba se boló se-lata-pôtêxô,” seo se phelago ka go dumelelana le melao ya motheo ya Beibele, seo se itshwarago bjalo ka Dihlatse tša Jehofa tše di botegago gomme se tsebatša Mmušo wa gagwe wo e lego wona feela kholofelo ya batho? (Jesaya 26:2-4) Lekodišiša dikereke tša Bojakane le madumedi a mangwe, gomme o bapiše boitshwaro bja ona le seo Beibele e se nyakago go bahlanka ba Modimo ba therešo.

19. Batho ba dimilione lefaseng ka bophara ba kgodišegile ka eng?

¹⁹ Batho ba dimilione lefaseng ka bophara, go akaretša le bafsa ba bantši, ba kgodišegile gore mašaledi a tloditšwego a Dihlatse tša Jehofa a bopa “sethšaba se boló.” Ba botša Baisiraele ba ba moya gore: “A nkê re yê le lena, ka xobane re kwile xore Modimo ó na le lena.” (Sakaria 8:23) Re tloga re holofela e bile re rapela gore lena bafsa le tla phetha ka go ba gare ga batho ba Modimo gomme ka go rialo la ‘ikgethela bophelo’—bophelo bjo bo sa felego lefaseng le lefsa la Jehofa.—Doiteronomio 30:15-20; 2 Petro 3:11-13.

E le Poeletšo

• Tlhahlo ya monagano e akaretša’ng?

• Ke tirelo ya mohuta ofe yeo e amogelegago go Jehofa?

• Bafsa ka moka bao ba godišwago ke batswadi bao ba ineetšego ba swanetše go dira kgetho efe?

• Ke ka baka la’ng kolobetšo e sa swanela go fo diegišwa?

[Dipotšišo tša Thuto]

[Diswantšho go letlakala 26]

O tla theetša mang?

[Seswantšho go letlakala 28]

Boineelo le kolobetšo di ka go šireletša bjang?

[Seswantšho go letlakala 29]

O thibelwa ke’ng go kolobetšwa?