“Xo tlo Hlalefa Mo-dumêla-thsôlô”

DIEMA 23:12 e re: “Tliša pelo ya xaxo mo xo lexo thutô; iša tsêbê ya xaxo mo xo bolêlwaxo tsebô.” Temaneng ye, “thutô” goba tlwaetšo ya boitshwaro e akaretša boitayo le tsholo yeo e tšwago go ba bangwe. Thuto e bjalo e nyaka gore go tsebje phošollo e nyakegago le kamoo e tla fiwago ka gona. Lega go le bjalo, ‘dipolelo tša tsebo’ tše di tšwago mothopong o ka botwago di bohlokwa bakeng sa thuto goba tayo.

Puku ya Beibele ya Diema ke mothopo o mobotse kudu wa dipolelo tše bohlale. Diema tšeo di lego ka go yona ke “tša xo tseba bohlale le thutô, . . . Xo amoxêlwê thutô le thlalefô le bothakxa le molaô le tše boló.” (Diema 1:1-3) Re bontšha bohlale ka go “iša tsêbê” go tšona. Diema kgaolo 15 e re fa tlhahlo e bohlale ya kamoo re ka laolago pefelo ya rena, kamoo re ka dirišago leleme la rena le kamoo re rutago ka gona. A re ahla-ahleng ditemana tše dingwe tša kgaolo yeo.

Ke’ng Seo se ‘Phohlišago Dipefelo’?

Ge a hlalosa kamoo mantšu ao a bolelwago a kgomago pefelo goba bogale ka gona, Kgoši Salomo wa Isiraele ya bogologolo o re: “Phetolô e bolêta e phohliša dipêfêlô; lentšu la xo fêrêlêla le tsoša boxale.” (Diema 15:1) ‘Pefelo’ ke lentšu leo le dirišwago go hlalosa maikwelo a matla goba karabelo ya go se thabe. “Bogale” bo hlaloswa e le “maikwelo a pefelo e feteletšego ao go lego thata kudu go a laola.” Seema se se ka re thuša bjang go lebeletšana le pefelo ya motho yo mongwe le kamoo re ka laolago ya rena ka gona?

Mantšu a sego botho ao a kwešago bohloko a ka mpefatša boemo bjo bo sa kgahlišego. Ka lehlakoreng le lengwe, phetolo e boleta gantši e phohliša maswafo. Lega go le bjalo, ga se ka mehla go lego bonolo go araba motho yo a befetšwego ka mantšu a boleta. Ka gona, go tla ba bonolo go dira bjalo ge re leka go kwešiša seo se mmefedišitšego. Beibele e re: “Molemoxi xa a na sebefedi; bokwala bya xaxwe ké xe a sa latiše phošô.” (Diema 19:11) Na e ka ba e le gore motho o befedišitšwe ke gore o hloka boikholofelo goba ke gore o tsoma go šetšwa? Motho a ka ba a se a befedišwa ke seo re ka bago  re se boletše goba re se dirile. Ge re kopana le batho bao ba befetšwego bodireding bja Bokriste, na se gantši ga se dirwe ke gore mong wa ntlo o boditšwe boitsebišo bjo bo fošagetšego ka ditumelo tša rena goba gore o foufaditšwe ke maaka? Na re swanetše go tshwenyega kudu moo re feleletšago re arabela ka bogale? Gaešita le ge e se ka mehla re ka bonago gore motho o befetšwe, go fetola ka mantšu a kwešago bohloko go ka bontšha gore re hloka boitayo. Diphetolo tše bjalo di swanetše go phengwa.

Le gona, keletšo ya gore re fetole ka mantšu a boleta e bohlokwa kudu ge go tliwa tabeng ya go laola pefelo ya rena. Re ka diriša keletšo e bjalo ka go ithuta go bolela kamoo re ikwago ka gona ka ditsela tšeo di sa kgopišego bao ba re theeditšego. Ge re dirišana le ditho tša lapa, re ka katanela go tšholla sa mafahleng a rena ka botho, go e na le go bolela ka tsela e bogale goba ya lenyatšo. Mantšu a kgopišago ge e le gabotse a tsoša kganyogo ya go itefeletša. Go botša motho maikwelo a gago ka botho ga se gantši go tsošago dikgohlano gomme go ka mo thuša gore a kgopele tshwarelo.

“’Leme la Bahlale le Tsefiša Tsebô”

Boitayo bo kgoma tsela ya rena ya go bolela le seo re se bolelago. Salomo o re: “’Leme la bahlale le tsefiša tsebô; melomo ya ditlatla e thšoloxa tša bošilo.” (Diema 15:2) Ge re e-ba le kganyogo ya go thuša ba bangwe e bile re ba botša ka morero wa Modimo le ditokišetšo tša gagwe tše di kgahlišago, na ga re ‘tsefiše tsebo’? Setlatla se palelwa ke go dira se ka gobane se hloka tsebo.

Pele a e-fa tlhahlo e oketšegilego ya kamoo go ka dirišwago leleme ka gona, Salomo o bontšha phapano e šišinyago kgopolo. “A mo xo fêla, mahlô a Morêna; a okametše ba babe le ba boló.” (Diema 15:3) Re ka thabela se ka gobane re kgonthišetšwa gore: “Mahlô a Morêna a tsepeletše lefase ka moka, xore a bônatšê matla a xaxwe ka bao ba lebeletšexo Yêna ka pelo ka moka.” (2 Koronika 16:9) Modimo o a tseba ge e ba re dira se sebotse. Le gona o lemoga bao ba dirago bobe gomme a ba ahlola.

Salomo o tšwela pele a gatelela bohlokwa bja leleme le boleta ka gore: “Bolêta bya leleme ké sehlare sa bophelô; xe le sa loke le xobatša môya-motho.” (Diema 15:4) Polelwana “sehlare sa bophelô” e šišinya dilo tšeo di fodišago le tšeo di nago le phepo. (Kutollo 22:2) Polelo e boleta ya motho yo bohlale e fodiša moya wa bao ba e theeditšego. Ke yeo e gogelago dikeng tša bona tše dibotse. Ka mo go fapanego, leleme le le forago goba la bohwirihwiri le gobatša moya wa batheetši.

Go Amogela Tayo le go “Byala Tsebô”

Kgoši e bohlale e tšwela pele ka gore: “Lešilo le nyatša tayô ya tat’alô; xo tlo hlalefa mo-dumêla-thsôlô.” (Diema 15:5) Motho a ka ‘dumela tsholo’ bjang ge e sa fiwe? Na lengwalo le ga le re gore tayo e phošollago e swanetše go fiwa ge go nyakega? Ka lapeng, ke boikarabelo bja batswadi—ka mo go kgethegilego tate—go nea tayo gomme boikarabelo bja bana ke go e amogela. (Baefeso 6:1-3) Lega go le bjalo, bahlanka ba Jehofa ka moka ba amogela tsholo ka tsela e itšego. Baheberu 12:6 e re: “Yo Jehofa a mo ratago o a mo laya; ge e le gabotse o otla yo mongwe le yo mongwe yo a mo amogelago e le morwa.” Karabelo ya rena tayong e utolla gore na re hlalefile goba re mašilo.

Ge a bontšha phapano e nngwe gape, Salomo o re: “Melomo ya bahlale e byala tsebô; pelo ya lešilo xa e loke.” (Diema 15:7) Go phatlalatša tsebo go swana le go bjala peu. Mehleng ya bogologolo, molemi o be a sa bjale peu ya gagwe ka moka felo gotee. Go e na le moo, o be a gaša dipeu tšhemong ka moka. Go bjalo le ka go phatlalatša tsebo. Ka mohlala, ge re kopana le motho bodireding, ke gabohlale go se mo tšhollele sohle seo re se tsebago ka Beibele ka yona nako yeo. Go e na le moo, motho yo bohlale o a itshwara mabapi le seo a se bolelago. O ‘bjala’ tsebo ge ganyenyane-ganyenyane  a gatelela therešo e tee ya Beibele ka nako, gomme a agelela go yona, a hlokometše karabelo ya batheetši ba gagwe. Mohlala wa rena, Jesu Kriste, o ile a dira se ge a be a bolela le mosadi wa Mosamaria.—Johane 4:7-26.

Go nea tsebo go akaretša go bolela selo seo se rutago le se se holago. Go bolela mantšu ao a neago tsebišo le a kgothatšago go nyaka go naganišiša. Ka gona, “Pelo ya moloki e akanya diphetolô.” (Diema 15:28) Ruri go bohlokwa gore mantšu a rena a be bjalo ka pula ya medupi yeo e kolobišago lefase e bile e le yeo e holago, e sego bjalo ka pula ya matla-ka-dibe yeo e sa rategego yeo e gogolago sohle seo se lego tseleng ya yona!

“Bakgethwa Boitshwarong”

Go phatlalatša tsebo ka Jehofa le morero wa gagwe gotee le go mo nea “seenywa sa melomo” bjalo ka “sehlabelo sa tumišo” ke tsela e bohlale e le ka kgonthe. (Baheberu 13:15) Lega go le bjalo, re swanetše go ba ba ‘bakgethwa boitshwarong bja rena ka moka,’ e le gore Jehofa a ka amogela sehlabelo se sebjalo. (1 Petro 1:14-16) A diriša diema tše pedi tše di sa swanego, Salomo ka kgapeletšo o re lemoša therešo ye e bohlokwa. O re: “Morêna ó nyênya didimo tša babe; ó kxahlwa ke thapêlo ya baloki. Morêna ó nyênya tsela ya yo mobe; ó rata wa xo phêxêlêla tokô.”—Diema 15:8, 9.

Bao ba tlogelago tsela e išago bophelong ba lebelela tayo bjang e bile ba letetšwe ke’ng? (Mateo 7:13, 14) “Moaroxi ó tlo tlêlwa ke dikôtlô tše bohloko; mo-nyatša-thsôlô o tlo hwa.” (Diema 15:10) Go e na le go amogela keletšo ya go ba phošolla e tšwago go bao ba nago le boikarabelo ka phuthegong ya Bokriste gomme ba itshole go tšwa pelong, ba bangwe ba bao ba latelago tseleng e fošagetšego ba kgetha go tlogela tsela e lokilego. A bošilo bjo bokaakang!

Go thwe’ng ge motho a itira tše nkego o amogela tsholo mola e le gore ge e le gabotse o e hloile? Se le sona ke bošilo. Kgoši ya Isiraele e re: “Bo-dula-bahu le sekoti sa tahlêxô, Morêna ó a di bôna; ó bôna le pelo tša bana ba batho.” (Diema 15:11) Ga go na selo seo ka tsela ya seswantšhetšo se ka bago kgole le Modimo yo a phelago go feta Sheole, e lego bodula-bahu. Lega go le bjalo, e pele ga gagwe. O tseba bao ba lego moo e bile o tseba le semelo sa bona le gona o kgona go ba tsoša. (Psalme 139:8; Johane 5:28, 29) Ruri go bonolo kudu go Jehofa go tseba seo se lego ka dipelong tša batho! Moapostola Paulo o ngwadile gore: “Dilo ka moka di hlobotše e bile di molaleng mahlong a yo re  ikarabelago go yena.” (Baheberu 4:13) Boikaketši bo ka fora batho eupša bo ka se fore Modimo.

Motho yo a ganago tayo ga se a hloya tsholo feela eupša o lwa le bao ba e neago. Salomo o re: “Mokweri xa a rate eo wa xo mo sôla.” A tšweletša kgopolo e swanago go godiša kgopolo yeo, o tlaleletša ka gore: “Xa a ye xo mohlale.” (Diema 15:12) Ruri go na le kholofelo e nyenyane ya gore motho yo bjalo o tla lokiša tsela ya gagwe!

O na le Pono e Nepagetšego

Tšhupetšo ya lentšu “pelo” e dumelelana le diema tše tharo tše di latelago tša Salomo. Ge e hlalosa kamoo sefahlego sa rena se bontšhago maikwelo a rena ka gona, kgoši e bohlale e re: “Pelo e thabilego e dira mahlo a mašweu; eupša moya o robagana ka bohloko bja pelo.”—Diema 15:13, PK.

Ke’ng seo se ka bakago bohloko bja pelo? Beibele e re: “Manyami a pelo a imeletša motho fase.” (Diema 12:25, PK) Re ka dira bjang gore maemo a sa kgahlišego bophelong a se ke a re gateletša? Go e na le go dula re tshwenyegile kudu ka maemo ao re ka bago re sa kgone go a laola gakaalo, re ka lebiša tlhokomelo ditšhegofatšong tše humilego tša moya tšeo Jehofa a re filego tšona gona bjale gotee le go seo a tlago go re direla sona nakong e tlago. Se se tla re batametša kgaufsi kudu le yena. Ee, go batamela kgaufsi le “Modimo yo a thabilego” go tla feleletša ka go thabiša dipelo tša rena tšeo di nyamilego.—1 Timotheo 1:11.

Go oketša moo, molaetša wa Beibele ke mothopo o mobotse kudu wa khomotšo le lethabo. Mopsalme o ile a re go thabile motho yoo a ‘thabelago molao wa Morena, gomme molao woo a o akanya mosegare le bošego.’ (Psalme 1:1, 2) Gaešita le ge re na le bohloko bja pelo, go bala Beibele le go naganišiša ka seo e se bolelago go tla re kgothatša. Gape go na le bodiredi bja rena bjoo re bo filwego ke Modimo. Re kgonthišetšwa gore “ba xo byala ka mexôkxô ba tlo buna ka mekxolokwane.”—Psalme 126:5.

Salomo o re: “Pelo-thlalefi e tsomeša tsebô; mahlô a setlatla a thabêla tša bošilo.” (Diema 15:14) Seema se se re bontšha phapano e kgolo magareng ga keletšo ya mohlale le ya lešilo. Pele a nea keletšo, motho yo a nago le pelo e kwešišago o tsomeša tsebo. O theetša ka kelohloko gomme a hwetša mabaka ka moka. O hlahloba Mangwalo gore a kgonthišege ka melao le melao ya motheo yeo e šomago boemong bjoo. Keletšo ya gagwe e theilwe ka mo go tiilego Lentšung la Modimo. Lega go le bjalo, lešilo ga le itshwenye ka go hwetša mabaka ka moka a boemo gomme le fo bolela seo se tlago kgopolong ya lona. Ka gona, ge re nyaka keletšo ke gabohlale go ya go bao ba nago le tsebo, e lego bao ba godilego, go e na le go ya go bao ba ka bago ba na le tshekamelo ya go re botša seo re nyakago go se kwa. Ke mo gobotse gakaakang go ba le “dimpho tšeo e lego batho” ka phuthegong ya Bokriste, bao ba ‘tsomešago tsebo’ pele ba e-fa keletšo!—Baefeso 4:8.

Seema se se latelago se bontšha mohola wa go ba le pono e nepagetšego. Kgoši ya Isiraele e re: “Yo madi-mabe matšatši a xaxwe ka moka ké mabe; mafolofolo ké monyanya wa ka mehla.” (Diema 15:15) Go na le ditšhegofatšo, masetlapelo, lethabo le dillo bophelong. Ge re ka fo dula re nagana ka mafokodi a rena, megopolo ya rena e tla fenywa ke manyami gomme matšatši a rena ka moka a tla mpefala. Lega go le bjalo, ge re ka tlatša menagano ya rena ka ditšhegofatšo tše re di hweditšego le kholofelo yeo re e filwego ke Modimo, dilo tšeo di re gateletšago e ka se be tša bohlokwa gomme re tla ba le lethabo la ka gare. Go ba le pono e nepagetšego go re kgontšha go thabela “monyanya wa ka mehla.”

Ka mešego-fela, anke re tšeeleng tayo godimo kamoo re ka kgonago ka gona. Anke re se ke ra fo e dumelela e kgoma maikwelo a rena, dipolelo tša rena le ditiro tša rena feela eupša gape re e dumelele e kgoma pono ya rena.

[Seswantšho go letlakala 13]

“Phetolô e bolêta e phohliša dipêfêlô”

[Seswantšho go letlakala 15]

Ke boikarabelo bja batswadi go fa tayo

[Seswantšho go letlakala 15]

“Melomo ya bahlale e byala tsebô”