Lentšu la Jehofa le a Phela

Dintlha tše Kgolo go tšwa Pukung ya Boraro le ya Bone ya Dipsalme

GE A be a rapela Modimo, mopsalme o ile a botšiša gore: “A botho by’axo bo sa rêtwa mabitleng? Therešô ya xaxo a e sa tlo rêtwa sekoting sa bahu?” (Psalme 88:11) Go molaleng gore karabo ke aowa. Re ka se kgone go reta Jehofa ge re hwile. Go reta Jehofa ke lebaka le lebotse la gore re tšwele pele re phela, gomme go phela ke lebaka le lebotse la gore re mo rete.

Puku ya Boraro le ya Bone ya Dipsalme, tšeo di akaretšago Dipsalme 73 go ya go 106, di re nea mabaka a mantši a go reta Mmopi le go godiša leina la gagwe. Go naganišiša ka dipsalme tše go swanetše go godiša tebogo ya rena bakeng sa “lentšu la Modimo” gomme go re tutueletše go kaonefatša dipolelo tša rena tša go mo tumiša. (Baheberu 4:12) A re thomeng ka go hlahloba Puku ya Boraro ya Dipsalme re e-na le kgahlego e kgolo.

“KE NATEFÊLWA KE XO BA KXAUFSI LE MODIMO”

(Psalme 73:1–89:52)

Dipsalme tša pele tše 11 pukung ya boraro di hlamilwe ke Asafa goba ditho tša lapa la gagwe. Koša ya mathomo e hlalosa seo se phološitšego Asafa gore a se arošwe ke tsela e fošagetšego ya go nagana. O fihleletše phetho e nepagetšego. O opela ka gore: “Xe e le nna ke natefêlwa ke xo ba kxaufsi le Modimo.” (Psalme 73:28) Psalme 74 e hlalosa sello sa ge Jerusalema e fedišwa. Dipsalme 75, 76 le 77 di hlalosa Jehofa e le Moahlodi yo a nago le toka, Mophološi wa ba boleta le Mokwi wa dithapelo. Psalme 78 e bušeletša histori ya Baisiraele go tloga mehleng ya Moše go fihla mehleng ya Dafida. Psalme 79 ke sello sa ge tempele e fedišwa. Psalme e latelago ke thapelo ya gore batho ba Modimo ba tsošološwe. Psalme 81 e re kgothaletša go kwa Jehofa. Psalme 82 le 83 ke dithapelo tša go kgopela Modimo gore a ahlole baahlodi ba kgopo le manaba a batho ba gagwe.

Koša ya barwa ba Kora e re: “Môya wa-ka o xoletšwe, ó hloloxetšwe ’kxôrô tša Morêna.” (Psalme 84:2) Psalme 85 ke kgopelo ya gore Modimo a šegofatše bao ba boago bothopša. Psalme ye e gatelela taba ya gore ditšhegofatšo tša moya ke tša bohlokwa kudu go feta tša nama. Go Psalme 86, Dafida o kgopela Modimo gore a mo šireletše le go mo ruta. Go Psalme 87, koša yeo e lego mabapi le Tsione le bao ba tswaletšwego go yona e latelwa ke thapelo yeo e lebišitšwego go Jehofa go Psalme 88. Botho bja Jehofa bjo lerato bjo bo bonagaditšwego kgweranong ya Dafida bo gatelelwa go Psalme 89, yeo e hlamilwego ke Ethane yoo mohlomongwe e bego e le yo mongwe wa banna ba bane ba bohlale mehleng ya Salomo.—1 Dikxoši 4:31.

 Dipotšišo tša Mangwalo di a Arabja:

73:9—Ke ka tsela efe ba kgopo ‘ba išago melomo ya bona legodimong gomme maleme a bona a sepela lefaseng’? Ka ge batho ba kgopo ba sa hlomphe motho le ge e le ofe legodimong goba lefaseng, ga ba dika-dike go roga Modimo ka melomo ya bona. Le gona ba thomeletša batho ka maleme a bona.

74:13, 14—Jehofa o ‘pšhatlile neng dihlogo tša dibata tša madiba le go pšhatla dihlogo tša dikwena’? “Farao kxoši ya Egipita,” o bitšwa ‘kwena-kgolo mo-lalela-batho mo dinokeng tša gagwe.’ (Hesekiele 29:3) Kwena e ka ba e swantšhetša “madira a Farao.” (Psalme 74:14, mongwalo wa tlase wa NW) Mohlomongwe go pšhatlwa ga dihlogo tša bona ke go fenywa ga Farao le madira a gagwe ka mo go feletšego ge Jehofa a be a phološa Baisiraele bokgobeng bja Egipita.

75:4, 5, 10—Lentšu “dinaka” le bolela’ng? Dinaka tša phoofolo ke sebetša se matla. Lega go le bjalo, lentšu “dinaka” ka polelo ya seswantšhetšo le bolela matla, goba go tia. Jehofa o phagamiša dinaka tša batho ba gagwe, a dira gore ba godišwe, mola a ‘roba dinaka tša ba babe.’ Re lemošwa gore re se ke ra ‘phagamiša dinaka tša rena’ ka kgopolo ya gore ga se ra swanela go ikgantšha goba go ikgogomoša. Ka ge Jehofa e le yena a re godišago, ditokelo tšeo di re neago boikarabelo ka phuthegong di swanetše go lebelelwa e le tše di tšwago go yena.—Psalme 75:7.

76:10—Go “hutlêxa” goba go galefa ga motho go ka tumiša Jehofa bjang? Ge Modimo a dumelela batho gore ba re galefele ka gobane re le bahlanka ba gagwe, go ka ba le mafelelo a mabotse. Mathata le ge e le afe ao re ka bago le ona a ka re nea tlwaetšo ka tsela e itšego. Jehofa o dumelela tlaišego feela go fihla bokgoleng bjoo e re neago tlwaetšo e bjalo. (1 Petro 5:10) ‘Kgalefo e šetšego ya batho, Modimo o ithweša yona.’ (Bapiša le NW.) Go thwe’ng ge e ba re tlaišega mo re feleletšago re hwile? Go dira bjalo le gona go ka reta Jehofa ka gobane bao ba re bonago re kgotlelela ka potego le bona ba ka thoma go reta Modimo.

78:24, 25—Ke ka baka la’ng manna a bitšwa “mabêlêʹ a lexodimo” le “bušwa bya Barongwa”? Ga go le e tee ya dipolelo tše yeo e bolelago gore manna e be e le dijo tša barongwa. E be e le “mabêlêʹ a lexodimo” ka kgopolo ya gore mothopo wa ona o be o le legodimong. (Psalme 105:40) Ka ge “barongwa” ba dula legodimong, polelwana “bušwa bya Barongwa” e ka no ba e bolela gore a be a newa ke Modimo yo a dulago legodimong. (Psalme 11:4) Le gona Jehofa a ka no ba a ile a diriša barongwa go nea Baisiraele manna.

82:1, 6—“Medimo” le “barwa ba Yo-xodimo-dimo” ke bomang? Dipolelwana tše ka bobedi di ra baahlodi ba batho kua Isiraeleng. Dipolelwana tše ke tše di swanetšego ka ge ba be ba swanetše go hlankela bjalo ka baboleledi ba Modimo le baemedi ba gagwe.—Johane 10:33-36.

83:2—Go ‘tsoša hlogo’ go bolela’ng? Tiro ye e bolela go ikemišetša go diriša matla goba go tšea kgato, gantši e le go ganetša, go lwa goba go gatelela.

Seo re Ithutago Sona:

73:2-5, 18-20, 25, 28. Ga se ra swanela go hufega ka baka la katlego ya ba kgopo gaešita le go amogela ditsela tša bona tša go se  hlomphe Modimo. Ba kgopo ba boemong bjo bo sa tsepamago. Ruri ‘ba tlo wa ba robega.’ Ka godimo ga moo, ka ge bokgopo bo ka se fele ka tlase ga pušo e sa phethagalago ya motho, maiteko a go bo fediša e tla ba a lefeela. Go etša Asafa, re dira gabotse ge re lebeletšana le bokgopo ka “xo ba kxaufsi le Modimo” le ka go ba le tswalano ya kgaufsi le Yena.

73:3, 6, 8, 27. Re swanetše go itiša malebana le go ikgantšha, go ikgogomoša, go kwera le go hlalefetša. Re swanetše go itiša malebana le mekgwa ye, gaešita le ge go e diriša go bonala go ka re hola.

73:15-17. Ge e ba go e-na le taba yeo re e belaelago, ga se ra swanela go e bolela phatlalatša. Go “bolela taba e bjalo” (NW) go tla fo nyamiša ba bangwe. Re swanetše go naganišiša ka dilo tše di re tshwenyago ka boiketlo gomme re hwetše tharollo ka go bokana le badumedi-gotee le rena.—Diema 18:1.

73:21-24. Go ‘galefa’ ka baka la seo go bonalago eka ke katlego ya ba kgopo go swana le go itshwara bjalo ka diphoofolo tše di sa naganego. Boitshwaro bjo bo laolwa ke maikwelo gomme bo ithekgile ka mo go feletšego ka tsela yeo motho a ikwago ka yona. Go e na le go itshwara ka tsela ye, re swanetše go hlahlwa ke keletšo ya Jehofa re e-na le kgodišego e feletšego ya gore ‘o tla re swara ka seatla sa gagwe se setona’ gomme a re thekga. Go oketša moo, Jehofa o ‘tla re godiša,’ ka mantšu a mangwe, re tla ba le tswalano ya kgaufsi le yena.

77:6. Go rata ditherešo tša moya e le ka kgonthe le go di tsoma ka kelohloko go nyaka gore re be le nako ya go bala le go naganišiša. Ruri ke gabohlokwa gore re beele nako ka thoko bakeng sa gore re be noši!

79:9. Jehofa o theetša dithapelo tša rena, kudu-kudu ge di le mabapi le go kgethagatšwa ga leina la gagwe.

81:13, 16. Go theetša Jehofa le go sepela ditseleng tša gagwe go tliša ditšhegofatšo tše dintši.—Diema 10:22.

82:2, 5. Go hloka toka go dira gore ‘dithekgo tša lefase’ di šuthe. Ditiro tša go hloka toka di dira gore lekoko la batho le se ke la tsepama.

84:1-4, 10-12. Tebogo ya bangwadi ba dipsalme bakeng sa lefelo la Jehofa la borapedi gotee le go kgotsofalela ga bona ditokelo tša bona tša tirelo ke mehlala e mebotse go rena.

86:5. Re leboga gakaakang gore Jehofa ke “molebaledi”! O dula a tsoma bohlatse bjo a ka bo dirišago e le lebaka la gore a gaugele modiradibe yo a itsholago.

87:5, 6. Na bao ba tlago go phela Paradeiseng mo lefaseng ba tla ka ba gopola maina a bao ba tsošeditšwego bophelong bja legodimong? Ditemana tše di bontšha gore go ka kgonega.

88:13, 14. Go se hwetše karabo ya dithapelo tša rena ka pela e ka ba sešupo sa gore Jehofa o nyaka gore re mmontšhe gore boineelo bja rena go yena ke bja kgonthe gakaakang.

“MO LEBOXENG, LE XODIŠENG LEINA L’AXWE”

(Psalme 90:1–106:48)

Nagana ka mabaka a fapa-fapanego a go godiša Jehofa ao a boletšwego ka pukung ya bone ya dipsalme. Go Psalme 90, Moše o bapetša go ba gona ga Jehofa e le “Kgoši ya bosafelego” le bophelo bja motho bjo bo fetago ka pela. (1 Timotheo 1:17) Go ya ka Psalme 91:2, Moše o bolela ka Jehofa e le ‘setšhabelo sa gagwe le sebo sa gagwe’—Mothopo wa gagwe wa tšhireletšego. Dipsalme tše mmalwa tše di latelago di bolela ka dika tša Modimo tše dibotse, dikgopolo tša gagwe tše di phagamego le mediro ya gagwe e kgahlišago. Dikoša tše tharo di thoma ka mantšu a rego: “Morêna ó a buša.” (Psalme 93:1; 97:1; 99:1) Ge a bolela ka Jehofa e le Mmopi wa rena, mopsalme o re laletša gore re ‘mo leboge, re godiše leina la gagwe.’—Psalme 100:4.

Mmuši yo a boifago Jehofa o swanetše go swaragana bjang le ditaba tša gagwe? Psalme 101, yeo e hlamilwego ke Kgoši Dafida, e re nea karabo. Psalme 102 e re botša gore Jehofa “ó tlo phafoxêla dithapêlô tša dišuana; ’thapêlô tša bôná a ka se di nyatše.” (Psalme 102:17) Psalme 103 e lebiša tlhokomelo bothong bjo lerato bja Jehofa le kgaugelong ya gagwe. Ge a bolela ka mediro ya Modimo e mentši ya mo lefaseng,  mopsalme o re: “Morêna, medirô ya xaxo xa se ka boati! O e dirile xohle ka bohlale.” (Psalme 104:24) Dikoša tše pedi tša mafelelo tša Puku ya Bone di reta Jehofa ka baka la mediro ya gagwe e kgahlišago.—Psalme 105:2, 5; 106:7, 22.

Dipotšišo tša Mangwalo di a Arabja

91:1, 2 (NW)—“Lefelo le le utegilego la Yo godimo-dimo” ke’ng, gomme re ka ‘dula’ go lona bjang? Le ke lefelo la seswantšhetšo la tšhireletšego ya moya le polokego—boemo bja go šireletšwa dikotsing tša moya. Lefelo le le utegile ka gobane bao ba sa botego Modimo ga ba le tsebe. Re dira Jehofa bodulo bja rena ka go ithekga ka yena bjalo ka setšhabelo sa rena le sebo sa rena, ka go mo tumiša bjalo ka Mmuši yo a Phagamego wa legohle le ka go bolela ditaba tše dibotse tša Mmušo. Re ikwa re šireletšegile moyeng ka gobane re a tseba gore Jehofa o dula a ikemišeditše go re thuša.—Psalme 90:1.

92:12—Ke ka tsela efe baloki ba ‘tagago bjalo ka sehlare sa [“mopalema,” NW]’? Sehlare sa mopalema se tsebja ka go enywa ga sona kudu. Moloki o swana le sehlare sa mopalema ka kgopolo ya gore o lokile pele ga Jehofa e bile o tšwela pele a enywa “dienywa tše dibotse.”—Mateo 7:17-20.

Seo re Ithutago Sona

90:7, 8, 13, 14. Go dira ga rena dibe ka mehla go senya tswalano ya rena le Modimo wa therešo. Le gona dibe tša ka sephiring di ka se ke tša fihlelwa Modimo. Lega go le bjalo, ge re itshola e le ka kgonthe gomme re tlogela tsela ya rena e fošagetšego, Jehofa o tla buša a re amogela gomme a re ‘horiša botho bja gagwe.’

90:10, 12. Ka ge bophelo e le bjo bokopana, re swanetše go “bala matšatši a rena.” Bjang? Ka go ba le ‘pelo e bohlale,’ goba ka go diriša bohlale e le gore re se ke ra diriša matšatši a rena a šetšego gampe, eupša re a diriše ka tsela yeo e kgahlišago Jehofa. Go dira bjalo go nyaka gore re ipeele dipakane tša moya gomme re diriše nako ya rena ka bohlale.—Baefeso 5:15, 16; Bafilipi 1:10.

90:17. Ke mo go swanetšego go rapela Jehofa gore a ‘tiiše mediro ya diatla tša rena’ gomme a šegofatše maiteko a rena bodireding.

92:14, 15. Batšofadi ba tšwela pele ba “hloxa [le go] taxa”—ba le mafolofolo moyeng—gomme e le karolo ya bohlokwa ya phuthego ge ba bala Lentšu la Modimo ka mafolofolo le ka go kopanela le batho ba Jehofa ka mehla.

94:19. Go sa šetšwe gore ke eng seo se re bakelago “dipelaêlô,” re tla homotšwa ke go bala le go naganišiša ka “dikhomotšô” tšeo di hwetšwago ka Beibeleng.

95:7, 8. Go theetša keletšo ya Mangwalo, go e ela hloko le go ikokobeletša yona go tla re thuša gore re se ke ra thatafala dipelo.—Baheberu 3:7, 8.

106:36, 37. Ditemana tše di tswalanya go rapela medimo ya diswantšho le go direla batemona dihlabelo. Se se bolela gore motho yoo a dirišago medimo ya diswantšho a ka ba ka tlase ga taolo ya batemona. Beibele e re phegelela ka gore: “Itišeng medimong ya diswantšho.”—1 Johane 5:21.

‘Retang Morena’

Dikoša tše tharo tša mafelelo tša Puku ya Bone ya Dipsalme di phetha ka kgothatšo e rego: ‘Retang Morena.’ Psalme ya mafelelo e thoma ka ona. (Psalme 104:35; 105:45; 106:1, 48) Ge e le gabotse, polelwana e rego ‘Retang Morena’ e tšwelela gantši Pukung ya Bone ya dipsalme.

Re tloga re e-na le mabaka a mantši a go reta Jehofa. Dipsalme 73 go ya go 106 di re neile tsebišo e ntši yeo re ka naganišišago ka yona gomme di tlatša dipelo tša rena ka tebogo bakeng sa Tatago rena wa legodimong. Na ga re tutueletšege gore re ‘rete Morena’ ka matla a rena ka moka ge re nagana ka sohle seo a šetšego a re diretše sona le seo a tlago go re direla sona nakong e tlago?

[Seswantšho go letlakala 10]

Go etša Asafa, re ka lebeletšana le bokgopo ka go “ba kxaufsi le Modimo”

[Seswantšho go letlakala 11]

Farao o a fenywa Lewatleng le Lehwibidu

[Seswantšho go letlakala 11]

Na o tseba gore ke ka baka la’ng manna a bitšwa “bušwa bya Barongwa”?

[Seswantšho go letlakala 13]

Ke’ng seo se re thušago go fediša “dipelaêlô” tša rena?