Jehofa o Phološa yo a Tlaišegago

“Mahloko a moloki a atile; ’me Morêna ó mo nthša mo xo ôna ka moka.”—PSALME 34:19.

1, 2. Mokriste yo mongwe yo a botegago o ile a lebeletšana le bothata bofe, gona ke ka baka la’ng le rena re ka welwa ke maemo a bjalo?

M OSADI yo mofsa yo a bitšwago Keiko * e bile yo mongwe wa Dihlatse tša Jehofa ka nywaga e fetago e 20. O hlanketše ka nakwana e le mmulamadibogo wa ka mehla, goba mogoeledi wa Mmušo wa nako e tletšego. O be a tšeela tokelo yeo godimo kudu. Lega go le bjalo, moragonyana bjale, Keiko o ile a thoma go nyema moko le go ipea lekatana. O re: “Ke be ke dula ke lla.” Ge a be a leka go lwantšhana le maikwelo a gagwe a fošagetšego, Keiko o ile a oketša nako yeo a e fetšago thutong ya motho ka noši. O re: “Lega go le bjalo, ga se ka kgona go fetoša tsela yeo ke bego ke ikwa ka yona. Ke be ke gateletšegile kudu mo ke ilego ka kganyoga gore nkabe ke hwile.”

² Na o kile wa tlaišwa ke maikwelo a swanago a go nyema moko? O le yo mongwe wa Dihlatse tša Jehofa, o na le mabaka a mantši a go thaba ka ge boineelo go Modimo “bo e-na le kholofetšo ya bophelo bja gona bjale le bja nakong e tlago.” (1 Timotheo 4:8) Mo nakong ye, o paradeiseng ya moya! Lega go le bjalo, na seo se bolela gore o šireleditšwe tlaišegong ka moka? Le gatee! Beibele e re: “Mahloko a moloki a atile.” (Psalme 34:19) Se ga se makatše, ka gobane “lefase ka moka le rapaletše matleng a yo kgopo,” Sathane Diabolo. (1 Johane 5:19) Ka tsela e itšego, ka moka ga rena re lebeletšana le ditla-morago tša seo.—Baefeso 6:12.

Ditla-morago tša Tlaišego

3. Nea mehlala ya Beibele ya bahlanka ba Modimo bao ba ilego ba lebeletšana le kgateletšo e kgolo.

³ Kgateletšego e sa kgaotšego e ka fsifatša tsela yeo re bonago dilo ka yona. (Diema 15:15) Ela hloko monna wa go loka e lego Jobo. A le tlaišegong e šoro, Jobo o itše: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:1) Jobo o be a feletšwe ke lethabo. O ile a ba a nagana gore Jehofa o mo lahlile. (Jobo 29:1-5) Jobo e be e se yena feela mohlanka wa Modimo yo a ilego a lebeletšana le tlalelo e kgolo. Beibele e re botša gore Hanna o be “à nyamile pelo” ka baka la ge a be a se na ngwana. (1 Samuele 1:9-11) A tshwentšwe ke boemo bja ka lapeng, Rebeka o itše: “Nna bophelô bo ntenne.” (Genesi 27:46) Ge a be a lebelela diphošo tša gagwe, Dafida o itše: “Ke hlwa kè ithsepelêla kè nyamile.” (Psalme 38:6) Mehlala ye e mmalwa  e bontšha gabotse gore batho bao ba boifago Modimo ba mehla ya pele ga Bokriste ba ile ba kgotlelela dinako tša kgateletšo e kgolo.

4. Ke ka baka la’ng go sa makatše gore go na le “meoya e nyamilego” gare ga Bakriste lehono?

⁴ Go thwe’ng ka Bakriste? Moapostola Paulo o bone go le bohlokwa go botša Bathesalonika gore ba “[bolele] ka mo go homotšago le meoya e nyamilego.” (1 Bathesalonika 5:14) Puku e nngwe e bontšha gore lentšu la Segerika leo le fetoletšwego e le “meoya e nyamilego” le ka bolela ka bao “ka nakwana ba gateleditšwego ke dikgateletšo tša bophelo.” Mantšu a Paulo a bontšha gore bao ba tloditšwego ka moya ka phuthegong yeo ya Thesalonika ba be ba gateletšegile. Le lehono, go na le meoya e gateletšegilego gare ga Bakriste. Eupša ke ka baka la’ng e gateletšegile? Anke re eleng hloko dibaki tše tharo tše di tlwaelegilego.

Re ka Gateletšwa ke go se Phethagale ga Rena

5, 6. Go ka hwetšwa khomotšo efe go Baroma 7:22-25?

⁵ Ka go se swane le batho bao ba gobogilego bao ba “[lahlegetšwego] ke maikwelo ohle a boitshwaro,” Bakriste ba therešo ba tshwenywa ke go se phethagale ga bona. (Baefeso 4:19) Ba ka ikwa go swana le kamoo Paulo a ilego a ikwa ka gona ge a be a ngwala gore: “Ruri ke kgahlišwa ke molao wa Modimo go ya ka motho yo ke lego yena ka gare, eupša dithong tša-ka ke bona molao o mongwe woo o lwantšhanago le molao wa monagano wa-ka gomme o ntira lethopša la molao wa sebe wo o lego dithong tša-ka.” Ke moka Paulo o ile a hlaboša lentšu a re: “Ke motho yo a hlomolago pelo gakaakang!”—Baroma 7:22-24.

⁶ Na o kile wa ikwa go swana le kamoo Paulo a ilego a ikwa ka gona? Ga se phošo gore o lemoge diphošo tša gago, ka ge di ka go bontšha ditla-morago tša sebe gomme tša matlafatša boikemišetšo bja gago bja go phema bobe. Eupša ga se wa swanela go dula o nyamišitšwe ke mafokodi a gago. Mantšung a gagwe a ge a be a gateletšegile ao a sa tšwago go tsopolwa, Paulo o okeditše ka gore: “A go lebogwe Modimo ka Jesu Kriste Morena wa rena!” (Baroma 7:25) Ee, Paulo o be a e-na le kholofelo ya gore madi a Jesu ao a tšholotšwego a be a tla mo phološa sebeng sa leabela.—Baroma 5:18.

7. Ke’ng seo se ka thušago motho gore a se ke a gateletšwa ke go se phethagale ga gagwe?

⁷ Ge o ikwa o gateletšegile ka baka la ge o sa phethagala, homotšwa ke mantšu a moapostola Johane, yo a ngwadilego gore: “Ge e ba motho a ka dira sebe, re na le mothuši go Tate, e lego Jesu Kriste, moloki. Ke sehlabelo sa poelanyo bakeng sa dibe tša rena, fela e sego bakeng sa tša rena feela, eupša le bakeng sa tša lefase ka moka.” (1 Johane 2:1, 2) Ge e ba o gateleditšwe ke gore ga se wa phethagala, dula o gopola gore Jesu o hwetše badiradibe, e sego batho bao ba phethagetšego. Ge e le gabotse, “bohle ba dirile sebe gomme ba hlaelelwa ke letago la Modimo.”—Baroma 3:23.

8, 9. Ke ka baka la’ng re swanetše go gana dikgopolo tša go ipona molato?

⁸ Lega go le bjalo, anke re re o kile wa dira sebe se segolo. Ga go pelaelo gore o ile wa rapela Jehofa ka taba yeo, mohlomongwe gantšinyana. O hweditše thušo ya moya go bagolo ba Bakriste. (Jakobo 5:14, 15) O ile wa itshola e le ka kgonthe gomme ka go rialo wa dula o le karolo ya phuthego. Goba mohlomongwe o tlogetše mokgatlo wa Modimo ka nakwana, eupša ka morago o ile wa itshola gomme wa boela boemong bja go ba yo a hlwekilego. Go sa šetšwe gore boemo ke bofe, o ka gopola sebe seo o se dirilego nakong e fetilego gomme wa gateletšega. Ge e ba seo se direga, gopola gore Jehofa o lebalela bao ba itsholago go tšwa pelong ka “tebalêlô e nntši.” (Jesaya 55:7) Go feta moo, ga a nyake gore o ikwe eka o lahlilwe. Ge o ka dira bjalo, o tla ba o phethagatša morero wa Sathane. (2 Bakorinthe 2:7, 10, 11) Diabolo o tla fedišwa ka gobane o swanelwa ke seo, eupša o rata gore le wena o nagane gore o swanelwa ke go ahlolwa ka tsela e bjalo. (Kutollo 20:10) O se ke wa dumelela Sathane gore a atlege lesolong le la gagwe la go senya tumelo ya gago. (Baefeso 6:11) Go e na le moo, ‘emeletšana le yena o tiile’ tabeng ye, go etša ge o dira ka ditsela tše dingwe.—1 Petro 5:9.

⁹ Go Kutollo 12:10, Sathane o bitšwa “mmegi wa bana babo rena”—Bakriste ba tloditšwego.  O ‘ba bega’ pele ga Modimo “mosegare le bošego.” Go naganišiša ka temana yeo go ka go thuša go bona gore Sathane, e lego mmegi wa maaka, a ka thaba ge o ka ipona molato le go nyema moko, gaešita le ge Jehofa a sa dire bjalo. (1 Johane 3:19-22) Ke ka baka la’ng o tšwela pele o itshwenya ka diphošo tša gago go fihla moo o ikwago eka o ka tlogela? O se ke wa dumelela Sathane a senya tswalano ya gago le Modimo. O se ke wa tsoga o dumeletše Diabolo a dira gore o se lemoge gore Jehofa ke “yo mabobo le kxauxêlô, wa xo se fêlê pelo, wa botho byo boxolo.”—Ekisodo 34:6.

Mafokodi a Rena a ka re Nyamiša

10. Mafokodi a rena a ka re nyamiša ka tsela efe?

¹⁰ Bakriste ba bangwe ba ka nyama ka baka la tsela yeo mafokodi a bona a kgomago tirelo ya bona e yago go Modimo. Na go bjalo le ka wena? Mohlomongwe e ka ba taba ya gore bolwetši bjo šoro, botšofadi goba maemo a mangwe a go thibela go fetša nako e lekanego bodireding go etša ge o be o kgona go dira bjalo nakong e fetilego. Ke therešo gore Bakriste ba kgothaletšwa go reka nako bakeng sa tirelo ya Modimo. (Baefeso 5:15, 16) Eupša go thwe’ng ge e ba ruri mafokodi a go palediša go dira mo go oketšegilego bodireding gomme se se go nyamiša kudu?

11. Keletšo ya Paulo yeo e begilwego go Bagalatia 6:4 e re hola bjang?

¹¹ Beibele e re kgothaletša gore re se ke ra tšwafa eupša re be “baekiši ba bao ka tumelo le go se fele pelo ba jago bohwa bja dikholofetšo.” (Baheberu 6:12) Re ka dira se ge feela re ka hlahloba mohlala wa bona o mobotse gomme ra nyaka go ekiša tumelo ya bona. Lega go le bjalo, re ka se ke ra holega ge re ka ipapiša ka mo go sa swanelago le ba bangwe gomme ra phetha ka gore ga go na selo seo re se dirago se se kgotsofatšago. Ka baka leo, re dira gabotse ge re diriša keletšo ya Paulo e rego: “Anke yo mongwe le yo mongwe a hlatsele seo modiro wa gagwe e lego sona, gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagalatia 6:4.

12. Ke ka baka la’ng re ka thabela tirelo yeo re e direlago Jehofa?

¹² Bakriste ba na le lebaka le lebotse la go thaba, gaešita le ge ba fokodišwa ke mathata a magolo a tša maphelo. Beibele e re kgonthišetša gore: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.” (Baheberu 6:10) Go ka direga gore maemo ao o sa kgonego go a laola a dirile gore o thatafalelwe ke go tšwela pele o dira kamoo o bego o tlwaetše go dira ka gona. Lega go le bjalo, ka thušo ya Jehofa, o ka ba o kgona go tšea karolo ka botlalo dibopegong tše dingwe tša bodiredi bja Bokriste, tše bjalo ka go nea bohlatse ka mogala le ka go ngwala mangwalo. O ka kgonthišega gore Jehofa Modimo o tla go šegofatša ka baka la tirelo ya gago ya nako e tletšego le lerato leo o ratago yena le batho ka lona.—Mateo 22:36-40.

Re ka Nyamišwa ke “Dinako tše di Hlobaetšago”

13, 14. (a) ‘Dinako tše tšeo di hlobaetšago’ di ka re bakela tlaišego ka tsela efe? (b) Re bona bjang gore lerato la tlhago le a hlaela lehono?

¹³ Gaešita le ge re lebeletše pele bophelong lefaseng le lefsa la go loka la Modimo, ga bjale re phela gare ga “dinako tše di hlobaetšago tšeo go lego thata go lebeletšana le tšona.” (2 Timotheo 3:1) Re kgothatšwa ke go tseba gore ditiragalo tšeo di nyamišago di re batametša kgaufsi le phološo ya rena. Lega go le bjalo, re kgongwa ke maemo ao a re dikologilego. Ka mohlala, go thwe’ng ge e ba o sa šome? Mešomo e ka no ba e se gona, gomme ge dikgwedi di dutše di feta, o ka ipotšiša ge e ba Jehofa a bona tlalelo ya gago goba ge e ba a e-kwa dithapelo tša gago. Goba mohlomongwe o a kgethollwa goba o lebeletšane le mohuta o mongwe wa go hloka toka. Gaešita le go bala dihlogo tša kuranta go ka go dira gore o ikwe go swana le kamoo Lota wa moloki a ilego a ikwa ka gona, e lego go “tlaišwa kudu” (go “fela matla,” Young’s Literal Translation of the Holy Bible) ka baka la boitshwaro bjo bo gobogilego bja batho bao a bego a phela le bona.—2 Petro 2:7.

¹⁴ Go na le sebopego se sengwe sa mehla ya  bofelo seo re ka se kego ra se hlokomologa. Beibele e boletše e sa le pele gore batho ba bantši e be e tla ba “ba ba se nago maikwelo a borutho a tlhago.” (2 Timotheo 3:3) Lerato la ka lapeng le a hlaela malapeng a mantši. Puku ya Family Violence e bolela gore ka kgonthe, “bohlatse bo bontšha gore go na le kgonagalo e kgolo ya gore batho ba bolawe, ba tlaišwe mmeleng, ba tlaišwe maikwelong goba ka tša botona le botshadi ke ditho tše dingwe tša malapa go feta motho le ge e le ofe. Go batho ba bangwe ba bagolo le bana, lefelo leo batho ba swanetšego go ratwa le go ikwa ba šireletšegile go lona, ke lona le kotsi kudu go feta mafelo ka moka.” Bao ba kilego ba ba magaeng ao a sa šireletšegago ba ka lebeletšana le dipelaelo le go nyema moko nywageng e tlago. Go thwe’ng ge e ba se e le therešo ka wena?

15. Lerato la Jehofa le feta bjang la motho le ge e le ofe?

¹⁵ Mopsalme Dafida o opetše ka gore: “Tate le mmê bôná ba ntloxetše; ’me Wêna Morêna O a nkamoxêla.” (Psalme 27:10) Ruri go a kgothatša go tseba gore Jehofa o re rata go feta motswadi le ge e ofe yo e lego motho! Gaešita le ge go hlokomologwa, go se swarwe gabotse goba go lahlwa ke motswadi go ka ba bohloko, ga go tutuetše tsela yeo Jehofa a go ratago ka yona. (Baroma 8:38, 39) Gopola gore Modimo o goga bao a ba ratago. (Johane 3:16; 6:44) Go sa šetšwe gore batho ba ile ba go swara bjang, Tatago wa legodimong o a go rata!

Megato e Šomago Bakeng sa go Fokotša go Nyema Moko

16, 17. Motho a ka dira’ng ge a nolegile moko e le gore a dule a matlafetše moyeng?

¹⁶ O ka gata megato e šomago bakeng sa go lebeletšana ka katlego le go nyema moko. Ka mohlala, latela lenaneo leo le kgothatšago la mediro ya Bokriste. Naganišiša ka Lentšu la Modimo, kudu-kudu ge go bonala eka kgateletšego e a go imela. Mopsalme o opetše ka gore: “Mohla kè šetše kè re ke a thêkêsêla, ka thêkxwa ke botho bya xaxo, Morêna. Mohla kè xoletšwe ke dipelaêlô ka teng xa-ka, ka bewa pelo ke dikhomotšô tša xaxo.” (Psalme 94:18, 19) Go bala Beibele ka mehla go tla thuša go tlatša monagano wa gago ka mantšu a kgothatšago le dikgopolo tše di matlafatšago.

¹⁷ Thapelo le yona e bohlokwa. Gaešita le ge o ka se kgone go bolela maikwelo a gago ka mo go tseneletšego, Jehofa o tseba seo o lekago go se bolela. (Baroma 8:26, 27) Mopsalme o neile kgonthišetšo ye: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”—Psalme 55:22.

18. Motho yo a gateletšegilego a ka gata megato efe e šomago?

¹⁸ Ba bangwe ba nolwa moko ke kgateletšego e tseneletšego ya maikwelo. * Ge e ba go le bjalo  ka wena, leka go lebiša tlhokomelo lefaseng le lefsa la Modimo le nakong ya ge go “ka se bê le e a rexo: Ke a babya!” (Jesaya 33:24) Ge e ba go nolega moko go sa kgaotše, e ka ba gabohlale go nyaka thušo ya tša kalafo. (Mateo 9:12) E bile go bohlokwa go itlhokomela mmeleng. Go ja dijo tša phepo le go itšhidulla go se nene e ka ba mo go holago. Kgonthišega gore o khutša ka mo go lekanego. O se ke wa dula go fihlela bošego kudu o lebeletše thelebišene, gomme o pheme mehuta ya boitapološo yeo e tla dirago gore o šale o lapile kudu mmeleng le maikwelong. Go feta tšohle, tšwela pele o swaregile ka mediro yeo e thabišago Modimo! Gaešita le ge e se ya hlwa e e-ba nako ya ge Jehofa a tla “phumola megokgo ka moka,” o tla go thuša go kgotlelela.—Kutollo 21:4; 1 Bakorinthe 10:13.

Go Phela ka “Tlase ga Seatla se Matla sa Modimo”

19. Ke’ng seo Jehofa a se holofetšago bao ba tlaišegago?

¹⁹ Beibele e re kgonthišetša gore gaešita le ge mathata a moloki e le a mantši, “Morêna ó mo nthša mo xo ôna ka moka.” (Psalme 34:19) Modimo o dira se bjang? Ge moapostola Paulo a be a rapela leboelela gore a hlomolwe “mootlwa nameng” ya gagwe, Jehofa o mmoditše gore: “Matla a-ka a phethagatšwa bofokoding.” (2 Bakorinthe 12:7-9) Ke’ng seo Jehofa a se holofeditšego Paulo, le gona ke’ng seo a go holofetšago sona? Ga a holofetše gore o tla re alafa gona bjale, eupša o holofetša matla a go kgotlelela.

20. Ke’ng seo re kgonthišetšwago sona go 1 Petro 5:6, 7 go sa šetšwe diteko tšeo re lebeletšanago le tšona?

²⁰ Moapostola Petro o ngwadile gore: “Ikokobetšeng tlase ga seatla se matla sa Modimo, gore a le godiše nakong e swanetšego; ge le dutše le lahlela dipelaelo tša lena ka moka go yena, gobane o a le hlokomela.” (1 Petro 5:6, 7) Jehofa a ka se ke a go lahla ka baka la gore o a go rata. O tla go thekga go sa šetšwe diteko tšeo o lebeletšanago le tšona. Gopola gore Bakriste bao ba botegago ba ka “tlase ga seatla se matla sa Modimo.” Ge re dutše re hlankela Jehofa, o re nea matla a go kgotlelela. Ge e ba re mmotegela, ga go na seo se ka re gobaletšago sa ruri moyeng. Ka gona, anke re duleng re botegela Jehofa e le gore re ka thabela bophelo bjo bo sa felego lefaseng la gagwe le lefsa le le holofeditšwego gomme re bone letšatši la ge ka kgonthe a tla be a phološitše yo a tlaišegago ya ba moka!

[Mengwalo ya ka tlase]

Na o a Gopola?

• Ke ka baka la’ng gaešita le bahlanka ba Jehofa ba tlaišega?

• Ke dilo dife tše dingwe tšeo di dirago gore batho ba bangwe ba Modimo ba ikwe ba nolegile moko?

• Jehofa o re thuša bjang go lebeletšana le mathata a rena?

• Re ka “tlase ga seatla se matla sa Modimo” ka tsela efe?

[Dipotšišo tša Thuto]

[Diswantšho go letlakala 25]

Batho ba Jehofa ba na le lebaka la go thaba go sa šetšwe diteko

[Seswantšho go letlakala 28]

Go nea bohlatse ka mogala ke tsela e nngwe ya go nea Jehofa tirelo ya pelo ka moka