“Re Swanetše Go Kwa Modimo E Le Mmuši Go E-na Le Batho”

“Modimo wa Rena ó na le Matla a xo re Phološa”

TIRAGALO ye e be e reretšwe gore e be e kgahlišago. Seswantšho se segolo sa gauta se be se tsemilwe molaleng wa Dura, wo go bonagalago o be o le kgaufsi le toropo ya Babilona. Seswantšho se be se tla kgakolwa moletlong o kgethegilego woo go bego go tlile le bahlankedi ba phagamego bao ba bego ba letetšwe gore ba khunamele seswantšho ge go letšwa diletšo tša go fapa-fapana. Nebukadinetsara Kgoši ya Babilona o be a laetše gore motho le ge e le ofe yo a ka se khunamelego seswantšho o tla hwela ka leubeng la mollo. Ke mang yo a bego a ka leka go tshela taelo yeo?

Se se makaditšego ba bego ba le gona ke gore barapedi bao ba boifago Jehofa ba bararo—Šadirake, Mešake le Abedinego—ga se ba ka ba khunama. Ba be ba tseba gore go dira bjalo e be e tla ba go latola boineelo bja bona bjo bo feletšego go Jehofa Modimo. (Doiteronomio 5:8-10) Ge ba gapeletšwa gore ba hlalose go ema ga bona ka go tia, ba ile ba botša Nebukadinetsara ba sa boife gore: “Xe xo ka dirwa ka mokxwa woo, xôna Modimo wa rena ó na le matla a xo re phološa leubeng la mollô o tukaxo, le xo re namolêla seatleng sa xaxo. Le xe a ka lesa xo re namolêla, xôna wene kxoši O fêlê Ò tseba xore medimo ya xaxo xa re e hlankele; seswanthšô seo O se tsemilexo, xa re se khunamele.”—Daniele 3:17, 18.

Ge Baheberu ba bararo ba be ba lahlelwa ka leubeng la mollo, e bile feela ka mohlolo mo ba ilego ba phološwa. Modimo o ile a romela morongwa gore a šireletše bahlanka ba Gagwe ba botegago. Eupša ba be ba šetše ba dirile kgetho ya gore ba bete dipelo ba hwe go e na le gore ba se kwe Jehofa. * Boemo bja bona bo be bo swana le bja baapostola ba Jesu Kriste, bao ka morago ga nywaga-kgolo ya ka godimo ga e tshela ba ilego ba botša kgoro e phagamego ya Bajuda gore: “Re swanetše go kwa Modimo e le mmuši go e-na le batho.”—Ditiro 5:29.

Thuto ya Bohlokwa Yeo re Ithutago Yona

Šadirake, Mešake le Abedinego ke mehlala e mebotse ya tumelo, go kwa le potego. Baheberu ba bararo ba ile ba bontšha gore ba na le tumelo go Jehofa. Matswalo a bona ao a tlwaeditšwego ka Mangwalo ga se a ba dumelela go tšea karolo medirong le ge e le efe ya borapedi bja maaka goba ditirong tša borapedi bja setšhaba. Bakriste ba mehleng yeno le bona ba bontšha go bota Modimo ka mo go feletšego. Ba hlahlwa ke matswalo a bona ao a tlwaeditšwego ka Beibele le gona ba gana go tšea karolo medirong ya borapedi bja maaka goba meletlo yeo e hlomphollago melao le melao ya motheo ya Modimo.

Baheberu ba ba bararo ba be ba bota Jehofa gomme ba ganne go amogela selo le ge e ka ba sefe seo Mmušo wa Babilona o bego o ka ba nea sona bakeng sa gore ba kwanantšhe go kwa ga bona, e ka ba botumo, maemo goba letago. Masogana ao a be a ikemišeditše go tlaišwa le go hwa go e na le gore a senye tswalano ya ona le Modimo. Go swana le Moše yo a phetšego pele ga bona, ba ile ba ‘tšwela pele ba tiile go etša ge eka ba bona Yo a sa bonagalego.’ (Baheberu 11:27) Go sa šetšwe gore Jehofa o kgethile go  ba phološa lehung goba go se bjalo, boraro bja bona ba be ba ikemišeditše go dula ba mmotegela go e na le gore ba kwanantšhe bakeng sa go phološa maphelo a bona. Go molaleng gore moapostola Paulo o šupa mohlaleng wa bona ge a bolela ka batho ba go botega bao ba ilego “ba tima matla a mollo.” (Baheberu 11:34) Bahlanka ba Jehofa ba bontšha tumelo e bjalo le go kwa ge potego ya bona e dutše e lekwa mehleng ye ya rena.

Phihlelong ye ya Šadirake, Mešake le Abedinego, le rena re ithuta gore Modimo o putsa bao ba mmotegelago. Mopsalme o opetše ka gore: “[Jehofa] . . . baxauxêlwa ba xaxwe xa’ ba lahle.” (Psalme 37:28) Lehono re ka se letele gore Modimo a re phološe ka mohlolo go swana le ge a phološitše Baheberu ba bararo. Lega go le bjalo, re ka kgodišega gore go sa šetšwe gore re lebana le mathata a mohuta ofe, Tatago rena wa legodimong o tla re thuša. Modimo a ka fediša bothata, a re nea matla a gore re bo kgotlelele goba go re tsoša ge e ba re tšwela pele re botega go fihla lehung. (Psalme 37:10, 11, 29; Johane 5:28, 29) Tumelo, go kwa le potego di a fenya ka mehla ge re lekwa gomme re kgetha go kwa Modimo go e na le batho.

[Mongwalo wa ka tlase]

[Lepokisi/Seswantšho go letlakala 9]

NA O BE O TSEBA?

• Ge Baheberu ba ba bararo ba be ba lebana le teko ye ya potego, ba be ba le nywageng ya bona ya mafelelong ya bo-20.

• Mollo o ile wa kgohletšwa gore o fiše kudu-kudu ka mo go kgonegago, mohlomongwe ka go lahlela dilo tšeo di bego di tla dira gore o tuke kudu.—Daniele 3:19.