Boifa Jehofa—O Thabe!
Boifa Jehofa—O Thabe!
“Go thaba motho yo a boifago Jehofa.”—PSALME 112:1, NW.
1, 2. Go boifa Jehofa go ka re tlišetša’ng?
LETHABO ga le itlele feela. Lethabo la kgonthe le ithekgile ka go dira dikgetho tše di swanetšego, go dira dilo tše di lokilego le go phema dilo tše di fošagetšego. Mmopi wa rena, e lego Jehofa, o re neile Lentšu la gagwe e lego Beibele e le gore a re rute kamoo re ka bago le bophelo bjo kaone-kaone. Ge re tsoma tlhahlo ya Jehofa le go e latela, gomme ka go rialo re bontšha gore re boifa Modimo, re ka kgotsofala e le ka kgonthe gomme ra thaba.—Psalme 23:1; Diema 14:26.
2 Sehlogong se, re tla ahla-ahla mehlala ya ka Beibeleng le ya mehleng yeno yeo e bontšhago kamoo go boifa Modimo e le ka kgonthe go neago motho matla a go ganetša kgatelelo ya go dira se se fošagetšego le sebete sa go dira se se nepagetšego. Re tla bona gore go boifa Modimo go ka re tlišetša lethabo ka go re tutueletša go lokiša diphošo go etša ge Kgoši Dafida a ile a swanelwa ke go dira bjalo. Le gona re tla bona gore ruri go boifa Jehofa ke bohwa bjo bohlokwa bjoo batswadi ba ka bo neago bana ba bona. Ka kgonthe, Lentšu la Modimo le re kgonthišetša gore: “Go thaba motho yo a boifago Jehofa.”—Psalme 112:1, NW.
Go Thaba Gape
3. Ke’ng seo se thušitšego Dafida go lemoga dibe tša gagwe?
3 Bjale ka ge go boletšwe sehlogong se se fetilego, Dafida o ile a palelwa ke go boifa Modimo ka mo go swanetšego ka makga a mararo ao a tsebegago gomme a dira sebe. Lega go le bjalo, tsela yeo a ilego a arabela ka yona ge Jehofa a mo laya e bontšhitše gore o be a tloga a boifa Modimo. Go hlompha ga gagwe Modimo go ile gwa mo tutueletša gore a amogele phošo ya gagwe, a lokiše ditsela tša gagwe gomme a tsošološe tswalano ya gagwe le Jehofa. Gaešita le ge diphošo tša gagwe di ile tša tlišetša yena le ba bangwe tlaišego, go itshola ga gagwe mo go tšwago pelong go ile gwa dira gore Jehofa a tšwele pele a mo thekga le go mo šegofatša. Ruri mohlala wa Dafida o ka matlafatša Bakriste bao lehono ba ka welago sebeng se segolo.
4. Go boifa Modimo go ka thuša motho bjang gore a thabe gape?
4 Ela hloko phihlelo ya Sonja. * Gaešita le ge a be a hlankela bjalo ka moebangedi wa nako e tletšego, Sonja o ile a gwerana le batho ba babe, a itshwara ka tsela yeo e sego ya Bokriste gomme a swanelwa ke go kgaolwa ka phuthegong ya Bokriste. Ge a se na go hlaphogelwa, Sonja o ile a dira sohle seo se nyakegago e le gore a lokiše tswalano ya gagwe le Jehofa. Ge nako e dutše e e-ya, o ile a bušetšwa ka phuthegong. Maemong a ka moka, Sonja ga se a ka a lahla kganyogo ya gagwe ya go hlankela Jehofa. Mafelelong o ile a tsenela bodiredi bja nako e tletšego gape. Ka morago o ile a nyalana le mogolo wa Mokriste yo a beago mohlala gomme gona bjale o hlankela le yena ka lethabo ka phuthegong. Gaešita le ge Sonja a itshola ka baka la ge a ile a aroga tseleng ya Bokriste ka nakwana, o thabišwa ke gore go boifa ga gagwe Modimo go mo thušitše gore a boelane le Jehofa.
Go Tlaišega go e na le go Dira Sebe
5, 6. Hlalosa gore ke bjang le gore ke ka baka la eng Dafida a ile a se ke a bolaya Saulo ka makga a mabedi.
5 Ke therešo gore go kaone kudu ge go boifa Modimo go phemiša motho go dira sebe. Se e bile sa therešo tabeng ya Dafida. Ka nako e nngwe ge Saulo a be a kitimiša Dafida a e-na le madira a dikete tše tharo, o ile a tsena ka leweng—lewa lona leo Dafida le banna bao a bego a e-na le bona ba bego ba iphihlile ka go lona. Banna bao ba ile ba kgothaletša Dafida gore a bolaye Saulo. Na ga se gore Jehofa o be a neetše lenaba la Dafida seatleng sa gagwe? Ka setu, Dafida o ile a khukhuna go fihla go Saulo gomme a ripa ntlha ya kobo ya gagwe. Ka ge Dafida a be a boifa Modimo, gaešita le yona tiro yeo e sego kotsi e ile ya tshwenya letswalo la gagwe. Dafida o ile a phatlalatša banna bao ba ba galefilego ka gore: “A Morêna a nthibêlê, xore mong wa-ka ke se mo dirê tšeo, ka iša letsôxô xo motlotšwa wa Morêna.” *—1 Samuele 24:2-8.
6 Tiragalong e nngwe ge Saulo a be a robetše nageng bošego, yena le banna bao a bego a sepela le bona ba ile ba welwa ke “borôkô byo boxolo byo bo bexo bo ba wetše bò e-tšwa xo Morêna.” Dafida le motlogolo wa gagwe yo a nago le sebete e lego Abisai ba ile ba tsena gare-gare ga banna bao, ba fihla ba ema kgaufsi le Saulo. Abisai o be a nyaka go mmolaya. Dafida o ile a thibela Abisai a mmotšiša gore: “Ké mang e a kaxo mo iša seatla, ’me a se ôtlwê?”—1 Samuele 26:9, 12.
7. Ke’ng seo se ilego sa thibela Dafida go dira sebe?
7 Ke ka baka la’ng Dafida a sa ka a bolaya Saulo ka makga a mabedi ge a be a e-na le sebaka sa go dira bjalo? Ka gobane o be a boifa Jehofa kudu go feta Saulo. Ka baka la go boifa ga gagwe Modimo ka mo go swanetšego, Dafida o be a ikemišeditše go tlaišega ge e ba go nyakega, go e na le gore a dire sebe. (Baheberu 11:25) O be a kgodišegile ka mo go feletšego gore Jehofa o hlokomela bahlanka ba Gagwe le gore le yena o tla mo hlokomela. Dafida o be a tseba gore go kwa le go bota Modimo go tla tliša lethabo le ditšhegofatšo tše dintši, mola go Mo hlokomologa go ka dira gore a se ke a amogelega go Modimo. (Psalme 65:4) Le gona o be a tseba gore Modimo o tla phethagatša kholofetšo ya Gagwe ya go dira Dafida kgoši le gore o tla tloša Saulo ka nako ya Gagwe le ka tsela ya Gagwe.—1 Samuele 26:10.
Go Boifa Modimo go Tliša Lethabo
8. Boitshwaro bja Dafida ge a be a le ka tlase ga kgateletšo ke mohlala bjang?
8 Bjalo ka Bakriste, re ka letela go kwerwa, go tlaišwa gotee le diteko tše dingwe. (Mateo 24:9; 2 Petro 3:3) Ka dinako tše dingwe re ka ba le mathata ao a akaretšago barapedi-gotee le rena. Lega go le bjalo, re a tseba gore Jehofa o bona dilo tšohle, o kwa dithapelo tša rena, le gore ka nako e swanetšego o tla lokiša ditaba ka go dumelelana le thato ya gagwe. (Baroma 12:17-21; Baheberu 4:16) Ka gona, go e na le go boifa manaba a rena, re boifa Modimo gomme re letela yena gore a re phološe. Bjalo ka Dafida, ga re itefeletše e bile ga re kwanantšhe melao ya motheo ya go loka e le gore re pheme tlaišego. Go dira bjalo go tliša lethabo mafelelong. Eupša bjang?
9. Nea mohlala wa kamoo go boifa Modimo go ka tlišago lethabo go sa šetšwe tlaišego.
9 Moromiwa yo mongwe yo a hlanketšego ka nako e telele kua Afrika o boletše gore: “Ke gopola mma yo mongwe le morwedi wa gagwe yo a lego mahlalagading, bao ba ilego ba gana go reka dikarata tša mokgatlo wa dipolitiki ka baka la boema-gare bja bona bja Bokriste. Sehlopha sa banna se ile sa ba betha o šoro ke moka sa ba laela gore ba ye gae. Ge ba dutše ba sepela, mma yo o ile a leka go homotša morwedi wa gagwe yoo a bego a lla ka ge a be a sa kwešiše gore ke ka baka la eng se se ba diragaletše. Ba be ba sa thaba ka nako yeo, eupša ba be ba e-na le matswalo a hlwekilego. Ka morago ba ile ba thaba ka ge ba ile ba kwa Modimo. Ge nkabe ba ile ba reka dikarata tša mokgatlo wa dipolitiki, sehlopha seo se ka ba se ile sa thaba kudu. Banna bao ba ka ba ba ile ba ba nea mapotlelo a dinwa-maphodi gomme ba sepela le bona ba bina ge ba e-ya gae. Eupša ngwanenyana yoo le mmagwe ba be ba tla nyama kudu ka ge ba tla ba ba tseba gore ba kwanantšhitše tumelo ya bona.” Go boifa ga bona Modimo go ile gwa ba šireletša manyaming ao ka moka.
10, 11. Go boifa Modimo ga mosadi yo mongwe go bile le mafelelo afe a mabotse?
10 Le gona go boifa Modimo go tliša lethabo ge re lebeletšane le diteko tšeo di akaretšago go hlompha go kgethega ga bophelo. Ge Mary a be a imile ngwana wa gagwe wa boraro, ngaka e ile ya mo kgothaletša gore a ntšhe mpa. Ngaka e itše: “Boemo bja gago bo kotsing. Bo ka mpefala ka nako le ge e le efe gomme wa hwa ka diiri tše 24. Ngwana le yena a ka hwa. Go sa šetšwe gore boemo e tla ba bofe, ga go na kgonthišetšo ya gore ngwana o tla phela gabotse.” Mary o be a dutše a ithuta Beibele le Dihlatse tša Jehofa eupša o be a se a hlwa a kolobetšwa. Mary o re: “Eupša ke be ke šetše ke dirile phetho ya go hlankela Jehofa gomme ke be ke ikemišeditše go mo kwa go sa šetšwe seo se bego se tla direga.”—Ekisodo 21:22, 23.
11 Nakong ya ge a imile, Mary o ile a tšwela pele a ithuta Beibele gomme a hlokomela lapa la gagwe. Mafelelong o ile a belega. Mary o re: “Ge ke be ke belega, ke bile le mathata go feta ge ke be ke belega bana ba bangwe ba-ka ba babedi, eupša e be e se mathata a magolo.” Go boifa Modimo go ile gwa thuša Mary gore a dule a e-na le letswalo le lebotse gomme o ile a kolobetšwa ka nako e sa fetšego pelo. Ngwana yoo wa gagwe le yena o ile a ithuta go boifa Jehofa ge a gola gomme gona bjale o hlankela go e nngwe ya diofisi tša makala tša Dihlatse tša Jehofa.
‘Itiiše Matla ka Jehofa’
12. Go boifa Modimo go ile gwa matlafatša Dafida bjang?
12 Go boifa Jehofa ga Dafida ga se gwa mo thibela feela gore a se dire sebe. Go ile gwa mo matlafaletša go gata mogato ka go tia le ka bohlale ge a lebeletšane le maemo a thata. Dafida le banna bao a bego a e-na le bona ba ile ba tšhabela Saulo gomme ba dula motseng wa Bafilisita wa Tsikilaga ka ngwaga le dikgwedi tše nne. (1 Samuele 27:5-7) Ka nako e nngwe ge yena le banna bao ba be ba se gona, bahlakodi ba Baamaleke ba ile ba fiša motse gomme ba thopa basadi ba banna bao, bana le mehlape ya bona. Ge Dafida le banna bao ba boa gomme ba bona seo se diregilego, ba ile ba lla. Kapejana manyami a ile a fetoga kgalefo gomme banna bao ba bolela gore ba tla kgatla Dafida ka mafsika. Gaešita le ge a be a gateletšegile, Dafida ga se a ka a lahlela toulo. (Diema 24:10) Go boifa ga gagwe Modimo go ile gwa mo tutueletša gore a retologele go Jehofa gomme “a itiiša matla ka Morêna Modimo wa xaxwe.” Ka thušo ya Modimo, Dafida le banna bao ba ile ba lata Baamaleke gomme ba tšea dilo tšohle tšeo ba bego ba di thopile.—1 Samuele 30:1-20.
13, 14. Go boifa Modimo go thušitše Mokriste yo mongwe bjang go dira diphetho tše dibotse?
13 Lehono bahlanka ba Modimo le bona ba lebeletšana le maemo ao a nyakago gore ba bote Jehofa gomme ba be le sebete sa go gata mogato ka go tia. Ela hloko mohlala wa Kristina. Ge e be e sa le yo mofsa, Kristina o ile a ithuta Beibele le Dihlatse tša Jehofa. Eupša o be a nyaka go ba sebapadi sa piano sa dikhonsate, gomme o be a dirile tšwelopele e kgolo e le gore a fihlelele pakane yeo. Ka godimo ga moo, o be a e-na le dihlong tša go dira boboledi gomme ka baka leo a tšhaba boikarabelo bjoo bo bego bo tla tlišwa ke kolobetšo. Ge Kristina a dutše a ithuta Lentšu la Modimo, o ile a thoma go lemoga matla a lona. O be a ithuta go boifa Jehofa gomme o ile a lemoga gore Jehofa o lebeletše gore bahlanka ba gagwe ba mo rate ka dipelo tša bona ka moka, menagano ya bona, moya wa bona le matla a bona ka moka. (Mareka 12:30) Se se ile sa mo tutueletša gore a ineele go Jehofa gomme a kolobetšwe.
14 Kristina o ile a kgopela Jehofa gore a mo thuše go dira tšwelopele ya moya. Kristina o hlalosa gore: “Ke be ke tseba gore bophelo bja sebapadi sa piano sa dikhonsate bo akaretša maeto a mantši le ditumelelano tša go bapala dikhonsateng tše ka fihlago go tše 400 ka ngwaga. Ka gona ke ile ka phetha ka gore ke be morutiši e le gore ke kgone go iphediša go e na le gore ke be sebapadi sa piano.” Ka nako yeo go be go šetše go rulagantšwe gore Kristina a bapale piano holong e tumilego ya dikhonsate nageng ya gabo. O re: “Khonsate ya-ka ya mathomo e bile khonsate ya-ka ya mafelelo.” Ka morago ga moo Kristina o ile a nyalana le mogolo wa Mokriste. Gona bjale ba hlankela gotee go e nngwe ya diofisi tša makala tša Dihlatse tša Jehofa. O thabile ka ge Jehofa a ile a mo nea matla a go dira diphetho tše di swanetšego le gore gona bjale o kgona go diriša matla le nako ya gagwe tirelong ya Jehofa.
Bohwa bjo Bohlokwa
15. Ke’ng seo Dafida a bego a nyaka go se nea bana ba gagwe, gona o ile a ba nea sona bjang?
15 Dafida o ngwadile gore: “Tlang lena Bana Le nkweng, ke Le rutê xo boifa Morêna.” (Psalme 34:11) Bjalo ka tate, Dafida o be a ikemišeditše go nea bana ba gagwe bohwa bjo bohlokwa kudu—go boifa Jehofa e le ka kgonthe le ka tsela e leka-lekanego le e swanetšego. Ka mantšu le ka ditiro tša gagwe, Dafida ga se a tšweletša Jehofa e le Modimo yo kgopo, yo a boifišago le yo a dulago a nyaka sebaka sa go latofatša batho ka go roba melao ya Gagwe, eupša o ile a mo tšweletša e le Tate yo lerato, yo a hlokomelago bana ba Gagwe ba lefaseng le yo a ba lebalelago. Dafida o botšišitše gore: “Ké mang a itemoxaxo dikaroxô?” Ke moka, e le ge a bontšha go kgodišega ga gagwe gore Jehofa ga a dule a re swaya diphošo, o okeditše ka gore: “Ntebalêlê le tše ke sa di tsebexo.” Dafida o be a kgodišegile gore ge e ba a iteka e le ka kgonthe, Jehofa o be a tla amogela dipolelo tša gagwe le dikgopolo tša gagwe.—Psalme 19:12, 14.
16, 17. Batswadi ba ka ruta bana ba bona bjang go boifa Jehofa?
16 Dafida ke mohlala go batswadi lehono. Ralph, yoo a hlankelago gotee le moratho wa gagwe ofising ya lekala ya Dihlatse tša Jehofa, o re: “Batswadi ba rena ba re godišitše ka tsela yeo e dirilego gore re thabele go ba therešong. Ge re be re sa le ba banyenyane, ba be ba re akaretša dipoledišanong tše di lego mabapi le mediro ya phuthego gomme re ile ra thoma go fišegela therešo go etša bona. Ba re rutile go dumela gore re ka dira dilo tše dibotse tirelong ya Jehofa. Ge e le gabotse, lapa lešo le ile la dula ka nywaga e mentši nageng yeo go yona go nyakegago bagoeledi ba bantši ba Mmušo gomme la thuša go hloma diphuthego tše difsa.
17 O re: “Seo se re thušitšego go kgomarela tsela e nepagetšego e be e se melao e mentši e thata, eupša e be e le taba ya gore batswadi ba rena ba be ba lebelela Jehofa e be e le motho wa kgonthe, yo a lego botho kudu le yo a lokilego. Ba be ba kganyoga go tseba Jehofa gakaone le go mo thabiša gomme re ile ra ithuta tseleng yeo ka yona ba boifago Modimo e le ka kgonthe le go mo rata. Gaešita le ge re be re dirile phošo, batswadi ba rena ba be ba sa re dire gore re ikwe eka Jehofa ga a sa re rata; e bile ba be ba sa re beele dithibelo tše di sa nyakegego. Gantši ba be ba dula le rena fase gomme ba bolela le rena, ka dinako tše dingwe mma a leka go fihlelela dipelo tša rena mahlo a gagwe a sekišitše megokgo. Mokgwa wo o ile wa atlega. Re ile ra ithuta dipolelong tša batswadi ba rena le ditirong tša bona gore go boifa Jehofa ke selo se sebotse le gore go ba yo mongwe wa Dihlatse tša gagwe go a thabiša, ga se morwalo.”—1 Johane 5:3.
18. Re tla hwetša moputso ofe ge re boifa Modimo?
18 ‘Mantšung a mafelelo a Dafida’ re bala gore: “Mmuši wa batho moloki, Mmuši mmoifa-Modimo Ó etša seedi ka mesô, Ó etša ’tšatši xe le hlaba.” (2 Samuele 23:1, 3, 4) Go bonala Salomo, e lego morwa wa Dafida le mohlatlami wa gagwe bogošing, a ile a kwešiša mantšu a ka ge a ile a kgopela Jehofa gore a mo nee “pelo e kwaxo” le bokgoni bja go ‘hlaologanya botse le bobe.’ (1 Dikxoši 3:9) Salomo o ile a lemoga gore go boifa Jehofa ke tsela ya bohlale le ya lethabo. Ka morago o ile a akaretša puku ya Mmoledi ka mantšu a rego: “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle. Xobane medirô ka moka, le dithopa tšohle, tše di botse le tše mpe, Modimo ó tlo di iša thsekong.” (Mmoledi 12:13, 14) Ge e ba re latela keletšo yeo, ruri re tla hwetša gore “boikokobetšô le xo boifa Morêna” ga di tliše feela bohlale le lethabo, eupša gape di tliša “lehumô, le xo rêtwa, le xo phela.”—Diema 22:4.
19. Ke’ng seo se tlago go re thuša go kwešiša seo se bolelwago ke “xo boifa Morêna”?
19 Go tšwa mehlaleng ya mehleng ya Beibele le ya mehleng yeno, re a bona gore go boifa Modimo ka mo go swanetšego go bapala karolo e bohlokwa bophelong bja bahlanka ba therešo ba Jehofa. Poifo e bjalo ga e re thibele feela go dira dilo tšeo di sa thabišego Tatago rena wa legodimong, eupša gape e re nea sebete sa go lebeletšana le manaba a rena le go kgotlelela ditlaišego le mathata ao a re welago. Ka gona, re le bafsa le batho ba bagolo, anke re baleng Lentšu la Modimo ka phišego, re naganišišeng ka seo re ithutago sona gomme re batamele kgaufsi le Jehofa ka mehla ka dithapelo tše di tšwago pelong. Ka go dira bjalo, re ka se ke ra “tseba Modimo” feela eupša gape re tla kwešiša seo se bolelwago ke “xo boifa Morêna.”—Diema 2:1-5.
[Mengwalo ya ka tlase]
^ ser. 4 Maina a fetotšwe.
^ ser. 5 Ye e ka no ba e be e le e nngwe ya diphihlelo tšeo di tutueleditšego Dafida go hlama Dipsalme 57 le 142.
Na o ka Hlalosa?
Go boifa Modimo
• go ka thuša motho bjang go lemoga dibe tša gagwe?
• go ka re tlišetša bjang lethabo ge re lebeletšane le diteko le tlaišego?
• go ka re matlafaletša bjang go dira thato ya Modimo?
• e ka ba bohwa bjo bohlokwa bjang go bana ba rena?
[Dipotšišo tša Thuto]
[Seswantšho go letlakala 26]
Go boifa Jehofa go ile gwa thibela Dafida go bolaya Kgoši Saulo
[Diswantšho go letlakala 29]
Go boifa Modimo ke bohwa bjo bohlokwa bjoo batswadi ba ka bo neago bana ba bona