Dipotšišo tše Tšwago go Babadi

Re tseba bjang gore tlhaloso ya bohlale go Diema 8:22-31 e šupa go Jesu Kriste e le sebopiwa sa moya pele e e-ba motho wa nama?

Tlhaloso e buduletšwego ya bohlale yeo e hwetšwago pukung ya Diema e balega ka tsela ye: “Nna, Morêna ó nthlomile mola à thôma ditsela tša xaxwe; nna ke wa mola à sešo a dira medirô ya xaxwe. . . . Ke wa mola dithaba di sešo tša thêwa, le meboto è sešo ya ba xôna. . . . Mola à thêkxa maxodimo, ke be ke le xôna, . . . ké xe kè na naê’ kè le mohlankana w’axwe, kè mo kxahla mehla yohle, kè bapala pele xa xaxwe ka mehla, . . . kè kxahlwa ke bana ba batho.”

Lengwalo le le ka se bolele feela ka bohlale bja Modimo goba bohlale bjo bo inaganelwago. Ka baka la’ng? Ka gobane bohlale bjo bo bolelwago mo bo ile bja ‘hlongwa,’ goba bja bopša e le mathomo a tsela ya Jehofa. Jehofa Modimo ga e sa le go tloga a le gona e bile ka mehla o dula a le bohlale. (Psalme 90:1, 2) Bohlale bja gagwe ga go na mo bo thomilego gona; ga se bja bopša goba go hlongwa. Ga se bja ‘tswalwa.’ (Bapiša le PK.) Go oketša moo, bohlale bjo go bolelwa gore bo a bolela e bile bo a šoma, seo se bolelago gore bo emela motho.—Diema 8:1.

Puku ya Diema e re nakong e fetilego bohlale bo be bo e-na le Jehofa, Mmopi, e le “mohlankana w’axwe.” Seo ka ntle le pelaelo se šupa Jesu. Nako e telele pele a e-tla lefaseng, Jesu o šomile kgaufsi kudu le Jehofa mo Lentšu la Modimo le bolelago gore: “Ke wa pele ga dilo tše dingwe ka moka gomme dilo tše dingwe ka moka di dirilwe gore di be gona ka yena.”—Bakolose 1:17; Kutollo 3:14.

Go bitša Morwa wa Modimo gore ke bohlale go swanetše, ka ge e be e le Yena yo a ilego a utolla merero le ditaelo tše bohlale tša Jehofa. Pele ga ge e ka ba motho wa nama, Jesu e be e le Lentšu la Modimo, goba Mmoleledi. (Johane 1:1) O hlaloswa e le “matla a Modimo le bohlale bja Modimo.” (1 Bakorinthe 1:24, 30) A tlhaloso e botse gakaakang ya Morwa wa Modimo, yoo lerato la gagwe bakeng sa batho le mo tutueditšego gore a neele ka bophelo bja gagwe e le topollo bakeng sa bona!—Johane 3:16.

[Seswantšho go letlakala 31]

“Ke wa mola dithaba di sešo tša thêwa”