Gempe ya Boya le go ba Motho wa Moya
Gempe ya Boya le go ba Motho wa Moya
KGOŠI LOUIS IX wa Fora o be a e apara. Mohlomphegi Thomas More o be a thušwa ke yona go dula a phafogile diiri tše 19 goba tše 20 ka letšatši, dikgweding tše mmalwa ge a be a sa le yo mofsa gomme a ithutela tša molao. Ka kgonthe, bophelong bja gagwe, More o tsebja ka go fetša nako e ntši a apare ya gagwe. Le gona ge Thomas Becket, e lego Mopišopo-mogolo wa Canterbury, a hwetšwa a bolailwe ka Kerekeng ya Canterbury go se gwa letelwa, o be a e apere ka gare. Ke’ng seo batho ba ba tumilego ba swanago ka sona? Ba be ba phegelela go ikweša bohloko mmeleng ba diriša gempe ya boya bakeng sa go laola dikganyogo tša bona.
Gempe ya boya e be e le seaparo sa go hlaba-hlaba seo se dirilwego ka boya bja pudi, seo se bego se aparwa ka gare e le gore se kgone go hlaba-hlaba mmele le go o gohla gomme se dire gore motho a se iketle. Le gona e be e ratwa ke dinta. Go be go bolelwa gore Thomas Becket o ile a apara gempe ya gagwe ya boya gotee le borokgwana bja ka gare bja go dirwa ka boya go ba go fihla ge di “nyeuma dinta.” Ka morago ga lekgolo la bo-16 la nywaga, boya bja pudi ka dinako tše dingwe bo be bo tšeelwa legato ke terata ya meetlwa yeo e nago le dintlha tšeo di bego di lebišwa mmeleng. Go dira gore gempe e be ka tsela ye go be go dira gore yo a e aperego a se ke a iketla le ganyenyane.
Go ya ka pukuntšu e nngwe, morero wa gempe ya boya, go swana le mekgwa e mengwe ya go ikweša bohloko, e be e le go “laola dikganyogo tša mmele le go hlagolela tshekamelo ya kgonthe ya dilo tša moya le mokgwa wa go phela woo o kgahlago Modimo.” Ga se batho ba go itima dilo feela bao ba bego ba apara seaparo seo; le batho ba tlwaelegilego go be go tsebega gore ba a se apara, go akaretša le bao ba lego matleng a bolaodi. Gaešita le lehono melao ya dikereke tše dingwe e sa kgomaretše mokgwa wo.
Na go apara gempe ya boya goba go kgotlelela mekgwa ya go itima dilo go dira gore motho e be motho wa moya? Aowa, go ba motho wa moya ga se gwa ithekga ka mekgwa e bjalo. Ge e le gabotse, moapostola Paulo o boletše kgahlanong le “tshwaro e šoro ya mmele.” (Bakolose 2:23) * Go fapana le moo, go ba motho wa kgonthe wa moya go ithekgile ka go tsoma go tseba Modimo, ka go bala Lentšu la gagwe ka mafolofolo le go diriša tsebo yeo bophelong.
[Mongwalo wa ka tlase]
^ ser. 5 Bakeng sa go hlahloba taba ye ka mo go oketšegilego, bona Phafoga! ya October 8, 1997, “Pono ya Beibele: Na go Itima Dilo Kudu ke Senotlelo sa Bohlale?”
[Methopo ya Diswantšho go letlakala 32]
King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904