Go Boifa Modimo—“Thutô ya Bohlale”

BOHLALE bja kgonthe bo rulagantše monyanya o mogolo. Bo “roma dimatlane, tša laletša batho di le diokamong, tša re: Yo e lexo wa lešilo, a a fapoxêlê mono! Ba-hlôka-thlaloxanyô ba thwe: Tlang Le jeng boxôbê bya ka, le nweng morara wo ke o fótlilexo. Lahlang bošilo Le phelê, Le tšeê ka tsela ya tsebô.”—Diema 9:1-6.

Go ja tafoleng ya bohlale ga go lebiše bobeng goba kotsing. Go theetša bohlale bjo bo tšwago go Modimo bjo bo lego ka go diema tše di buduletšwego le go amogela tayo ya bjona go feleletša ka botse feela. Go bjalo le ka dipolelo tše bohlale tše di ngwadilwego go Diema 15:16-33. * Go kwa keletšo ya mantšu a a makopana go ka re thuša go kgotsofala le ge re se na dilo tše di bonagalago, go ka re thuša go tšwela pele le go thabela go phela. Le gona go dira bjalo go tla re thuša go dira diphetho tše bohlale gomme gwa re thuša gore re dule re kgomaretše tsela e išago bophelong.

Ge go se be le Dilo tše Dintši tše di Bonagalago go le Kaone

Kgoši Salomo wa Isiraele ya bogologolo o re: “Lehumô le lexolo le hlokišaxo khutšô, le phalwa ke thšexo e naxo le xo boifa Morêna.” (Diema 15:16) Ke bošilo gore motho a hlokomologe Mmopi gomme a dire gore go phegelela dilo tše di bonagalago e be selo sa bohlokwa bophelong. Go phegelela bophelo bja mohuta woo go lapiša kudu e bile go tletše ka dipelaelo. Ruri e tla ba mo go nyamišago ge motho a lemoga a šetše a tšofetše gore bophelo bja gagwe ka moka e bile bja lefeela le bja go hloka morero! E tloga e se gabohlale go kgoboketša mahumo a mantši gotee le ‘go hloka khutšo.’ Ruri go kaone go ithuta go kgotsofala le go phela ka seo re nago le sona! Kgotsofalo ya kgonthe e hwetšwa ka go boifa Jehofa—tswalanong ya rena le yena—e sego dilong tše di bonagalago.—1 Timotheo 6:6-8.

Ge a gatelela gore tswalano e botse le ba bangwe ke ya bohlokwa go feta go kgobela dilo tše di bonagalago, Salomo o re: “Xo ja morôxo rè ratana, xo phala mola xò hlabilwe kxomo e nonnexo rè hlôyana.” (Diema 15:17) Ee, lapa le nago le lerato ke la bohlokwa kudu go feta motlalo wa dijo tše bose. Lapeng la motswadi yo a se nago molekane, go ka ba go se na dilo tše kaalo tše di bonagalago. Dinageng tše dingwe, dijo tša go fo itloša bodutu e ka ba tšona tšeo motho a ka kgonago go di nea. Lega go le bjalo, lapa le thabela mo go nago le lerato le maikwelo a borutho.

Gaešita le malapeng ao ka tlwaelo go nago le lerato, go ka ba le mathata. Yo mongwe ka  lapeng a ka bolela goba a dira selo seo se ka kgopišago yo mongwe. Yo a kgopišitšwego o swanetše go arabela bjang? Diema 15:18 e re: “Wa sebefedi ó tsoša thšitanô; wa xo se fele pelo ó fediša kxang.” Karabo e boleta, e sego e bogale, e tliša khutšo. Keletšo ya seema se e šoma ka mo go swanago dikarolong tše dingwe tša bophelo, go akaretša medirong ya phuthego le bodireding bja phatlalatša.

Ge ‘Mmila o Lekelane’

Seema se se latelago se gatelela phapano magareng ga motho yo a sa kago a ela hloko bohlale le yo a bo etšego hloko. Kgoši e bohlale e re: “Tsela ya sebodu e hwa ka meetlwa; ya moloki ké mmila, e lekelane.”—Diema 15:19.

Sehlare sa meetlwa ke lepheko le le hlabago. Sebodu se nagana ka mehuta ka moka ya mapheko gomme se a diriša e le lebaka la go lokafatša go palelwa ga sona ke go thoma mošomo o itšego. Ka lehlakoreng le lengwe, baloki ga ba tshwenyege ka mapheko ao a ka ba šitišago. Ba dira mošomo wa bona ka mafolofolo gomme ba phetha mošomo woo ba o neilwego. Ka go rialo, ba phema mathata a mantši a go hlaba wa meetlwa ao ba ka lebeletšanago le ona ge ba ka hlokomologa dilo. Tsela ya bona e “lekelane,” seo se rago gore, e tšwela pele. Ba tšwela pele modirong wa bona gomme ba thabela go bona ge o tšwela pele.

Ka mohlala, nagana ka taba ya go hwetša tsebo e nepagetšego ya Lentšu la Modimo le go tšwela pele o gola ka tsebo. Go nyakega boiteko. Motho a ka fo diriša go se be le thuto e lekanego, go se kgone go bala gabotse goba go lebala ka pela e le lebaka la go se be le thuto e mafolofolo ya motho ka noši ya Beibele. Ruri go kaone go se nagane ka dilo tše bjalo e le tšeo di re thibelago go hwetša tsebo! Gaešita le ge re se na bokgoni gakaalo, re ka leka ka matla go kaonefatša bokgoni bja rena bja go bala le go kwešiša seo re se balago, mohlomongwe re diriša pukuntšu ge e ba go nyakega. Go ba le pono e nepagetšego go re thuša go ba le tsebo le go tšwela pele moyeng.

 Ge ‘Tate a Kgahlega’

Kgoši ya Isiraele e re: “Ngwana’mohlalefi ó kxahla tat’axwe; mo-nyatša-mm’axwe ké motho wa lešilo.” (Diema 15:20) Na batswadi ga ba thabe ge bana ba bona ba dira dilo ka bohlale? Ke therešo gore batswadi ba swanetše go tlwaetša le go laya bana ba bona e le gore go be le mafelelo ao a mabotse. (Diema 22:6) Eupša ruri batswadi ba a thaba ge morwa wa bona a le bohlale! Lega go le bjalo, wa lešilo o ba bakela manyami a sa felego.

Kgoši e bohlale e bolela gape gore: “Mo-hlôka-kxopôlô ó thabêla tša bošilo; monna wa kêlêllô ó swara tsela ya xo loka.” (Diema 15:21) Bao ba hlokago kgopolo ba thabela disego tša bošilo le menyanya yeo e sa tlišego kgotsofalo ya kgonthe goba lethabo. Lega go le bjalo, motho yo a nago le temogo o bona bošilo bja go ba yo a “ratago maipshino go e-na le go rata Modimo.” (2 Timotheo 3:1, 4) Go kgomarela melaong ya motheo yeo Modimo a e rutago go mo thuša gore a dule a lokile gomme tsela ya gagwe e letlile.

Ge ‘Maano a Kgonega’

Go phela ka go latela melao ya motheo ya Modimo go hola dibopegong tše dingwe tša bophelo bja rena. Diema 15:22 e re: “Maanô a padile, xò se keletšanô; a tlo kxônêxa xe baeletši ba ka ata.”

Maano mo a bolela poledišano ya ka sephiring gare ga batho eupša e le ya go ntšha sa mafahleng. Lentšu la Seheberu leo le fetoletšwego e le “maanô” le šupa go “mabothobotho” go Psalme 89:7. Se se bontšha go kgobokana ka morero wa go boledišana. Maano ke go botšana dikgopolo le maikwelo, go feta go fo boledišana le motho. Ge banna le basadi gotee le batswadi le bana ba boledišana ka bolokologi ka tsela ye, go ba le khutšo le botee magareng ga bona. Eupša go se boledišane go baka dikgakanego le mathata ka lapeng.

Ge re dira diphetho tše bohlokwa, ke gabohlale go kwa keletšo e rego: “[Go] kxônêxa xe baeletši ba ka ata.” Ka mohlala, ge re kgetha mohuta wa kalafo, na ga se gabohlale go ya ngakeng e fetago e tee, kudu-kudu ge go akaretšwa ditaba tše dikgolo?

Ke gabohlokwa kudu go ba le baeletši ba bantši ge re hlokomela dilo tša moya. Ge bagolo ba boledišana le go diriša keletšo e bohlale yeo ba e hweditšego ge ba be ba bokane e le sehlopha, ‘taba e a kgonega.’ Go oketša moo, bagolo bao ba sa tšwago go kgethwa ga se ba swanela go dika-dika go tsoma keletšo ya bagolo bao ba godilego goba bao ba nago le phihlelo e ntši, kudu-kudu ge e ba taba yeo ba swanetšego go swaragana le yona e le thata.

Ge ‘Phetolo e Thabiša’

Mantšu ao a bolelwago ka temogo a ka ba le mafelelo afe a mabotse? Kgoši ya Isiraele e re: “Monna ó thabêla phetolô ya molomo w’axwe; ka kxonthe lentšu la xo tla lebakeng la xôna,  ké lôna le le botse.” (Diema 15:23) Na ga re thabe ge karabo goba keletšo ya rena e latelwa gomme go e-ba le mafelelo a mabotse? Lega go le bjalo, e le gore keletšo ya rena e atlege, e swanetše go fihlelela dinyakwa tše pedi.

Sa pele, keletšo e swanetše go thewa ka go tia Lentšung la Modimo, e lego Beibele. (Psalme 119:105; 2 Timotheo 3:16, 17) Ke moka, e swanetše go bolelwa ka nako e swanetšego. Gaešita le mantšu a therešo ao a bolelwago ka nako e fošagetšego e ka ba ao a gobatšago. Ka mohlala, go nea motho keletšo pele ga ge a ka bolela ditaba ka botlalo ga se gabohlale e bile ga go thuše. Ruri go bohlokwa gore re be bao ba “akgofago mabapi le go kwa, [bao ba] diegago mabapi le go bolela”!—Jakobo 1:19.

“Mmila wa Bophelô ó Iša Xodimo”

Diema 15:24 e re: “Xo yo bohlale mmila wa bophelô ó iša xodimo, xore a tloxêlanê le bodula-bahu bò s’e kxolê.” Motho yo a dirago dilo ka bohlale goba temogo o tseleng yeo e mo tlošago bodula-bahu goba Sheole, e lego lebitla le le tlwaelegilego la batho. O phema mekgwa e gobatšago e bjalo ka go ba le dikopano tša botona le botshadi ka tsela e sa swanelago, go diriša dihlare-tagi gampe le botagwa—gomme ka go rialo a phema go hwa ka pela. Tsela ya gagwe e iša bophelong.

Ka mo go fapanego, ela hloko tsela ya bao ba se nago temogo: “Motse wa baipoti o tlo thubya ke Morêna; mosadi wa mohlôlôxadi ó mo kxaolêla thšemo. Morêna ó hlaswa maanô a mabe; tše e sexo thšila ké polêlô tše di ratêxaxo. Wa bokxônatha ó ithsenyetša motse; xo tlo phela mo-ila-tsôxô-le-kobong.”—Diema 15:25-27.

Ge kgoši ya Isiraele e re bontšha kamoo re ka phemago molaba o swanago, e re: “Pelo ya moloki e akanya diphetolô; molomo wa yo kxôpô o thšoloxa tše di befilexo.” (Diema 15:28) Ruri keletšo ya seema se e bohlokwa! Ke ka sewelo dikarabo tšeo di sa kago tša naganwa e sa le pele le tša bošilo tšeo di fogo bolelwa, di bago le mafelelo a mabotse. Ge re naganišiša ka dikarolo tše di fapa-fapanego tšeo di ka tlaleletšago tabeng e itšego, go akaretša maemo le maikwelo a ba bangwe, ga se gantši re ka bolelago selo seo re tla itsholelago sona ka morago.

Ka gona, go boifa Modimo le go amogela tayo ya gagwe go hola ka’ng? Monna yo bohlale o araba ka gore: “Morêna ó kxolê le ba babe; ó kwa dithapêlô tša baloki.” (Diema 15: 29) Modimo wa therešo ga a kgaufsi le ba kgopo. Beibele e re: “Thlala-molaô, le thapêlô y’axwe ké makxapa.” (Diema 28:9) Bao ba boifago Modimo gomme ba katanela go dira se se lokilego pele ga gagwe ba ka mmatamela ka bolokologi, ba e-na le kgodišego e feletšego ya gore o tla ba kwa.

Seo se ‘Thabišago Pelo’

Ge Salomo a diriša papišo e šišinyago kgopolo o re: “Mahlô a mašweu a thabiša pelo; ’fokô le boló le tiiša dithô [“nontšha marapo,” NW].” (Diema 15:30) Marapo a ‘nona’ ge a e-na le moko. Se se matlafatša mmele ka moka gomme se dira gore pelo e thabe. Le gona lethabo la pelo le bonagatšwa ge sefahlego se edile. Se ke seo se dirwago ke pego e botse!

Na dipego tša go katološwa ga barapedi ba Jehofa lefaseng lohle ga se mothopo wa kgothatšo ya kgonthe go rena? Go ithuta ka dilo tšohle tšeo di fihleletšwego modirong wa go bolela ka Mmušo le wa go dira barutiwa ruri go re matlafaletša go tšea karolo ka mo go tletšego bodireding. (Mateo 24:14; 28:19, 20) Diphihlelo tša bao ba dirago gore Jehofa e be Modimo wa bona gomme ba thoma go phela ka go dumelelana le borapedi bja therešo di thabiša dipelo tša rena. Ka ge “’fokô-boló-le-tšwa-kxolê” le e-ba le mafelelo a mabotse, ruri go bohlokwa gore ka mo go nepagetšego le ka letswalo le lebotse re bege seo re se dirago bodireding!—Diema 25:25.

“Boikokobetšô bo Latêlwa ke Kxodišô”

Ge e gatelela mohola wa go amogela tayo yeo e tlago ka ditsela tše di fapa-fapanego, kgoši e bohlale e re: “Tsêbê e thaetšaxo thsôlô ye e phedišaxo, e itiša le bahlale. Mo-lahla-thutô ó nyatša bophelô bya xaxwe; mo-thaetša thsôlô ó huma thlaloxanyô.” (Diema 15:31, 32) Tsholo, goba tayo, e fihlelela pelo ya motho gomme ya e lokiša, ya dira gore a nagane dilo gabotse. Ga go makatše ge “kxati ya thsôlô” e le yona yeo e tlošago ‘bošilo bjo bo gweranego le pelo ya mošemanyana’! (Diema 22:15) Le gona motho yo a theetšago tayo o ba le maikemišetšo a mabotse. Ka lehlakoreng le lengwe, go gana tayo ke go gana bophelo.

Ka kgonthe, go amogela tayo ya bohlale le go e amogela ka boikokobetšo go a hola. Ga se feela gore go dira bjalo go a kgotsofatša, go tliša tšwelopele, go a thabiša e bile go tliša katlego eupša gape go iša letagong le bophelong. Diema 15:33 e phetha ka gore: “Xo šia Morêna ké yôna thutô ya bohlale; boikokobetšô bo latêlwa ke kxodišô.”

[Mongwalo wa ka tlase]

[Seswantšho go letlakala 17]

Boemo bjo bo rategago ka lapeng ke bjo bo kgahlišago go feta motlalo wa dijo tše dibose

[Seswantšho go letlakala 18]

Gaešita le ge re sa kgone go bala gabotse, kgopolo e nepagetšego e re thuša go hwetša tsebo

[Seswantšho go letlakala 19]

Maano ke ge batho ba boledišana ka seo ba se naganago e le ka kgonthe le kamoo ba ikwago ka gona

[Seswantšho go letlakala 20]

Na o tseba kamoo ‘pego e botse e nontšhago marapo’?