Go Swarwa ga Batho ka Seriti—Go a Kgonega go Bohle

“Re swanetše go thea lefase le lefsa—lefase le lekaone-kaone— leo go lona seriti sa motho se tlago go hlompšha ka mo go sa felego.”—MOPRESIDENTE WA U.S. HARRY TRUMAN, KUA SAN FRANCISCO, CALIFORNIA, U.S.A., APRIL 25, 1945.

GO SWANA le batho ba bantši ba nywageng ya ka morago ga Ntwa ya II ya Lefase, Mopresidente Truman o be a dumela gore batho ba ka ithuta dilong tšeo di fetilego gomme ba thea “lefase le lefsa” leo go lona bohle ba tlago go ba le seriti. Ka manyami, dilo tšeo di diregago mehleng ya lehono di bontšha gore ga go bjalo. “Seriti sa ka mo go sa felego sa batho” se tšwela pele se senywa ka baka la gore bothata bjo ga bo bakwe ke batho eupša bo bakwa ke lenaba la bona le legolo.

Mmaki wa Bothata

Beibele e šupa lenaba le e le Sathane Diabolo, sebopiwa se kgopo sa moya seo go tloga mathomong a histori ya batho se ilego sa hlasela tokelo ya Modimo ya go buša. Go thoma ge Sathane a be a boledišana le Efa tšhemong ya Edene, morero wa gagwe e be e le go goketša batho gore ba tlogele go hlankela Mmopi wa bona. (Genesi 3:1-5) Nagana ka mafelelo a nyamišago ao Adama le Efa ba bilego le ona ge ba be ba latela dikeletšo tša Diabolo! Ditla-morago tša ka pela ka morago ga  ge ba tshetše molao wa Modimo wa mabapi le seenywa se se ileditšwego di bonagetše ge ka bobedi ba ile “ba utama bà . . . thšaba sefahloxô sa Morêna Modimo.” Ka baka la’ng? Adama o utollotše gore: ‘Ke be ke boifa ka ge ke se ka apara gomme ka utama.’ (Genesi 3:8-10) Tswalano ya Adama le Tatagwe wa legodimong le tsela yeo a bego a itebelela ka yona di be di fetogile. O be a e-na le dihlong gomme a ikwa a sa lokologe ge a boledišana le Jehofa.

Ke ka baka la’ng Diabolo a be a nyaka go bona seriti sa Adama se senyega? Ka baka la gore batho ba bopilwe ka seswantšho sa Modimo, le gona Sathane o thabišwa ke go bona ba dira dilo tšeo di ka ba šitišago go bonagatša letago la Modimo. (Genesi 1:27; Baroma 3:23) Se se re thuša go kwešiša lebaka leo ka lona histori ya batho e tletšego ka ditiro tša kgobošo. Ka ge Sathane e le “modimo wa tshepedišo ye ya dilo,” o phatlaladitše moya wo “lebakeng la xe motho à sa buša motho xore a mo senyê.” (2 Bakorinthe 4:4; Mmoledi 8:9; 1 Johane 5:19) Na se se ra gore seriti sa kgonthe sa batho ke gona ge se ile?

Jehofa o Nea Dibopiwa tša Gagwe Seriti

Nagana gape ka boemo bja tšhemong ya Edene pele ga ge Adama le Efa ba dira sebe. Ba be ba e-na le dijo tše dintši le mošomo o kgotsofatšago gomme ba e-na le tebelelo ya bophelo bjo bo sa felego bja go hloka malwetši bakeng sa bona gotee le bana ba bona. (Genesi 1:28) Karolo e nngwe le e nngwe ya bophelo bja bona e be e bonagatša morero wa Modimo ka batho wo o nago le lerato le seriti.

Na pono ya Jehofa ka seriti sa batho e ile ya fetoga ge Adama le Efa ba dira sebe? Aowa. O ile a ba naganela ka baka la ge ba be ba lewa ke dihlong ka gobane ba be ba sa apara. Modimo ka lerato o ba “diretše diaparô ka matlalô,” legatong la matlakala a mogo ao ba bego ba a logile gore ba itirele ditšwaro. (Genesi 3:7, 21) Go e na le gore Modimo a ba tlogele ba lewa ke dihlong, o ile a ba swara ka seriti.

Ka moragonyana, ge Jehofa a be a dirišana le setšhaba sa Isiraele o ile a bontšha go kwela ditšhiwana, bahlologadi le badiiledi bohloko—batho bao gantši ba lebanago le kgobošo setšhabeng. (Psalme 72:13) Ka mohlala, Baisiraele ba ile ba botšwa gore ge ba buna mabele, mehlware le merara, ba se ke ba boela go yo budutša. Go e na le moo, Modimo o ba laetše gore mabudutša ‘a tšewe ke moeng goba tšhiwana goba mosadi wa mohlologadi.’ (Doiteronomio 24:19-21) Ge melao ye e be e latelwa, e be e fediša lebaka la go kgopela gomme e nea gaešita le bahloki mešomo yeo e nago le seriti.

Jesu o be a Swara ba Bangwe ka Seriti

Ge a be a le lefaseng, Morwa wa Modimo e lego Jesu Kriste, o ile a bontšha gore o thabela go swara ba bangwe ka seriti. Ka mohlala, ge a be a le Galilea, o ile a batamelwa ke monna yo a bego a e-na le lephera leo le bego le pherile kudu. Go ya ka Molao wa Moše, e le go phema gore molephera a se fetetše ba bangwe, o be a swanetše go goeletša a re: “Dithšila! Dithšila!” (Lefitiko 13:45) Lega go le bjalo, ge monna yo a be a  batamela o ile a se ke a goeletša e le gore a lemoše Jesu. Go e na le moo, o ile a khunama gomme a lopa Jesu a re: “Morena, ge feela o rata, o ka ntlhwekiša.” (Luka 5:12) Jesu o ile a arabela bjang? Jesu ga se a ka a omanya monna yo, go se mo šetše goba go mo hlokomologa ka ge a tshetše Molao. Go e na le moo, o ile a mo swara ka seriti ka go mo kgwatha gomme a re: “Ke a rata. Hlweka.”—Luka 5:13.

Mabakeng a mangwe, Jesu o ile a bontšha gore o kgona go fodiša batho ntle le go ba kgwatha—ka dinako tše dingwe a le kgole. Lega go le bjalo, mo lebakeng le o ile a kgetha go kgwatha monna yo. (Mateo 15:21-28; Mareka 10:51, 52; Luka 7:1-10) Ka ge monna yo a be a “tletše lephera,” ga go na pelaelo gore o be a feditše nywaga e mentši a sa kopane le batho. Go swanetše go ba go ile gwa mo homotša gakaakang go kgwathwa ke motho yo mongwe gape! Selo feela seo monna yo a bego a se holofetše e be e le go fodišwa lephera. Lega go le bjalo, mokgwa wo Jesu a mo fodišitšego ka ona o ile wa thuša go godiša le selo se sengwe gape—seriti sa monna yo. Na go a kwagala go dumela gore go tshwenyega ka seriti sa ba bangwe ka tsela yeo go ka kgonega molokong wa batho ba lehono? Ge e ba go le bjalo, se ka bontšhwa bjang?

Molao o Neago Seriti

Jesu o ile a bolela seo ba bantši ba se tšeago e le taelo e tumilego kudu yeo e ilego ya newa mabapi le ditirišano tša batho, e rego: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mateo 7:12) Molao wo wa Gauta, ka ge gantši o bitšwa bjalo, o tutueletša motho yo mongwe le yo mongwe go hlompha ba bangwe, ka kholofelo ya gore le yena o tla hlompšha.

Bjalo ka ge histori e bontšha, go diriša molao wo ga go itlele feela—gantši lenyatšo ke lona le itlelago fela. Monna yo re ka mmitšago Harold o bolela gore: “Ge e le gabotse ke be ke thabela go  goboša batho ba bangwe. Ka mantšu a mmalwa feela ke be ke ba tlogela ba ferekane, ba lewa ke dihlong e bile ka dinako tše dingwe ba lla.” Eupša go ile gwa direga selo se sengwe seo se dirilego gore Harold a fetoše tsela yeo a bego a swara batho ba bangwe ka yona. O re: “Dihlatse tša Jehofa tše mmalwa di ile tša thoma go nketela. Ke hlabja ke dihlong ge ke gopola dilo tšeo ke bego ke di bolela le kamoo ka dinako tše dingwe ke bego ke di swara ka gona. Eupša ga se tša ka tša lahlela toulo gomme ganyenyane-ganyenyane ditherešo tša Beibele di ile tša nwelela pelong ya-ka gomme tša ntutueletša go fetoga.” Lehono, Harold o hlankela e le mogolo ka phuthegong ya Bokriste.

Phihlelo ya Harold ke bohlatse bja gore, “lentšu la Modimo le a phela e bile ke le matla gomme le bogale go feta tšhoša le ge e le efe ya magale a mabedi, le gona le phuleletša gaešita le go arola moya le seo motho a lego sona ka gare le malokololo le moko, gomme le kgona go lemoga dikgopolo le maikemišetšo a pelo.” (Baheberu 4:12) Lentšu la Modimo le na le matla a go tutuetša pelo ya motho le go fetoša dikgopolo tša gagwe le boitshwaro. Wo ke motheo wa bohlokwa wa go swara batho ba bangwe ka seriti—go rata go thuša ba bangwe ka pelo ka moka go e na le go ba kweša bohloko, go ba godiša go e na le go ba goboša.—Ditiro 20:35; Baroma 12:10.

Go Tsosološwa ga Seriti sa Kgonthe

Dihlatse tša Jehofa di tutuetšwa ke kganyogo e swanago go boledišana le ba bangwe ka kholofelo e kgahlišago ya Beibele. (Ditiro 5:42) Ga go na tsela e kaone ya go bontšha go hlompha le go godiša batho ba bangwe go feta go boledišana le bona ka “ditaba tše dibotse tša mabapi le selo se sekaone.” (Jesaya 52:7, NW) “Selo se sekaone” se akaretša go apara “motho yo mofsa,” yo a tlago go fediša “kganyogo e gobatšago” ya go goboša batho ba bangwe. (Bakolose 3:5-10) Se akaretša gape le morero wa Jehofa wa gore kgaufsinyane a fediše maemo le mekgwa yeo e tšeelago batho seriti, gotee le mothomi wa tšona e lego Sathane Diabolo. (Daniele 2:44; Mateo 6:9, 10; Kutollo 20:1, 2, 10) Ke feela ka nako yeo, ge lefase lohle le tla be le “tseba Morêna,” moo batho ba tlago go ba le seriti.—Jesaya 11:9.

Re go laletša gore o ithute ka kholofelo ye yeo e kgahlišago. Ka go itlwaelanya le Dihlatse tša Jehofa, o tla bona ka noši gore go diriša molao wa motheo wa Beibele go godiša seriti sa ba bangwe. Le gona o tla kgona go ithuta kamoo Mmušo wa Modimo kgaufsinyane o tlago go tliša ‘lefase le lefsa le le kaone-kaone,’ lefase leo go lona batho ba tlago go newa ‘seriti sa ka mo go sa felego’ seo se ka se kego sa gobošwa gape.

[Lepokisi/Seswantšho go letlakala 6]

Go Dula ba Botega go Šireleditše Seriti sa Bona

Nakong ya Ntwa ya II ya Lefase, Dihlatse tša Jehofa tšeo di fetago 2 000 di ile tša romelwa dikampeng tša tshwenyo tša Nazi ka baka la tumelo ya tšona. A lemogile tsela e makatšago yeo di ilego tša bontšha potego ya tšona, Gemma La Guardia Gluck yo a kilego a golegwa kua Ravensbrück, o hlalosa ka pukung ya gagwe ya My Story gore: “Ka nako e nngwe ma-Gestapo a ile a bolela gore Morutwana wa Beibele yo a ka dirago tsebišo ka lengwalo a ba a le saena ya gore ga e sa le wa bodumedi bjoo, o tla newa tokologo gomme a ka se sa tlaišwa.” Ge a ngwala mabapi le bao ba ilego ba gana go saena lengwalo leo, o itše: “Ba ile ba kgetha go tšwela pele ba tlaišega le go leta letšatši la tokologo ka go se fele pelo.” Ke ka baka la’ng ba ile ba dira phetho yeo? Magdalena, yo ga bjale a lego nywageng ya gagwe ya bo-80, yo go boletšwego ka yena mathomong a sehlogo se se fetilego, o hlalosa gore: “Go dula re botegela Jehofa go be go le bohlokwa go feta go dira maiteko a gore re dule re phela. Go dula re e-na le seriti go be go bolela gore re dule re botega.” *

[Mongwalo wa ka tlase]

[Seswantšho go letlakala 5]

Jesu o be a godiša bao a bego a ba fodiša

[Seswantšho go letlakala 7]

Dihlatse tša Jehofa di godiša ba bangwe ka go boledišana le bona ka “ditaba tše dibotse tša mabapi le selo se sekaone”