Go Swarwa ga Batho ka Seriti—Tshwanelo yeo Gantši e Gatakelwago

“Selo se sengwe le se sengwe ka bophelo bja ka kampeng e be e le mogato o dirago gore ba gobošwe le go nyatšwa.”—MAGDALENA KUSSEROW REUTER, YO A ILEGO A TLAIŠWA KAMPENG YA TSHWENYO YA NAZI.

GAEŠITA le ge di be di tšhoša ka mokgwa woo, ditlaišo tše sehlogo tšeo di bego di dirwa ka dikampeng tša tshwenyo tša Nazi nakong ya Ntwa ya II ya Lefase e be e se mathomo goba mafelelo a go tšeelwa ga batho seriti. Go sa šetšwe gore re hlahloba mehla e fetilego goba ya bjale, bohlatse bo molaleng bja gore “batho ke kgale ba phela ka tlase ga maemo a go gobošwa le go nyatšwa.”

Lega go le bjalo, go tšeelwa ga batho seriti ga go dirwe ka ditiro tše sehlogo tšeo di šilafaditšego histori ya batho. Gantši go dirwa ka ditsela tše dintši tšeo di sa bonagalego gabonolo. Nagana ka ngwana yo a kwerwago ka baka la tsela yeo a bopegilego ka yona. Goba, mofaladi yo a kwerwago ka baka la metlwae ya gagwe e itšego yeo go thwego ga se ya tlwaelwa. Goba motho yo a kgethollwago ka baka la mmala wa gagwe goba morafo. Bao ba dirago dilo tše ba ka nagana gore ke metlae, eupša bohloko le nyenyefatšo tšeo di bakwago ke go gobošwa ga se selo sa go segiša.—Diema 26:18, 19.

Seriti sa Motho ke Eng?

Pukuntšu e nngwe e hlalosa seriti e le, ‘seka goba boemo bja go swanelega, go godišwa goba go tšeelwa godimo.’ Ka gona, seriti sa batho se akaretša kamoo re itebelelago ka gona le kamoo ba bangwe ba dirišanago le rena ka gona. Le ge go e-na le mabaka a mantši ao a ka kgomago kamoo  re itebelelago ka gona, tsela yeo ba bangwe ba re swarago goba ba re lebelelago ka yona e phetha karolo e kgolo semelong sa rena le kamoo re itebelelago ka gona bophelong bja letšatši le letšatši.

Setšhaba se sengwe le se sengwe se na le badiidi, batho ba sa šireletšegago le ba hlaselegago gabonolo. Lega go le bjalo, go ba boemong bjo bjalo ga go nape go tšeela motho seriti. Tsela yeo ba bangwe ba re lebelelago ka yona le yeo ba re swarago ka yona di ka dira gore motho a ikwe a se na seriti. Therešo e nyamišago ke gore batho bao ba lego maemong a tlasana ke bona bao gantši ba kwešwago bohloko goba ba nyenyefatšwago. Gantši ge batho ba tlaiša batšofadi, badiidi, digole goba bao ba sego ba itekanela monaganong, re kwa ba bolela mantšu a swanago le a rego, “ga o na mohola,” “o nagana gore o mang” le “segoboga”!

Ke ka baka la’ng batho ba gobošana? Na tshwanelo ya motheo ya gore batho ba newe seriti e tla ka ya phethagatšwa? Sehlogo se se latelago se tla nea karabo e kgotsofatšago e tšwago Lentšung la Modimo e lego Beibele.