Hlalefa—O Boife Modimo!

“Mathômô a bohlale ké xo boifa Morêna.”—DIEMA 9:10.

1. Ke ka baka la’ng ba bantši ba hwetša go le thata go kwešiša taba ya go boifa Modimo?

GO KILE gwa ba le nako yeo ka yona batho ba bego ba thaba ge ba hlaloswa e le bao ba boifago Modimo. Lehono batho ba bantši ba lebelela kgopolo ya go boifa Modimo e le yeo e šiilwego ke nako e bile go le thata go e kwešiša. Ba ka botšiša gore, ‘Ge e ba Modimo e le lerato, ke ka baka la’ng ke swanetše go mmoifa?’ Go ya ka bona, poifo ke maikwelo a sa rategego le ao a nolago moko. Lega go le bjalo, go boifa Modimo e le ka kgonthe ke taba e nabilego kudu, gomme bjalo ka ge re tla bona, ga se feela tsela yeo motho a ikwago ka yona.

2, 3. Go boifa Modimo e le ka kgonthe go akaretša’ng?

² Ge go dirišwa ka Beibeleng, go boifa Modimo ke seka se se kgahlišago. (Jesaya 11:3) Ke go hlompha Modimo ka mo go tseneletšego, e lego kganyogo e matla ya go se nyake go mo kgopiša. (Psalme 115:11) Go akaretša go amogela le go kgomarela kgaufsi-ufsi ditekanyetšo tša Modimo tša boitshwaro le kganyogo ya go phela ka go dumelelana le ditekanyetšo tša Modimo tša mabapi le se se nepagetšego goba se se fošagetšego. Puku e nngwe ya ditšhupetšo e re poifo e bjalo e swanetšego e bolela “tsela ya motheo yeo motho a lebelelago Modimo ka yona le yeo e dirago gore motho a itshware ka bohlale gomme a pheme mehuta ka moka ya bobe.” Lentšu la Modimo le re botša ka mo go swanetšego gore: “Mathômô a bohlale ké xo boifa Morêna.”—Diema 9:10.

³ Ka kgonthe, go boifa Modimo go akaretša dikarolo tše dintši tša bophelo bja motho. Ga go tswalane feela le bohlale, eupša go tswalana gape le lethabo, khutšo, katlego, go phela nako e telele, kholofelo, go botega le go ikholofela. (Psalme 2:11; Diema 1:7; 10:27; 14:26; 22:4; 23:17, 18; Ditiro 9:31) Go tswalana kgaufsi kudu le tumelo le lerato. Ge e le gabotse, go akaretša dilo ka moka tšeo di sepedišanago le tswalano ya rena le Modimo le batho. (Doiteronomio 10:12; Jobo 6:14; Baheberu 11:7) Go boifa Modimo go akaretša kgodišego e tseneletšego ya gore Tatago rena wa legodimong o re rata re le motho ka o tee ka o tee le gore o dula a ikemišeditše go re lebalela diphošo tša rena. (Psalme 130:4) Ke feela batho ba kgopo ba sa itsholego bao ba nago le lebaka la go boifa go batamela kgaufsi le Modimo. *—Baheberu 10:26-31.

Go Ithuta go Boifa Jehofa

4. Ke’ng seo se ka re thušago go ‘ithuta go boifa Jehofa’?

⁴ Ka ge go boifa Modimo go le bohlokwa bakeng sa gore re dire diphetho tše bohlale le go šegofatšwa ke Modimo, ‘re ka ithuta bjang go boifa Jehofa’ ka mo go swanetšego? (Doiteronomio 17:19) Mehlala e mentši ya banna le basadi bao ba boifago Modimo e ngwadilwe ka Mangwalong bakeng sa “go re ruta.” (Baroma 15:4) E le gore re kwešiše seo ge e le gabotse go boifa Modimo go se bolelago, anke re ahla-ahleng o mongwe wa mehlala yeo, e lego Kgoši Dafida wa Isiraeleng ya bogologolo.

5. Go diša go ile gwa thuša Dafida bjang gore a ithute go boifa Jehofa?

⁵ Jehofa o ile a lahla kgoši ya pele ya Isiraele, e lego Saulo, ka baka la go boifa ga gagwe batho e sego Modimo. (1 Samuele 15:24-26) Ka lehlakoreng le lengwe, bophelo bja Dafida le tswalano ya gagwe ya kgaufsi le Jehofa di mo hlaola e le monna yoo a boifago Modimo e le ka kgonthe. Go tloga e sa le mofsa, Dafida o be a e-hlwa nageng a dišitše dinku tša tatagwe. (1 Samuele 16:11) Mašego ao a a feditšego a le madišong a lebeletše dinaledi a swanetše go ba a ile a thuša Dafida go kwešiša go boifa Jehofa. Gaešita le ge Dafida a be a kwešiša karolwana feela ya bogolo bja legohle, o ile a fihlelela phetho e nepagetšego—Modimo o swanelwa ke tlhompho ya rena le kgodišo. Ka morago o ile a ngwala gore: “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé, O di beilexo, Ke re motho ké eng, xe O bile  O sa mo lebale? Ngwana wa motho ké eng, xe O bile O mo êla hlôkô?”—Psalme 8:3, 4.

6. Go kwešiša bogolo bja Jehofa go ile gwa dira gore Dafida a ikwe bjang?

⁶ Ka mo go swanetšego, Dafida o ile a kgomega kudu ge a bapiša bonyenyane bja gagwe le legodimo leo le tletšego dinaledi. Go e na le gore tsebo ye e mo tšhoše, e ile ya mo tutueletša go tumiša Jehofa gomme a re: “Maxodimo a re anêxêla boxolo bya Modimo; medirô ya ’atla tša xaxwe e rêtwa ke leratadima.” (Psalme 19:1) Go hlompha Modimo ka tsela ye go ile gwa dira gore Dafida a batamelane kgaufsi kudu le Jehofa gomme gwa mo dira gore a nyake go ithuta le go latela ditsela tša Gagwe tše di phethagetšego. Akanya kamoo Dafida a ilego a ikwa ka gona ge a opelela Jehofa gore: “E moxolo ké Wêna Modira-matete; Modimo ké Wêna Ò nnoši. Morêna, nthutê tsela ya xaxo, ke sepelê kè Xo botexetše; pelo ya-ka O e tlêmaxanyê le xo boifa leina la xaxo.”—Psalme 86:10, 11.

7. Go boifa Modimo go ile gwa thuša Dafida bjang gore a lwe le Goliata?

⁷ Ge Bafilisita ba be ba hlasela naga ya Isiraele, nkgwete ya bona ya botelele bja dimithara tše ka bago tše tharo e lego Goliata, e ile ya nyatša Baisiraele gomme ge e le gabotse ya re: ‘Kgethang monna gore a lwe le nna re lebane! Ge a ka mphenya, gona re tla le hlankela.’ (1 Samuele 17:4-10) Saulo le madira a gagwe ka moka ba be ba tšhogile—eupša e sego Dafida. O be a tseba gore ke Jehofa feela yoo a swanetšego go boifša, e sego motho le ge e le ofe, go sa šetšwe gore ke yo matla gakaakang. Dafida o ile a botša Goliata gore: “Ke tlile fá ka ’ina la Morêna wa Mašaba. . . . Lešaba lé ka moka le tlo lemoxa xobane Morêna xa’ thuše ka thšoša le ka lerumô. Thlabanô yé ké ya Morêna.” Ka seraga-mabje sa gagwe le lefsika le tee—gotee le ka thušo ya Jehofa—Dafida o ile a fenya senatla se.—1 Samuele 17:45-47.

8. Mehlala ya Beibele ya batho bao ba boifago Modimo e re ruta’ng?

⁸ Re ka no ba re lebeletšane le mapheko goba manaba a boifišago go etša ao Dafida a bego a lebeletšane le ona. Re swanetše go dira’ng? Re ka lebeletšana le wona ka tsela e swanago le yeo Dafida gotee le bahlanka ba bangwe ba botegago ba bogologolo ba ilego ba lebeletšana le wona ka yona—ka go boifa Modimo. Go boifa Modimo go ka fenya go boifa batho. Mohlanka wa Modimo yo a botegago e lego Nehemia, o ile a phegelela Baisiraele-gotee le yena bao ba bego ba gateletšwe ke manaba gore: “Le se kê la boifa manaba ao; Le išeng mexopolô xo Morêna e lexo e moxolo e a thšabêxaxo.” (Nehemia 4:14) Dafida, Nehemia gotee le bahlanka ba bangwe ba botegago ba Modimo ba ile ba kgona go phetha dikabelo tša bona tšeo ba di neilwego ke Modimo ka baka la thekgo ya Jehofa. Le rena re ka kgona, ge e ba re boifa Modimo.

Go Boifa Modimo ge re Lebeletšane le Mathata

9. Dafida o ile a bontšha gore o boifa Modimo ka tlase ga maemo afe?

⁹ Ka morago ga ge Dafida a bolaile Goliata, Jehofa o ile a dira gore a fenye dintwa tše dintši. Lega go le bjalo, Saulo yo a nago le lehufa o ile a leka go bolaya Dafida—mathomong e le ka baka la go tšeega maikwelong, ke moka a diriša bofora gomme mafelelong a diriša madira. Gaešita le ge Jehofa a ile a kgonthišetša Dafida gore e tla ba kgoši, ka nywaga e mentši Dafida o ile a swanelwa ke go tšhaba, go lwa le go letela nako ya Jehofa ya go mo dira kgoši. Maemong a ka moka, Dafida o ile a bontšha gore o boifa Modimo wa therešo.—1 Samuele 18:9, 11, 17; 24:2.

10. Dafida o ile a bontšha bjang gore o boifa Modimo ge a be a lebeletšane le kotsi?

¹⁰ Ka nako e nngwe, Dafida o ile a tšhabela go Akise, e lego kgoši ya motse wa Bafilisita wa Gathe moo Goliata a bego a e-tšwa gona. (1 Samuele 21:10-15) Bahlanka ba kgoši ba ile ba latofatša Dafida ka gore ke lenaba la setšhaba sa gabo bona. Dafida o ile a arabela bjang boemong bjoo bjo kotsi? O ile a tšhollela pelo ya gagwe go Jehofa ka thapelo. (Psalme 56:1-4, 11-13) Gaešita le ge a ile a swanela ke go itira segafsi e le gore a phologe, Dafida o be a tseba gore ke Jehofa yoo ge e le gabotse a mo phološitšego ka go šegofatša maiteko a gagwe. Go ithekga ga Dafida ka mo go feletšego ka Jehofa le go mmota go bontšhitše gore Dafida o boifa Modimo e le ka kgonthe.—Psalme 34:4-6, 9-11.

11. Re ka bontšha bjang gore re boifa Modimo ge re lebeletšane le teko go etša Dafida?

¹¹ Bjalo ka Dafida, re ka bontšha gore re boifa Modimo ka go bota kholofetšo ya gagwe ya gore o tla re thuša go lebeletšana le mathata a rena. Dafida o itše: “Xafêla Morêna ditsela tša xaxo, O mmôtê; Yêna ó tlo dira.” (Psalme 37:5) Se ga se bolele  gore re fo nea Jehofa mathata a rena gomme ra letela gore a re rarollele wona ntle le gore re dire se sengwe ka wona. Dafida ga se a ka a rapela Modimo gomme a fetša gona fao. O ile a diriša matla le bohlale bjoo Jehofa a mo neilego bjona gomme a rarolla bothata bja gagwe. Lega go le bjalo, Dafida o be a tseba gore maiteko a batho a ka se atlege ge e le ona feela. Go swanetše go be bjalo le ka rena. Re swanetše go tlogela dilo ka moka diatleng tša Jehofa ge re šetše re dirile sohle seo se lego matleng a rena. Ge e le gabotse, gantši ga go selo seo re ka se dirago ge e se go ithekga ka Jehofa. Mo ke moo go nyakegago gore re bontšhe gore re boifa Modimo. Re ka homotšwa ke mantšu a Dafida a tšwago pelong a rego: “Morêna ó kwana le ba ba mmoifaxo.”—Psalme 25:14.

12. Ke ka baka la’ng re swanetše go tšeela dithapelo tša rena godimo kudu, gona ke boemo bofe bja kgopolo bjoo re sa swanelago go ba le bjona?

¹² Ka gona re swanetše go tšeela godimo kudu dithapelo tša rena le tswalano ya rena le Modimo. Ge re batamela Jehofa, re swanetše “go dumela gore o gona le gore e ba moputsi wa bao ba mo tsomago ka phišego.” (Baheberu 11:6; Jakobo 1:5-8) Ke moka ge a re thuša, re swanetše go ‘ipontšha re le ba lebogago,’ go etša ge moapostola Paulo a re eleditše. (Bakolose 3:15, 17) Ga se ra swanela go ba bjalo ka bao ba hlalositšwego ke Mokriste yo a tloditšwego yo a nago le phihlelo yo a itšego: “Ba tšea Modimo bjalo ka mohlanka wa bona wa legodimong. Ge go na le selo seo ba se nyakago, ba nyaka gore Modimo a ba nee sona ka ponyo ya leihlo. Ke moka ge ba se hweditše, ba nyaka gore Modimo a kgaogane le bona.” Boemo bjo bjalo bja kgopolo bo bontšha gore motho ga a boife Modimo.

Ge go Boifa Modimo go Fokotšega

13. Ke neng moo Dafida a ilego a palelwa ke go hlompha Molao wa Modimo?

¹³ Go thušwa ke Jehofa nakong ya ge a e-na le mathata go ile gwa dira gore Dafida a boife Modimo ka mo go tseneletšego gomme gwa dira gore a mmote kudu. (Psalme 31:22-24) Lega go le bjalo, ka makga a mararo a tsebegago, go boifa ga Dafida Modimo go ile gwa fokotšega, e lego seo se ilego sa tliša ditla-morago tše bohloko. Tiragalo ya pele e be e le mabapi le go rulaganya ga gagwe gore areka ya kgwerano ya Jehofa e tlišwe Jerusalema ka karikana go e na le gore e rwalwe ke Balefi, go etša ge Molao wa Modimo o laetše. Ge Usa yoo a bego a eteletše karikana yeo pele a be a swara Areka e le gore a e thekge, o ile a hwa le semeetseng ka baka la “bošaedi” bja gagwe. Ke therešo gore Usa o dirile sebe se segolo, lega go le bjalo mafelelong e bile go palelwa ga Dafida ke  go hlompha Molao wa Modimo ka mo go swanetšego mo go bakilego ditla-morago tšeo tše bohloko. Go boifa Modimo go bolela go dira dilo go ya ka thulaganyo ya gagwe.—2 Samuele 6:2-9; Numeri 4:15; 7:9.

14. Go bala ga Dafida Baisiraele go bile le mafelelo afe?

¹⁴ Ka morago, a tutueditšwe ke Sathane, Dafida o ile a bala madira a Isiraele. (1 Koronika 21:1) Ka go dira bjalo Dafida o ile a bontšha gore go boifa ga gagwe Modimo go fokotšegile, e lego seo se ilego sa feleletša ka go hwa ga Baisiraele ba 70 000. Gaešita le ge Dafida a ile a itshola go Jehofa, yena gotee le bao a bego a e-na le bona ba ile ba kwa bohloko kudu.—2 Samuele 24:1-16.

15. Ke’ng seo se dirilego gore Dafida a wele sebeng sa dikopano tša botona le botshadi?

¹⁵ Go se boife Modimo ka lebakanyana ka nako e nngwe go ile gwa dira gore Dafida a wele boitshwarong bjo bobe le Batseba mosadi wa Uria. Dafida o be a tseba gore bohlotlolo goba go kganyoga molekane wa yo mongwe ke phošo. (Ekisodo 20:14, 17) Bothata bo thomile ge Dafida a bona Batseba a hlapa. Go boifa Modimo ka mo go swanetšego go be go swanetše go tutueletša Dafida gore a tloše mahlo a gagwe moo gomme a nagane ka selo se sengwe. Go e na le moo, go bonala Dafida a ile a ‘tšwela pele a mo lebeletše’ go fihlela dikganyogo tša gagwe di fenya go boifa ga gagwe Modimo. (Mateo 5:28; 2 Samuele 11:1-4) Dafida o ile a lebala karolo yeo Jehofa a e kgathago bophelong bja gagwe.—Psalme 139:1-7.

16. Dafida o bile le ditla-morago dife ka baka la bobe bja gagwe?

¹⁶ Dafida le Batseba ba ile ba ba le morwa ka baka la boitshwaro bja bona bjo bo gobogilego. Kapejana ka morago ga moo, Jehofa o ile a romela moporofeta wa gagwe e lego Nathane gore a yo pepentšha sebe sa Dafida. A hlaphogetšwe, Dafida o ile a tsošološa go boifa ga gagwe Modimo gomme a itshola. O ile a lopa Jehofa gore a se ke a mo lahla goba a mo amoga moya wa Gagwe o mokgethwa. (Psalme 51:7, 11) Jehofa o ile a lebalela Dafida gomme a fokotša kahlolo ya gagwe, eupša ga se A ka a šireletša Dafida go ditla-morago ka moka tša  boitshwaro bja gagwe. Morwa wa Dafida o ile a hwa gomme go tloga ka nako yeo go ya pele, lapa la Dafida le ile la welwa ke masetlapelo. Ruri e bile mafelelo a bohloko a go felelwa ke poifo ya go boifa Modimo!—2 Samuele 12:10-14; 13:10-14; 15:14.

17. Bontšha manyami ao a tlišwago ke boitshwaro bjo bobe.

¹⁷ Lehono, go palelwa ke go boifa Modimo ditabeng tša boitshwaro go ka ba le ditla-morago tše bohloko le tša nako e telele ka mo go swanago. Nagana ka bohloko bjo mosadi yo mongwe yo mofsa a ilego a bo kwa ge a se na go kwa gore monna wa gagwe wa Mokriste ga se a mmotegela ge a be a šoma moše-wa-mawatle. A tšhošitšwe ke se e bile a nyamile, o ile a khupetša sefahlego sa gagwe ka diatla gomme a lla. Go tla mo tšea nako e kaaka’ng gore a buše a bote monna wa gagwe gomme a mo hlomphe? Ditla-morago tše bjalo tše bohloko di ka phengwa ka gore re boife Modimo e le ka kgonthe.—1 Bakorinthe 6:18.

Go Boifa Modimo go re Phemiša Sebe

18. Pakane ya Sathane ke efe gomme o diriša mokgwa ofe?

¹⁸ Sathane o gare o phuhlamiša ditekanyetšo tša lefase tša boitshwaro ka lebelo le legolo, gomme ka mo go kgethegilego o nyaka go senya Bakriste ba therešo. E le gore a fihlelele seo, o senya dipelo tša rena le megopolo ya rena ka go lebanya—a diriša dikwi tša rena, kudu-kudu mahlo le ditsebe tša rena. (Baefeso 4:17-19) O tla dira’ng ge e ba o ka kopana le diswantšho tše di gobogilego, mantšu a gobogilego goba batho bao ba gobogilego o se wa ikemišetša?

19. Go boifa Modimo go thušitše bjang Mokriste yo mongwe go fenya teko?

¹⁹ Ela hloko phihlelo ya André, * e lego mogolo wa Mokriste, tate e bile e le ngaka kua Yuropa. Ge André a be a le mošomong bošego ka moka sepetlele, kgafetša-kgafetša bašomi-gotee le yena ba basadi ba ile ba kgomaretša mangwalwana—ao a bego a kgabišitšwe ka go thalwa diswantšho tša dipelo—mosamelong wa gagwe gomme ba mo laletša gore a be le dikopano tša botona le botshadi le bona. André o ile a gana go naganišiša ka dikgoketšo tša bona a tiišitše. Go oketša moo, e le gore a tloge boemong bjoo bjo kotsi, o ile a hwetša mošomo lefelong le lengwe. Go boifa Modimo go ile gwa ipontšha e le tsela ya bohlale gomme go ile gwa tliša ditšhegofatšo, ka gobane lehono André o hlankela ka nakwana ofising ya lekala ya Dihlatse tša Jehofa nageng ya gabo.

20, 21. (a) Go boifa Modimo go ka re phemiša bjang go dira sebe? (b) Ke’ng seo se tlago go ahla-ahlwa sehlogong se se latelago?

²⁰ Ge motho a dula a nagana ka dilo tše di fošagetšego, seo se ka dira gore a be le boemo bja kgopolo bjoo go bjona a ikemišetšago go lahla tswalano ya gagwe e bohlokwa le Jehofa e le gore a hwetše selo seo a se nago tshwanelo ya go ba le sona. (Jakobo 1:14, 15) Ka lehlakoreng le lengwe, ge e ba re boifa Jehofa, re tla dulela kgole—gaešita le go sepelela kgole—le batho, mafelo, mediro le boithabišo bjoo bo ka dirago gore re phuhlamiše boitshwaro bja rena. (Diema 22:3) Dihlong le ge e le dife goba selo le ge e le sefe seo re ka swanelwago ke go se gafa ga se selo ge se bapišwa le go se amogelwe ke Modimo. (Mateo 5:29, 30) Ge e le gabotse, go boifa Modimo go akaretša go se ipee ka boomo kotsing ya selo le ge e le sefe seo se gobogilego, go akaretša le diswantšho tše di kgothaletšago bootswa tša mohuta le ge e le ofe eupša go bolela go ‘lahliša mahlo a rena go bogela tša lefeela.’ Ge e ba re dira bjalo, re ka holofela gore Jehofa o tla ‘re phediša’ gomme a re nea dilo tšohle tšeo re di nyakago.—Psalme 84:11; 119:37.

²¹ Ruri go itshwara ka tsela ya go boifa Modimo e le ka kgonthe ke tsela ya bohlale. Le gona ke mothopo wa lethabo la kgonthe. (Psalme 34:9) Se se tla hlaloswa gabotse sehlogong se se latelago.

[Mengwalo ya ka tlase]

Na o ka Hlalosa?

• Go boifa Modimo go akaretša dika dife tša Bokriste?

• Go boifa Modimo go feta go boifa batho bjang?

• Re ka bontšha bjang gore re na le pono e swanetšego ka thapelo?

• Go boifa Modimo go ka re phemiša bjang go dira sebe?

[Dipotšišo tša Thuto]

[Seswantšho go letlakala 23]

Dafida o ile a ithuta go boifa Modimo ge a be a lebeletše tlholo ya Jehofa

[Diswantšho go letlakala 24]

O tla dira’ng ge o ka kopana le teko o sa letela?