Phihlelo

Lapa la Rena le Kopane Mafelelong!

KA GE GO ANEGA SUMIKO HIRANO

Ke be ke hweditše tsela e kaone kudu ya bophelo gomme ke be ke nyaka gore monna wa-ka a be gotee le nna. Go fetile nywaga e 42 pele seo se ka direga.

KE NYALANE le monna wa-ka ka 1951, ge ke be ke e-na le nywaga e 21. Ka nywaga e mene, re bile le barwa ba babedi gomme bophelo bja-ka bo be bo bonagala bo šegofaditšwe kudu.

Ka letšatši le lengwe ka 1957, mogolo’a-ka o ile a mpotša gore o be a etelwa ke moromiwa wa Dihlatse tša Jehofa. Gaešita le ge e be e le Mobuddha, mogolo’a-ka o ile a thoma go ithuta Beibele le moromiwa yoo gomme a nkgothaletša gore le nna ke ithute. Ke ile ka dumela. Ke be ke tsena kereke ya Protestanta gomme ke be ke nagana gore nka kgona go swaya Dihlatse tša Jehofa diphošo.

Kapejana ke ile ka lemoga gore ke be ke sa tsebe Beibele gakaalo. Ke ile ka swanelwa ke go botšiša moromiwa gore, “Jehofa ke mang?” Ke be ke se ka ka ke e-kwa leina leo le dirišwa ka kerekeng yeo ke bego ke e tsena. Moromiwa yo e lego Daphne Cooke (yoo ka morago e bilego wa ga Pettitt), o mpuletše Jesaya 42:8, yeo e bontšhago gabotse gore Jehofa ke leina la Modimo yo Matla ohle. Daphne o arabile dipotšišo tša-ka ka moka a diriša Beibele.

Ke ile ka botšiša moruti wa-ka dipotšišo tšona tšeo. O ile a mpotša gore: “Go botšiša dipotšišo ke sebe. Dumela feela seo o se kwago.” Gaešita le ge ke be ke sa nagane gore go botšiša dipotšišo ke sebe, ke be ke e-ya kerekeng mesong ya Sontaga se sengwe le se sengwe dikgweding tše tshela e bile ke e-ya dibokeng tša Dihlatse tša Jehofa thapama.

 Kamoo Lenyalo La-ka le Ilego la Kgongwa ka Gona

Seo ke bego ke ithuta sona go tšwa Beibeleng se be se nkgahla gomme ke be ke se botša monna wa-ka e lego Kazuhiko. Ka morago ga thuto le seboka se sengwe le se sengwe, ke be ke mmotša seo ke bego ke ithutile sona. Se se be se baka gore go se be le khutšo magareng ga rena. O be a sa nyake gore ke be yo mongwe wa Dihlatse tša Jehofa. Lega go le bjalo, go ithuta Beibele go be go kgotsofatša kudu moo ke ilego ka tšwela pele ke ithuta gotee le go kopanela le Dihlatse.

Ka matšatši a diboka, ke be ke apeela Kazuhiko dijo tše a di ratago pele ke e-ya dibokeng eupša o ile a thoma go ya go ja lebenkeleng la go jela. Ge ke boa gae ka morago ga diboka, ke be ke mo hwetša a galefile e bile a gana go mpolediša. Ka morago ga matšatši a mabedi goba a mararo, o be a e-ba kaone eupša o be a galefa gape ge e e-ba nako ya diboka.

Ka yona nako ye, ke ile ka swarwa ke bolwetši bja mafahla, e lego bolwetši bjoo bo bego bo šetše bo bolaile ba mmalwa ka lapeng labo monna wa-ka. Kazuhiko o be a tshwenyegile kudu gomme a mpotša gore ge ke okobala, nka dira sohle seo ke se ratago. Ke ile ka fo mo kgopela gore a se ke a nkganetša go ya dibokeng bekeng e nngwe le e nngwe. O ile a dumela.

Go ntšere dikgwedi tše tshela gore ke fole gomme ka nako yeo ke be ke ithuta Beibele ka mo go tseneletšego. Ke ile ka tsoma diphošo dithutong tša Dihlatse, ke nagana gore ke tla tlogela go ithuta ge nka hwetša e tee feela. Ga se ka ka ka hwetša le e tee. Go e na le moo, diphošo tša Kereke ya Protestanta di ile tša ba molaleng. Ke ile ka thoma go lemoga lerato la Jehofa le toka ya gagwe gape ka bona le mohola wa go phela ka go dumelelana le melao ya gagwe.

Ge ke fodile, monna wa-ka o ile a phethagatša kholofetšo ya gagwe gomme a se ke a nkganetša go ya dibokeng. Ke ile ka tšwela pele ke gola moyeng gomme ka May 1958, ka kolobetšwa bjalo ka yo mongwe wa Dihlatse tša Jehofa. Ke be ke duma gore lapa la-ka le ka ba gotee le nna go rapeleng Modimo wa therešo.

Go Thuša Bana Ba-ka Moyeng

Barwa ba-ka ba be ba dula ba e-na le nna dibokeng le modirong wa boboledi, eupša dilo tše dingwe tšeo di bego di direga di ile tša mpontšha gore ba be ba gola tsebong ya Beibele. Ka letšatši le lengwe Masahiko, morwa wa-ka wa nywaga e tshelelago, o be a ipapalela ka ntle. Ke ile ka kwa lešata le legolo gotee le motho a goelela. Moagišani o ile a iphošetša ka ngwakong wa-ka, a goeletša a re morwa wa-ka o thutšwe ke koloi. Na o be a hwile? Ke ile ka ikgapeletša go iša maswafo fase ge ke be ke kitimela ka ntle. Ge ke bona paesekela ya gagwe e potagane ke ile ka tšhoga, eupša ke ile ka bona a e-tla go nna, a gobetše ganyenyane feela. Ge a be a nkgokarela, o itše: “Mma, Jehofa o nthušitše, a ke re?” Ge ke mmona a sa phela le go kwa mantšu ao a mabotse ke ile ka thoma go lla.

Ka letšatši le lengwe re le bodireding, re ile ra kopana le mokgalabje yoo a ilego a omanya ka gore: “O re’ng o duletše go goga-goga ngwana yo monyenyane ka mokgwa wo? Ke mo kwela bohloko.” Pele nka fetola, Tomoyoshi wa nywaga e seswai o ile a re: “Rakgolo, mma ga a nkgapeletše go dira boboledi. Ke dira boboledi ka gobane ke  nyaka go hlankela Jehofa.” Mokgalabje o ile a fo re lebelela gomme a ikhomolela.

Barwa ba-ka e be e le ditšhiwana moyeng. Ke be ke swanelwa ke go ba ruta ditherešo tša Beibele mola e le gore le nna ke be ke swanetše go ithuta. Ke ile ka ithuta go ba le lerato, tumelo gotee le phišego gomme ka leka go bea mohlala o mobotse. Ke be ke leboga Jehofa letšatši le letšatši ke e-na le bana ba-ka. Ke ile ka ba botša diphihlelo tša-ka tša modirong wa boboledi. Se se ile sa ba kgothatša. Ge ka morago ba botšišwa gore ke ka baka la eng ba e-ba babulamadibogo, goba badiredi ba nako e tletšego ba Dihlatse tša Jehofa, ba ile ba araba ka gore: “Re bone gore mma o be a thabile ge a bula madibogo gomme le rena re be re nyaka go thaba bjalo ka yena.”

Ke ile ka katanela go se bolele gampe ka tatago bona goba ka motho le ge e le ofe ka phuthegong. Ke ile ka lemoga gore dipolelo tše sa lokago di be di ka gobatša bana ba-ka. Ba be ba ka se nyatše feela yoo go bolelwago ka yena eupša ba be ba tla nyatša le yoo a bolelago.

Go Fenya Mathata ao a Thibelago Tšwelopele

Ka 1963 mošomo wa monna wa-ka o ile wa dira gore lapa la rena le hudugele Taiwan. O ile a mpotša gore ge nka dira boboledi go batho ba Majapane, ke be ke tla baka mathata. Re be re ka gomišetšwa Japane gomme seo se be se tla bakela khamphani ya gagwe mathata. O be a nyaka go re aroganya le Dihlatse.

Dihlatse di ile tša re amogela ka borutho kua Taiwan, moo diboka ka moka di bego di swarwa ka se-China. Ke ile ka kgetha go ithuta se-China e le gore ke tle ke kgone go dira boboledi bathong ba fao, go e na le go bo dira go Majapane. Ka mokgwa woo, ke be ke tla phema mathata ao monna wa-ka a bego a boletše ka ona.

Go gwerana ga rena le Dihlatse tša kua Taiwan go ile gwa re matlafatša. Banyalani ba bangwe ba baromiwa, e lego Harvey le Kathy Logan, ba ile ba re thuša kudu. Ngwanabo Rena Logan o ile a ba tatago bašemanyana ba-ka wa moya. O ile a ba bontšha gore go hlankela Jehofa ga se tsela e sa thabišego le e thata ya bophelo. Ke kgolwa gore barwa ba-ka ba dirile phetho ya go hlankela Jehofa ge re be re le Taiwan.

Tomoyoshi le Masahiko ba tsene sekolo sa Maamerika, e lego moo ba ilego ba ithuta Seisemane gotee le se-China. Thuto yeo e ile ya ba hlamela bodiredi bja nakong e tlago bjalo ka badiredi ba Modimo wa therešo e lego Jehofa. Ke leboga Jehofa bakeng sa go dira gore nako yeo e ka bego e bile e thata go rena e be nako ya ditšhegofatšo tša nako e telele. Ka morago ga nywaga e meraro le seripa e sa lebalegego re le Taiwan, lapa la rena le ile la boela Japane.

Ka nako ye, bašemane ba be ba le mahlalagading gomme ba be ba nyaka go itaola. Ke feditše nako e telele ke boledišana le bona ka melao ya motheo ya Mangwalo gomme Jehofa o ile a ba thuša nakong yeo e thata. Ge a fetša sekolong se se phagamego, Tomoyoshi o ile a thoma go bula madibogo. O kgonne go thuša batho ba  bane go ineela le go kolobetšwa nywageng ya gagwe e mmalwa ya mathomo e le mmulamadibogo. Masahiko o ile a latela mohlala wa mogolo’agwe gomme a thoma go bula madibogo gatee-tee ge a se na go fetša sekolong se se phagamego. O ile a thuša bafsa ba bane go ba Dihlatse nywageng ya gagwe e mene ya mathomo e le mmulamadibogo.

Ke moka Jehofa o ile a thuša bana ba-ka ka mo go oketšegilego. Tomoyoshi o ile a ithuta le monna wa mosadi yoo ke mo thušitšego go ithuta ditherešo tša Beibele. Barwedi ba bona ba babedi le bona ba ile ba ba Dihlatse. Ka morago, Tomoyoshi o ile a nyala ngwanenyana yo mogolo, e lego Nobuko gomme Masahiko a nyala moratho, e lego Masako. Gona bjale Tomoyoshi le Nobuko ba hlankela ntlong-kgolo ya Dihlatse tša Jehofa kua Brooklyn, New York. Gomme Masahiko le Masako ke baromiwa kua Paraguay.

Diphetogo tše Dinyenyane Monneng Wa-ka

Monna wa-ka o be a bonagala a sa re selo ka tumelo ya rena nywageng yeo eupša re ile ra bona maswao a gore o a fetoga. Ge batho ba nkganetša, o be a emelela ditumelo tša-ka gomme ge e le gabotse o be a thekga ditherešo tša Beibele a sa lemoge. O be a thuša Dihlatse tšeo di bego di hlaka ka dilo tše di bonagalago. Lenyalong la yo mongwe wa barwa ba rena o ile a bolela ka mantšu a sego kae gore: “Go ruta batho tsela e nepagetšego ya bophelo ke mošomo o mokaone-kaone woo o lego gona, gomme ke wo mothata kudu. Barwa ba-ka le basadi ba bona ba kgethile tsela ye e thata kudu gore e be tsela ya bona ya bophelo. Ba thušeng hle.” Tše ka moka di ile tša ntira gore ke nagane ka kgodišego gore ruri o be a tla hlankela Jehofa gotee le rena.

Ke ile ka rulaganya gore Dihlatse-gotee le nna di tle legaeng la rena e le gore a ka gwerana le tšona. Ke laleditše Kazuhiko go tla dibokeng tša Bokriste le dikopanong gotee le Segopotšong sa lehu la Kriste. O be a e-tla ge mošomo wa gagwe o be o mo dumelela, gaešita le ge a be a sa rate. Gantši ke be ke bona eka a ka amogela thuto ya Beibele, ka gona ke be ke laletša bagolo ba Bakriste gore ba tle legaeng la rena. Eupša o ile a gana go ithuta. Ke ile ka ipotšiša gore bothata e be e le eng.

Ke ile ka gopola mantšu a moapostola Petro a rego: “Lena basadi ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.” (1 Petro 3:1, 2) Ke ile ka lemoga gore ke be ke sa diriše keletšo yeo ka mehla. E le gore ke dire ka go dumelelana le yona ka botlalo, ke ile ka swanelwa ke go dira tšwelopele ya moya.

Ka 1970, ke ile ka thoma go bula madibogo ka morero wa go ba motho wa moya ka mo go oketšegilego. Go ile gwa feta nywaga e 10, ke moka gwa feta e 20. Lega go le bjalo, ga se ka ka ka bona phetogo le ge e le efe ya moya monneng wa-ka. Morutwana yo mongwe wa Beibele o ile a ba a re: “Go swanetše go ba go le thata go thuša batho ba bangwe mola o sa kgone go thuša monna wa gago.” Seo se be se nyamiša eupša ga se ka ka ka felelwa ke matla.

Mafelelong a bo-1980, batswadi ba rena ba be ba tšofetše kudu. Go ba hlokomela le go phetha mediro e mengwe ya-ka go be go tloga go lapiša e bile go gateletša. Ka moka ga bona ba ile ba ganetša tumelo ya-ka go Jehofa ka nywaga e mentši, eupša ke ile ka leka ka mo nka kgonago go ba bontšha lerato. Pele a e-hwa, mma yo a bego a e-na le nywaga e 96 o mpoditše gore, “Sumiko, ge nka tsoga bahung, ke tla ba wa bodumedi bja gago.” Ke ile ka lemoga gore maiteko a-ka e be e se a lefeela.

Monna wa-ka o ile a lemoga sohle seo ke se diretšego batswadi ba rena. Go bontšha tebogo ya gagwe, o ile a thoma go ya dibokeng ka mehla. O ile a dira bjalo ka nywaga e mentši eupša ka ntle le tšwelopele ya kgonthe ya moya. Ke ile ka tšwela pele ke leka go mo kgahliša. Ke ile ka laletša bagwera ba gagwe dijong gaešita le bašomi-gotee le yena ba tšwago dinageng dišele lapeng la rena. Ke ile ka ithabiša le yena. Ge diiri tša babulamadibogo di be di fokoletšwa go tše 70 ka kgwedi, ke ile ka fetša nako e oketšegilego ke e-na le yena.

Go Tlogela Mošomo go Tliša Diphetogo

Monna wa-ka o ile a tlogela mošomo ka 1993. Ke ile ka nagana gore bjale o tla ba le nako ya go  ithuta Beibele mafelelong. Eupša o ile a re go no hlankela Modimo ka gobane a na le nako ya go dira bjalo e tla ba lenyatšo. Go e na le moo, o boletše gore o tla hlankela Modimo ge pelo ya gagwe e mo tutueletša go dira bjalo le gore ga se ka swanela go mo gapeletša.

Ka letšatši le lengwe Kazuhiko o ile a mpotšiša gore na gona bjale nka mo phelela bophelo bja-ka ka moka. Se se ile sa nnyamiša ka gobane e be e le kgale ke mo direla sohle seo nka se kgonago ga e sa le go tloga ge re nyalana. Ke katane ka matla go mo thabiša, eupša o be a bona eka ke be ke phelela Jehofa kudu go feta yena. Ka morago ga go nagana ka taba ye ka lebakanyana, ke ile ka mmotša gore nka se sa hlwa ke sa kgona go dira go feta ka mo ke dirago. Eupša ge a ka kopanela le nna modirong wa-ka, re be re tla thoma bophelo bjo bofsa bjo bo kgahlišago bjo bo swarelelago, e sego nywaga e sego kae feela eupša ka mo go sa felego. Matšatši a ile a feta monna wa-ka a sa nkarabe. Mafelelong o ile a mpotšiša gore, “Na o tla ithuta Beibele le nna?” Ke thaba kudu ge ke nagana ka mantšu ao ka mehla.

Ke ile ka thoma ka go rulaganya gore mogolo wa Mokriste a tle a ithute le monna wa-ka eupša o ile a mpotša gore: “Ga ke nyake go ithuta le motho yo mongwe eupša ke nyaka go ithuta le wena.” Ka gona re ile ra thoma go ithuta Beibele letšatši le letšatši. Ka ge ke le phuthegong ya se-China gomme monna wa-ka a bolela leleme leo ka thelelo, re ile ra swara thuto ka se-China. Re ile ra ba ra bala Beibele ka moka re le gotee ka nako ya ka tlase ga ngwaga.

Ka nako ye, mogolo yo mongwe ka phuthegong ya se-China gotee le mosadi wa gagwe, ba ile ba thoma go re kgahlegela bjalo ka banyalani. Gaešita le ge ba be ba fetwa ke bana ba rena, ba ile ba ba bagwera ba rena ba paale. Dihlatse tše dingwe tše dintši le tšona di ile tša kgahlegela monna wa-ka ka mo go kgethegilego. Di ile tša re amogela gotee le go bolela le Kazuhiko tše nkego ke tatago tšona. Seo se ile sa mo thabiša kudu.

Ka letšatši le lengwe re ile ra hwetša taletšo ya go tla lenyalong phuthegong, gomme e be e rometšwe monna wa-ka. Go dira gore a lemogwe gore ke hlogo ya lapa go ile gwa mo kgoma kudu, gomme o ile a dira phetho ya go ya monyanyeng woo. Kapejana o ile a thoma go ba le bogwera go Dihlatse gomme a thoma go ithuta Beibele le mogolo wa Mokriste. Thuto ya gagwe ya Beibele, go ya ga gagwe dibokeng le go rata ga gagwe phuthego go ile gwa mo thuša go gola gabotse moyeng.

Lapa Leo le Kopanego Mafelelong

Ka December 2000, monna wa-ka o ile a kolobetšwa e le go bontšha go ineela ga gagwe go Jehofa. Barwa ba-ka le basadi ba bona ba ile ba tla ba e-tšwa kgole go tlo bona “mohlolo” wo wa mehleng yeno. Go tšere nywaga e 42, eupša mafelelong re lapa leo le kopanego.

Gona bjale mesong e mengwe le e mengwe, bobedi bja rena re hlahloba temana ya letšatši le go bala Beibele re le gotee. Re thabela dipoledišano tša moya ka mehla gotee le go swarega ka mediro ya moya. Gona bjale monna wa-ka ke mohlanka wa bodiredi ka phuthegong gomme ga se kgale a file polelo ya phatlalatša e theilwego Beibeleng ka se-China. Ke leboga Jehofa bakeng sa go re kopanya. Ke lebeletše pele go phagamišeng leina la gagwe le bogoši bja gagwe ka mo go sa felego ke e-na le bao ba lego kgaufsi le nna ka moka le bao ke ba ratago.

[Mmapa go letlakala 13]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

CHINA

DEMOCRATIC PEOPLE’S REPUBLIC OF KOREA

REPABLIKI YA KOREA

Lewatle la Japane

JAPANE

Tokyo

Lewatle la China Bohlabela

TAIWAN

Taipei

[Seswantšho go letlakala 12]

Ke e-na le lapa la-ka ka 1958, e lego ngwaga woo ke kolobeditšwego ka wona

[Diswantšho go letlakala 13]

Re be re matlafatšwa moyeng ke bagwera ba bjalo ka Harvey le Kathy Logan ge re be re huduga Tokyo go ya Taipei

[Seswantšho go letlakala 15]

Lapa la-ka le kopane borapeding bja therešo lehono