Ba Boleta ba tla ja Bohwa bja Lefase

“Ke nagana gore tlhago e tla fetošwa le go tsošološwa. . . . E sego gosasa eupša nywageng e mentši go tloga bjale, ge go tla be go e-na le legodimo le lefsa le lefase le lefsa.”—Jean Marie Pelt, setsebi sa tša tikologo sa Mofora.

KA GE batho ba gateletšwa ke maemo a tikologo le a tša leago mo lefaseng, ba bantši ba rata go bona polanete ya rena e fetošwa paradeise. Lega go le bjalo, kganyogo ye ga se feela toro ya lekgolong la bo-21 la nywaga. Nywageng e mentši e fetilego, Beibele e ile ya holofetša gore Paradeise e tla tsošološwa lefaseng. Dipolelo tša Jesu tše di rego “ba moya o boleta . . . ba tla ja bohwa bja lefase” le “thato ya gago a e direge le mo lefaseng bjalo ka ge e direga legodimong,” ke tše dingwe tša ditemana tša go tsebega tša Mangwalo. (Mateo 5:5; 6:10) Lega go le bjalo, ba bantši lehono ga ba dumele gore go tla ba le lefase la paradeise leo le tla dulwago ke ba boleta. Go ba bantši bao ba ipolelago gore ke Bakriste, Paradeise ke selo seo se ka se kego sa kgonega.

Ge makasine wa Fora wa beke le beke wa La Vie o hlalosa kamoo go dumela go paradeise—e ka ba ya lefaseng goba ya legodimong—go tlogetšwego ka gona bonyenyane ka Kerekeng ya Katholika, o re: “Ka morago ga ge e bile thuto ya ka mehla ya baruti ba Katholika bonyenyane ka nywaga-kgolo e 19, [kgopolo ya] paradeise e ile ya timelela dithutong tša kereke, ditherong tša ka Sontaga, dithutong tša thuta-tumelo le ka diklaseng tša katikasema.” Go bolelwa gore lentšu “paradeise” le bipilwe ke “kgodi e ntši” ya “sephiri le kgakanego.” Baruti ba bangwe ba le phema ka boomo ka baka la gore le “rwele dikgopolo tše dintši mabapi le lethabo la lefaseng.”

Eupša go Frédéric Lenoir, e lego setsebi sa tša leago seo se šomago ka mo go kgethegilego ka tša bodumedi, dipolelo tša paradeise di fetogile “diswantšho tša boikgopolelo.” Ka mo go swanago, Jean Delumeau e lego radihistori e bile e le mongwadi wa dipuku tše mmalwa mabapi le taba ye, o nagana gore dikholofetšo tša Beibele di ka se ke tša phethagatšwa ka tsela ya kgonthe. O ngwala gore: “Potšišong, ‘go sa na le mašaledi afe a Paradeise?’ Bodumedi bja Bokriste bo tšwela pele bo araba ka gore: Re leboga go tsošwa ga Mophološi, ka letšatši le lengwe re tla swarana ka diatla gomme ra bona ge seo re se holofetšego se phethega.”

Na molaetša wa paradeise ya lefaseng o sa dutše o kwagala? Ge e le gabotse ke’ng seo bokamoso bo se swaretšego polanete ya rena? Na pono ya rena ka bokamoso e ya phadima, goba e ya fsifala? Sehlogo se se latelago se tla araba dipotšišo tše.

 [Mothopo wa Seswantšho go letlakala 2]

COVER: Emma Lee/Life File/Getty Images