“E Direge le mo Lefaseng Bjalo ka ge e Direga Legodimong”

“Bodumedi bja Katholika bo hlaola Dilo tša Mafelelo tše Nne, e le: Lehu, Kahlolo, Hele le Legodimo.”—Puku ya Catholicism yeo e beakantšwego ke George Brantl.

HLOKOMELA gore mo lelokelelong le la Dilo tša Mafelelo tše Nne, lefase ga le akaretšwe. Seo se tloga se sa makatše ka baka la gore Kereke ya Katholika, go swana le madumedi a mangwe a mmalwa, e kgomaretše kgopolo ya gore lefase ka letšatši le lengwe le tla fedišwa. Dictionnaire de Théologie Catholique e hlalosa se gabotse ka tlase ga sehlogo sa “Bofelo bja Lefase,” gore: “Kereke ya Katholika e dumela le go ruta gore lefase la bjale, ka ge le bopilwe ke Modimo e bile le le gona, le ka se be gona ka mo go sa felego.” Le katikasema ya morago bjale ya Katholika e tšweletša kgopolo ye ge e re: “Lefase la rena . . . le tla feleletša le timeletše.” Eupša ge e ba lefase la rena le tla timelela, gona go thwe’ng ka kholofetšo ya Beibele ya lefase la paradeise?

Beibele e bolela ka mo go kwagalago ka paradeise ye e tlago go ba gona lefaseng. Ka mohlala, moporofeta Jesaya o hlalositše lefase le  badudi ba lona ka tsela ye: “Nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.” (Jesaya 65:21, 22) Bajuda bao Modimo a dirilego dikholofetšo tše go bona ba be ba kgodišegile gore naga ya bona—ge e le gabotse, lefase ka moka—ka letšatši le lengwe le be le tla fetoga paradeise yeo e bego e tla hola batho ka mo go sa felego.

Psalme 37 e tiišetša kholofetšo ye. “Ba bolêta e tlo ba bôná beng ba naxa.” (Psalme 37:11) Temana ye ga e bolele feela ka go bušetšwa ga lebakanyana ga setšhaba sa Baisiraele Nageng ya Kholofetšo. Yona psalme ye e hlalosa ka go lebanya gore: “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) * Ela hloko gore psalme ye e re batho “ba bolêta” ba tla putswa ka bophelo bjo bo sa felego lefaseng la Paradeise. Ka Beibeleng ya Sefora, tlhaloso ya temana ye e bolela gore lentšu “bolêta” le “na le kgopolo e phatlaletšego go feta ka mo le kwalago ka diphetolelong tše dingwe; le akaretša bahloki, batho bao ba tlaišwago goba ba hlomarwago ka baka la Yahweh [Jehofa], ba dipelo tše di ikokobeletšago Modimo.”

Na e tla ba Lefaseng Goba Legodimong?

Thutong ya Thabeng, Jesu o ile a dira kholofetšo yeo e re gopotšago ka mangwalo ao a tsopotšwego ka mo godimo, e rego: “Go thaba ba moya o boleta, ka ge ba tla ja bohwa bja lefase.” (Mateo 5:5) Le gona, lefase e tla ba moputso wa sa ruri wa babotegi. Lega go le bjalo, Jesu o ile a dira gore baapostola ba gagwe ba kwešiše gore o be a ba lokišetša bodulo ka ‘Ntlong ya Tatagwe’ le gore ba be ba tla ba le yena legodimong. (Johane 14:1, 2; Luka 12:32; 1 Petro 1:3, 4) Ka gona, re swanetše go kwešiša bjang ditšhegofatšo tšeo di holofeditšwego tša lefaseng? Na di a kwagala lehono, le gona di šoma go bomang?

Baithuti ba Beibele ba go fapa-fapana ba bolela gore “lefase” leo Jesu a boletšego ka lona Thutong ya Thabeng le leo go bolelwago ka lona go Psalme 37 ke feela la seswantšhetšo. Ka pukung ya Bible de Glaire, F. Vigouroux o hlalosa gore o bona ditemana tše di “swantšhetša legodimo le Kereke.” Go ya ka monyakišiši wa Beibele wa Mofora e lego M. Lagrange, tšhegofatšo ye “ga se kholofetšo ya gore ba boleta ba tla rua lefase leo ba dulago go lona, e ka ba e le tshepedišong ye ya dilo goba ka tlase ga taolo e phethagetšego kudu, eupša ba tla rua lefelo leo e lego mmušo wa magodimo, go sa šetšwe moo o tla bago o le gona.” Go ya ka ba bangwe, ke “tshwantšhetšo ya go diriša dilo tša lefase go šupa tša legodimo.” Le gona go ya ka ba bangwe, “lefase la kholofetšo e lego Kanana, ke seswantšho sa dilo tša moya gomme le emela legae la legodimong, mmušo wa Modimo, leo le kgonthišeditšwego go dulwa ke ba boleta. Seo ke sona seo se hlaloswago ke seswantšho se go Psalme 37 le ditemaneng tše dingwe.” Eupša na re swanetše go akgofela go tloša lefase la kgonthe dikholofetšong tša Modimo?

Morero wa ka mo go sa Felego ka Lefase

Mathomong lefase le be le tswalantšwe ka go lebanya le morero wa Modimo wa mabapi le batho. Mopsalme o ngwadile gore: “Maxodimo ké maxodimo a Morêna; ’me lefase ó le neetše bana ba batho.” (Psalme 115:16) Ka gona, morero wa Modimo wa mathomong wa mabapi le batho o be o tswalanywa le lefase, e sego legodimo. Jehofa o neile banyalani ba pele taelo ya go katološa tšhemo ya Edene gore  e akaretše lefase ka moka. (Genesi 1:28) Morero wo e be e se wa lebakanyana. Jehofa o kgonthišetša ka Lentšung la gagwe gore lefase le tla ba gona ka mo go sa felego, o re: “Moloko xe o ile, xo tla o mongwê; lefase lôna le dula lè le xôna.”—Mmoledi 1:4; 1 Koronika 16:30; Jesaya 45:18.

Dikholofetšo tša Modimo ga di folotše, ka gobane ke Yo Godimo-dimo, le gona o kgonthišetša gore di a phethega. Ge e dira seswantšho ka modikologo o tlwaelegilego wa meetse go bontšha gore dikholofetšo tša Modimo di ka se ke tša folotša, Beibele e hlalosa gore: “Bo-ka pula le leswêla dì e-tšwa lexodimong, ’me di se hlwê di boêla xôna, ya ba tša xo nošetša lefase xore le hloxišê dibyalo, di melê, . . . le Lentšu la-ka [lentšu la Modimo] le le tšwaxo molomong wa-ka, le ka se boêle xo Nna lè le fêla; le tlo dira se nkxahlaxo, le tlo phêtha se ke le rometšexo sôna.” (Jesaya 55:10, 11) Modimo o holofetša batho dilo. Nako e itšego e ka feta pele ga ge dikholofetšo tšeo di ka phethagatšwa, eupša ga di folotše. Di ‘boela’ go yena di phethile seo a se boletšego.

Ka kgonthe Jehofa o ‘kgahlilwe’ ke go bopela batho lefase. Mafelelong a letšatši la botshelela la tlholo, o ile a bolela gore dilo tšohle ke “tše botse kudu.” (Genesi 1:31) Go fetošwa ga lefase gore e be paradeise ya ka mo go sa felego ke karolo ya morero wa Modimo woo ga bjale o sego wa phethwa. Lega go le bjalo, dikholofetšo tša Modimo ‘di ka se boele go yena di le fela.’ Dikholofetšo ka moka tša mabapi le bophelo bjo bo phethagetšego lefaseng, moo batho ba tlago go phela ka khutšo le polokego, di tla phethwa.—Psalme 135:6; Jesaya 46:10.

Morero wa Modimo o Phethwa Ntle le go Folotša

Sebe sa batswadi ba rena ba pele, Adama le Efa, se šitišitše ka lebakanyana morero wa Modimo wa mathomong wa go dira lefase paradeise. Ka morago ga go se kwe ga bona, ba ile ba rakwa tšhemong. Ka gona ba lahlegetšwe ke tokelo ya go tšea karolo go phetheng morero wa Modimo wa go dira gore lefase la paradeise le dulwe ke batho ba phethagetšego. Lega go le bjalo, Modimo o ile a dira dithulaganyo tša gore a kgone go phetha morero wa gagwe. Bjang?—Genesi 3:17-19, 23.

Boemo bja Edene bo be bo swana le bja monna yo a thomago go aga ntlo setsheng se sebotse kudu. Ge a thoma go thea motheo, go tšwelela motho yo mongwe yo a senyago motheo woo o šetšego o theilwe. Go e na le gore a tlogele mošomo wa gagwe wo a o rerilego, monna wa moagi o gata megato yeo e kgonthišetšago gore ntlo e a phethwa. Le ge mošomo wo o mongwe o nyaka ditefo tše di oketšegilego, ga go na pelaelo gore mošomo wo o thomilwego o tla phethwa ka mo go swanetšego.

Ka mo go swanago, Modimo o dirile ditokišetšo tša go kgonthišetša gore morero wa gagwe o a phethwa. Ka pela ka morago ga sebe sa batswadi ba rena ba pele, Modimo o ile a bolela ka kholofelo yeo ditlogolo tša bona di bego di tla ba le yona—“peu,” yeo e bego e tla lokiša tshenyo yeo e dirilwego. E le go phethagatša boporofeta bjo, karolo ya pele ya peu e itlhatsetše e le Morwa wa Modimo e lego Jesu, yo a ilego a tla lefaseng le go gafa bophelo bja gagwe e le topollo ya go lopolla batho. (Bagalatia 3:16; Mateo 20:28) Ge a tsošeditšwe legodimong, Jesu o be a tla ba Kgoši ya Mmušo. Sa pele, ke yena motho wa boleta yo a abelwago lefase gotee le babotegi bao ba hlaotšwego lefaseng bao ba tsošetšwago legodimong go buša gotee le yena Mmušong wo. (Psalme 2:6-9) Ge nako e dutše e-ya, mmušo wo o tla laola ditaba ka moka tša lefase e le gore o phethe morero wa Modimo wa mathomong le go fetoša lefase paradeise. Dimilione tše di sa balegego tša batho ba boleta di tla “ja bohwa bja lefase” ka kgopolo ya gore di holwa ke go buša ga Mmušo wo ka Jesu Kriste le babuši-gotee le yena.—Genesi 3:15; Daniele 2:44; Ditiro 2:32, 33; Kutollo 20:5, 6.

“E Direge le mo Lefaseng Bjalo ka ge e Direga Legodimong”

Pono yeo e bonwego ke moapostola Johane e hlaloswa e e-na le mafelelo a mabedi a go se  swane, a legodimong le a lefaseng. O bone dikgoši tšeo di kgethilwego go barutiwa ba Kriste ba go botega di dutše didulong tša legodimo. Beibele e bolela ka mo go kgethegilego mabapi le badirišani ba ba Kriste gore, “ba tla buša e le dikgoši godimo ga lefase.” (Kutollo 5:9, 10) Hlokomela dibopego tše pedi mabapi le go phethwa ga morero wa Modimo—lefase leo le tsošološitšwego ka tlase ga bolaodi bja Mmušo wa magodimo wo o bopšwago ke Jesu Kriste le baja-bohwa-gotee le yena. Ka go dumelelana le morero wa Modimo wa mathomong, dithulaganyo tše ka moka di tla dira gore tsošološo ya mafelelo ya Paradeise ya lefaseng e kgonege.

Thapelong ya gagwe ya mohlala, Jesu o ile a botša barutiwa ba gagwe gore ba rapelele gore thato ya Modimo e direge “le mo lefaseng bjalo ka ge e direga legodimong.” (Mateo 6:9, 10) Na mantšu a a be a ka kwagala ge e ba lefase le tla senywa goba le swantšhetša legodimo? Ka mo go swanago, na a be a tla kwagala ge e ba baloki ka moka ba rotogela legodimong? Thato ya Modimo ka lefase e kwagala gabotse ka Mangwalong, go tloga pegong ya tlholo go ba go fihla diponong tša puku ya Kutollo. Lefase le tla fetolwa seo Modimo a se rerilego—paradeise. Ye ke thato yeo Modimo a holofetšago go e phetha. Babotegi bao ba lego lefaseng ba rapelela gore thato yeo e phethege.

Mmopi, Modimo yo go yena go ‘se nago phetogo’ o rerile go tloga mathomong gore go be le bophelo bjo bo sa felego lefaseng. (Maleaki 3:6; Johane 17:3; Jakobo 1:17) Ka nywaga ya ka godimo ga e lekgolo, makasine wo wa Morokami, o be o dutše o hlalosa dibopego tše pedi tša mabapi le go phethwa ga morero wa Modimo. Se se re thuša go kwešiša dikholofetšo tšeo di lego ka Mangwalong tša mabapi le go tsošološwa ga lefase. Re go laletša gore o tšwele pele o hlahloba taba ye ka go boledišana le Dihlatse tša Jehofa goba ka go ikgokaganya le bagatiši ba makasine wo.

[Mongwalo wa ka tlase]

[Seswantšho go letlakala 4]

Beibele e bolela ka mo go kwagalago ka go thewa ga nakong e tlago ga Paradeise ya lefaseng

[Seswantšho go letlakala 7]

Na thapelo ya Jesu ya mohlala e be e tla ba e kwagalago ge e ba lefase le be le tla timelela?