Jobo—Monna wa Kgotlelelo le Potego
Jobo—Monna wa Kgotlelelo le Potego
“Jobo mohlanka wa-ka a O mo šeditše? Ka xobane lefaseng ka moka xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.”—JOBO 1:8.
1, 2. (a) Jobo o ile a lebeletšana le dikotsi dife tšeo a bego a sa di letela? (b) Hlalosa bophelo bja Jobo pele ga ge a ka lebeletšana le mathata a.
GO KILE gwa ba le monna yo a bego a bonagala a e-na le dilo tšohle—lehumo, maemo, a phetše gabotse mmeleng e bile a e-na le lapa le le thabilego. Ke moka go ile gwa direga dikotsi tše tharo ka go latelelana ka lebelo. Kapejana, o ile a lahlegelwa ke lehumo la gagwe. Ke moka, bana ba gagwe ka moka ba ile ba bolawa ke ledimo le le makatšago. Nakwana ka morago ga moo, o ile a swarwa ke bolwetši bjo bo fokodišago bjo bo ilego bja dira gore mmele wa gagwe ka moka o tlale dišo tše bohloko. Mohlomongwe o a lemoga gore monna yo go bolelwago ka yena mo ke Jobo, gomme go bolelwa ka yena ka pukung ya Beibele yeo e bitšwago ka leina la gagwe.—Jobo, dikgaolo 1 le 2.
2 O ile a lla ka gore: “A nkabe kè sa le wa kxwedi tšela tša mohlamonene.” (Jobo 3:3; 29:2) Ge re welwa ke manyami, ke mang yo a sa gopolego matšatši a kaone a fetilego? Ge e le Jobo, o be a phetše bophelo bjo bobotse, a bonagala a šireleditšwe dikotsing. Batho bao ba tumilego ba be ba mo hlompha e bile ba tsoma keletšo ya gagwe. (Jobo 29:5-11) O be a humile, eupša o be a e-na le pono e leka-lekanego ka tšhelete. (Jobo 31:24, 25, 28) O be a thuša ditšhiwana le bahlologadi. (Jobo 29:12-16) Le gona o ile a dula a botegela mosadi wa gagwe.—Jobo 31:1, 9, 11.
3. Jehofa o be a lebelela Jobo bjang?
3 Jobo o be a phela bophelo bjo bo se nago bosodi ka gobane o be a rapela Modimo. Jehofa o itše: “Lefaseng ka moka xa xo motho e a swanaxo le yêna ka bothakxa le xo loka, le ka xo boifa Modimo, le ka xo ila bobe.” (Jobo 1:1, 8) Eupša go sa šetšwe go botega ga Jobo ka mo go nepagetšego, mathata a ile a mo senyetša bophelo bja gagwe bjo bobotse. Dilo ka moka tšeo a ilego a šoma ka thata gore a be le tšona di ile tša timelela, gomme semelo sa gagwe se ile sa lekwa ke bohloko, tlalelo le kgakanego.
4. Ke ka baka la’ng e ka ba mo go holago go ela hloko teko ya Jobo?
4 Ke therešo gore Jobo ga se yena feela mohlanka wa Modimo yo a ilego a kwešwa bohloko ke mathata a gagwe. Bakriste ba bantši lehono ba bile le phihlelo e swanago le ya gagwe. Ka baka leo, ke mo go swanetšego go ahla-ahla dipotšišo tše tše pedi: Go gopola teko ya Jobo go ka re thuša bjang ge re lebeletšane le mathata? Le gona e ka re ruta bjang gore re be le kwelobohloko kudu go ba bangwe bao ba tlaišegago?
Kgang le Teko ya Potego
5. Go ya ka Sathane, ke ka baka la’ng Jobo a be a hlankela Modimo?
5 Boemo bja Jobo e be e le bjo bo sa tlwaelegago. Diabolo o be a belaela maikemišetšo a Jobo a go hlankela Modimo, mola Jobo ka boyena a be a sa tsebe ka se. Ge go be go swerwe seboka legodimong, Jehofa o ile a lebiša tlhokomelo dikeng tše dibotse tša Jobo, gomme Sathane a araba ka gore: “A xa se Wene O mo axeleditšexo ka lexora, yêna le ba lapá la xaxwe, le tšohle tše e lexo tša xaxwe thokô tše xo fêla?” Ka go rialo, Sathane o be a bolela gore Jobo o be a e-na le boithati—ka go rialo a bolela gore bahlanka ka moka ba Modimo ba bjalo. Sathane o boditše Jehofa gore: “Byale, O k’O lekê xo iša letsôxô O kxwathê tšohle tše e lexo tša xaxwe, O bônê xe a tlo Xo hlala pepeneneng.”—Jobo 1:8-11.
6. Sathane o ile a tsoša kgang efe ya bohlokwa?
6 Kgang ye e be e le ya bohlokwa. Sathane o ile a hlohla tsela yeo Jehofa a bego a buša ka yona. Na ruri go a kgonega gore Modimo a buše legohle ka lerato? Goba na ka mehla boithati bo tla fenya mafelelong go etša ge Sathane a boletše? Jehofa o ile a dumelela Diabolo gore a akaretše Jobo tekong ye, ka ge a be a holofela gore mohlanka wa Gagwe o a botega. Ka gona, Sathane ka boyena o ile a bakela Jobo mathata ka go latelana ka lebelo. Ge Sathane a be a palelwa maitekong a gagwe a mathomo, o ile a tlišetša Jobo bolwetši bjo bohloko. Diabolo o itše: “Letlalô le kxônwa ka letlalô. Motho tše a naxo natšô’ a ka di nthša tšohle xe a hlêkêlêla bophelô bya xaxwe.”—Jobo 2:4.
7. Ke ka ditsela dife bahlanka ba Modimo lehono ba welwago ke diteko tše di swanago le tša Jobo?
7 Gaešita le ge Bakriste ba bantši lehono ba sa tlaišege go swana le Jobo, ba tlelwa ke ditlaišego tša mehuta-huta. Ba bantši ba lebeletšana le tlaišo goba mathata a lapa. Mathata a tša boiphedišo goba go fokola mmeleng e ka ba mo go ferekanyago. Ba bangwe ba hwetše tumelo ya bona. Ke therešo gore ga se ra swanela go nagana gore Sathane o re bakela bothata bjo bongwe le bjo bongwe bjo re lebeletšanago le bjona. Ge e le gabotse, mathata a mangwe a ka ba a bakwa ke diphošo tša rena goba boemo bja leabela. (Bagalatia 6:7) Le gona ka moka ga rena re kgongwa ke mafokodi ao a bakwago ke botšofadi le dikotsi tša tlhago. Beibele e hlalosa gabotse gore mo nakong ye, Jehofa ga a šireletše bahlanka ba gagwe ka tsela ya mohlolo dikotsing tše.—Mmoledi 9:11.
8. Sathane a ka leka go diriša bjang tlaišo yeo re lebeletšanago le yona?
8 Lega go le bjalo, Sathane a ka diriša tlaišo yeo re ka lebeletšanago le yona gore a senye tumelo ya rena. Moapostola Paulo o boletše ka go tlaišwa ke “mootlwa nameng, morongwa wa Sathane,” yo a bego a dutše a mo ‘phasola.’ (2 Bakorinthe 12:7) Go sa šetšwe gore bjo e be e le bothata mmeleng, bjo bjalo ka go se bone gabotse goba selo se sengwe, Paulo o be a kwešiša gore Sathane a ka diriša bothata bjo le pherekano yeo bo e tlišago go mo amoga lethabo le potego. (Diema 24:10) Lehono, Sathane a ka dira gore ditho tša lapa, bao motho a tsenago le bona sekolo goba mebušo ya babuša-noši e tlaiše bahlanka ba Modimo ka tsela e itšego.
9. Ke ka baka la’ng re sa swanelwa go makatšwa kudu ke mathata goba tlaišo?
9 Re ka lebeletšana bjang le mathata a ka katlego? Ka go a lebelela e le sebaka sa go bontšha gore re rata Jehofa le gore go ikokobeletša ga rena bogoši bja gagwe ga se ga mankekišane. (Jakobo 1:2-4) Go sa šetšwe gore ke eng seo se re gateletšago, go kwešiša gore go bohlokwa go botegela Modimo go tla re thuša go dula re tiile moyeng. Moapostola Petro o ngwaletše Bakriste gore: “Baratiwa, le se ke la makatšwa ke phišo e lego gare ga lena, ye e le diragalelago gore le lekwe, bjalo ka ge eka le be le welwa ke selo se se sa tlwaelegago.” (1 Petro 4:12) Le gona, Paulo o hlalositše gore: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Sathane o sa dutše a belaela go botega ga Dihlatse tša Jehofa, go fo swana le ge a dirile bjalo go Jobo. Ge e le gabotse, Beibele e bontšha gore Sathane o okeditše ditlhaselo tša gagwe go batho ba Modimo mehleng ye ya bofelo.—Kutollo 12:9, 17.
Go Hloka Kwešišo le go Newa Keletšo e Fošagetšego
10. Jobo o ile a lebeletšana le bothata bofe?
10 Go na le bothata bjo Jobo a ilego a ba le bjona, bjo re sa nyakego go ba le bjona. O be a sa tsebe gore ke ka baka la eng a e-na le mathata a. Jobo ka phošo o ile a phetha ka gore, ka tsela e itšego “Morêna ó be a neile; Morêna ó tšere.” (Jobo 1:21) Mohlomongwe Sathane ka boomo o ile a leka go dira gore Jobo a nagane gore ke Modimo yo a mmakelago mathata.
11. Hlalosa kamoo Jobo a ilego a arabela ka gona mathateng a gagwe.
11 Jobo o ile a nyama kudu, gaešita le ge a ile a gana go roga Modimo go etša ge mosadi wa gagwe a be a mo kgothaletša go dira bjalo. (Jobo 2:9, 10) O itše: ‘Dilo di bonagala di sepelela ba kgopo gabotse go feta nna.’ (Jobo 21:7-9) A ka ba a ile a ipotšiša gore: ‘Ke ka baka la’ng Modimo a nkotla?’ Go kile gwa ba le dinako tšeo ka tšona a bego a fo nyaka go ikhwela. O goeleditše ka gore: “A mola O kabe O nkuta kwa bodula-bahu, boxale bya xaxo bya phôhla Ò sa mphihlile!”—Jobo 14:13.
12, 13. Dipolelo tša bagwera ba bararo ba Jobo di ile tša mo kgoma bjang?
12 Jobo o be a e-na le bagwera ba bararo bao ba ilego ba mo etela, bao ba bego ba bonala eka ba tlile go ‘mo hloboga le go mo homotša.’ (Jobo 2:11) Lega go le bjalo, ba ile ba ipontšha e le “bahomotši ba xo tena motho.” (Jobo 16:2) Jobo a ka ba a ile a holwa ke bagwera bao a bego a ka ba rolela mathata a gagwe, eupša bagwera ba ba bararo ba ile ba oketša kgakanego ya Jobo gomme ba oketša maikwelo a gagwe a go ferekana.—Jobo 19:2; 26:2.
13 Go a kwagala gore Jobo a ka ba a ile a ipotšiša gore: ‘Ke ka baka la’ng se se ntiragalela? Ke dirile’ng mo ke swanelwago ke tlaišo ye ka moka?’ Bagwera ba gagwe ba ile ba mo nea ditlhaloso tšeo di bego di aroša e le ruri. Ba be ba nagana gore Jobo o ipaketše tlaišego ka go dira sebe se segolo. Elifase o ile a botšiša gore: “Ó kae mo-lôba-à-se-na molato? . . . Tše nna ke di bonexo ši-di: Ba-lema-bošula, ba-byala-bokxôpo—ba buna tšôna-tšeo.”—Jobo 4:7, 8.
14. Ke ka baka la’ng re sa swanela go akgofela go tswalanya tlaišego le boitshwaro bjo bo sa swanelago?
14 Ke therešo gore go ka ba le mathata ge re bjala nameng go e na le go bjala moyeng. (Bagalatia 6:7, 8) Lega go le bjalo, tshepedišong ye, mathata a ka ba gona go sa šetšwe tsela yeo re itshwerego ka yona. Go feta moo, ga se gore bao ba se nago bosodi ga ba tlaišege. Jesu Kriste, “yo a sa šilafalago, yo a arogilego go badiradibe,” o ile a lebeletšana le lehu le bohloko koteng ya tlhokofatšo, gomme moapostola Jakobo o ile a hwa lehu la mohwela-tumelo. (Baheberu 7:26; Ditiro 12:1, 2) Go nea mabaka ka tsela e fošagetšego ga Elifase le bagwera ba gagwe ba babedi go ile gwa tutueletša Jobo go emelela botumo bja gagwe le go phegelela taba ya gore ga a na molato. Lega go le bjalo, dipolelo tša bona tša go ithatafiša hlogo tša gore tlaišego ya Jobo e be e le e swanetšego di ka ba di ile tša tutuetša tsela yeo ka yona a bego a lebelela toka ya Modimo.—Jobo 34:5; 35:2.
Go Hwetša Thušo ge re Tlaišega
15. Re tla thušwa ke kgopolo ya mohuta ofe gore re lebeletšane le tlaišo?
15 Na go na le selo seo re ithutago sona mo? Manyami, bolwetši goba tlaišo di ka bonagala e le tše di kgethollago. Go ka bonagala batho ba bantši ba sa be le bontši bja mathata a bjalo. (Psalme 73:3-12) Ka dinako tše dingwe, re ka swanelwa ke go ipotšiša dipotšišo tše tša motheo: ‘Na go rata Modimo go ntutueletša go mo hlankela go sa šetšwe seo se ka diregago? Na ke kganyoga gore Jehofa a “tsebe seo a kago fetola sona ge ba mo nyatša?”’ (Diema 27:11; Mateo 22:37) Ga se ra swanela go dumelela mantšu a se nago tlhaologanyo a re dira gore re belaele Tatago rena wa legodimong. Mokriste yo mongwe yo a botegago yo a ilego a babja o šoro ka nywaga e mentši o itše: “Ke a tseba gore selo le ge e le sefe seo Jehofa a se dumelelago, ke tla kgona go se kgotlelela. Ke a tseba gore o tla mpha matla ao a nyakegago. Ka mehla o be a dutše a dira bjalo.”
16. Lentšu la Modimo le thuša bjang bao ba lebeletšanego le mathata?
16 Ge e le mabapi le maano a Sathane, re kwešiša dilo tšeo Jobo a sa kago a di kwešiša. “Re tseba maano a gagwe,” goba maano-mabe. (2 Bakorinthe 2:11) Go feta moo, re na le mothopo o mogolo wo re ka hwetšago bohlale go ona. Ka Beibeleng, re hwetša dipego tša banna bao ba botegago le basadi bao ba ilego ba kgotlelela mehuta ka moka ya mathata. Moapostola Paulo, yo a tlaišegilego go feta Bakriste ba bantši, o ngwadile gore: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” (Baroma 15:4) Hlatse e nngwe ya kua Yuropa yeo e bego e golegilwe bakeng sa tumelo ya yona nakong ya ntwa ya bobedi ya lefase e ile ya kgetha go se fiwe dijo ka matšatši a mararo e le gore e newe Beibele. E re: “Seo e bile se putsago e le ruri. Go sa šetšwe go swarwa ke tlala nameng, ke ile ka hwetša dijo tša moya tšeo di thušitšego go matlafatša nna le ba bangwe ditekong tša rena dinakong tšeo tša mathata. Ke sa dutše ke e-na le Beibele yeo le lehono.”
17. Ke ditokišetšo dife tšeo Modimo a re neilego tšona tše di ka re thušago go kgotlelela?
17 Ka ntle le khomotšo ya Mangwalo, re na le dilo tše dintši tšeo di re thušago go ithuta Beibele tšeo di re neago tlhahlo e kwagalago ya gore re lebeletšane le mathata. Ge o hlahloba Watch Tower Publications Index, mohlomongwe o tla hwetša phihlelo ya Mokriste-gotee le rena yo a kilego a ba le teko e swanago le ya gago. (1 Petro 5:9) E bile e ka ba mo go thušago go ahla-ahla maemo a gago le bagolo bao ba nago le kwelobohloko goba Bakriste ba bangwe bao ba godilego ka tsebo. Sa bohlokwa kudu, ka thapelo, o ka ithekga ka thušo ya Jehofa le ya moya wa gagwe o mokgethwa. Paulo o ile a fenya bjang ge a be a ‘phasolwa’ ke Sathane? Ka go ithuta go ithekga ka matla a Modimo. (2 Bakorinthe 12:9, 10) O ngwadile gore: “Dilong tšohle ke na le matla ka baka la yo a mphago matla.”—Bafilipi 4:13.
18. Bakriste bao ba botegago ba ka nea bjang kgothatšo ya bohlokwa?
18 Ka gona, thušo e gona, le gona ga se wa swanela go dika-dika go e tsoma. Seema se re: “X’O nôlêxa môkô mohla wa tlalêlô, xôna matla ’axo xa se a selô.” (Diema 24:10) Go fo swana le ge mohlwa o ka wiša ntlo yeo e agilwego ka dikota, go nyama go ka fokodiša potego ya Mokriste. E le gore re pheme kotsi ye, Jehofa o re nea thekgo ka bahlanka ba Gagwe bao re hlankelago gotee le bona. Morongwa o tlile go Jesu gomme a mo matlafatša bošegong bjo a golegilwego ka bjona. (Luka 22:43) Ge a le leetong la go ya Roma e le mogolegwa, Paulo “o ile a leboga Modimo a tia matla” ge a be a kopana le bana babo rena Borekišetšong bja Apiase le Dintlong tše Tharo tša Baeng. (Ditiro 28:15) Hlatse e nngwe ya Mojeremane e sa dutše e gopola thušo yeo e e hweditšego ge e be e fihla kampeng ya tshwenyo ya Ravensbrück bjalo ka mofsa yo a lego boi wa mahlalagading. E gopola ka gore: “Mokriste-gotee le nna o ile a mpona gomme a nkamogela ka borutho. Kgaetšedi yo mongwe yo a botegago o ile a ntlhokomela gomme o ile a ba bjalo ka mma wa-ka wa moya.”
“Itlhatsele o Botega”
19. Jobo o thušitšwe ke’ng gore a fenye maiteko a Sathane?
19 Jehofa o hlalositše Jobo e le monna yo a bego a “tieletše bothakxa [“potego”, NW] bya xaxwe.” (Jobo 2:3) Go sa šetšwe maikwelo a go nyama le go se kwešiše gore ke ka baka la eng a tlaišega, Jobo ga se a ka a aroga tabeng ya bohlokwa ya go botega. Jobo ga se a ka a gana gore o ile a lebeletšana le dilo tše ka moka bophelong. O kgomaretše tabeng ya gore: “Ke tlo hwa kè sešo ka re: Ke molato.”—Jobo 27:5.
20. Ke ka baka la’ng kgotlelelo e le ya bohlokwa?
20 Boikemišetšo bjo bo swanago bo tla re thuša go dula re botega ka tlase ga maemo le ge e le afe—ge re lebeletšane le teko, kganetšo goba mathata. Jesu o boditše phuthego ya Simirina gore: “O se boife dilo tše o tla tlogago o tlaišwa ka tšona. Bona! Diabolo o tla dula a lahlela ba bangwe ba lena kgolegong e le gore le lekwe ka mo go feletšego le gore le be le tlaišego ka matšatši a lesome. Itlhatsele o botega gaešita le go iša lehung, gomme ke tla go nea mphapahlogo wa bophelo.”—Kutollo 2:10.
21, 22. Ge re lebeletšana le tlaišo, re ka homotšwa ke ge re tseba eng?
21 Tshepedišong ye yeo e bušwago ke Sathane, kgotlelelo ya rena le potego di tla lekwa. Lega go le bjalo, Jesu o re kgonthišetša gore ge re dutše re fagahletše bokamoso, ga re na lebaka la go boifa. Selo sa bohlokwa kudu ke gore re itlhatsele re botega. Paulo o itše: “Tlaišego [ke] ya nakwana,” mola “letago,” goba moputso wo Jehofa a re holofetšago wona e le wa “boima bjo bo fetišago kudu gomme ke [wa] ka mo go sa felego.” (2 Bakorinthe 4:17, 18) Gaešita le tlaišego ya Jobo e be e le ya nakwana ge e bapetšwa le nywaga e mentši kudu ya lethabo yeo a e thabetšego pele le ka morago ga teko ya gagwe.—Jobo 42:16.
22 Lega go le bjalo, go ka ba le dinako maphelong a rena mo diteko tša rena di ka bonagalago di sa fele e bile mohlomongwe re sa kgone go kgotlelela tlaišo. Sehlogong se se latelago, re tla ahla-ahla kamoo phihlelo ya Jobo e ka re rutago dithuto tše di oketšegilego mabapi le kgotlelelo. Le gona re tla bona ditsela tšeo ka tšona re ka matlafatšago ba bangwe bao ba lebeletšanago le mathata.
O tla Araba Bjang?
• Ke kgang efe ya bohlokwa yeo Sathane a ilego a e rotoša mabapi le potego ya Jobo?
• Ke ka baka la’ng mathata a sa swanela go re makatša kudu?
• Jehofa o re thuša bjang go kgotlelela?
[Dipotšišo tša Thuto]
[Diswantšho go letlakala 23]
Go dira nyakišišo, go boledišana le Bakriste bao ba godilego ka tsebo le go rapela ka seo se lego dipelong tša rena go ka re thuša go kgotlelela