Koketšego e Lapološago Sehlakahlakeng se Sebotse

GA GO pelaelo gore baeng ba Taiwan ba be ba kgahlwa ke dimela tše ditala tša molatšatšing tšeo di apareditšego sehlakahlaka. Botala bja go kgahliša bja dimela tša reise bo fetogela mmaleng wa gauta ge di butšwa nakong ya puno. Dithokgwa tše di bofaganego tša dihlare tše di phetšego gabotse di khupeditše dithaba. Go fapana le metse-toropo e tletšego batho, dimela tše tala ka mašemong le dithabeng di tloga di lapološa e le ruri. Goba gona, ke seo se ilego sa tutuetša motho yo a tšwago dinageng tša ka Bodikela yo a ilego a bona sehlakahlaka se gore a kgethe leina la Ilha Formosa, goba “Sehlakahlaka se Sebotse.”

Ee, Taiwan ke sehlakahlaka se sebotse eupša se senyenyane—sa botelele bja dikhilomithara tše 390 feela le bophara bja dikhilomithara tše 160. Naga e kgolo ya sehlakahlaka e khupeditšwe ke dithaba tše ditelele. Thaba ya Yü Shan (Thaba ya Morrison) e phagame go feta Thaba ya Fuji kua Japane goba Thaba ya Cook ya kua New Zealand. Go dikologa dithaba tša ka gare le go fihla lewatleng go na le melala ya lebopo ya go pitlagana, yeo e nyeumago ka badudi ba Taiwan ba palo ya ka godimo ga dimilione tše 22.

Koketšego ya Moswana-noši

Lega go le bjalo, go na le mohuta o mongwe wa koketšego yeo e bonalago ganyenyane-ganyenyane kua Taiwan—koketšego modirong wa moya. Se se bonagatšwa ke mafolofolo ao batho, ba banyenyane le ba bagolo, ba a bontšhago ge ba thoma go tseba Modimo wa therešo e lego Jehofa. Go tloga go kgahliša go bona palo e oketšegago ya bao ba šomago ka mafolofolo go thuša ba bangwe go ithuta ka Jehofa le morero wa gagwe.

Koketšego e tutuetša katološo. Ka December 1990, go ile gwa rekwa moago bakeng sa go oketša ofisi ya lekala ya Dihlatse tša Jehofa. Moago wa pele wo o bego o le Taipei, e be e le o monyenyane kudu bakeng sa go hlokomela mediro ya bagoeledi ba mmušo ba Taiwan bao ka nako yeo ba bego ba le 1 777. Ka morago ga gore baithapi ba bagolo le ba banyenyane ba Taiwan le ba tšwago dinageng tše dingwe ba šome  ka thata ka nywaga e mmalwa, meago e mefsa e mebotse yeo e lego Hsinwu e be e loketše go ka dirišwa ka August 1994. Ka nako yeo go be go e-na le bagoeledi ba 2 515 ba ditaba tše dibotse tše di hwetšwago ka Lentšung la Modimo e lego Beibele. Ga bjale ka morago ga nywaga e lesome, palo ye e oketšegile go feta gabedi, e hlatlogetše ka godimo ga 5 500 gomme ka kgwedi bao ba ka dirago kotara ya palo ye ba tšea karolo modirong wa ka mehla wa boebangedi. Bao ba lemogwago ka mo go kgethegilego ke masogana le makgarebe ao a swanago le “phoka” ya mahuba e lapološago.—Psalme 110:3.

Koketšego ya Bafsa Medirong ya Moya

Bagoeledi ba bantši ba ditaba tše dibotse e tloga e le ba bafsa. Ba bangwe ke barutwana ba mephato ya tlase. Ka mohlala, toropong e nngwe ya ka leboa la Taiwan, banyalani ba bangwe ba be ba laleditšwe go ba gona la mathomo Sekolong sa Bodiredi sa Pušo ya Modimo, moo Dihlatse tša Jehofa di ithutago kamoo di ka rutago ba bangwe ditherešo tša Beibele. Banyalani ba ba ile ba makatšwa ke go bona mošemane o monyenyane Weijun, a bala Beibele a le sethaleng ka bokgoni bjo bogolo, go feta batho ba bantši ba bagolo. Le gona sebokeng se sengwe seo ba ilego ba ya go sona, ba ile ba kgahlwa ke go bona bomapimpana ba nea dikarabo tše di nago le tlhaologanyo. Banyalani ba ba ile ba hlalosa kamoo bana ba ba banyenyane ba itshwarago gabotse ka gona ge ba le Holong ya Mmušo.

Ke ka baka la’ng bafsa mo nageng ye e tletšego ka Ma-Bhudda le Ma-Tao ba lebiša tlhokomelo gakaakaa thutong ya Beibele? Ke ka baka la gore batswadi ba bona ba Bakriste ba ile ba diriša melao ya motheo ya Beibele gomme ba agile bophelo bjo bo thabišago bja lapa bjo bo ithekgilego ka go ba le tswalano le Jehofa. Ka ge batswadi ba Weijun ba katanela go dira gore thuto ya lapa ya Beibele le bodiredi bja tšhemo di thabiše, mogolo’a mošemane yo yo monyenyane le kgaetšedi’agwe e šetše e le Dihlatse tše di kolobeditšwego. Morago bjale ge Weijun a be a kgopela go tšea karolo modirong wa go bolela phatlalatša, mmagwe o ile a hlalosa gore mošemane yo o šetše a sepedišitše dimakasine tše dintši kgweding yeo go feta palo-moka ya ge go hlakanywa tša bohle ba lapa. Go molaleng gore o thabela go bolela ka ditherešo, go nea dikarabo dibokeng le go boledišana le ba bangwe ka seo a ithutilego sona.

Ge ba Dutše ba Gola

Bafsa ba ba itshwara bjang ge ba dutše ba gola? Ba bantši ba tšwela pele ba bontšha e le ka kgonthe gore ba rata Jehofa le bodiredi. Ka mohlala, Huiping ke morutwana. Ka letšatši le lengwe morutiši wa gagwe o ile a bolela gore ditho tša bodumedi bjo bongwe di ka se amogele madi eupša a hlalosa gore ga a tsebe gore ke bofe. Ka morago ga ge klase e tšwile, mofsa yo wa Mokriste o ile a hlalosetša morutiši wa gagwe gore ke Dihlatse tša Jehofa le gore ke ka baka la eng di dira phetho e bjalo.

Mohlahli yo mongwe o ile a ba bontšha bidio ya malwetši a fetelago ka dikopano tša botona le botshadi. Le ge bidio e ile ya bolela ka 1 Bakorinthe 6:9, o ile a bolela gore Beibele ga e ganetše bosodoma. Le mo lebakeng le, Huiping o ile a kgona go hlalosetša mohlahli ka pono ya Modimo mabapi le taba ye.

Ge moithuti-gotee le yena e lego Shuxia a be a lokišetša pego mabapi le bošoro bja ka lapeng, Huiping o ile a mo nea Phafoga! ya November 8, 2001 yeo e nago le sehlogo sa ka ntle se se rego “Thušo Bakeng sa Basadi Bao ba Bethwago,” gomme a mo hlalosetša gore e na le tsebišo e ntši e theilwego Beibeleng mabapi le pego ya gagwe. Ka morago, Shuxia o ile a ba mogoeledi yo a sego a kolobetšwa. Ga bjale yena le Huiping ba boledišana le ba bangwe ka ditaba tše dibotse.

Bakriste ba bantši ba lemoga gore ga go bonolo go tsebja o le motho yo a phelago ka melao ya motheo ya Beibele. Ka mo go kgethegilego se se bjalo metseng e menyenyane ya magaeng. Ka baka la tumelo ya gagwe le modiro wa gagwe wa boboledi, Zhihao o ile a swanelwa ke go lwa le kgateletšo ya dithaka. O re: “Ke be ke ikwa ke ferekane moo ke bego ke boifa go gahlana le baithuti-gotee le nna ge ke  le bodireding. Ka dinako tše dingwe, ba be ba nkwera ba le lesome!” Ka letšatši le lengwe, morutiši o ile a nea Zhihao kabelo ya gore a hlalosetše klase ka bodumedi bja gagwe. “Ke be ke dirile phetho ya go thoma polelo ya-ka go Genesi kgaolo 1 gomme ke ahla-ahla dipotšišo tše bjalo ka: Ke mang yo a dirilego lefase le tšohle go lona? Motho o bile gona bjang? Ge ke be ke thoma go bala Mangwalo ba bangwe ba ile ba thoma go ntshega, ba re ke motho wa ditumela-khwele. Lega go le bjalo, ke ile ka tšwela pele go fihlela ke fetša pego ya-ka. Ka morago ga moo, ke ile ka ba le sebaka sa go boledišana le ba bangwe ba baithuti-gotee le nna ka o tee ka o tee ka modiro wa rena le tumelo ya rena. Ga bjale ge ba mpona ke le bodireding ga ba sa ntshega!”

Zhihao o tšwela pele ka gore: “Ka ge batswadi ba-ka e le Dihlatse, re hlahloba temana ya letšatši mesong e mengwe le e mengwe. E bile re ithuta Beibele le go ya dibokeng ka mehla. Ke ka baka leo nka kgonago go lebeletšana le mang le mang yo a sa dutšego a nyaka go nkwera ge ke leka go boledišana le batho ba bangwe ka ditherešo tše di lapološago tša Beibele.”

Tingmei ke morutwana sekolong sa banenyana sa thekhinikhale. Ka nako e nngwe o ile a laletšwa ke baithuti-gotee le yena gore a ye pikiniking le bona, ba e-na le bašemane ba tšwago sekolong sa bašemane. O ile a bona kotsi ya boitshwaro ditswalanong tše bjalo gomme o ile a gana go ya. O ile a laletšwa ka makga a mmalwa le ge a be a boditše baithuti-gotee le yena ka ditaba tša go kgahliša tšeo di lego ka pukung ya Dipotšišo tša Bafsa le Dikarabo tše Šomago. * Banenyana ba ba ile ba mo kwera, ba re o nagana bjalo ka batho ba kgale. Lega go le bjalo, bohlale bja go latela melao ya motheo ya Beibele bo ile bja bonagala gabotse ge yo mongwe wa banenyana a ima gomme a ntšha mpa yeo. Tingmei o re: “Go latela ditaelo tšeo Jehofa a di neago go dirile gore ke be le letswalo le le hlwekilego. Ke ka baka leo ke kwago moya wa-ka o thabile e bile o kgotsofetše.”

Go Fenya Mapheko a Koketšego

Yo mongwe wa bagwera ba paala ba Tingmei ke Ruiwen. Ge e be e sa le yo mofsa, Ruiwen o be a nagana gore go ya dibokeng tša Bokriste le go tšea karolo bodireding bja tšhemo e be e le mediro ya go lapiša. Lega go le bjalo, ge a bona phapano magareng ga lerato la kgonthe la bao ba lego phuthegong ya gabo le segwera sa mankekišane sa baithuti-gotee le yena, o ile a kgodišega gore o swanetše go dira diphetogo bophelong bja gagwe. Ruiwen o ile a thoma go boledišana le baithuti-gotee le yena gomme go se go ye kae o ile a lemoga ka pela seo a bego a swanetše go se dira. O ile a thoma go hlankela  e le mmulamadibogo wa go thuša, a fetša diiri tša ka godimo ga tše 50 ka kgwedi a le bodireding. Ka morago, a thoma go bula madibogo ka mehla, a fetša diiri tša ka godimo ga tše 70 ka kgwedi a le tirelong. Ruiwen o re: “Ke tloga ke leboga Jehofa. Ga se a ka a ntlhoboga. Le ge ke ile ka dira dilo tšeo di ilego tša mo nyamiša, o be a sa nthata. Mma gotee le ba bangwe ka phuthegong ba ile ba bontšha mokgwa o swanago wa lerato. Ka ge bjale ke swara dithuto tše hlano tša Beibele, ke ikwa ke tšea karolo modirong wo o tlogago o kgotsofatša.”

Sekolong se sengwe se se phagamego sa dinaga-magaeng, bana ba babedi ba Dihlatse ba be ba abetšwe go emela sekolo sa bona diphadišanong tša mmino wa setšo. Ge ba lemoga mohuta wa phadišano yeo, bafsa ba Dihlatse ba ile ba bona go tšea karolo phadišanong yeo go be go tla lwantšha matswalo a bona a Bokriste. Ge ba leka go hlalosa pono ya bona le go kgopela gore ba se tšee karolo diphadišanong tšeo, kgopelo ya bona e ile ya ganetšwa. Go fapana le moo, barutiši ba ile ba ba botša gore ka ge ba abetšwe go tšea karolo phadišanong, ba swanetše go ya. Ka ge ba be ba se ba ikemišetša go kwanantšha, bafsa ba Dihlatse ba ile ba ikgokaganya le lefapha la thuto ka mokero wa Web gomme ba romela lengwalo leo le hlalosago bothata bja bona. Le ge bafsa ba ba se ba ka ba hwetša karabo ka bobona, sekolo se ile sa hwetša taelo kapejana ya gore se se ke sa gapeletša motho go tšea karolo diphadišanong tše bjalo. Bafsa bao ba ile ba thaba gakaakang ge ba bona gore tlhahlo ya Beibele yeo ba e hweditšego ga se ya bopa matswalo a bona feela, eupša gape e ba neile matla a go emela seo se lokilego!

Le bao ba fokolago mmeleng ba thabišwa ke go boledišana le ba bangwe ka kholofelo ya Beibele yeo ba nago le yona. Minyu o belegwe a golofetše. Ka ge a sa kgone go diriša matsogo a gagwe, o phetla matlakala a Beibele ka leleme gore a hwetše lengwalo leo a nyakago go le bala. Dikabelong tša gagwe tša dipolelo Sekolong sa Bodiredi sa Pušo ya Modimo Holong ya Mmušo, o dula sofeng e lego tlase gomme mothuši wa gagwe o dula setulong sa tlasana e bile o mo swarela maekrofone. Go thabiša gakaakang go bona maiteko ao Minyu a a dirago ge a lokišeletša dipolelo tše!

Ge Minyu a be a nyaka go ba mogoeledi wa Mmušo, dikgaetšedi tše dingwe ka phuthegong di ile tša ithuta go nea bohlatse ka mogala e le gore di kgone go mo thuša. O kgotla dikonotswana tša mogala ka leleme mola kgaetšedi yo mongwe a mo thuša go ngwala pego ya batho bao a ba leletšago. O rata modiro wo kudu mo e lego gore o bile mmulamadibogo wa go thuša gomme o fetša diiri tše 50 go ya go tše 60 ka kgwedi a diriša mogala go boledišana le batho ba bangwe ka Mmušo wa Modimo. Go na le bao ba amogelago dipuku tšeo di theilwego Beibeleng gomme ba mo dumeletše gore a ba leletše mogala gape. Ga bjale o swara dithuto tše tharo tša Beibele le batho bao a ikgokagantšego le bona ka mokgwa wo.

Ee, go swana le marothodi a phoka, masogana—le makgarebe—ka diphuthegong tše 78 tša Dihlatse tša Jehofa tša Taiwan a ikemišeditše e bile a na le mafolofolo a go iša ditaba tše dibotse tša Mmušo tšeo di matlafatšago maphelo bathong ba dimilione bao ba nyeumago sehlakahlakeng. Ye e fo ba karolo e nyenyane lefaseng ka bophara ya go phethagatšwa ga boporofeta bja Beibele bjo bo rego: “Mohla Ò e-tšwa dirá, sethšaba sa xaxo se tlo ithapa; ba bafsa ba xaxo ba tlo thšêpa ka tše kxêthwa bo-ka phoka ngwana wa mahuba.” (Psalme 110:3) Bafsa ba ke mothopo wa kgothatšo bathong ba bagolo bao ba šomago le bona, le gona ke mothopo wa lethabo go tatago bona wa legodimong e lego Jehofa Modimo!—Diema 27:11.

[Mongwalo wa ka tlase]

[Lepokisi/Seswantšho go letlakala 10]

GO NYAKEGA DIHOLO TŠE DINGWE TŠA MMUŠO

Ka baka la koketšego kua Taiwan, go hwetšagala ga Diholo tše dingwe tša Mmušo e ba tlhohlo e kgolo. Ka baka la’ng? Ka baka la gore, go hwetša lefelo leo le swanetšego bakeng sa go aga Holo ya Mmušo ga go bonolo, re sa bale dinaga-magaeng. Ka ntle le moo, ditheko tša ditsha di phagame ka mo go feteletšego le melao ya go arolwa ga metse e thata. Ditoropong tše dikgolo le tše dinyenyane, tsela e kaone ke go reka meago ya diofisi le go e fetoša gore e be Diholo tša Mmušo. Lega go le bjalo, disiling tša diofisi tše dintši di tlase kudu, go di hlokomela go bitša tšhelete e ntši kudu, ga go bonolo go tsena go tšona ka ge di hlapeditšwe goba go na le mabaka a mangwe ao a dirago gore go se ke gwa kgonega go di diriša e le Diholo tša Mmušo.

Lega go le bjalo, nywageng ya morago bjale, Dihlatse tša Jehofa tša Taiwan di kgonne go aga Diholo tše mmalwa tše difsa tša Mmušo. Lesolo la go nyaka meago e mefsa le tšwela pele ka ge Dihlatse di bontšha gore di ikemišeditše go rwala boikarabelo bja tša ditšhelete, gaešita le go ithuta mediro e fapa-fapanego ya go aga.