“Le Kwele ka Kgotlelelo ya Jobo”
“Le Kwele ka Kgotlelelo ya Jobo”
“Le kwele ka kgotlelelo ya Jobo gomme le bone pheletšo ye Jehofa a e neilego, gore Jehofa o na le maikwelo a borutho a bonolo kudu e bile ke yo a gaugelago.”—JAKOBO 5:11.
1, 2. Banyalani ba bangwe ba kua Poland ba ile ba lebeletšana le teko efe?
HARALD ABT o be a šetše a e-na le nako ya ka tlase ga ngwaga o tee e le yo mongwe wa Dihlatse tša Jehofa ge madira a Hitler a be a thoma go laola Danzig (yeo ga bjale e lego Gdańsk) ka leboa la Poland. Ke moka dilo di ile tša ba thata, ee, boemo bo ile bja ba kotsi go Bakriste ba therešo ba gona moo. Ma-Gestapo a ile a leka go gapeletša Harald gore a saene lengwalo leo le bontšhago gore o latola tumelo ya gagwe, eupša o ile a gana. Ka morago ga go fetša dibeke tše sego kae a le kgolegong, Harald o ile a romelwa kampeng ya tshwenyo ya Sachsenhausen, moo kgafetša-kgafetša a bego a tšhošetšwa le go bethwa. Mohlankedi o ile a šupa tšhimele yeo e bego e tupa muši gomme a botša Harald gore, “O tla rotogela kua go Jehofa wa gago matšatšing a 14 ge e ba o kgomarela tumelo ya gago.”
2 Ge Harald a be a golegwa, mosadi wa gagwe e lego Elsa o be a sa dutše a nyantšha ngwana wa bona wa ngwanenyana wa dikgwedi tše lesome. Eupša seo ga se sa dira gore ma-Gestapo a se ke a mo golega. Go se go ye kae, o ile a tšeelwa ngwana wa gagwe gomme yena a romelwa kampeng ya polao kua Auschwitz. Lega go le bjalo, o ile a kgona go phela ka nywaga e mentši, go fo etša ge Herald le yena a ile a dira bjalo. Ka go Morokami (wa Seisemane) wa April 15, 1980, o ka bala mo go oketšegilego mabapi le kamoo ba ilego ba kgotlelela ka gona. Harald o ngwadile gore: “Ka kakaretšo, ke feditše nywaga e 14 ya bophelo bja-ka dikampeng tša tshwenyo le dikgolegong ka baka la go dumela ga-ka go Modimo. Ke ile ka botšišwa gore: ‘Na mosadi wa gago o ile a go thuša go kgotlelela dilo tše ka moka?’ Ee, o nthušitše ruri! Ke be ke tseba go tloga mathomong gore a ka se ke a kwanantšha tumelo ya gagwe, gomme go tseba se go mmatlafaditše. Ke be ke tseba gore o be a ka upša a mpona ke le leakong ke hwile go e na le go tseba gore ke lokolotšwe ka baka la ge ke ile ka kwanantšha. . . . Elsa o kgotleletše mathata a mantši nywageng yeo a e feditšego a le dikampeng tša tshwenyo tša kua Jeremane.”
3, 4. (a) Ke mehlala ya bomang yeo e ka kgothatšago Bakriste gore ba kgotlelele? (b) Ke ka baka la’ng Beibele e re kgothaletša go hlahloba phihlelo ya Jobo?
3 Go tloga go se bonolo go tlaišwa, go etša ge Dihlatse tše dintši di ka hlatsela seo. Ka baka leo, Beibele e eletša Bakriste ka moka gore: “Baporofeta bao ba boletšego ka leina la Jehofa, ba tšeeng e le mohlala wa go tlaišwa ke bobe le wa go bontšha go se fele pelo.” (Jakobo 5:10) Go theoša le nywaga-kgolo, bahlanka ba bantši ba Modimo ba tlaišitšwe ntle le lebaka. Mehlala yeo e beilwego ke ‘leru le le legolo la dihlatse’ e ka re kgothaletša go tšwela pele re kitima lebelo la rena la Bokriste ka kgotlelelo.—Baheberu 11:32-38; 12:1.
4 Pegong ya Beibele, Jobo ke mohlala o mobotse wa kgotlelelo. Jakobo o ngwadile gore: “Bonang! Bao ba kgotleletšego re re ba thabile. Le kwele ka kgotlelelo ya Jobo gomme le bone pheletšo ye Jehofa a e neilego, gore Jehofa o na le maikwelo a borutho a bonolo kudu e bile ke yo a gaugelago.” (Jakobo 5:11) Phihlelo ya Jobo e re nea seswantšho sa moputso wo o letetšego bao ba botegago, bao Jehofa a ba šegofatšago. Sa bohlokwa kudu, e utolla ditherešo tšeo di tla re thušago dinakong tša mathata. Puku ya Jobo e re thuša go araba dipotšišo tše: Ge re le ka tlase ga teko, ke ka baka la’ng re swanetše go leka go kwešiša dikgang tša bohlokwa tšeo di akaretšwago? Ke dika le dikgopolo dife tšeo di re thušago go kgotlelela? Re ka matlafatša bjang Bakriste-gotee le rena bao ba tlaišegago?
Go ba le Kwešišo ka Botlalo
5. Ke kgang efe ya bohlokwa yeo re swanetšego go dula re e gopola ge re lebeletšane le diteko?
5 E le gore re dule re e-na le teka-tekano moyeng ge re lebeletšane le mathata, re swanetše go kwešiša ditaba ka botlalo. Go sego bjalo, mathata a rena a ka šira pono ya rena ya moya. Taba ya go botegela Modimo ke ya bohlokwa kudu. Tatago rena wa legodimong o dira boipiletšo bjo yo mongwe le yo mongwe wa rena a ka bo tšeelago godimo bja gore: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Diema 27:11) Yeo ruri ke tokelo ya moswana-noši! Go sa šetšwe mafokodi a rena le go se phethagale, re ka dira gore Mmopi wa rena a thabe. Re dira bjalo ge go rata ga rena Jehofa go re thuša go lebeletšana le diteko. Lerato la kgonthe la Bokriste le kgotlelela dilo ka moka. Ga le fele.—1 Bakorinthe 13:7, 8.
6. Sathane o thomeletša Jehofa bjang, gomme o dira bjalo go fihla bokgoleng bofe?
6 Puku ya Jobo e bea ditaba pepeneneng tša gore Sathane ke yena a thomeletšago Jehofa. Le gona e utolla semelo se sebe sa lenaba le leo le sa bonagalego le kganyogo ya lona ya go senya tswalano ya rena le Modimo. Go etša ge go bontšhitšwe tabeng ya Jobo, Sathane ge e le gabotse o latofatša bahlanka ka moka ba Jehofa ka gore ba na le maikemišetšo a fošagetšego gomme o nyaka go hlatsela gore lerato la bona go Modimo le ka tapa. Sathane o be a thomeleditše Modimo ka nywaga e dikete. Ge Sathane a be a rakwa legodimong, lentšu le le tšwago legodimong le ile la mo hlalosa e le “mmegi wa bana babo rena” le gore o ba bega ka tsela e bjalo “pele ga Modimo mosegare le bošego.” (Kutollo 12:10) Ka go kgotlelela ga rena ka potego, re ka bontšha gore ditatofatšo tša gagwe ga di kwagale.
7. Re ka fenya bjang mafokodi a nama?
7 Re swanetše go gopola gore Diabolo o tla diriša tlaišo le ge e le efe yeo re ka lebeletšanago le yona bakeng sa go leka go re aroganya le Jehofa. O lekile Jesu neng? E be e le nakong ya ge Jesu a be a swerwe ke tlala ka morago ga go ikona ka matšatši a mantši. (Luka 4:1-3) Lega go le bjalo, matla a Jesu a moya a ile a mo thuša go gana diteko tša Diabolo ka go tia. Ruri go bohlokwa go lwa le mafokodi a nama—ao mohlomongwe a bakwago ke bolwetši goba botšofadi—ka matla a moya! Gaešita le ge “motho yo re lego yena ka ntle a onala,” ga re langwe ka gobane “motho yo re lego yena ka gare o mpshafatšwa letšatši le letšatši.”—2 Bakorinthe 4:16.
8. (a) Maikwelo a fošagetšego a ka ba le mafelelo afe a mabe? (b) Jesu o be a e-na le tshekamelo efe ya monagano?
8 Go oketša moo, maikwelo a gateletšago a ka gobatša motho moyeng. Yo mongwe a ka ipotšiša gore: ‘Ke ka baka la’ng Jehofa a dumelela boemo bjo?’ Yo mongwe ka morago ga go swarwa ka tsela e sego botho a ka botšiša gore: ‘Ke ka baka la’ng ngwanabo rena a ntshwara ka tsela ye?’ Maikwelo a bjalo a ka dira gore re hlokomologe dikgang tša bohlokwa le gore re tsepamiše kgopolo ka botlalo maemong a rena. Go ferekanywa ga Jobo ke bagwera ba gagwe ba bararo bao ba bego ba sa kwešiše dilo gabotse go bonagala go ile gwa mo gobatša kudu maikwelong go etša ge bolwetši bja gagwe bo ile bja mo hlokofatša mmeleng. (Jobo 16:20; 19:2) Ka mo go swanago, moapostola Paulo o bontšhitše gore kgalefo yeo e tšeago lebaka le letelele e ka “nea Diabolo sebaka.” (Baefeso 4:26, 27) Go e na le go ferekana goba go galefela batho goba go nagana ka mo go feteletšego ka go hloka toka ga maemo a itšego, Bakriste ba dira gabotse go ekiša Jesu ka go “[ikgafela] yo a ahlolago ka go loka,” Jehofa Modimo. (1 Petro 2:21-23) Go ba le “tshekamelo . . . ya monagano” wa Jesu go ka re šireletša kudu ditlhaselong tša Sathane.—1 Petro 4:1.
9. Modimo o re nea kgonthišetšo efe mabapi le merwalo yeo re swanetšego go e rwala goba diteko tšeo re lebeletšanago le tšona?
9 Go feta tšohle, ga se ra swanela go nagana gore mathata a rena ke bohlatse bjo bo kgonthišeditšwego bja gore ga re kgahle Modimo. Go se kwešiše dilo ka tsela e bjalo go ile gwa kweša Jobo bohloko nakong ya ge a be a tshwenywa ke mantšu a bogale a bao ba bego ba swanetše go mo homotša. (Jobo 19:21, 22) Beibele e re kgonthišetša ka mantšu a: “Modimo a ka se ke a lekwa ka dilo tše mpe le gona yena ga a leke motho le ge e le ofe.” (Jakobo 1:13) Ka mo go fapanego, Jehofa o holofetša go re thuša go rwala morwalo le ge e le ofe wo o ka re welago le go re bontšha kamoo re ka fetago tekong le ge e le efe yeo e ka re welago. (Psalme 55:22; 1 Bakorinthe 10:13) Ka go batamela kgaufsi le Modimo dinakong tša mathata, re ka dula re e-na le pono e nepagetšego ka dilo gomme ra ganetša Diabolo ka katlego.—Jakobo 4:7, 8.
Dilo Tšeo di re Thušago go Kgotlelela
10, 11. (a) Jobo o thušitšwe ke’ng gore a kgotlelele? (b) Go ba le letswalo le lebotse go ile gwa thuša Jobo bjang?
10 Jobo o ile a dula a botega go sa šetšwe boemo bja gagwe bja go ba tlalelong—go akaretša go hlaselwa ka mantšu ke bao e bego e swanetše go ba bahomotši ba gagwe le kgakanego yeo a bego a le go yona mabapi le sebaki sa kgonthe sa mathata a gagwe. Re ka ithuta’ng kgotlelelong ya gagwe? Ka ntle le pelaelo, lebaka le legolo la go atlega ga gagwe e be e le gore o botegela Jehofa. ‘O be a boifa Modimo e bile a ila bobe.’ (Jobo 1:1) Yeo e be e le tsela ya gagwe ya bophelo. Le ge a be a sa kwešiše gore ke ka baka la eng dilo di ile tša fo mpefala kapejana, Jobo o ile a gana go furalela Jehofa. Jobo o be a dumela gore o swanetše go hlankela Modimo dinakong tše dibotse le tše mpe.—Jobo 1:21; 2:10.
11 Le gona, go ba le letswalo le lebotse go ile gwa homotša Jobo. Nakong ya ge go be go bonagala eka o kgaufsi le go hwa, o ile a homotšwa ke go tseba gore o dirile seo a bego a ka se kgona bakeng sa go thuša ba bangwe, gore o kgomaretše ditekanyetšo tša Jehofa tša go loka le gore o ile a phema mokgwa le ge e le ofe wa borapedi bja maaka.—Jobo 31:4-11.
12. Jobo o ile a arabela bjang thušong yeo a ilego a e hwetša go Elihu?
12 Ee, ke therešo gore Jobo o be a nyaka thušo e le gore a fetoše pono ya gagwe ditabeng tše dingwe. Le gona o ile a amogela thušo yeo ka boikokobetšo—e lego selo se sengwe seo se ilego sa mo thuša go kgotlelela ka katlego. Jobo o ile a theetša ka tlhompho keletšo e bohlale ya Elihu gomme a arabela ka tsela e nepagetšego ge Jehofa a be a mo phošolla. O ile a dumela ka gore: “Ké nna ke boletšexo kè sa hlaoloxanye . . . Ke a inyatša, ke a ithsôla kè le lerole le molôra.” (Jobo 42:3, 6) Go sa šetšwe bolwetši bjo bo bego bo sa dutše bo mo tshwenya, Jobo o ile a thabela gore go fetoša ga gagwe tsela yeo a bego a nagana ka yona go mmatameditše kgaufsi le Modimo. Jobo o itše: “Ke tseba xobane O [Jehofa] Mo-kxôna-tšohle.” (Jobo 42:2) A thušwa ke tsela yeo ka yona Jehofa a hlalositšego bogolo bja Gagwe, Jobo o ile a kwešiša gabotse kudu boemo bja gagwe ge bo bapetšwa le bja Mmopi.
13. Go bontšha kgaugelo go ile gwa bonagala go hola Jobo bjang?
13 Mafelelong, Jobo o re nea mohlala o mobotse wa kgaugelo. Bahomotši ba gagwe ba maaka ba ile ba mo kweša bohloko kudu, lega go le bjalo, ge Jehofa a be a kgopela Jobo gore a ba rapelele, o ile a dira bjalo. Ka morago ga moo, Jehofa o ile a fodiša Jobo. (Jobo 42:8, 10) Go molaleng gore go boloka sekgopi go ka se ke gwa re thuša go kgotlelela, mola lerato le kgaugelo di tla dira bjalo. Go tlogela go boloka sekgopi go a re lapološa moyeng, gomme ke tsela yeo Jehofa a e šegofatšago.—Mareka 11:25.
Baeletši ba Bohlale Bao ba re Thušago go Kgotlelela
14, 15. (a) Ke dika dife tšeo di tlago go thuša moeletši gore a fodiše ba bangwe? (b) Hlalosa kamoo Elihu a ilego a atlega ka gona go thuša Jobo.
14 Thuto e nngwe gape yeo re ka ithutago yona pegong ya Jobo ke bohlokwa bja baeletši ba bohlale. Batho ba bjalo ba swana le bana babo rena bao ba re “[tswaletšwego] wa mohla wa tlalêlô.” (Diema 17:17) Lega go le bjalo, go etša ge phihlelo ya Jobo e bontšha, baeletši ba bangwe ba ka re kweša bohloko go e na le go re fodiša. Moeletši yo botse o swanetše go bontšha kwelobohloko, tlhompho le botho, go etša ge go dirile Elihu. Bagolo le Bakriste ba bangwe bao ba godilego ka tsebo ba ka swanelwa ke go fetoša tsela yeo bana babo rena bao ba wetšwego ke mathata ba naganago ka yona, gomme tabeng ye, baeletši ba bjalo ba ka ithuta mo gontši pukung ya Jobo.—Bagalatia 6:1; Baheberu 12:12, 13.
15 Re ithuta dithuto tše dibotse mabapi le tsela yeo ka yona Elihu a ilego a swaragana le bothata. O ile a theetša ka go se fele pelo pele ga ge a ka araba dipolelo tše di fošagetšego tša bagwera ba bararo ba Jobo. (Jobo 32:11; Diema 18:13) Elihu o ile a bitša Jobo ka leina gomme a ipiletša go yena bjalo ka mogwera. (Jobo 33:1) Ka go se swane le baeletši ba bararo ba maaka, Elihu ga se a ka a ipona a phagametše Jobo. O itše: “Le nna ke bopilwe ka letsopa.” Ga se a ka a nyaka go oketša tlaišego ya Jobo ka go bolela mantšu a se nago tlhaologanyo. (Jobo 33:6, 7; Diema 12:18) Go e na le go swaya Jobo diphošo ka baka la tsela yeo a bego a itshwere ka yona, Elihu o ile a mo reta bakeng sa go loka ga gagwe. (Jobo 33:32) Sa bohlokwa kudu, Elihu o be a lebelela dilo ka tsela ya Modimo, gomme o ile a thuša Jobo go tsepamiša kgopolo tabeng ya gore Jehofa a ka se ke a dira dilo ka tsela e se nago toka. (Jobo 34:10-12) O ile a kgothaletša Jobo go letela Jehofa, go e na le go katanela go itokafatša. (Jobo 35:2; 37:14, 23) Bagolo ba Bakriste le ba bangwe ruri ba ka holwa ke dithuto tše bjalo.
16. Ke bjang baeletši ba bararo ba Jobo ba maaka e bilego didirišwa tša Sathane?
16 Keletšo e bohlale ya Elihu e fapana le mantšu a kwešago bohloko a Elifase, Bilidada le Tsofara. Jehofa o ba boditše gore: “Xa L’a ka la . . . mpolêla ka mo xo swanetšexo.” (Jobo 42:7) Gaešita le ge ba be ba bolela gore ba na le maikemišetšo a mabotse, e be e le didirišwa tša Sathane go e na le go ba bjalo ka bagwera bao ba botegago. Boraro bja bona ba be ba nagana go tloga mathomong gore Jobo ka boyena o be a swanetše go bewa molato ka baka la tlalelo ya gagwe. (Jobo 4:7, 8; 8:6; 20:22, 29) Go ya ka Elifase, Modimo ga a bote bahlanka ba gagwe, le gona ga A na taba gore re lokile goba ga se ra loka. (Jobo 15:15; 22:2, 3) Elifase o ile a ba a latofatša Jobo ka diphošo tšeo a sa kago a di dira. (Jobo 22:5, 9) Ka lehlakoreng le lengwe, Elihu o ile a thuša Jobo moyeng, e lego seo ka mehla moeletši yo lerato a dulago a ikemišeditše go se dira.
17. Ke’ng seo re swanetšego go dula re se gopola ge re lekwa?
17 Go na le thuto e nngwe mabapi le kgotlelelo yeo re ka ithutago yona pukung ya Jobo. Modimo wa rena yo lerato o bona boemo bja rena gomme o ikemišeditše e bile o a kgona go re thuša ka ditsela tše di fapa-fapanego. Re badile pejana ka phihlelo ya Elsa Abt. Ela hloko phetho yeo a ilego a e fihlelela, o re: “Pele ga ge nka golegwa, ke be ke ile ka bala lengwalo la kgaetšedi yo a bego a boletše gore moya wa Jehofa o go thuša gore o iše maswafo fase nakong ya teko e šoro. Ke be ke nagana gore o be a feteletša go se nene. Eupša ge nna ka noši ke be ke lekwa, ke ile ka lemoga gore o be a bolela therešo. Ruri go ba bjalo. Go thata go nagana ka taba ye ge e sa ka ya go diragalela. Lega go le bjalo, go nna e diregile. Jehofa o a thuša.” Elsa o be a sa bolele ka seo Jehofa a bego a ka se dira goba seo a se dirilego nywageng e dikete e fetilego mehleng ya Jobo. O be a bolela ka mehla ya rena. Ee, “Jehofa o a thuša”!
Go Thaba Motho yo a Kgotlelelago
18. Go kgotlelela ga Jobo go mo hotše bjang?
18 Ga se ka moka ga rena bao re tlago go lebeletšana le teko e šoro e swanago le yeo Jobo a ilego a lebeletšana le yona. Eupša go sa šetšwe teko yeo tshepedišo ye ya dilo e ka re tlišetšago yona, re na le mabaka a kwagalago a go dula re botega, go etša ge Jobo a dirile. Ge e le gabotse, kgotlelelo e matlafaditše bophelo bja Jobo. E mo dirile yo a phethagetšego, ya mo dira yo a feletšego. (Jakobo 1:2-4) E matlafaditše tswalano ya gagwe le Modimo. Jobo o dumetše ka gore: “Xo kwa ka ditsêbê ke be ke e-kwa; byale xôna mahlô a-ka a Xo bone.” (Jobo 42:5) Sathane o ile a hlatselwa e le moaketši ka gobane ga se a ka a kgona go senya potego ya Jobo. Nywageng e makgolo ka morago, Jehofa o be a sa dutše a bolela ka mohlanka wa gagwe Jobo e le mohlala wa mabapi le go loka. (Hesekiele 14:14) Pego ya gagwe ya potego le kgotlelelo e matlafatša batho ba Modimo gaešita le lehono.
19. Ke ka baka la’ng o nagana gore kgotlelelo ke ya bohlokwa?
19 Ge Jakobo a be a ngwalela Bakriste ba lekgolong la pele la nywaga mabapi le kgotlelelo, o ile a bolela ka kgotsofalo yeo e tlišwago ke go kgotlelela. Le gona o ile a diriša mohlala wa Jobo go ba gopotša gore Jehofa o putsa kudu bahlanka ba gagwe bao ba botegago. (Jakobo 5:11) Go Jobo 42:12, re bala gore: “Morêna yêna a šexofatša Jobo ka tše di tlilexo byale; tša fetiša tša mola pele.” Modimo o ile a nea Jobo ka mo go ipoeleditšego gabedi dilo tšeo di bego di mo lahlegetše, gomme o ile a phela bophelo bjo botelele bja lethabo. (Jobo 42:16, 17) Ka mo go swanago, bohloko le ge e le bofe, tlaišego goba manyami ao re ka swanelwago ke go a kgotlelela bofelong bjo bja tshepedišo ye ya dilo bo tla phumolwa le go lebalwa lefaseng le lefsa la Modimo. (Jesaya 65:17; Kutollo 21:4) Re kwele ka kgotlelelo ya Jobo, gomme re ikemišeditše go ekiša mohlala wa gagwe, re thušwa ke Jehofa. Beibele e holofetša ka gore: “Go thaba motho yo a tšwelago pele go kgotlelela moleko, gobane ge a amogelwa o tla hwetša mphapahlogo wa bophelo, wo Jehofa a o holofeditšego bao ba tšwelago pele ba mo rata.”—Jakobo 1:12.
O tla Araba Bjang?
• Re ka thabiša pelo ya Jehofa bjang?
• Ke ka baka la’ng re sa swanela go phetha ka gore mathata a rena ke bohlatse bja gore ga re kgahle Modimo?
• Ke dika dife tšeo di ilego tša thuša Jobo gore a kgotlelele?
• Re ka ekiša Elihu bjang tabeng ya go matlafatša badumedi-gotee le rena?
[Dipotšišo tša Thuto]
[Seswantšho go letlakala 28]
Moeletši yo botse o bontšha kwelobohloko, tlhompho le botho
[Diswantšho go letlakala 29]
Elsa le Harald Abt