Na o a Gopola?

Na o thabetše go bala ditokollo tša morago bjale tša Morokami? Bona ge e ba o ka kgona go araba dipotšišo tše di latelago:

• Jesu o tla “hlakodiša modiitšana” bjang go etša ge Psalme 72:12 e boletše e sa le pele?

Nakong ya go buša ga gagwe, go tla ba le toka e tlago go thabelwa ke bohle, go se na kgobogo. Dintwa gantši di baka bodiidi, eupša Kriste o tla tliša khutšo e phethagetšego. O kwela batho bohloko gomme o tla ba kgobokanya, le gona o tla kgonthišetša gore go tla ba le dijo tše dintši. (Psalme 72:4-16)—5/1, letlakala 7.

• Re le Bakriste, re ka bonagatša bjang “tokologo ya polelo”? (1 Timotheo 3:13; Filemone 8; Baheberu 4:16)

Re ka dira bjalo ka go nea bohlatse ka mafolofolo le ka sebete, ka go ruta le go nea keletšo ka pela le ka katlego gaešita le ka go tšhollela dipelo tša rena go Modimo ka thapelo, re holofela gore o tla e kwa le go e araba.—5/15, matlakala 14-16.

• Ka tlase ga Molao, ke ka baka la’ng mekgwa e mengwe ya tlhago yeo e tswalanago le ditho tša botona le botshadi e be e lebelelwa e le yeo e dirago gore motho a ‘šilafale’?

Melao ye e akaretšago go šilafala ka baka la go tšhollwa ga matšhedi, go ya kgweding le go belega e be e kgothaletša bohlweki bja ditho tša botona le botshadi le bohlweki ka kakaretšo, go gatelela go kgethega ga madi le go bontšha go nyakega ga tshwarelo ya dibe.—6/1, letlakala 31.

• Ge e ba motho a nyaka go thaba, ke ka baka la’ng a swanetše go ela hloko puku ya Dipsalme?

Bangwadi ba Dipsalme ba be ba kgodišegile gore lethabo le tlišwa ke go ba ga motho le tswalano e botse le Modimo. (Psalme 112:1) Ba gatelela gore ga go tswalano yeo batho ba ka bago le yona, dilo tše di bonagalago le dilo tšeo motho a ka di fihlelelago tšeo di ka tlišago lethabo leo le swanago le leo le tlišwago ke go ba gare ga “sethšaba seo [Jehofa] e lexo Modimo wa sôna.” (Psalme 144:15)—6/15, letlakala 12.

• Ke tswalano efe e kgethegilego yeo Baisiraele ba bogologolo ba ilego ba ba le yona le Jehofa?

Ka 1513 B.C.E., Jehofa o bile le tswalano e mpsha le Baisiraele le go ba le bona kgweranong. (Ekisodo 19:5, 6; 24:7) Ka morago ga moo, Baisiraele ba ile ba tswalwa e le ditho tša batho ba Modimo bao ba ineetšego go yena. Lega go le bjalo, yo mongwe le yo mongwe o be a swanetše go itirela phetho ya gore o hlankela Modimo.—7/1, matlakala 21-2.

• Ke ka baka la’ng re swanetše go dira dilo tšohle “ka ntle le dingongorego”? (Bafilipi 2:14)

Mehlala ya dingongorego yeo e boletšwego ka Mangwalong e bontšha gore go ngongorega go bakile kgobalo gare ga batho ba Modimo. Ka gona, re dira gabotse go naganišiša kudu mabapi le tutuetšo e gobatšago yeo go ka e bakago lehono. Batho bao ba sa phethagalago ba na le tshekamelo ya go belaela gomme re swanetše go itiša malebana le go hlagolela seka se le go se phema.—7/15, Matlakala 16-17.

• Re tseba bjang gore bohlale bjo bo hlalositšwego go Diema 8:22-31 ga se bohlale bjo bo inaganelwago?

Bohlale bjoo bo ile bja ‘hlongwa,’ goba bja bopša e le mathomo a tsela ya Jehofa. Modimo ga e sa le go tloga a le gona e bile ka mehla o dula a le bohlale; bohlale bja gagwe ga se bja bopša. Bohlale bjo bo lego go Diema 8:22-31 bo be bo e-na le Modimo, e le “mohlankana w’axwe,” e lego seo se bolelago ka sebopiwa sa moya seo se šupago Jesu yo a šomilego kgaufsi le Modimo go bopeng dilo. (Bakolose 1:17; Kutollo 3:14)—8/1, letlakala 31.