Bodumedi—Bo Hola Ka Eng?

“NKA ba motho wa go loka le ge ke sa tsene kereke!” Ke kamoo batho ba bantši ba ikwago ka gona. Batho ba bantši ba go botega, ba kwelobohloko le bao ba ka botwago ga ba na taba le bodumedi. Ka mohlala, le ge batho ba bantši ba Bodikela bja Yuropa ba bolela gore ba dumela go Modimo, ke ba mmalwa feela bao ba yago kerekeng ka mehla. * Gaešita le kua Latin Amerika, ke palo ya Makatholika a 15 go ya go a 20 lekgolong feela ao a yago kerekeng ka mehla.

Mohlomongwe le wena, go swana le batho ba bangwe ba bantši, o nagana gore bodumedi ga bo thuše motho go phela bophelo bjo bokaone. Lega go le bjalo, mohlomongwe o a tseba gore nywageng e fetilego, mehleng ya bo-rakgolo ba gago, batho ba bantši ba be ba rata kereke go feta ba mehleng ya lehono. Go tlile bjang gore bodumedi bo feleletše bo se sa kgahla batho? Na motho a ka ba yo a lokilego le ge a sa tsene kereke? Na go na le bodumedi bjo bo ka go holago?

Lebaka Leo ka Lona ba Bantši ba Hlanogetšego Bodumedi

Ka nywaga-kgolo e mentši, batho ba bantši ba Bojakane ba be ba dumela gore Modimo o nyaka go kwewa. Ba be ba e-ya kerekeng bakeng sa gore ba hwetše kamogelo ya Modimo ka ditirelo tšeo di bego di dirwa ke baruti goba ka ditaelo tšeo di bego di newa ke baruti. Goba gona, ba bantši ba be ba tseba ka boikaketši bja bodumedi. Tema yeo e kgathilwego ke bodumedi dintweng e be e tsebja gabotse, go swana le ge boitshwaro bjo bo šilafetšego bja baruti ba bangwe bo be bo tsebja. Eupša batho ba bantši ba be ba nagana gore bodumedi ka bobona bo lokile. Ba bangwe ba be ba rata moya wa moo, metlwae ya gona, le mmino; ba bangwe ba be ba e-kwa ba tutuetšwa ke tšhošetšo ya go fsa ka mo go sa felego mollong wa dihele, e lego thuto yeo e sego gona ka Mangwalong. Ka morago, diphetogo tše mmalwa di ile tša fetoša tsela yeo batho ba bantši ba bego ba lebelela dikereke ka yona.

Thuto ya tlhagelelo e ile ya thoma go tuma. Ba bangwe ba ile ba kgolwa gore bophelo bo thomegile ka kotsi—ga se bja thongwa ke Modimo. Madumedi a mantši a paletšwe ke go tšweletša bohlatse bjo bo kgodišago bja gore Modimo ke Mothopo wa bophelo. (Psalme 36:9) Go tlaleletša moo, kgatelopele ya thekinolotši, katlego e kgolo ya tša kalafo, ya dinamelwa le ya dipoledišano di dirile gore batho ba be le kholofelo ya gore bothata le ge e le bofe bo ka rarollwa ka go diriša thutamahlale. Go oketša moo, go ile gwa dumelwa gore bo-rathutamahlale ba tša leago le ditsebi tša tša monagano di nea tlhahlo e kaone go phala dikereke. Dikereke, ka botšona, di paletšwe ke go tšweletša bohlatse bjo bo ka kgodišago bja gore go phela ka molao wa Modimo ke tsela e kaone ya go phela.—Jakobo 1:25.

Ka baka leo, dikereke tše dintši di ile tša fetoša molaetša wa tšona. Baruti le bareri ba ile ba kgaotša go ruta gore kganyogo ya Modimo ke gore re mo kwe. Go e na le moo, ba bantši ba ile ba ruta gore motho yo mongwe le yo mongwe o swanetše go itirela phetho ya gore ke selo sefe  seo se lokilego le seo se sa lokago. E le ge ba inyakela botumo, baetapele ba bangwe ba bodumedi ba ile ba bolela gore Modimo o a go amogela go sa šetšwe gore o phela bjang. Thuto e bjalo e re gopotša seo Beibele e ilego ya se bolela e sa le pele, ge e re: “Go tla ba le nako yeo ka yona ba ka se kego ba kgotlelela thuto e phelago, eupša ba tla ikgobokeletša barutiši ka go dumelelana le dikganyogo tša bona gore ba kweše ditsebe tša bona bose.”—2 Timotheo 4:3.

Go e na le gore thuto e bjalo e gogele batho, e ile ya dira gore ba hlanoge. Ka tlwaelo ba be ba makala, ba re: ‘Ge e ba dikereke di belaela matla a Modimo a go bopa le bohlale bja Modimo bja go bea melao, go ya kerekeng go nkhola ka’ng? Ke ka baka la’ng ke swanetše go itshwenya ka go ruta bana ba-ka ka tša bodumedi?’ Batho bao ba bego ba leka go phela maphelo a go loka ba ile ba thoma go bona bodumedi bo se sa le bohlokwa. Ba ile ba tlogela dikereke, gomme bodumedi bo ile bja se sa ba bohlokwa go bona. Ke’ng seo se bakilego gore selo sa go loka bjale se fetoge selo sa go se loke? Beibele e nea tlhaloso e kgodišago.

Bodumedi bo Dirišetšwa go Phetha Merero e Mebe

Moapostola Paulo o lemošitše Bakriste ba pele gore ba bangwe ba be ba tla diriša Bokriste go phetha merero e mebe. O boletše gore: “Diphiri tše di gatelelago di tla tsena gare ga lena gomme di ka se sware mohlape ka bonolo, le gona gare ga lena ka noši go tla tsoga banna gomme ba bolela dilo tše di kgopamego gore ba goge barutiwa gore ba ba šale morago.” (Ditiro 20:29, 30) Yo mongwe yo a ilego a bolela “dilo tše di kgopamego” e be e le Augustine, e lego rathutatumelo wa Roma Katholika. Jesu o be a rutile balatedi ba gagwe gore ba kgodiše ba bangwe ka go ba beela mabaka ka Mangwalo. Lega go le bjalo, Augustine o ile a kgopamiša seo se bolelwago ke mantšu a Jesu ao a begilwego go Luka 14:23 a rego, “O ba gapeletše gore ba tle,” a re a bolela gore go lokile go sokolla batho ka kgapeletšo. (Mateo 28:19, 20; Ditiro 28:23, 24) Augustine o ile a diriša bodumedi go laola batho.

Sathane, morongwa wa lerabele, ke yena a dirago gore bodumedi bo dirišwe gampe le go šilafatšwa. O ile a hlohleletša banna ba bodumedi ba lekgolong la pele la nywaga gore ba leke go šilafatša diphuthego tša Bokriste. Beibele e bolela ka banna bao gore: “Batho ba bjalo ke baapostola ba maaka, badiri ba bohwirihwiri, bao ba itirago baapostola ba Kriste. Ga go makatše, gobane Sathane ka boyena o dula a itira morongwa wa seetša. Ka baka leo ga se selo se segolo ge e ba badiredi ba gagwe le bona ba dula ba itira badiredi ba toko.”—2 Bakorinthe 11:13-15.

Sathane o sa dutše a diriša bodumedi bjo bo itirago bja Bokriste, boitshwaro le tshedimošo e le go dira gore batho ba phele ka ditekanyetšo tša gagwe go e na le gore ba phele ka tša Modimo. (Luka 4:5-7) O ka ba o šetše o lemogile gore baruti ba bantši lehono ba diriša bodumedi go iphagamiša ka maina a tlhompho le go hwetša tšhelete ya mehlape ya bona. Mebušo le yona e dirišitše bodumedi go kgodiša badudi gore ba ikgafe dintweng.

Diabolo o diriša bodumedi go feta kamoo batho ba bantši ba ka bago ba lemoga ka gona. O ka nagana gore ke madumedi a feteletšego a mmalwa ao a phethagatšago dikgahlego tša Sathane. Eupša go ya ka Beibele, ‘yo a  bitšwago Diabolo le Sathane, o timetša lefase ka moka le go agilwego go lona.’ Le gona Beibele e re: “Lefase ka moka le rapaletše matleng a yo kgopo.” (Kutollo 12:9; 1 Johane 5:19) Modimo o ikwa bjang ka madumedi ao a dirišwago ke baetapele ba dikereke le ba dipolitiki go goga batho gore ba ba šale morago?

“Ke Dira’ng ka Tšôna?”

Ge e ba boitshwaro bja dikereke tše dingwe tša Bokriste bo go tlaba, gona tseba gore bo tloga bo kgopiša Modimo yo Matla ohle. Bojakane bo bolela gore bo dirile kwano le Modimo; Isiraele ya bogologolo le yona e ile ya bolela bjalo. Bobedi di itlhatsetše di sa botege. Kahlolo yeo Jehofa a e boletšego phatlalatša mabapi le Isiraele e bolela se se swanago le ka Bojakane lehono. Jehofa o boletše gore: “Ba xanne xo theetša se ke se boletšexo; ’me molaô wa-ka ba o lahla. Diôrêlô tše di tšwaxo Seba, . . . ke dira’ng ka tšôna? Didimo tša lena xa di nkxahle.” (Jeremia 6:19, 20) Modimo o be a sa amogele ditiro tša borapedi tšeo di bego di dirwa ke baikaketši. O be a sa kgahlwe ke ditirelo tša bona tša borapedi le dithapelo. O ile a botša Isiraele gore: “Menyanya ya lena, ke [e] hloile, [e] a nkimêla, ’me [e] ntapišitše. Xe Le emiša matsôxô Lè mpitša, ke tla Le xerula; le xe Le ka atiša dithapêlô, nka se kê ka Le kwa.”—Jesaya 1:14, 15.

Na Jehofa o kgahlwa ke menyanya ya Bokriste yeo dikereke di e dirilego eupša yeo pele e bego e direlwa medimo ya maaka? Na o theetša dithapelo tša baruti bao ba senyago dithuto tša Kriste? Na Modimo o amogela bodumedi le ge e le bofe bjo bo ganago molao wa gagwe? O ka kgodišega gore o sa dutše a lebelela ditirelo tša kereke lehono go swana le ka mo a ilego a lebelela dihlabelo tša Isiraele ya bogologolo ka gona, moo a ilego a bolela mabapi le tšona gore: “Ke dira’ng ka tšôna?”

Lega go le bjalo, Jehofa o tloga a kgahlišwa kudu ke borapedi bjo bo dirwago ka therešo ke batho ba go botega. Modimo o a thaba ge batho ka o tee ka o tee ba bontšha go leboga dilo tšohle tšeo a ba direlago tšona. (Maleaki 3:16, 17) Ka gona, na o ka ba motho wa go loka le ge o sa rapele Modimo? Motho yo a sa direlego batswadi ba gagwe ba rategago selo ga a na lebaka la go itokafatša ka gore o lokile, na ga go bjalo? Na motho yo a sa direlego Modimo selo a ka re o lokile? Go a kwagala gore re swanetše go kgahlišwa ke Modimo wa therešo, yo bophelo bo thomilego go yena. Sehlogong se se latelago, re tla bona kamoo borapedi bja therešo bo sa godišego Modimo feela eupša gape le kamoo bo re holago ka gona.

[Mongwalo wa ka tlase]

[Seswantšho go letlakala 4]

Na dikereke di bontšhitše bohlatse bja gore Modimo o bopile dilo ka moka?

[Seswantšho go letlakala 4, 5]

Na moemedi wa Modimo o swanelwa ke go ba mo?

[Seswantšho go letlakala 5]

Modimo o lebelela bjang menyanya ya mohuta wo?

[Mothopo]

AP Photo/Georgy Abdaladze