Borapedi Bjo Bo Go Swanetšego

MOPSALME ASAFA o boletše gore: “Xe e le nna ke natefêlwa ke xo ba kxaufsi le Modimo.” O ile a rata go ekiša bao ba bego ba sa re selo ka Modimo e le gore a ka kgona go phegelela bophelo bja manobonobo. Eupša Asafa o ile a naganišiša ka mehola ya go batamela kgaufsi le Modimo gomme a phetha ka gore e be e le selo se sebotse go yena. (Psalme 73:2, 3, 12, 28) Na borapedi bja therešo ke selo se sebotse go wena lehono? Bo ka go hola bjang?

Go rapela Modimo wa therešo go go thuša go phagamišetša kgopolo ya gago ka godimo ga kgopolo ya go phela ka boithati. Ka baka la tsela yeo “Modimo wa lerato” a re bopilego ka yona, bao ba phegelelago dikgahlego tša bona feela ba ka se ke ba hwetša lethabo. (2 Bakorinthe 13:11) Jesu o rutile therešo ya motheo mabapi le tlhago ya batho ge a be a re: “Go na le lethabo le legolo go neeng go feta go amogeleng.” (Ditiro 20:35) Ke ka baka leo re thabelago go direla bagwera le ba lapa dilo tše dibotse. Eupša lethabo le legolo le tlišwa ke go di direla Modimo. Ga go na yo a swanelwago ke lerato la rena go feta yena. Batho ba dimilione ba tšwago maemong ka moka ba lemogile gore go rapela Modimo ka go dira se a se kgopelago, go kgotsofatša kudu.—1 Johane 5:3.

Go ba le Morero Bophelong

Borapedi bja therešo le bjona ke selo se sebotse go wena ka ge bo go nea morero bophelong. Na o lemogile gore gantši lethabo le sepedišana le go ba le maikwelo a go ikwa o atlega go fihlelela selo sa bohlokwa? Batho ba bantši ba na le pakane bophelong, ye e ka bago e tswalanywa le lapa, bagwera, kgwebo goba boipshino. Ka baka la maemo a bophelo a sa tsepamago, gantši dilo tše ga di kgone go ba dira gore ba thabe. (Mmoledi 9:11) Lega go le bjalo, borapedi bja therešo bo go thuša go hwetša morero o phagamego, wo o tšwelago pele o kgotsofatša le ge dikarolo tše dingwe tša bophelo di bonala di nyamiša.

Borapedi bja therešo bo akaretša go tseba Jehofa le go mo hlankela ka potego. Bao ba dirago bjalo ba batamela kgaufsi kudu le Modimo. (Mmoledi 12:13; Johane 4:23; Jakobo 4:8) O ka hwetša go le thata go nagana gore o ka tseba Modimo gabotse moo e lego gore e ka ba mogwera wa gago. Eupša ka go naganišiša ka ditirišano tša gagwe le batho le go ela hloko tšeo a di bopilego, o ka kgona go lemoga ka kgonthe dika tša gagwe. (Baroma 1:20) Go oketša moo, ka go bala Lentšu la Modimo, o ka kwešiša gore ke ka baka la eng re phela, ke ka baka la eng Modimo a dumeletše tlaišego, le kamoo a tlago go fediša tlaišego ka gona, mohlomongwe seo se makatšago le go feta, le kamoo o ka phethago karolo e bohlokwa go seo Modimo a se dirago. (Jesaya 43:10; 1 Bakorinthe 3:9) Kwešišo e bjalo e ka go nea lebaka le lefsa la go phela!

Go Fetoga Motho yo Mokaone

Borapedi bja therešo ke selo se sebotse go wena ka gobane bo go thuša go fetoga motho yo mokaone. Ge o dutše o phetha borapedi bja therešo, o hlagolela semelo seo se dirago gore o be le ditswalano tše di thabišago le ba bangwe. O ithuta go Modimo le go Morwa wa gagwe mabapi le go dira dilo ka potego, go bolela ka botho le go phela bophelo bja go ba yo a ka botwago. (Baefeso 4:20–5:5) Ge o tseba Modimo gabotse moo o thomago go mo rata, o kwa o tutueletšega go mo ekiša. Beibele e re: “E-bang baekiši ba Modimo, le le bana ba ratwago, le tšwele pele le sepela leratong.”—Baefeso 5:1, 2.

Na go ka se thabiše go dikologwa ke batho bao ba ekišago lerato la Modimo? Ka mo go thabišago, borapedi bja Modimo wa therešo ga se tirelo yeo motho a swanetšego go e dira a nnoši. E go dira gore o kopane gotee le ba bangwe bao ba ratago  se se nepagetšego le se se lokilego. Goba gona, o ka ba le maikwelo a go se lokologe ge o nagana ka bodumedi bjo bo rulagantšwego. Lega go le bjalo, ka ge re bone sehlogong se se fetilego, bothata bja madumedi a mangwe ga se gore a rulagantšwe, eupša ke gore ga se a rulaganywa ka tsela e swanetšego le ka morero o swanetšego. Madumedi a mantši a rulaganyeditšwe go phetha merero yeo e sego ya Bokriste. Batho ba Modimo ba rulaganywa ke Jehofa ka noši bakeng sa morero o kgethegilego. Beibele e re: “Gobane Modimo ga se Modimo wa tlhakatlhakano eupša ke wa khutšo.” (1 Bakorinthe 14:33) Go swana le batho ba bangwe ba dimilione, le wena o ka hwetša gore go kopanela le sehlopha sa Bakriste ba rulagantšwego go ba le tutuetšo e kgahlišago tseleng yeo o lebelelago dilo ka yona.

Go ba le Kholofelo ka Bokamoso

Mangwalo a Makgethwa a bontšha gore Modimo o rulaganya barapedi ba therešo bakeng sa gore ba phologe bofelo bja tshepedišo ya bjale ya dilo le go abelwa lefase le lefsa moo ‘toko e tla agago gona.’ (2 Petro 3:13; Kutollo 7:9-17) Ka gona, borapedi bjo bobotse go wena bo go nea kholofelo ya bohlokwa e lebišago lethabong. Ba bangwe ba thea kholofelo ya bona ya bokamoso mebušong e tiilego, dibakeng tše di kgahlišago tša tša kgwebo goba kholofelong ya bophelo bjo bobotse le ditšheleteng tše di kgotsofatšago tša ge ba rola modiro. Eupša ke dilo tše sego kae feela ge e ba di le gona tšeo di theago motheo o tiilego wa go lebelela pele bokamosong bjo bo thabišago. Ka lehlakoreng le lengwe, moapostola Paulo o ngwadile gore: “Re beile kholofelo ya rena go Modimo yo a phelago.”—1 Timotheo 4:10.

Ge o ka dira nyakišišo e tseneletšego, o ka hwetša barapedi ba therešo. Lefaseng la lehono leo le aroganego, Dihlatse tša Jehofa di hlaolwa ka mo go kwagalago ke lerato le botee. Di tšwa mo e nyakilego go ba ditšhabeng ka moka le maemong ka moka; lega go le bjalo, di kopantšwe ke go ratana seng sa tšona le ke go rata Jehofa. (Johane 13:35) Di go laletša gore le wena o tle o ikwele ka bowena seo di se kwelego. Asafa o ngwadile gore: “Xe e le nna ke natefêlwa ke xo ba kxaufsi le Modimo.”—Psalme 73:28.

[Seswantšho go letlakala 7]

O ka ba mogwera wa Modimo