Lentšu la Jehofa le a Phela

Dintlha tše Kgolo go tšwa Pukung ya Bohlano ya Dipsalme

BAHUMI ba ka re: “Ké mo bana ba rena ba tl’o xo etša meré ya xo hlêkwa xe e mela, ’me barwedi ba rena ba tlo etša dikôkwane tše di setilwexo tša xo thêkxa nywakô ya boxoši. Nywakô ya rena ya matloló e tlo tlala . . . diruiwa tša rena di tlo tswala ka diketekete.” Go oketša moo, bahumi ba ka bolela gore: “Ké ôna mahlatse a sethšaba.” Lega go le bjalo, mopsalme o re: “Mahlatse [ke] a sethšaba seo Morêna e lexo Modimo wa sôna.” (Psalme 144:12-15) Go tla bjang gore go be le phapano e kgolo gakaakaa? Jehofa ke Modimo yo a thabilego, le gona lethabo ke kabelo ya bao ba mo rapelago. (1 Timotheo 1:11) Therešo ye e bewa molaleng karolong ya mafelelo ya dikopelo tše di buduletšwego ke Modimo, tše di akaretšago Dipsalme 107 go ya go 150.

Le gona puku ya bohlano ya Dipsalme e gatelela dika tša Jehofa tše di phagamego kudu, go akaretša le botho bja gagwe bjo lerato, therešo le bolo. Ge re tšwela pele re hwetša temogo ka semelo sa Modimo, re tla mo rata kudu le go mmoifa. Ka go rialo, se se a re thabiša. Ruri re hwetša molaetša wa bohlokwa ka Pukung ya Bohlano ya Dipsalme!—Baheberu 4:12.

GO THABA KA BAKA LA BOTHO BJO LERATO BJA JEHOFA

(Psalme 107:1–119:176)

Ge Bajuda bao ba bego ba le bothopša kua Babilona ba be ba boa, ba opetše ka gore: “Bôná-bao a ba leboxê Morêna botho le mehlôlô, a xo e dira xo bana ba batho.” (Psalme 107:8, 15, 21, 31) Ge Dafida a reta Modimo o re: “Botho bya xaxo bo feta maxodimo ka boxolo.” (Psalme 108:4) Košeng e latelago, o rapela ka gore: “Morêna Modimo wa-ka, a k’O nthušê, O nthlakodišê ka botho bya xaxo.” (Psalme 109:18, 19, 26) Psalme 110 ke boporofeta bja pušo ya Mesia. Psalme 111:10 e re: “Xo boifa Morêna ké mathômô a bohlale.” Go ya ka psalme e latelago, “wa lehlôxônôlô ké e a boifaxo Morêna.”—Psalme 112:1.

Dipsalme 113 go ya go 118 di bitšwa Dipsalme tša Tumišo, di bitšwa bjalo ka gobane di diriša gantši polelwana “Haleluya,” goba “Retang Jah!” Go ya ka Mishnah—puku ya lekgolong la boraro la nywaga yeo go yona go ngwadilwego mekgwa ya bogologolo ya polelo—dikopelo tše di be di opelwa ka Paseka le menyanyeng e meraro ya ngwaga le ngwaga ya Bajuda. Psalme 119, e lego psalme e telele go di feta ka moka le kgaolo e telele go di feta ka moka ka Beibeleng, e tumiša lentšu le le utolotšwego la Jehofa, goba molaetša.

Dipotšišo tša Mangwalo di a Arabja:

109:23—Dafida o be a bolela’ng ge a be a re: “Ke fêlêla byalo ka meriti xe e xonoxile”? Dafida o be a bolela ka tsela ya go reta gore o be a ikwa a le kgaufsi le go hwa.—Psalme 102:11.

110:1, 2—“Morêna [wa Dafida],” e lego Jesu Kriste, o be a dira’ng ge a be a dutše ka letsogong le letona la Modimo? Ka morago ga tsogo ya gagwe, Jesu o ile a rotogela legodimong gomme a leta ka letsogong le letona la Modimo go fihlela ka 1914 e le gore a thome go buša e le Kgoši. Ka nako yeo, Jesu o be a buša balatedi ba gagwe bao ba tloditšwego, a ba hlahla modirong wa bona wa boboledi le wa go dira barutiwa le go ba rulaganyetša go buša le  yena Mmušong wa gagwe.—Mateo 24:14; 28:18-20; Luka 22:28-30.

110:4—Ke’ng seo Jehofa a ilego a ‘ikana ka sona gomme a se itshole’? Keno ye ke kgwerano yeo Jehofa a e dirilego le Jesu Kriste ya go hlankela e le Kgoši le Moperisita yo a Phagamego.—Luka 22:29.

113:3—Leina la Jehofa le tla retwa ka tsela efe “xo tloxa Bohlabêla xo iša Bodikêla”? Se se akaretša se se fetago sehlopha sa batho bao ba rapelago Modimo letšatši le letšatši. Ge letšatši le hlaba ka bohlabela le ge le sobela ka bodikela, mahlasedi a lona a bonega lefase ka bophara. Ka mo go swanago, Jehofa o swanetše go retwa lefaseng ka bophara. Se se ka se ke sa dirwa ntle le maiteko ao a rulagantšwego. Re le Dihlatse tša Jehofa, re na le tokelo e kgolo ya go reta Modimo le go tšea karolo ka mafolofolo modirong wa go tsebatša ka Mmušo.

116:15—Ke bjang ‘lehu la babotegi e lego la bohlokwa mahlong a Jehofa’? Barapedi ba Jehofa ke ba bohlokwa kudu go yena mo a lebelelago lehu la bona bjalo ka sehlopha e le tahlegelo e kgolo kudu yeo a ka se kego a e dumelela. Ge Jehofa a be a ka dumelela gore seo se direge, go be go tla bonagala eka manaba a gagwe a matla kudu go mo feta. Go oketša moo, go be go ka se šale motho lefaseng bakeng sa go thea lefase le lefsa.

119:71—Go tlaišwa go ka ba le mehola efe? Mathata a ka re ruta go ithekga ka Jehofa ka botlalo, go mo rapela ka go tšwa pelong le go ithuta Beibele ka phišego e kgolo gotee le go diriša seo e se bolelago. Go oketša moo, tsela yeo re arabelago ka yona ge re tlaišwa e ka utolla mafokodi ao a ka nyakago go phošollwa. Tlaišo e ka se ke ya re kgopiša ge e ba re e dumelela gore e re hlwekiše.

119:96—Ke’ng seo se bolelwago ke “bofêlô bya tšohle tše di phethexilexo”? Mopsalme o bolela ka phethego go ya ka pono ya batho. Mohlomongwe o be a naganne ka gore go phethagala ga batho go lekanyeditšwe. Ka mo go fapanego, molao wa Modimo ga se wa lekanyetšwa. Tlhahlo ya wona e šoma dibopegong ka moka tša bophelo.

119:164—Go reta Modimo “xa-šupa ka ’tšatši” go bontšha’ng? Gantši palo ya šupa e bontšha mafelelo. Ka baka leo, mopsalme o bolela gore Jehofa o swanelwa ke theto ka moka.

Seo re Ithutago Sona:

107:27-31. Bohlale bja lefase bo tla “hlôbôxa” goba go gakanega ge Haramagedone e fihla. (Kutollo 16:14, 16) Bo ka se ke bja šireletša motho phedišong. Ke feela bao ba ithekgago ka phološo ya Jehofa bao ba tlago go phelela go ‘mo leboga ka baka la botho bja gagwe.’

109:30, 31; 110:5. Gantši tšhoša yeo e hwidinywago ka letsogong le letona la mohlabani e ba e se na sephemo, seo se bago se swerwe ka letsogo le letshadi. Ka tsela ya seswantšhetšo, Jehofa o ‘eme ka seatleng se setona’ sa bahlanka ba gagwe, gore a ba lwele. Ka go rialo, o a ba šireletša le go ba thuša—ke lebaka le lebotse leo le dirago gore re ‘mo leboge kudu’!

113:4-9. Jehofa ke yo a phagamego kudu mo a ‘ukamelago magodimo.’ Lega go le bjalo, o kwela mmotlana bohloko, modiidi le mosadi wa moopa. Morena yo a Phagamego Jehofa o ikokobeditše le gona o nyaka gore barapedi ba gagwe le bona ba be bjalo.—Jakobo 4:6.

114:3-7. Go ithuta ka mediro e mebotse yeo Jehofa a e diretšego batho ba gagwe kua Lewatleng le Lehwibidu, Nokeng ya Jorodane le Thabeng ya Sinai go swanetše go re kgoma ka mo go tseneletšego. Batho, bao ba emelwago ke “lefase,” ba swanetše go makatšwa—ba ‘roromele’ ka tsela ya seswantšhetšo—ka baka la Morena.

119:97-101. Go hwetša bohlale, temogo le kwešišo go tšwa Lentšung la Modimo go re šireletša kotsing ya moya.

119:105. Lentšu la Modimo ke seetša dinaong tša rena ka kgopolo ya gore le re thuša go lebeletšana le mathata a rena a gona bjale. Le gona ka tsela ya seswantšhetšo, le bonega tsela ya rena, ka ge le bolela e sa le pele ka morero wa Modimo mabapi le bokamoso.

GO THABA GO SA ŠETŠWE MATHATA

(Psalme 120:1–145:21)

Re ka lebeletšana bjang le maemo ao a hlohlago gomme ra phema mathata? Dipsalme 120 go  ya go 134 di re nea karabo e kwagalago potšišong ye. Re phologa mathata le go dula re thabile ka go lebelela go Jehofa gore a re thuše. Dipsalme tše, tšeo di bitšwago Dikopelo tša Thotogelo, mohlomongwe di be di opelwa ke Baisiraele bao ba bego ba le leetong la go ya Jerusalema go yo bina monyanya wa bona wa ngwaga le ngwaga.

Dipsalme 135 le 136 di bolela ka Jehofa e le Modiri wa selo le ge e le sefe seo se mo thabišago, gomme o fapane kudu le medimo ya diswantšho yeo e se nago mohola. Psalme ya bo-136 e hlametšwe gore e opelwe ka bokgwari, karolo ya mafelelo ya temana e nngwe le e nngwe e opelwa e le ge go arabelwa karolo ya pele. Psalme e latelago e laodiša boemo bja go kwa pelo bohloko ga Bajuda ba bego ba le Babilona bao ba bego ba nyaka go rapela Jehofa kua Tsione. Dipsalme 138 go ya go 145 ke tša Dafida. O nyaka go ‘leboga Jehofa ka pelo ya gagwe ka moka.’ Ka baka la’ng? O re: “Ke a Xo leboxa x’O mpopile wa matete-tete.” (Psalme 138:1; 139:14) Dipsalmeng tše hlano tše di latelago, Dafida o rapelela gore a šireletšwe go banna ba babe, gore a kgalemelwe ka toka, gore a phološwe go batlaiši le gore a hlahlwe mabapi le kamoo a swanetšego go itshwara ka gona. O gatelela lethabo la batho ba Jehofa. (Psalme 144:15) Ka morago ga go hlahloba bogolo bja Modimo le botho bja gagwe, Dafida o tsebatša gore: “Molomo wa-ka a o bolêlê thêtô ya Morêna, nama yohle a e rêtê ’ina le lekxêthwa l’axwe ka mehla le mehleng ya neng le neng.”—Psalme 145:21.

Dipotšišo tša Mangwalo di a Arabja:

122:3—Ke bjang Jerusalema e bego e le motse wa “mabothêlêlê”? Go etša ge go be go le bjalo ka metse ya mehleng ya bogologolo, dintlo tša Jerusalema di be di agwa di batamelane. Motse wo o be o kitlane gomme ka go rialo go be go le bonolo go o šireletša. Go oketša moo, go batamelana ga dintlo go be go dira gore badudi ba motseng ba thekgane e le gore ba thušane le go šireletšana. Se se bontšha botee bja moya bjoo meloko e 12 ya Isiraele e bego e e-na le bjona ge e be e kopana bakeng sa borapedi.

123:2—Morero wa seswantšho sa mahlo a bahlanka ke ofe? Bahlanka ba banna le ba basadi ba lebelela letsogo la mong wa bona wa monna goba wa mosadi ka mabaka a mabedi: go lemoga dikganyogo tša gagwe le go hwetša tšhireletšego le dilo tše di nyakegago bophelong. Ka mo go swanago, re lebelela go Jehofa e le gore re lemoge thato ya gagwe le gore re amogelwe ke yena.

131:1-3—Dafida o ile a ‘fepeletša le go homotša moya wa gagwe bjang bjalo ka ngwana yo a tshwešwago ke mmagwe’? Go etša ge ngwana yo a tshwešwago a ithuta go hwetša matla le kgotsofalo matsogong a mmagwe, Dafida o ile a ithuta go fepeletša le go homotša moya wa gagwe “byalo ka ngwana-mothswešwa.” Bjang? Ka go se be le boikgogomošo le mahlo-maikgantšhi le ka go se kitimiše dilo tšeo e bego e le tše dikgolo kudu go yena. Go e na le go nyaka botumo, gantši Dafida o be a lemoga mafokodi a gagwe gomme a bontšha boikokobetšo. Re ba bohlale ge re ekiša tsela ya gagwe ya go nagana, kudu-kudu ge re katanela go fihlelela ditokelo ka phuthegong.

Seo re Ithutago Sona:

120:1, 2, 6, 7. Polelo ya go thomeletša le e hlabago e ka baka kgateletšo e kgolo go ba bangwe. Go laola leleme la rena ke tsela e nngwe ya go bontšha gore re ‘ba leago,’ goba khutšo.

120:3, 4. Ge e ba re swanetše go kgotlelela motho yo a  nago le “leleme la xo fora,” re tla homotšwa ke go tseba gore Jehofa o tla lokiša ditaba ka nako ya gagwe e swanetšego. Bathomeletši ba tla ba kotsing diatleng tša “moxale.” Ruri ba tla lebeletšana le kahlolo ya Jehofa ya mollo yeo e swantšhetšwago ke “maxala a hlennexo a madixá.”

127:1, 2. Medirong ya rena ka moka, re swanetše go lebelela go Jehofa e le gore a re hlahle.

133:1-3. Botee bja batho ba Jehofa bo a homotša, bo a aga e bile bo a lapološa. Ga se ra swanela go bo senya ka go ba bao ba swayago diphošo, bao ba tsošago diphapano goba bao ba nago le dipelaelo.

137:1, 5, 6. Barapedi ba Jehofa bao ba bego ba le bothopša ba ile ba ikwa ba rata Tsione, yeo e bego e emela mokgatlo wa Modimo. Go thwe’ng ka rena? Na ka potego re kgomaretše mokgatlo wo Jehofa a o dirišago lehono?

138:2. ‘Jehofa o godišitše leina la gagwe la fetiša tšohle, la fetiša le tše a di boletšego’ ka kgopolo ya gore go phethagatšwa ga dilo ka moka tšeo a di holofeditšego ka leina la gagwe go tla feta kgole dilo le ge e le dife tšeo re ka bago re di letetše. Ruri re letetše dilo tše di kgahlišago.

139:1-6, 15, 16. Jehofa o tseba mediro ya rena, menagano ya rena le mantšu a rena gaešita le pele ga ge re ka a bolela. O re tseba go tloga ge re sešo ra bopega, pele ga ge setho se sengwe le se sengwe sa mmele se ka bonala. Re ‘palelwa’ ke go kwešiša tsela yeo Modimo a re tsebago ka yona re le batho. Ruri go a kgothatša go tseba gore Jehofa ga a fo bona boemo bjo bo re lekago bjo re ka bago re lebeletšane le bjona, eupša gape o kgona go kwešiša mafelelo ao bo ka bago le ona go rena!

139:7-12. Ga go na lefelo leo re ka yago go lona leo le lego kgole kudu gore Modimo a ka palelwa ke go fihla go lona gomme a re matlafatša.

139:17, 18. Na re thabela go tseba Jehofa? (Diema 2:10) Ge e ba go le bjalo, re hweditše mothopo o sa felego wa lethabo. Dikgopolo tša Jehofa “di feta mohlaba xo ata.” Go tla dula go e-na le mo gontši mo re ka ithutago gona ka yena.

139:23, 24. Re swanetše go nyaka gore Jehofa a hlahlobe maikemišetšo a rena a ka gare-gare go bona ge e ba go e-na le “tsela e mpe”—dikgopolo tše di sa swanelago, dikganyogo le ditshekamelo—le go re thuša go di fediša.

143:4-7. Re ka kgotlelela bjang gaešita le mathata a šoro? Mopsalme o re nea senotlelo: Re naganišišeng ka mediro ya Jehofa, re dule re kgomegile ka ditiro tša gagwe gomme re mo rapele gore a re thuše.

‘Retang Jah, Lena Batho!’

E nngwe le e nngwe ya dikarolo tše nne tša dipsalme e felela ka polelwana ya go reta Jehofa. (Psalme 41:13; 72:19, 20; 89:52; 106:48) Go bjalo le ka karolo ya mafelelo. Psalme 150:6 e re: “Tšohle tše di bušaxo môya di rêtê Morêna. Haleluya!” Seo se tla direga e le ruri lefaseng le lefsa la Modimo.

Ge re dutše re lebeletše pele nakong yeo ya lethabo, re na le lebaka le le kwagalago la go tagafatša Modimo wa therešo le go reta leina la gagwe. Ge re nagana ka lethabo leo re bago le lona ka baka la ge re tseba Jehofa le go thabela tswalano e botse le yena, na ga re tutueletšege go mo reta ka dipelo tše di lebogago?

[Seswantšho go letlakala 15]

Mediro ya Jehofa e makatšago e a kgahliša

[Seswantšho go letlakala 16]

Dikgopolo tša Jehofa “di feta mohlaba xo ata”