Ge yo o mo Ratago a Tlogela Jehofa

MARK le Louise ke Dihlatse tša Jehofa. * Ka lerato le ka tlhokomelo, ba rutile bana ba bona Mangwalo, ka ge Beibele e kgothaletša batswadi ba Bakriste go dira bjalo. (Diema 22:6; 2 Timotheo 3:15) Ka manyami, ga se bana ba bona ka moka bao ba ilego ba tšwela pele ba hlankela Jehofa ge ba gola. Louise o re: “Ke kwela bana bao ba timetšego bohloko. Ke bjang nka itirago tše e kego ga ke kwe bohloko letšatši le letšatši? Ge ba bangwe ba bolela ka barwa ba bona, ke kwa bohloko gomme ke thiba megokgo.”

Ee, ge motho a kgetha go tlogela Jehofa le tsela ya bophelo yeo e hwetšwago ka Mangwalong, ditho tša lapa tšeo di botegago di kwa bohloko. Irene o re: “Ke rata mogol’a-ka kudu. Nka dira selo le ge e le sefe gore ke mmone a boetše go Jehofa!” Maria yoo kgaetšedi’agwe a hlanogetšego Jehofa e le gore a tšwele pele ka boitshwaro bjo bo gobogilego o re: “Ke be ke dutše ke thatafalelwa ke go kgotlelela se ka gobane dikarolong tše dingwe ka moka, e be e dutše e le mogol’a-ka yo mo kaone. Ke mo gopola kudu-kudu ge ke le dipokanong tše dikgolo tša lapa.”

Ke ka Baka La’ng go le Thata Gakaakaa?

Ke ka baka la’ng go lahlegelwa ke ngwana moyeng goba yo mongwe yo o mo ratago go gateletša ba leloko ba Bakriste gakaakaa? Ka gobane ba a tseba gore Mangwalo a holofetša bao ba dulago ba botegela Jehofa ka go se kwanantšhe bophelo bjo bo sa felego lefaseng la paradeise. (Psalme 37:29; 2 Petro 3:13; Kutollo 21:3-5) Ba lebelela pele go thabela ditšhegofatšo tše le balekane ba bona, bana, batswadi, bana ba gabo bona gotee le ditlogolo tša bona. Ruri ba kwešwa bohloko ke go nagana gore baratiwa ba bona bao ba tlogetšego go hlankela Jehofa ba ka no se hwetše ditšhegofatšo tše! Gaešita le bophelong bja bona bja gona bjale, Bakriste ba kwešiša gore melao ya Jehofa le melao ya gagwe ya motheo e a ba hola. Ka gona, Bakriste ba kwa bohloko go bona baratiwa ba bona ba bjala ka tsela yeo mola e le gore seo ba tla se bunago ke bohloko.—Jesaya 48:17, 18; Bagalatia 6:7, 8.

 Go ka ba thata go motho yo a sa kago a ba maemong a bjalo go lemoga kamoo maemo ao a ka senyago motho ka gona. Mo e nyakilego go ba dikarolo ka moka tša bophelo di a kgomega. Louise o re: “Go ba thata le go feta ge ke le dibokeng tša Bokriste gomme ke bona batswadi ba sega le go bolela le bana ba bona. Tiragalo le ge e le efe e thabišago e bipša ke go nyama ka baka la bao ba sego gona.” Mogolo yo mongwe wa Mokriste o gopola nywaga e mene yeo ka yona morwedi wa mosadi wa gagwe a bego a sa hlwe a kopanela le bona. O re: “Gantši le dinako tše di thabišago di be di e-ba thata. Ge ke be nka nea mosadi wa-ka mpho goba mafelo-bekeng a mangwe ra ya lefelong le lengwe la go thabiša, o be a ka lla ge a gopola gore morwedi wa gagwe o be a se a thaba le rena.”

Na Bakriste ba bjalo ba tšewa ke maikwelo? Ga se gore go bjalo. Ge e le gabotse, ba ka ba ba bontšha dika tša Jehofa go fihla bokgoleng bjo itšego, yoo motho a bopilwego ka seswantšho sa gagwe. (Genesi 1:26, 27) Se se ra gore’ng? Go ba gona, Jehofa o ile a ikwa bjang ge batho ba gagwe ba Isiraele ba rabela kgahlanong le yena? Go Psalme 78:38-41, re kwa gore Jehofa o ile a kwa bohloko. Lega go le bjalo, ka go se fele pelo o ile a ba nea temošo le go ba laya, a ba lebalela nako le nako ge ba bontšha go itshola. Go molaleng gore Jehofa o kwa a na le tswalano le dibopiwa tša gagwe, ‘dibopša tša diatla tša gagwe’ gomme ga a fo di lahla gabonolo. (Jobo 14:15; Jona 4:10, 11) O ile a nea batho bokgoni bja go ba le ditswalano tše di swanago tša potego e sa kwanantšhego gomme ditswalano tša ditho tša  lapa di ka tia. Ka gona ga go makatše gore batho ba kwa bohloko ge ba lahlegelwa moyeng ke wa leloko yo a rategago.

Ka kgonthe, go lahlegelwa moyeng ke wa leloko yo o mo ratago go gare ga diteko tše thata tšeo di welago barapedi ba therešo. (Ditiro 14:22) Jesu o itše go amogela molaetša wa gagwe go be go tla aroganya malapa a mangwe. (Mateo 10:34-38) Se ga se direge ka gobane molaetša wa Beibele ka bowona o dira gore malapa a arogane. Go e na le moo, ditho tša lapa tše di sa dumelego goba tše di sa botegego di baka dikarogano ka go gana, go lahla goba gaešita le go ganetša tsela ya Bokriste. Lega go le bjalo, re ka leboga gore Jehofa ga a tlogele batho ba gagwe bao ba botegago ba se na tsela ya go lebeletšana le diteko tšeo di ba welago. Ge e ba gona bjale o nyamile ka baka la go lahlegelwa ke yo o mo ratago moyeng, ke melao efe ya motheo ya Beibele yeo e ka go thušago go kgotlelela bohloko bjoo o bo kwago le go hwetša tekanyo e itšego ya lethabo le kgotsofalo?

Go Kgotlelela

“Ka go ikaga . . . , itoteng leratong la Modimo.” (Juda 20, 21) Go ithekgile ka maemo a gago a itšego, e ka ba e le gore ga go seo o ka se dirago mo nakong ye go ka thuša wa leloko yo a kgaoditšego go hlankela Jehofa. Lega go le bjalo, o ka kgona e bile o swanetše go ikaga gotee le go aga le ge e le ofe wa ba leloko yo a sa dutšego a botega. Veronica, yo barwa ba gagwe ba babedi go ba bararo ba ilego ba tlogela therešo, o re: “Nna le monna wa-ka re ile ra gopotšwa gore ge e ba re dula re le matla moyeng, re tla ba boemong bjo bobotse bja go amogela barwa ba rena gape letšatši leo ba hlaphogelwago. Morwa wa lehlaswa nkabe a le kae ge nkabe tatagwe a be a se boemong bjo bobotse bja go mo amogela gape?”

Gore o dule o matlafetše, swarega ka mediro ya moya. Se se tla akaretša go dula o na le lenaneo la go bala Beibele ka mo go tseneletšego gotee le go ba gona dibokeng tša Bokriste. E-ba yo a hwetšagalago go thuša ba bangwe ka phuthegong go fihla bokgoleng bjoo maemo a gago a go dumelelago. Ke therešo gore o ka thoma ka go thatafalelwa ke mediro e bjalo. Veronica o gopola gore: “Ke ile ka thoma ka go ikwa ke nyaka go ikarola bjalo ka phoofolo yeo e gobetšego. Eupša monna wa-ka o ile a gapeletša gore re swanetše go dula re e-na le lenaneo la mediro ya moya. O ile a kgonthišetša gore re ya dibokeng. Ge e be e le nako ya go ya kopanong ya selete, ke be ke tloga ke nyaka sebete sa go yo kopana le batho. Lega go le bjalo, lenaneo le be le re batametša kgaufsi le Jehofa. Morwa wa rena yo a bego a dutše a botega o ile a kgothatšwa ke kopano yeo ya selete.”

Maria, yo go boletšwego ka yena pejana, o bona go hola go dula a swaregile tirelong ya tšhemo gomme gona bjale o thuša batho ba bane go ithuta Beibele. Ka mo go swanago, Laura o re: “Le ge ke sa dutše ke lla letšatši le letšatši, ke leboga Jehofa gore gaešita le ge ke se ka atlega go godišeng bana bjalo ka batswadi ba bangwe, ke na le molaetša o phethagetšego wa Beibele, woo o kgonago go thuša malapa mehleng ye ya bofelo.” Ken le Eleanor, bao bana ba bona ba godilego ba tlogetšego phuthego, ba ile ba lokiša maemo a bona gore ba ye moo go nago le tlhokagalo e kgolo ya bagoeledi ba Mmušo gomme ba tsenela bodiredi bja nako e tletšego. Se se ile sa ba thuša go lebelela dilo ka leihlo le lebotse gwa ba gwa ba thuša go phema go metšwa ke go nyama.

 O se ke wa felelwa ke kholofelo. Lerato le “holofela tšohle.” (1 Bakorinthe 13:7) Ken, yoo go boletšwego ka yena ka mo godimo, o re: “Ge bana ba rena ba be ba tlogela tsela ya therešo, ke ile ka nagana gore go be go le bjalo ka ge eka ke lehu la bona. Eupša ka morago ga lehu la kgaetšedi ya-ka, pono ya-ka e ile ya fetoga. Ke leboga gore bana ba-ka ga se ba hwa lehu la kgonthe le gore Jehofa o tšwela pele a ba buletše tsela ya gore ba boele go yena.” Ka kgonthe, go lemogilwe gore ba bantši bao ba ilego ba tlogela therešo ba ile ba boa mafelelong.—Luka 15:11-24.

O se ke wa ipea molato. Batswadi kudu-kudu ke bona ba bago le mokgwa wa go lebelela morago gomme ba itshole gore ga se ba ka ba swaragana le maemo a mangwe ka tsela e kaone. Lega go le bjalo, ntlha ya motheo yeo e fetišwago go Hesekiele 18:20 ke ya gore Jehofa o bona modiri wa sebe molato bakeng sa kgetho ya gagwe e fošagetšego, e sego batswadi wa gagwe. Ka mo go kgahlišago, le ge puku ya Diema e bolela gantši ka tshwanelo ya batswadi ya go godiša bana ka tsela e nepagetšego, e rwele keletšo e fetago yeo ka makga a mane ya gore bana ba theetše le go kwa batswadi ba bona. Ee, bana ba na le boikarabelo bja go arabela tlwaetšong e theilwego Beibeleng ya batswadi ba bona bao ba sego ba phethagala. Mohlomongwe o swaragane le maemo gabotse go fo swana le kamoo o bego o tla dira ka gona ka nako yeo. Lega go le bjalo, le ge e le gore o bona o dirile diphošo tše itšego le gore tše ruri e be e le diphošo tša gago, seo ga se re gore diphošo tša gago ke tšona di dirilego gore moratiwa wa gago a tlogele therešo. Boemong le ge e le bofe, go dulela go hlwa re re “nkabe” ga go thuše selo. Ithute diphošong tša gago, katanela go se di boeletše gomme o rapele Jehofa gore a go lebalele. (Psalme 103:8-14; Jesaya 55:7) Ke moka o lebelele go tša nakong e tlago, e sego go tšeo di fetilego.

O se ke wa felela ba bangwe pelo. Ba bangwe ba ka thatafalelwa ke go tseba gore ge e le gabotse ba ka go kgothatša goba go go homotša bjang, kudu-kudu ge e ba ba se ba ka ba ba le phihlelo e swanago. Ka ntle le moo, batho ga ba swane mabapi le seo ba se bonago se kgothatša goba se homotša. Ka gona ge ba bangwe ba bolela dilo tšeo di go kgopišago, diriša keletšo ya moapostola Paulo yeo e hwetšwago go Bakolose 3:13 e rego: “Tšwelang pele le kgotlelelana gomme le lebalelana ka bolokologi ge e ba motho a e-na le lebaka la go ba le pelaelo ka yo mongwe.”

Hlompha tokišetšo ya Jehofa ya tayo. Ge e ba ba leloko la geno ba hweditše tayo e tšwago phuthegong, gopola gore ye ke karolo ya tokišetšo ya Jehofa gomme ke bakeng sa go hola bohle, go akaretša le modiri wa sebe. (Baheberu 12:11) Ka gona, lwantšha tshekamelo le ge e le efe ya go ntšha bagolo diphošo bao ba bego ba akaretšwa goba diphetho tšeo ba di dirilego. Gopola gore mafelelo a mabotse a tlišwa ke go dira dilo ka tsela ya Jehofa, mola e le gore go lwantšha dithulaganyo tša Jehofa go ka fo feleletša ka kgateletšego e oketšegilego.

Ka morago ga go phološwa ga Baisiraele kua Egipita, Moše o be a šoma bjalo ka moahlodi ka mehla. (Ekisodo 18:13-16) Ka ge kahlolo yeo e dirwago ka go kgahla yo mongwe e tla ba kgahlanong le yo mongwe, ga go pelaelo gore ba bangwe ba be ba nyamišwa ke diphetho tša Moše. Go ntšha dikahlolo tša Moše diphošo mohlomongwe maemong a mangwe go ile gwa lebiša borabeleng malebana le bolaodi bja gagwe. Lega go le bjalo, Jehofa o be a diriša Moše go etelela batho ba Gagwe pele e bile O ile a ba otla, e sego Moše, eupša marabele gotee le malapa a ona ao a bego a a thekga. (Numeri 16:31-35) Re ka ithuta go se ka go katanela go itshola  gotee le go dirišana le diphetho tšeo di dirilwego ke bao lehono ba nago le matla a taolo ya pušo ya Modimo.

Mabapi le se, Delores o gopola kamoo go bego go mo thatafalela ka gona go dula a na le pono e leka-lekanego ge morwedi’agwe a be a kgalemetšwe ke phuthego. O re: “Seo se ilego sa nthuša ke go dula ke bala dihlogo tšeo di bego di bolela ka go leka-lekana ga dithulaganyo tša Jehofa. Ke ile ka itirela puku e kgethegilego ya go ngwalela dintlha tša dipolelo gotee le dihlogo tšeo di bego di tla nthuša go kgotlelela le go tšwela pele.” Se se lebiša tseleng e nngwe ya bohlokwa ya go kgotlelela.

Tšholla sa mafahleng a gago. O ka thušwa ke go botša o tee goba ba babedi ba bagwera ba gago bao ba kwešišago bao o ba botago. Ka go rialo, kgetha bagwera bao ba tlago go go thuša go dula o na le boemo bjo bo nepagetšego bja kgopolo. Go ‘tšhollela Jehofa pelo ya gago’ ka thapelo e tla ba mo go holago kudu. * (Psalme 62:7, 8) Ka baka la’ng? Ka gobane o kwešiša go tsenelela ga maikwelo a gago. Ka mohlala, o ka nagana gore ga se gwa swanela gore o welwe ke manyami a bjalo. Go oketša moo, ga se wa tlogela Jehofa. Tšhollela Jehofa sa mafahleng a gago gomme o mo kgopele gore a go thuše go lebelela boemo ka tsela e sa kwešego bohloko.—Psalme 37:5.

Ge nako e dutše e e-ya, gantši o tla kgona go laola maikwelo a gago gakaone. Go sa le bjalo, o se ke wa fela matla maitekong a gago a go kgahliša Tatago wa legodimong e bile o se tsoge o naganne gore maiteko a ke a lefeela. (Bagalatia 6:9) Gopola gore le ge re be re ka tlogela Jehofa, re be re sa tlo no ba le mathata. Ka lehlakoreng le lengwe, ka go dula re mmotegela ka go se kwanantšhe, o tla re thuša mathateng ao re lebeletšanago le ona. Ka gona, kgonthišega gore Jehofa o tšeela bogolo bja boemo bja gago godimo gomme o tla tšwela pele a go fa matla ao a nyakegago ka nako e swanetšego.—2 Bakorinthe 4:7; Bafilipi 4:13; Baheberu 4:16.

[Mengwalo ya ka tlase]

[Lepokisi go letlakala 19]

Kamoo o ka Swaraganago le Boemo

◆ “Ka go ikaga tumelong . . . , itoteng leratong la Modimo.”—Juda 20, 21.

◆ O se ke wa itlhoboga.—1 Bakorinthe 13:7.

◆ Phema go ipona molato.—Hesekiele 18:20.

◆ O se ke wa felela ba bangwe pelo.—Bakolose 3:13.

◆ Hlompha thulaganyo ya tayo ya Jehofa.—Baheberu 12:11.

◆ Bontšha maikwelo a gago.—Psalme 62:7, 8.

[Lepokisi/Seswantšho go letlakala 21]

Na o Tlogetše Jehofa

Ge e ba go bjalo, ka lebaka le ge e le lefe, tswalano ya gago le Jehofa gotee le tebelelo ya gago ya ka mo go sa felego di kotsing. Mohlomongwe o ikemišeditše go boela go Jehofa. Na o phegelela seo gona bjale? Goba na o se šuthišetša go fihla go seo go thwego ke nako e swanetšego? Gopola gore Haramagedone e kgaufsi kudu. Go oketša moo, bophelo tshepedišong ye ke bjo bokopana e bile ga se bja kgonthišega. O ka se kgone go tseba gore o tla ba o phela gosasa goba aowa. (Psalme 102:3; Jakobo 4:13, 14) Monna yo mongwe yo go utollotšwego gore o na le bolwetši bjo bo bolayago o itše: “Bolwetši bjo bo nkhweditše ke hlankela Jehofa ka nako e tletšego, ke se na khupamarama le ge e ka ba efe. Gomme ao ke maikwelo a mabotse ao motho a ka bago le ona gona bjale.” Lega go le bjalo, nagana gore o be a tla ikwa bjang ge nkabe bolwetši bja gagwe bo mo wetše a sa re: “Ka letšatši le lengwe, ke tla boela go Jehofa!” Ge e le gore o tlogetše Jehofa, gona bjale ke nako e kaone-kaone ya go boela go yena.

[Diswantšho go letlakala 18]

Go dula o swaregile ka mediro ya moya go ka go thuša go dula o na le boemo bjo bo nepagetšego bja kgopolo