“Ka Baka la Mošemane wa Nywaga e Senyane”
“Ka Baka la Mošemane wa Nywaga e Senyane”
KA MEHLA ge Dihlatse tša Jehofa di e-tla ga gagwe, Wiesława yo a dulago ka borwa bja Poland, o be a leboga gomme a di kgopela ka botho gore di sepele. Ka letšatši le lengwe, Samuel wa nywaga e senyane o ile a tla ga gagwe a e-na le mmagwe. Wiesława o ile a phetha ka gore lebakeng le o tla theetša molaetša gomme a amogela le makasine wo o bolelago ka paradeise ya lefaseng.
Ka ge Segopotšo sa lehu la Jesu Kriste se be se batamela, Samuel o be a nyaka go laletša Wiesława tiragalong ye ya bohlokwa. Ka gona, a felegetšwa ke mmagwe, mošemane yo o ile a mo etela gape, lebakeng le a mo tlišeditše taletšo ye e gatišitšwego. Ge a bona gore mošemane yo o be a apere gabotse, Wiesława o ile a kgopela tshwarelo ganyenyane gomme a ya go apara gabotse. Ge a boa, o ile a theetša molaetša wa Samuel ke moka a amogela taletšo gomme a botšiša gore: “Na nka tla ke nnoši goba ke tle le monna wa-ka?” A oketša ka gore: “Le ge monna wa-ka a ka se tle, nna ke tla tla. Se ke se direla wena, Samuel.” Samuel o ile a thabišwa ke ge mosadi yo a be a fihla.
Nakong ya polelo ya Segopotšo, Samuel o ile a dula kgaufsi le Wiesława gomme a mmontšha mangwalo ao a bego a ahla-ahlwa. Se se ile sa tlaba Wiesława. Wiesława o ile a thabela Segopotšo le go leboga ditlhaloso tše di kwagalago tšeo di bego di hlaloswa gabonolo. O ile a kgahlwa ke kamogelo e borutho yeo a e hweditšego le botho bjo phuthego e mmontšhitšego bjona. Go tloga ka nako yeo, Wiesława o ile a bontšha kgahlego e oketšegilego dilong tša moya gomme a thoma go kopanela ka mehla le Dihlatse tša Jehofa. Morago bjale o itše: “Ke lewa ke dihlong ka gore ke be ke sa le theetše ge le be le e-tla ga-ka. Ke swanetše go dumela gore ke theeditše molaetša wa lena ka baka la mošemane wa nywaga e senyane, ka baka la Samuel.”
Ka go swana le Samuel wa kua Poland, bafsa ba bantši ba Dihlatse tša Jehofa ba reta Modimo ka mantšu le ka tlhompho le boitshwaro bja bona bjo bobotse. Ge e ba o le mofsa, le wena o ka kgona go thuša batho ba ba botegago gore ba leboge dilo tša moya.